“Ami Oupwe Pwal Fel Lon Ami Kana Foffor Meinisin”

“Pokiten ewe emon mi fen korikemi a fel, iwe, ami oupwe pwal fel lon ami kena foffor meinisin, pun a fen makketiu: ‘Ami oupwe fel, pun ngang ua fel.’”​—1 PITER 1:15, 16.

1. Pwata Piter a pesei chon Kraist pwe repwe aramas fel?

PWATA ewe aposel Piter a eani ewe fon mi mak asan? Popun, pun a kuna pwe a lamot ngeni iteiten chon Kraist meinisin ar repwe tumunu ekiekir me fofforur ren ar repwe eani pinin Jiowa. Ina minne, iei makkeian mwen an makkei ekkena kapas asan: “Oupwe rifengenni lukanapen letipemi, oupwe ononoto. . . Usun semirit mi alleasochis, ousap appiru ami kewe mochenia-ingau mi nom remi lom, lon ami rochopwak.”​—1 Piter 1:13, 14.

2. Pwata mochenich kewe rese pin mwen ach fiti ewe enlet?

² Mochenich kewe lom rese pin. Met popun? Popun, pun chommong leich ra appiru fofforun fonufan mwen ach etiwa ewe enlet lon pekin chon Kraist. Piter a silei ena mettoch lupwen a makkei ei poraus mi ffat: “Ewe fansoun a lo epwe naf ngeni ami fori minne ekkewe Jentail ra mochen fori, manau lon angolsa, lon mocheisou, lon unupuch, lon mongommong, lon puchen achi, o pwal lon fofforun fel ngeni anu-mwaal mi ingau.” Pungun pwe Piter ese eiteita ekkewe foffor ese pin mi fiffis lon ach ei fansoun, pun aramas rese silei usur lon ena atun.​—1 Piter 4:3, 4.

3, 4. (a) Ifa usun sipwe tongeni amoielo ngeni mocheniangau? (b) A ita wewe ngeni pwe chon Kraist repwe amoielo ar kewe memmef meinisin? Awewei mwo.

³ Ka kuna pwe mochenin aramas kena ra mmen ammeseik ngeni ewe inis, ngeni ewe tupu, me pwal ngeni ewe letip? Lupwen sipwe mut ngenir ar repwe nemenikich, iwe, epwe mecheres ngeni ekiekich me fofforuch ar repwe wiliti ekiek me foffor ese pin. Ena poraus a affata lamoten ach sipwe mut ngeni ach tufichin eani ekiek mi mirit an epwe nemeni fofforuch. A iei usun an Paul awewei ena mettoch: “Iwe, upwe fonou ami pwii kena, ren umoumochun Kot, pwe oupwe fangelo inisimi usun chok asor mi manau, asor mi fel, asor Kot epwe pwapwa ren, eu angang mi fel fan ami tufichin eani ekiek mi mirit.”​—Rom 12:1, 2.

⁴ Ren ach sipwe mwei ngeni Kot eu asor mi fel, sipwe mut ngeni ach tufichin eani ekiek mi mirit, nge esap meefiach, an epwe nemenikich. A ifa chommongun chokewe mi tipisin lisowu mwaal pokiten ar mut ngeni meefier an epwe nemeni fofforur! Nge sisap ita ekieki pwe meefiach kewe meinisin mi ngau pun ika sipwe ina usun, epwe ita ifa usun sipwe tongeni pwarata chengel lon ach angang ngeni Jiowa? Iwe nge, ika sia mochen uwani uwan ewe ngun mi fel nge esap angangen ewe futuk, iwe, sipwe siwili ach ekiek pwe epwe tipeeu ngeni ekiekin Kraist.​—Kalesia 5:22, 23; Filipai 2:5.

