Ifa Ussun Ekkewe Elter Mi Saifetal Ra Angang Lon Ewe Wis, Wisen Chon Souan Mi Tuppwol
“Ussun chok oua fen angei en me liffangan, oupwe alamota ir, emon fan asengesin emon, ussun chon souani ewe chenin Kot mi sokkosokkopat.”—1 PITER 4:10.
1, 2. (a) Ifa ussun kopwe awewei ewe kapas “chon souan”? (b) Io ekkewe ra kapachelong lein ekkewe chon souan Kot a kan nounou?
JIOWA a kan nounou meinisin chon Kraist mi tuppwol pwe repwe chon souan. Fan chommong emon chon souan i emon chon angang mi wisen tumunu angangen business fan iten noun we masta. (Luk 16:1-3; Kalesia 4:1, 2) Jises a eita ngeni mwichen noun kewe chon kepit mi tuppwol “ewe chon souan mi tuppwol.” A fen likitalo le poun ena chon souan “pisekin kewe mwinisin,” pachelong ekkewe kokkot meinisin fan iten ewe angangen afalafal ussun ewe Muu.—Luk 12:42-44; Mattu 24:14, 45.
2 Ewe aposel Piter a apasa pwe chon Kraist meinisin ir chon souani umoumochun Kot mi pwapwalo lon lapalap mi sokkopat. Iteiten chon Kraist meinisin a wor en me leenian, iwe, epwe tongeni apwonueta wisan we, wisen chon souan lon. (1 Piter 4:10) Ekkewe chon Kraist mi seikita ngeni ewe wis elter, ir chon souan, me ekkewe elter mi saifetal ra kapachelong leir. (Taitos 1:7) Epwe fet ach ekiek ussur? Met sokkun lapalap epwe nom rer me met sokkun mettoch repwe ekiekin apwonueta? Iwe, ifa ussun repwe tongeni awora sokkun alillis meinisin?
Kilisou ren Ar Angang
3. Pwata sia tongeni eita ngeni ekkewe elter mi saifetal “chon souan mi murinno”?
3 Iei makkeien ruuemon chon Kraist mi pupulu ngeni emon elter mi saifetal me puluwan we: “Am aua mochen apasa am kilisou ren ewe watten fansoun me tong oua fen ngenikem. Lon am famili, aua fen kuna feioch lapalap seni ami kewe kapasen apochokkul me fon. Aua silei pwe mi lamot am aupwe mammaarita lon pekin ngun, nge ren ewe alillis seni Jiowa me pwiich kewe mi ussun chok ami, a mwaren kukkunulo weiresin am mammaar.” Fan chommong sia rong ena sokkun memmef pun ekkewe elter mi saifetal ra kan tongei chiener kewe chon luku, ussun chok emon chon souan mi murinno epwe achocho le awora met a lamot ngeni eu famili. Ekkoch ra mmen angoch le afalafal lon mwich. Chommong ra mmen angoch lon ewe angangen afalafal, nge pwal fitemon ra ur ren tong me umoumoch. Ren ar amaari me aea ekkena liffang lon ar angang ngeni aramas, mi fichiti ekkewe elter mi saifetal ar repwe iteni “chon souan mi murinno.”
4. Ifa ewe kapas eis sipwe popporaus ussun iei?
4 Ewe aposel Paul a makkei pwe “Iei ussun ach kutta ussun ekkewe chon souan; pwe repwe tuppwol”. (1 Korint 4:2) An emon angang ngeni chienan kewe chon Kraist lon eu me eu mwichefel iteiten wiik, ina eu wis mi auchea me apwapwa. Iwe nge, ina pwal eu wis mi chou. Ina minne, ifa ussun ekkewe elter mi saifetal repwe tongeni apwonuetafichi wiser we, wisen chon souan pwe repwe tuppwol me sopwoch lon?
Ar Akapwonuetafichi Wiser we, Wisen Chon Souan
5, 6. Pwata mi wesewesen lamot ngeni manauen emon elter mi saifetal an eani apilukuluk won Jiowa lon iotek?
5 Mi wesewesen lamot ngeni ekkewe elter mi saifetal ar repwe eani apilukuluk won Jiowa len iotek ren ar repwe chon souan mi apwonuetafichi wiser. Pokiten ar schedule me chommongun ar angang, fan ekkoch repwe tongeni chouchou. (Alollo ngeni 2 Korint 5:4.) Iwe, a lamot ar repwe fori met ewe sou mak kol fel itan Tafit a makkei: “Kopwe chok likiti ngeni Jiowa osom we, o epwe amwochuk; esap mut ngeni emon pwe epwe amwokutu ekkewe aramas mi pwung.” (Kol Fel 55:22) Ra pwal kuna ourur seni alon Tafit ei: “Amwo Jiowa epwe feioch, ewe mi ukkuwei osach kewe iteiten ran meinisin.”—Kol Fel 68:19.
