Eú Pwon Ngeni Jiowa

Ina epwe ruu maram mwirin án ekkewe chón Israel ló seni Isip, ra tori ewe Chuuk Sinai me aúetá imwer kewe tento. Jiowa a kéri Moses iwe Moses a feitá wóón ewe chuuk me Jiowa a ereni: ‘Úa angasaaló chón Israel. Iká ra álleasochisiei me ái kewe allúk, repwe wiliiti nei aramas mi aúchea.’ Moses a liwintiw me a ereni ekkewe chón Israel met Jiowa a apasa. Met meefier? Ra erá: ‘Áúpwe féri meinisin met Jiowa a erenikem.’

Moses a feitá sefál wóón ewe chuuk. Me ikena ie, Jiowa a ereni: ‘Lón aúlúngátin rán, úpwe kapas ngonuk. Kopwe ereni ekkewe aramas pwe resap feitá wóón ewe Chuuk Sinai.’ Moses a feitiw me ereni ekkewe chón Israel ar repwe ammólneeretá le aúseling ngeni Jiowa.

Lón ewe aúlúngátin rán, ekkewe chón Israel ra kúna inefi me rochen kuchu wóón ewe chuuk. Ra pwal rong akúrangen chopulap, me ttikin rappwa. Mwirin Jiowa a feitiw wóón ewe chuuk lón ngeten ekkei. Ekkewe chón Israel ra chechchech ren ar fókkun niwokkus. Unusen ewe chuuk a pwélúló ren étúét. Ttikin ewe rappwa a léúwommóngoló. Mwirin Kot a erá: ‘Ngang Jiowa. Ousap fókkun fel ngeni pwal ekkóch kot.’

Moses a feitá sefál wóón ewe chuuk, me Jiowa a ngeni ekkewe allúk fán iten ekkewe aramas ren ifa ussun repwe fel ngeni me epwe ifa ussun féfférúr. Moses a makkeetiw ekkewe allúk mwirin a állea ngeni ekkewe chón Israel. Iwe ra pwonei: ‘Áúpwe féri meinisin met Jiowa a erenikem.’ Ewer, ra eáni eú pwon ngeni Kot, nge repwe apwénúetá?