Manau mi Fel, Liwinin mi Fel

5. Pwata Piter a wesewesen meefi lamoten ewe mettoch manau mi fel?

⁵ Pwata Piter a wesewesen meefi lamoten chon Kraist repwe aramas fel? Pun a mirititiochu ewe liwinin mi fel a fen kamotiu fan iten penmanauen aramas mi alleasochis. Iei makkeian: “Oua fen silei pwe a fen angasalo ami seni ekkewe sokkun fofor-mwaal esor lamoter, ekkewe foffor oua angei seni sememi kewe lom, nge ami ngaselo ese fis ren ekkewe mettoch mi epwe morelo, usun chok silifer are kolt, nge a fis ren chchaan Kraist mi auchea, usun chok chchaan emon siip mi sap limelimengau, o esor an tiikitikipwul.” (1 Piter 1:18, 19) Ewer, ewe Emon ewe lapalap fel a popu seni, Jiowa Kot, a fen tinatiu Noun we alaemon, “ewe Emon mi Fel,” ngeni fonufan pwe epwe monatiu liwinin ewe moon kepichilo nge ina ewe mettoch epwe suuki ngeni aramas ewe alen ar repwe ririoch ngeni Kot.​—Jon 3:16; 6:69; Ekistos 28:36; Mattu 20:28.

6. (a) Pwata esap mecheres ach sipwe eani foffor mi pin fansoun meinisin? (b) Met epwe tongeni alisikich le kakkamwoch manauach mi fel?

⁶ Iwe nge, mi lamot ach sipwe weweiti pwe esap mecheres ach sipwe eani manau mi fel atun sia nonnom lon an Setan fonufan mi limengau. Emonewe a kan foratiu ekkewe eseich ngeni chon Kraist mi enlet, nge chokana ra kan achocho le likiiitu lon ei otot minen lom. (Efisus 6:12; 1 Timoti 6:9, 10) Pokiten ach kukkuna mettoch mi chounikich lon ach leenien angang, seni mararich kewe mi u ngenikich, seni ekkewe mi esiitakich lon sukul, me pwal seni chienach kewe mi peseikich ach sipwe fofforingau, a lamot ach sipwe pochokkul lon pekin ngun fan iten ach sipwe likiitu fan manauach mi fel. Ena poraus a menalpei lamoten ach sipwe pwisin kakkaeo Paipel me fiffiti ekkewe mwich chon Kraist ra eani. Iei an Paul fon ngeni Timoti: “Iwe, kopwe amwochu ekkewe sokkun kapas murinno ka fen rong seniei, lon ewe luku o ewe tong mi nonnom lon Kraist Jises.” (2 Timoti 1:13) Sia rongorong ekkena kapasen apochokkul lon ach Kingdom Hall me pwal lon ach pwisin kakkaeo Paipel. Ir mi tongeni alisikcih pwe sipwe eani foffor mi fel iteiten ran lon chommong leeni me lapalap.

Foffor mi Fel lon ewe Famili

7. Ifa usun foffor mi fel epwe ita nemeni ach famili?

⁷ Lupwen Piter a aloni alon Lifitikos 11:44, a nounou ewe kapasen Krik haʹgi·os, nge a wewe ngeni “mi imulo seni tipis, ina minne a eu mettoch mi kefilita fan iten Kot, mi pin.” (An Expository Dictionary of New Testament Words, by W. E. Vine) Epwe ita ifa usun ena mettoch epwe weneiti ach familien chon Kraist? Epwe wewe ngeni pwe manauen ach famili epwe longolong won tong, pun “Kot mi tong.” (1 Jon 4:8) Ewe sokkun tong mi pennuku pwisin mochenich a kan apochokkula ewe riri lefilen chon pupulu me pwal lefiler me nour kewe.​—1 Korint 13:4-8; Efisus 5:28, 29, 33; 6:4; Kolose 3:18, 21.

8, 9. (a) Fan ekkoch met sokkun lapalap epwe fisita lon familien chon Kraist? (b) Ifa ewe fon mi lukuchar ewe Paipel a awora fan iten ena mettoch?

