Ewe Tefil A Sótuni Jises

Mwirin án Jises papatais, ewe ngún mi fel a emmwenaaló ngeni eú fénúpéén. Ese mwéngé ren úkúúkún 40 rán, ina pwata a fókkun echik. Mwirin ewe Tefil a feito pwe epwe sótuni Jises me ereni: ‘Iká en wesewesen Néún Kot, kopwe ereni ekkeei faw ar repwe wiliiti pilawa.’ Nge Jises a pélúweni ren an aloni alon Paipel: ‘A makketiw pwe sisap chék manaw ren mwéngé. A lamot sipwe aúseling ngeni meinisin met Jiowa a apasa.’

Mwirin, ewe Tefil a pwal sótunisefál Jises me erá: ‘Iká en wesewesen Néún Kot, kopwe oturuketiw seni ungen ei imwenfel, pún a makketiw pwe Kot epwe tiinaato néún kewe chónláng pwe repwe túmúnuk.’ Nge Jises a pwal aloni alon Paipel me erá: ‘A makketiw pwe kosap sótuni Jiowa.’

Mwirin, Setan a pwáári ngeni Jises meinisin mwúún fénúfan me lingan me wéúéchún me a ereni: ‘Úpwe ngonuk meinisin ekkeei mwú me linger iká kopwe fel ngeniei fán eú chék.’ Nge Jises a pélúweni: ‘Kopwe sú seniei, Setan! A makketiw pwe kopwe fel ngeni Jiowa chék.’

Mwirin ewe Tefil a feiló seni, me ekkewe chónláng ra feito me uwou ngeni anan. Seni ena atun, Jises a afalafala kapas allimen ewe mwú. Ina ewe angang a feito fénúfan an epwe féri. Aramas ra aúcheani met Jises a asukuler, me ra fiti ekis meinisin ia a feiló ie.