Fós Ussun Met ewe Emén A Sani

Minne Jises A Féri

VIDEO: Jises me ewe Fefin Ppen ewe Ito

1. Katol ei VIDEO, are álleani Jon 4:​6-9. Mwirin pwóróusfengen wóón ekkeei kapas eis:

1. Met Jises a esilla ussun ewe fefin me mwen an poputá le fós ngeni?

2. Jises a erá: “Kese mochen kopwe ngeniei och konik.” Pwata an féri ena a mmen álilliséch lón an poputááni eú pwóróusfengen?

Met Sia Káé Seni Jises?

2. Iká sia poputá le fósun och mettóch ewe emén a sani, ese mwáál ach pwóróusfengen epwe fisiéch.

Áppirú Jises

3. Tipemecheres. Kosap péchéú le poputááni eú pwóróusfengen ka ekiekin fósun. Kopwe poputá le fós ussun och mettóch ekkewe ekkóch ra ekieki lón ena ránin. Pwisin eisinuk:

1. ‘Met sókkun pwóróus a nóm lón news?’

2. ‘Met chón órui kewe, chienei chón angang, are chienei chón sukul ra kan fós ussun?’

4. Ekieki nónnómun ewe emén. Pwisin eisinuk:

1. ‘Met ewe emén a kan féfféri? Epwe met a ekieki ussun?’

2. ‘Met fouten ewe emén, napanapan, are imwan a áiti ngeniei ussun an lúkú are an ééreni?’

3. ‘Iei ewe fansoun mi fich ái úpwe fós ngeni ei emén?’

5. Aúseling.

1. Kosap kon fós chómmóng.

2. Pesei ewe emén an epwe uwawu meefian. Iká mi fich, eisini ekkóch kapas eis.