⁸ Eli sipwe kan ekieki pwe ena sokkun tong epwe chok pukun pwapwalo lon eu familien chon Kraist. Iwe nge, a pwung ach sipwe apasa pwe lon ekkoch familien chon Kraist, ewe tong mi pwalo ese tori ewe ukukun epwe ita pwalo lor. Eli epwe ita pwalo ena tong lon ewe Kingdom Hall, nge a ifa mecheresin an epwe morolo pinin manauach lon imwach. Iwe, ika sia pupulu, eli sipwe muttir monuki pwe etiach sia ita sufoluti lon ewe Kingdom Hall, i mi chuen fefinach chon Kraist are i mi chuen mwanich, nge eli i emon ministerial servant are elter. Eli epwe pwichita letiper, iwe, anini watte epwe tongeni fisita. Manauach epwe pwal tongeni keangfesen lon ruu sokkun lapalap. Weween pwe ewe pupulu esap chuen usun an emon mwan me fefin ririfengen usun chon Kraist nge epwe usun chok an emon mwan me fefin akaninifengen iteitan. Ra kan monuki pwe imwer epwe ita eu leenien foffor mi fel. Eli repwe poputa le eani kapasen chon lukun. Iwe mwirin, kapas mi maras are kapasen esiit epwe tongeni mecheresin towu seni auer!​—Proverbs 12:18; alollo ngeni Fofor 15:37-39.

⁹ Iwe nge, iei an Paul fon: “Ousap atou och kapas ingau [Krik, loʹgos sa·prosʹ, “kapas mi limengau,” ina minne, ese pin] seni lon auemi, nge sokkun kapas chok mi fich ngeni mammarita lon fansoun meinisin, pwe epwe efisata chen ngeni chon rongorong.” Iwe, ena poraus a weneiti meinisin chon rong lon ewe imw, pachelong ekkewe nau.​—Efisus 4:29; Jemes 3:8-10.

10. Ifa usun ewe fon usun manau mi fel a weneiti ekkewe nau?

¹⁰ Ena fon fan iten foffor mi pin a pwal weneiti ekkewe nau lon ewe familien chon Kraist. A ifa mecheresin ar repwe liwin seni sukul, iwe, muttir pouta le appiru ekkewe sokkun kapas mi pwarata sufolungau ngeni nemenem chiener kewe chon sukul ra kan eani. Ami nau kana, ousap eani ekkewe sokkun ekiek mi ngau a nom ren ekkewe at mi mwanesol mi esiita noun Jiowa we soufos, nge ikenai ena sokkun lapalap a pwalo lon ekkewe mi eani kapasen okoun me kapasen esiit. (2 Kings 2:23, 24) Om kapas esap ita limengauolo ren kapasen lefalang pwe ekkena sokkun kapas mi fichiti chok aramas mi liseangas are tiparoch, nge ina ewe popun ar rese aea kapas mi murinno. Pokiten kich chon Kraist, ach kapas epwe ita fel, murinno, epwe apochokkula aramas, epwe pwarata kirokiroch, me epwe “anno ren soon.” Epwe ita pwarata pwe sia sokko seni chon lukun.​—Kolose 3:8-10; 4:6.

Ewe Lapalap Fel me Chon Ach Famili Esor ar Lukuluk

11. Pwata an emon eani manau mi fel esap wewe ngeni an epwe asika ngeni aramas pwe manauan a pwung?

¹¹ Inaamwo ika sia kan achocho le eani manau mi fel, nge sisap lamalam tekia me asika ngeni aramas pwe kich aramas pwung, nge akkaewin, lon ach foffor ngeni chon ach famili esor ar lukuluk. Ach eani fofforun chon Kraist mi pwarata kirokiroch epwe ita alisir ar repwe kuna pwe manauach a sokkolo lon eu lapalap mi murinno, pwe sia silei ifa usun ach sipwe pwarata tong me umoumoch, usun chok ewe chon Sameria lon an Jises kapas awewe.​—Luk 10:30-37.

