LESEN 05
A Masou ewe Paipel ren án Kot Pwóróus Ngenikich
Jiowa a fen fang ngenikich ewe Paipel. Ina eú liffang mi aúchea mi masou ren 66 kúkkún puk. Nge eli kopwe eis: ‘Ia ewe Paipel a feito me ie? Ié ewe sounemenemen makkan?’ Ren ach sipwe pélúweni ekkena kapas eis, sipwe káé ika ifa usun a torikich án Kot pwóróus lón ewe Paipel.
1. Ika pwe aramas ra wisen makkeei ewe Paipel, iwe pwata sia tongeni erá pwe a feito seni Kot?
Ina epwe úkúkún 40 mwán ra wisen makkeei ewe Paipel. A makketiw ewe ewin puk ina epwe 3,500 ier lóóm, nge ewe sáingoon puk a makketiw ina epwe 1,900 ier lóóm. A sókkofesen nónnómun ekkena chón mak. A wor chón masen siip, chón attaw, me king. Ikaamwo ina, nge a tipeeúfengen unusen masouen ewe Paipel. Ifa usun a tufich ena? Pokiten Kot i ewe a wisen emmweni makkan. (Álleani 1 Tesalonika 2:13.) Ekkewe chón mak rese makkeei pwisin ekiekiir. Nge, ‘ra nom fän nemenien ewe ngünmifel ra apasatä ewe kapas a feito seni Kot.’a (2 Petrus 1:21) Kot a áeá an we ngún mi fel le emmweni ekkena mwán le makkeetiw ekiekin.—2 Timoty 3:16.
2. Ié a tongeni kúna álillis seni ewe Paipel?
“Sokun mwich me ainang, kapas me mwü meinisin” ra tongeni kúna álillis seni ewe pwóróus allim mi mak lón ewe Paipel. (Álleani Pwärätä 14:6.) Kot a nochchei an epwe kawor ewe Paipel lón sókkopaten fós lap seni sókkun puk meinisin. Arapakkan meinisin ra tongeni álleani ewe Paipel. A pwúng ena ese lifilifil ia aramas ra nóm ie are menni fós ra eáni.
3. Ifa usun Jiowa a túmúnú pwe ete kamwóóló ewe Paipel?
Ese nómottam ekkewe mettóch ekkewe chón makkeei ewe Paipel ra áeá le makkeei ewe Paipel, áwewe chék ren ekkewe únúchen man are ekkewe taropwe seni ewe irá itan papyrus. Nge chókkewe mi aúcheani ewe Paipel ra túmúnú pwe epwe pwúng ar kapiini ewe Paipel wóón péúr. Inaamwo ika ekkewe aramas mi wor maner ra sótun amóeló ewe Paipel, nge a wor chókkewe ra pennúkú manawer pwe repwe túmúnú pwe ete kamwóóló. Jiowa ese mut ngeni emén are och mettóch an epwe aúkatiw i le fóffós ngenikich. Iei alon Paipel: “Alon ach we Kot epwe nonom tori feilfeilachök.”—Aisea 40:8.
KÚTTAFICHI
Káé ifa usun Kot a emmweni ekkewe mwán le makkeei ewe Paipel, ifa usun a túmúnú pwe ete kamwóóló, me usun an atufichi kaworan ngeni aramas meinisin.
4. Ewe Paipel a pwári ié ewe Sounemenemen Makkan
Fichi ei VIDEO. Mwirin álleani 2 Timoty 3:16, me pwóróusfengen wóón ekkeei kapas eis.
Ika aramas ra wisen makkeei ewe Paipel, iwe pwata a iteni ewe Kapasen Kot?
Óm ekiek nge mi tufich ach sipwe lúkú pwe Kot a tongeni atoura an ekiek ngeni ekkewe chón makkeei ewe Paipel?
Eli emén seketeri epwe wisen makkeei eché taropwe, nge masouan, ina alon ewe mi wisen ereni met epwe makkeei. Ina usun ren ewe Paipel, aramas ra wisen makkeei, nge masouan, a feito seni Kot
5. Ese morolo ewe Paipel inaamwo ika aramas ra sótun amóeló
Pokiten ewe Paipel a pop seni Kot, iwe a túmúnú pwe esap kamwóóló. Seni lóóm, aramas mi wor maner ra sótun amóeló ewe Paipel. Ekkewe néúwisin lamalam rese mochen án aramas repwe álleani. Chómmóng ra pennúkú manawer fán iten ewe Paipel inaamwo ika aramas ra áweiresiir me pwal mwo nge fán feiengawen máló. Ren óm kopwe silei emén me leir, fichi ei VIDEO, me mwirin pwóróusfengen wóón ekkeei kapas eis.
Óm silei úkúkún met ekkena aramas ra pennúkú fán iten ewe Paipel, a efisi óm mochen álleani? Pwata ka mochen álleani?
Álleani Kölfel 119:97, me mwirin pwóróusfengen wóón ei kapas eis:
Met a amwékútú chómmóng le pennúkú manawer pwe repwe tongeni chiyakúúni me achéwú ewe Paipel?
6. Eú puk fán iten aramas meinisin
Ewe Paipel, ina ewe puk mi chéú chiyakúún me einetin lap seni puk meinisin lón uruwo. Álleani Föför 10:34, 35, me mwirin pwóróusfengen wóón ekkeei kapas eis:
Pwata Kot a mochen pwe epwe chéú chiyakúún me einetin an we Kapas?
Met ka sani usun pwóróusen ewe Paipel seni óm káé ei lesen?
Arapakkan
Meinisin
chón fénúfan
ra tongeni álleani ewe Paipel lón ewe fós ra weweiti
A kawor lón lap seni
3,000
fós
unusen kapiin are kinikinin chék
5 Billion
Ina úkúkún kapiin a fen kawor,
lap seni puk meinisin
EKKÓCH RA ERÁ: “Ewe Paipel ina eú puk minen lóóm makkeien chék aramas.”
Met meefiom?
Met a ánnetatá pwe ewe Paipel ina án Kot we Kapas?
MENLAPAN
Ewe Paipel, ina án Kot we Kapas, iwe a túmúnú pwe epwe kawor ngeni aramas meinisin.
Enniwili
Met weween ach erá pwe Kot a emmweni ekkewe aramas le makkeei ewe Paipel?
Pwata ka mwaar ren chiyakúún ewe Paipel, einetin, me an ese kamwóóló?
Met meefiom mwirin óm káé meinisin ekkeei mettóch Kot a féri ren an epwe pwóróus ngonuk?
PWAL EKKÓCH PWÓRÓUS
Álleani usun uruwoon ewe Paipel seni kapiin we minen lóóm, tori chiyakúún we lón ei fansoun.
Álleani ifa usun a nómoffóchóló ewe Paipel inaamwo ika a fen wor ekkewe úlúngát mettóch ra tongeni amóeló.
“Ewe Paipel—Pwóróusen An Nómoffóchóló” (Ewe Leenien Mas, July 2016)
Katol minne ekkewe aramas ra fen pennúkúóló ren ar repwe chiyakúúni ewe Paipel.
A fen ffér kapiin ewe Paipel me chiyakú fán chómmóng. Iwe ifa usun sia tongeni lúkú pwe a chúen pwúng masouan?
“Has the Bible Been Changed or Tampered With?” (Web article)