Hana A Tingor lón Iótek Emén Néún Át

Emén chón Israel itan Elkana a wor rúúemén pwúlúwan, iter Hana me Penina, nge a kon tongei Hana. Pokiten a chómmóng néún Penina, a kan soun ámángawa Hana pún Hana ese wor néún. Iteiten ier, Elkana a kan uwei an we famili pwe repwe féri ar fel lón ewe imwenfel mangaku lón Silo. Lón eú atun ra nóm ikena, a esilla pwe Hana a fókkun letipechou. A ereni: ‘Hana kosap kechiw. Kosap lólilen pwe ngang mi nóm rem, úa mmen tongeek.’

Mwirin, Hana a feiló pwe epwe iótek wóón pwisin an. Ese tongeni wes le kechiw atun a tingormaw ngeni Jiowa pwe epwe álisi. A pwonei: ‘Jiowa iká kopwe fang ngeniei emén át, úpwe fang ngonuk pwe epwe angang ngonuk lón ánein manawan.’

Ewe souasor mi lapalap itan Eli a kúna án Hana misúkúsúk le kechiw, me a ekieki pwe a sakaw. Hana a pélúweni: ‘Aapw ái samol, úse sakaw. A wor ái watteen osukosuk, nge iei úa fós ngeni Jiowa ussun.’ Eli a mirititi pwe a mwáál me a ereni: ‘Amwo Kot epwe fang ngonuk met ka mochen.’ Hana a meefi kinamwe, iwe mwirin a liwiniti leenian. Esaamwo tori eú ier mwirin ena, nge a néúni emén át itan Samuel. Ka tongeni anchangei úkúúkún pwapwaan Hana?

Hana ese ménúki an we pwon ngeni Jiowa. Atun chék a mwuuti Samuel seni oupw, a uwei ngeni ewe imwenfel mangaku pwe epwe angang lón. A ereni Eli: ‘Iei ewe át úa iótek fán itan. Úa fang ngeni Jiowa pwe epwe angang ngeni lón ánein manawan.’ Iwe, Elkana me Hana ra kan soun ló chuuri Samuel iteiten ier me uwou úfan minefé. Jiowa a pwal fang ngeni Hana úlúmén néún át me rúúemén nengngin.