12. Ifa usun ekkewe chon Kraist mi pupulu repwe tongeni achungu letipen puluwer kewe pwe repwe ekiekoch usun ewe enlet?

¹² Piter a menlapei lamoten ach sipwe eani ekiek pwung ngeni chon ach famili esor ar lukuluk pwe iei makkeian ngeni ekkewe fin Kraist mi pupulu: “Pwal usun chok, ami fefin kana, oupwe alleasochisi puluemi, pwe, inaamwo ika ekkoch leir rese alleasochisi ewe kapas, nge repwe chok Soulangelo ren an puluer foffor murinno, nge esap ren ar kapas, lupwen ra nennengeni ami foffor mi limelimoch, eti niuokkus.” Emon fin Kraist mi pupulu (are pwal mwo nge emon mwan) epwe tongeni alisi chon imwan we esor an lukuluk pwe epwe ekiekoch usun ewe enlet ika an kewe foffor epwe limelimoch, me epwe pwarata kirokiroch me sufol. A wewe ngeni pwe ewe theocratic schedule esap kon titchik pwe ewe emon ese fiti ewe enlet esap meefi nge ewe famili a fen tunalo are monukalo i.a​—1 Piter 3:1, 2.

13. Fan ekkoch, ifa usun ekkewe elter me ministerial servant repwe tongeni alisi ekkewe mwan le aucheani ewe enlet ika pwe esap ir chon fiti ewe enlet?

¹³ Fan ekkoch ekkewe elter me ministerial servant repwe tongeni awora alillis ika repwe sotuni le silei ekiekin me meefien ewe emon ese fiti ewe enlet. Epwe ina usun ewe emon epwe tongeni kuna pwe ekkewe Chon Pwarata, ir mi usun aramas meinisin, me ir aramas murinno mi aucheani chommong sokkopaten mettoch, pachelong ekkewe mettoch lukun ewe Paipel. Fan eu, emon elter a mochen silei usun attau pwe ina ewe mettoch emon mwan a mmen saani. Iwe, ina ewe mettoch a efisata chiechi lefiler. Lo, lo, ewe mwan a papataiselo. Lon pwal eu poraus, emon mwan ese fiti ewe enlet a mmen efich an epwe kaeo usun och sokkun matchang. Ekkewe elter rese fangeta. Emon leir a kaeo usun ewe matchang fan iten an epwe tongeni popporaus ngeni ewe mwan usun minne a fokkun efich ika repwe chufengen fan eu. Ina minne, ach eani manau mi fel esap wewe ngeni ach sipwe kon eipo are chechchei chok eu sokkun ekiek.​—1 Korint 9:20-23.

Epwe Ifa Usun Ach Sipwe Aramas Fel lon ewe Mwichefel?

14. (a) Ifa eu mettoch Setan a kan aea le efisata fitikoko lon ewe mwichefel? (b) Ifa usun sipwe tongeni fiu ngeni an Setan ssar?

¹⁴ Setan ewe Tefil emon sou pwen, pun ewe kapasen Krik fan iten Tefil, di·aʹbo·los, a wewe ngeni “sou tipimwaal” are “sou pwen.” A mmen angoch le efisata kapasen pwen, me a kan aea ena mettoch lon ewe mwichefel. A akkaewin efich ewe mettoch etileepat are uwokuku. Sia kan mut ngenikich ach sipwe nom fan nemenian lon ena sokkun foffor ese pin? Ifa usun? Ren ach poputani ena sokkun kapas, ach uweifeili, are ach auseling ngeni. Iei alon eu mwiitun mi mirit: “Emon mwan mi tipatchem sola a ekkefisata fitikoko, me emon sou pwen a akkaimufeseni chokewe mi chiechifengen.” (Proverbs 16:28) Met epwe amoielo etileepat me kapasen pwen? Sipwe tuttumunu pwe fansoun meinisin ach kapas epwe apochokkula aramas me epwe longolong won tong. Ika sipwe annefota ochchun pwiich kewe nge esap met ra usun ita apwangapwang won, ach kapas epwe murinno me epwe awora alillis lon pekin ngun fansoun meinisin. Chechemeni mwo pwe a mecheres ach sipwe akkapi aramas. Iwe, ewe emon mi uwokuku ngonuk usun aramas epwe pwal tongeni uwokuku ngeni aramas usum!​—1 Timoti 5:13; Taitos 2:3.

