Néún ewe Fefin mi Má Pwúlúwan Át A Manawsefál

Atun ewe pwás, Jiowa a ereni Elias: ‘Kopwe feiló Sarafat. A wor emén fefin mi má seni pwúlúwan ikenan epwe amwéngéénuk.’ Elias a kúna emén fefin mi má seni pwúlúwan mi osupwang a ioi amúch únúkkún tittin ewe telinimw. Elias a tingorei och únúman konik. Atun a feiló angei, Elias a kékkéló mwirin: ‘Kese mochen pwal mwineto och pilawa.’ Nge neminna a erá: ‘Ese wor enei pilawa ái úpwe tongeni ngonuk. A chék wor ekis pilawa mi ámás me apúra ái úpwe féri pwe enei me nei we.’ Elias a ereni: ‘Jiowa a fen pwon pwe iká kopwe féri och pilawa fán itei, onom we pilawa mi ámás me óm we apúra esap iteló tori an epwe púng rán sefál.’

Iwe, neminna a feiló ren imwan we me a féri och pilawa fán iten néún Jiowa we soufós. Ussun met Jiowa a fen pwonei, ena fefin mi má pwúlúwan a chék wokkor anan me néún we át atun ewe fansoun pwás. An kewe leenien pilawa me apúra a chék mammasou.

Mwirin a fis och mettóch mi áweires. Néún ena fefin we át a fókkun semmwen, mwirin a máló. A tingormaw ngeni Elias an epwe álisi. Elias a eki seni ewe át me ekietá lón ewe ruumw asan. A akonatiw wóón ewe bed me iótek: ‘Jiowa, kese mochen amanawasefáli ei semirit.’ Ka silei pwata epwele mmen amwarar án Jiowa epwe féri ena? Pún ussun esaamwo wor emén a manawsefál me akkomw. Me ena fefin mi má pwúlúwan me néún we át esap iir chón Israel.

Iwe ewe át a manawetá, me poputá le ngasangas! Elias a ereni ewe fefin mi má pwúlúwan: ‘Katol! Noum we át a manaw.’ A wesen pwapwa me ereni Elias: ‘En wesen emén néún Kot. Úa silei ena pokiten ka apasa met chék Jiowa a erenuk óm kopwe apasa.’