KINIKIN 3
Kinásen Letip—Lupwen mi Wor Popun Sia “Chou Ngeni Eman”
“Emén pwii lón mwichefel a tipimwáál ngeniei pwe ua soláái néún moni. Ekkóch chón ewe mwichefel ra rongorong pwóróusem, iwe ekkóch ra peniei nge ekkóch ra peni neminna. Nge mwirin och fansoun, neminna a ereniei pwe a kerán silei och pwóróus mi ánnetatá pwe ese wor tipisi. Inaamwo ika a omusomus ngeniei, nge me lón letipei usap tongeni omusaaló, pún ua mmen riáfféú ren.”—Linda.
KA WEWEITI meefien Linda, ewe a fókkun metek letipan ren met pwiin we chón lúkú a féri? Mi elichippúng, pún ekkóch a apwangapwangoló ar riri ngeni Kot pokiten ra fókkun letipengaw ren met pwiir kewe chón lúkú ra ffér ngeniir. Ina met a pwal fis ngonuk?
Emén mi Tongeni “Aimwüfesenikich Seni än Kot we Chen”?
Pwúngún pwe epwe tongeni weires ngenikich ach sipwe omusaaló tipisin pwiich kewe chón lúkú mi fen ámeteki letipach. Pún itá úrúrún, Chón Kraist repwe tongefengeniir. (Johannes 13:34, 35) Ika emén pwiim chón lúkú a tipis ngonuk, ka tongeni meefi watteen riáfféú ren óm lichippúng me metekin letipom.—Kölfel 55:12, 13.
Nge, ewe Paipel a apasa pwe epwe wor atun ‘eman epwe chou ngeni eman’ lón ewe mwichefelin Chón Kraist. (Kolose 3:13) Inaamwo ika sia silei ena, nge lupwen a fis ngenikich pwisin, a tongeni weires ach sipwe silei met sipwe féri. Mei wor och mettóch a tongeni álisikich? Sipwe ppii ekkeei úlúngát kapasen emmwen lón Paipel:
Semach we lón láng a silei mettóch meinisin. Jiowa a kúna meinisin minne a fiffis, kapachelong ach riáfféú ren och pwúngúngaw a fis ngenikich. (Ipru 4:13) Pwal och, i a pwal meefi weires lupwen sia kúna riáfféú. (Soukapwüng 10:16) Jiowa esap mut ngeni “osukosuk, are weires” are pwal och mettóch, pwal mwo nge emén néún chón angang, an epwe “aimwüfesenikich seni än Kot we chen.” (Rom 8:35, 38, 39) Ika Jiowa a ina usun, iwe sisap pwal mut ngeni och mettóch are emén aramas an epwe áimufesenikich me Jiowa.
Ach omusaaló tipis esap weween pwe sia tipeeú ngeni tipis. Lupwen sia omusaaló chókkewe ra tipis ngenikich, esap weween pwe sia fen ekisikisaaló choun, tipeeú ngeni, are ekieki pwe ese wor ngawen met ra féri ngenikich. Chechchemeni pwe Jiowa esap fókkun tipeeú ngeni tipis, nge i a omusaaló tipisin emén ika a enletin aier. (Kölfel 103:12, 13; Apakuk 1:13) Jiowa a mochen ach sipwe áppirú i lupwen a pesekich le omusaaló tipisin ekkewe ekkóch. I ese “amwöchü an song tori feilfeilachök.”—Kölfel 103:9; Mateus 6:14.
Lupwen sia likitaló ach song, sia pwal feiéch. Ifa usun? Ekieki ei kapas áwewe. Ka angei eféú faú eli fite paun choun, ka amwéchú me eitawu. Neman epwe mecheres ngonuk óm kopwe amwéchú ena faú ren ekis fansoun. Nge epwe fet ika kopwe attamaaló óm akkamwéchú? Ka tongeni akkamwéchú ena faú ren fitu minich, fitu awa, are fen ttam seni ena? Aapw, ese mwáál poum epwe pekkusuló! Pwúngún pwe wesewesen choun ewe faú ese siwil. Nge ika ka attamaaló óm akkamwéchú, kopwe meefi pwe usun ewe faú a chochchouló. Pwal ina usun ren song. Ika sia akkamwéchú ach song ren fansoun langattam, pwal mwo ekkewe esin song mi chék kúkkún, epwe fen watteeló ach pwisin efeiengawakich. Ina minne, a mmen éch án Jiowa pesekich ach sipwe likitaló song. Enlet, lupwen sia likitaló song sipwe pwisin feiéch.—Än Salomon Fos 11:17.
Lupwen sia likitaló song, sia pwisin feiéch
“Usun Itá Jiowa Pwisin A Fós Ngeniei”
Met a álisi Linda an esap amwéchú an song ren minne pwiin we chón lúkú a féri ngeni? Eú me lein ekkewe mettóch, ina an ekilonei án Paipel áwewe usun ekkewe popun mi lamot sipwe omusaaló tipisin ekkewe ekkóch. (Kölfel 130:3, 4) A ákkáeúin chúng letipen Linda ren an silei pwe ika sia omusaaló tipisin ekkewe ekkóch, Jiowa epwe pwal omusaaló tipisich. (Efisos 4:32–5:2) Ena mettóch a kkúú letipen Linda, iwe a erá: “Usun itá Jiowa pwisin a fós ngeniei.”
Mwirin och fansoun, Linda a tongeni likitaló an song. A unusen omusaaló tipisin chienan we chón lúkú, me iei iir me rúúemén ra chiechiéch. Linda a akkachocho iei lón an angang ngeni Jiowa. Kopwe lúkúlúk pwe Jiowa a mochen álisuk óm kopwe pwal ina usun.