15. Met sokkun lapalap, lapalapen chon Kraist, epwe alisi meinisin lon ewe mwichefel ar repwe amwochu manau mi fel?

¹⁵ Ren ach sipwe alukulukatiu pinin ewe mwichefel, a lamot ngeni oukich meinisin ach sipwe eani ekiekin Kraist, me sia silei pwe tong, iei ewe nampa eu lapalap a nom ren. Ina minne, Paul a fonou ekkewe chon Kolose pwe repwe eani ewe tong Kraist a eani: “Iwe, ami, usun noun Kot mi filita, ami kena mi fel o achengicheng, oupwe pwilitalong womi umoumoch, kirokiroch, tipetekison, mosonoson, o songommang. . . , o omusomusfengen. . . Nge lap seni ekkkeei mettoch meinisin, oupwe wilitialong womi ewe riri itan tong, ewe mi ririfengenni o aunusochualo mettoch meinsin.” Iwe, a pwal makkei: “Iwe, ewe kinamwe an Kraist epwe nemeni lon letipemi.” Ika sipwe eani ena ngunun omusomusfengen, ese mwaal sipwe tongeni alukulukatiu tipeeun me pinin ewe mwichefel.​—Kolose 3:12-15.

Pinin Manauach a kan Pwapwalo ngeni Chon Oruch?

16. Pwata ach lamalam mi fel epwe eu lamalam mi apwapwa?

¹⁶ Nge ifa usun chon oruch kewe? Met ar ekiek usuch? Chengelin ewe enlet a kan pwalo won mesach are a usun ita nge sia fen choutiu ren? Ika kich aramas mi fel usun chok Jiowa a pin, iwe, epwe pwalo lon ach kapas me ach foffor. Epwe ita ffatoch pwe ach lamalam mi fel, iei eu lamalam mi apwapwa. Met popun? Pun Jiowa ach Kot emon Kot mi pwapwa, nge a mochen pwe ekkewe mi fel ngeni i repwe chengel. Ina popun, ewe sou makkei kol fel a tongeni makkei ei mettoch usun noun Jiowa kewe aramas lom: “Mi pwapwa ekkewe aramas mi eani Jiowa pwe ar Kot!” Ena pwapwa a kan pwalo lon manauach? Nouch kewe ra kan pwarata pwe ra pwapwa ren ar nonnom lein noun Jiowa kewe aramas lon ewe Kingdom Hall me pwal lon ekkewe mwichelap?​—Kol Fel 89:15, 16; 144:15b.

17. Met sipwe tongeni fori lon pekin kaworen alillis ren ach siwpe pwarata pwe mi itepok me ruuepek manauach mi fel?

¹⁷ Sipwe pwal tongeni pwarata pwe manauach a fel ren ach eani ewe ngunun tipemecheres me kirokiroch ngeni chon oruch kewe. Fan ekkoch a lamot ach sipwe alillisfengen me chon oruch kewe, awewe chok, ren ach limeti sopwuch, are, usun ar fori lon ekkoch fonu, ach awora alillis le forsefalli ekkewe al. Manauach mi fel epwe pwal tongeni pwalo ren ach tumunu pwe epwe torotoroch ach atake, leeniach, are fonuach. Ika epwe wor piipi lon are lukun imwach, are epwe torotorongau leeniach, are epwe pwal wor waa mi tatiu lon aparich meinisin mi tongeni kuna, sipwe tongeni apasa pwe sia kan sufoluti chon oruch kewe?​—Pwarata 11:18.

Manau mi Fel lon Leenien Angang me Sukul

18. (a) Ifa eu mettoch mi ekefisata osukosuk ngeni chon Kraist ikenai? (b) Ifa usun sipwe tongeni sokko seni fonufan?

