Kirekiréch

Minne Jises A Féri

VIDEO: Jises A Echikara Emén Mwán mi Chuun

1. Katol ei VIDEO, are álleani Jon 9:​1-7. Mwirin pwóróusfengen wóón ekkeei kapas eis:

1. Met Jises a akkomw féri, a echikara ewe mwán mi chuun are fós ngeni ussun ewe kapas allim?—Ppii Jon 9:​35-38.

2. Met meefiom, pwata ewe mwán a tipemecheres le aúseling ngeni Jises?

Met Sia Káé Seni Jises?

2. Emén a tongeni mochen aúseling ngeni ach afalafal iká a meefi pwe sia chúngú.

Áppirú Jises

3. Achocho le ekieki meefien ewe emén.

1. Pwisin eisinuk: ‘Epwe met a eáni lólilen? Met sókkun pwóróus a tongeni álisi me epwe sani?’ Óm féri ena, epwe álisuk le pwáári kirekiréch seni enletin letipom.

2. Aúseling ngeni meefian. Iká ka féri ena, ka pwáári pwe ka ekieki met a aúchea me ren. Iká a erenuk meefian wóón och mettóch are fósun eú an osukosuk, kosap erikaló met ena a mochen fós ussun.

4. Fós fán kirekiréch me súfél. Lupwen ka tongei emén me enletin mochen álisi, epwe meefi ena seni ngingiin óm kapas. Túmúnú met kopwe apasa me ifa ussun kopwe apasawu, me kosap apasa ekkewe kapas mi tongeni eletipengawa.

5. Álilliséch. Kútta eú fansoun mi fich óm kopwe álisi emén. Lupwen sia kirekiréch ngeni, ese mwáál epwe mochen fós ngenikich.