¹⁸ Iei makkeien ewe aposel Paul ngeni ekkewe chon Kraist lon ewe telinimw ese pin itan Korint: “Lon ewe taropwe ua fen mak ngenikemi, ua makketiu pwe ousap chiechi ngeni ekkena chon lisou. Nge sap iei weween ai kewe kapas, pwe ousap chiechi ngeni chon lisouen ei fonufan, are chon mochenia, are chon sola, are chon fel ngeni anumwaal; pun are iei usun, ami oupwe chok tou seni lon fonufan.” (1 Korint 5:9, 10) Ina eu osukosuk ngeni chon Kraist, pun iteiten ran repwe chufengen me aramas mi ipweri allukun Paipel are ir kewe rese luku ekkena sokkun alluk. Ina eu sossot mi lapalap ngeni ar tuppwol, nge akkaewin lon ekkewe fonu ikewe aramas ra kan apochokkula are mutata foffor mi sikepwach, otupotup, me ppwor ie. Ika a ina usun nonnomuch, esap och ach sipwe uwopwangapwang fan iten allukun Paipel pwe epwe usun ita nge kich mi usun chok chon fonuach. Iwe nge, fofforuch mi kirokiroch, fofforun chon Kraist, nge mi sokko seni fofforun chon lukun, epwe ita ffatolo ngeni aramas mi mirit, weween, ngeni ekkewe mi esinna ar osupwang lon pekin ngun me ir mi mochen amurinnolo manauer.​—Mattu 5:3; 1 Piter 3:16, 17.

19. (a) Ami kana nau, met sokkun sossot oua kan kukkuna lon sukul? (b) Met ekkewe sam me in repwe tongeni fori ren ar repwe apochokkula nour kewe pwe repwe likiitu fan manauer mi fel?

¹⁹ Pwal usun chok, a wor chommong sossot mi tori nouch kewe lon sukul. Ami kana sam me in, oua kan aamwa ewe sukul noumi kewe ra fiti? Oua silei ika mei fet nonnomun ekkewe chon sukul? A wor tipeeu lefilemi me ekkewe sense? Pwata a lamot ekkena kapas eis? Popun, pun lon chommong fonu, ekkewe sukul ra ur ren fofforun nninni me fiu, safeien opuchopuch, me lisowu mwaal. Epwe ita ifa usun noumi kewe repwe tongeni likiitu fan ar tuppwol me manauer mi fel ika rese kuna alillis senikemi, ami kana sam me in? A pwung an Paul ei fon ngeni sam me in: “O ami sam kena, ousap asonga noumi, pwe rete apilukingau.” (Kolose 3:21) Ekkewe sam me in repwe asonga nour kewe ika rese weweiti ar kewe osukosuk me sossot mi fis iteiten ran. Ar akammol fan iten ekkewe sossot lon sukul a kan poputa lon imwer, imwen chon Kraist, ikewe ra kunakun me ie alillis lon pekin ngun.​—Tuteronomi 6:6-9; Proverbs 22:6.

20. Pwata a lamot ngeni oukich meinisin ach sipwe eani manau mi fel?

²⁰ Ren amuchuloon ei poraus, pwata a lamot ngenikich meinisin ach sipwe eani manau mi fel? Popun, pun a kan tumunukich seni fofforun me ekiekin an Setan fonufan. Ina eu minen afeioch iei me epwe pwal ina usun lon mwach kkan. A eu minen alukuluk ngenikich pwe ewe manau mi enlet epwe toto rech lon ewe fonufan sefo mi pwung. A alisikich pwe sipwe itepok me ruuepek, tipemecheres, me achocho le popporausfengen lon manauach, manauen chon Kraist, nge sap minne sipwe umwesin chechchei chok pwisin ach ekiek. A wewe ngeni pwe epwe siwili manauach pwe sipwe usun chok Kraist.​—1 Timoti 6:19.

[Footnote]

En mi Chechemeni?

◻ Pwata Piter a kuna lamoten an epwe fonou chon Kraist usun ewe mettoch manau mi fel?

◻ Pwata esap mecheres ach sipwe eani manau mi fel?

◻ Met oukich meinisin sipwe tongeni fori ren ach sipwe alapalo foffor mi pin lon ewe famili?

◻ Ren ach sipwe alukukukatiu pinin ewe mwichefel, met sokkun foffor ese pin sipwe tumunukich seni?

◻ Ifa usun sipwe tufichin kakkamwoch manau mi fel lon ach leenien angang me pwal lon sukul?

[Ekkewe sasing lón pekin taropwe 26, 27]

Lon wisach we, wisen Chon Pwarata Jiowa, sipwe ita mefi chengel ren ach angang ngeni Kot me pwal lon ekkewe ekkoch foffor