6 Paul a angei me ia ewe pochokkul fan iten an epwe apwonueta wisan kewe lon pekin ngun? A makkei pwe “Ngang mi tufich ren mettoch meinisin lon ewe emon mi apochokkulaei.” Ewer, Jiowa Kot ewe Sou Awora an Paul pochokkul. Pwal ussun chok, Piter a eani ei fon: “Emon mi wisen angang epwe angang ren ekkewe manaman mi feito seni Kot; pwe repwe alinga Kot ren Jises Kraist lon mettoch meinisin.” (1 Piter 4:11) Iei alon emon brother mi fen pin emon elter mi saifetal lom, nge a menlapei lamoten ar eani apilukuluk won Kot: “Fansoun meinisin sipwe kutta Jiowa fan iten ach sipwe pwakini ekkewe osukosuk, me kutta alillis seni an we mwicheich.”
7. Ifa ussun mirit a chu ngeni angangen emon elter mi saifetal?
7 A lamot ngeni emon elter mi saifetal an epwe mwokut fan mirit ren an epwe apwonuetafichi wisan. Ussun ekkewe chon Kraist meinisin atewe a kan achocho le “akkomwa ekkewe mettoch mi kkolo lamoter.” (Filipai 1:10)a Lupwen ekkewe elterin mwichefel ra eani kapas eis ussun och mettoch, epwe eu alen mirit ar repwe angei alillis seni ewe circuit overseer. (An Salomon Fos 11:14; 15:22) Neman an weweoch me ewe fon a uwawu seni Paipel epwe awora watte alillis ngeni ekkewe elter fansoun ar repwe angang won ewe mettoch mwirin an atewe lo seni ewe mwichefel. Lon pwal och lapalap mi ussun chok ena, iei alon Paul ngeni Timoti: “Minne ka rong seniei fan mesen chommong chon pwarata kopwe pwal luku ngeni aramas mi tuppwol, ir ekkewe mi tongeni afalafala ekkewe ekkoch.”—2 Timoti 2:2.
8. Pwata a fokkun lamot kaeo lon Paipel, kutta weweochun poraus, me ekiekifichi masouen Paipel?
8 An emon kaeo lon Paipel, an kutta titchikin poraus, me an ekiekifichi minne a kan kaeo, a lamot fan iten kaworen fon mi lukuchar. (An Salomon Fos 15:28) Iei alon emon district overseer: “Lupwen sipwe mwichfengen me ekkewe elter, sisap ita niueiti ach sipwe apasa pwe sise silei poluen och kapas eis.” Ar achocho le eani “ekiekin Kraist” ussun eu mettoch epwe atufichir ar repwe awora fon mi longolong won Paipel, iwe, ena fon epwe alisi aramas pwe repwe tipeeu ngeni letipen Kot. (1 Korint 2:16) Fan ekkoch a lamot ngeni emon elter mi saifetal an epwe mak ngeni ewe Watch Tower Society ren an emmwen. An luku Jiowa me an tongei ewe enlet a mmen lamot seni pwisin itochun are angochun le kapas. Sap minne Paul a war fan “kapas mi alollol are tipatchem,” nge a poputa an angangen afalafal lon Korint “kapas mi alollol are tipatchem,” nge a poputa an angangen afalafal lon Korint “lon apwangapwang me pwal lon niuokkus me pwal chechchech chapur.” A ita lipwakingau pokiten ekkena lapalap? Aap, pun a alisi ekekwe chon Korint pwe ar luku “esap longolong won tipatchemen aramas, pwe won manamanen Kot.”— 1 Korint 2:1-5.
Pwal Ekkoch Lapalap mi Lamot
9. Pwata a lamot ngeni ekkewe elter mi saifetal ar repwe wewefichiti mefien aramas?
9 Ar weweiti mefien aramas a kan alisi ekkewe elter mi saifetal pwe epwe sopwoch ar angang. Piter a pesei chon Kraist meinisin pwe repwe ‘weweiti mefien chiener kewe,’ are “chu ngeni letipen aramas.” (1 Piter 3:8, footnote) Emon circuit oveseer a mefi lamoten an epwe ‘ekieki meinisin lon ewe mwichefel me wesewesen silei mefier meinisin.’ Paul a eani ena sokkun memmef pwe iei makkeian: “Oupwe eti chon pwapwa lon ar pwapwa, o pwal eti chon kechiu lon ar kechiu.” (Rom 12:15) Ena sokkun ekiek a kan amwokutu ekkewe elter mi saifetal pwe repwe achocho le weweiti met chienan kewe chon luku ra osukosuk ren are mei fet nonnomur. Iwe mwirin, repwe tongeni awora fon seni Paipel mi apochokkulereta me epwe pwal atoto feioch ika repwe apwonueta. Emon circuit overseer a nouni ei taropwe seni eu mwichefel mi kan ngeni Turin, Italy: “Ika ka mochen pwe aramas repwe afannuk, kopwe akkom afannir; ika ka mochen pwe aramas repwe pwapwa reom, en kopwe pwapwa rer; ika ka mochen kuna tong, kopwe akkom pwarata tong; ika ka mochen kuna alillis, kopwe akkom awora om alillis. ikkena ekkewe mettoch am aua fen kaeo sonuk!”
10. Met ekkewe circuit me district overseer ra apasa ussun tipetekison, me ifa ewe leenien appiru Jises a isetiu fan iten ena mettoch?
10 Ekkewe elter mi saifetal repwe tongeni apwonueta chommong mettoch mi murinno ika repwe tipetekison me tipemecheres. Iei eu mettoch emon circuit overseer a kuna: “A fokkun lamot ach sipwe tipetekison.” Iei an fon ngeni ekkewe minefon elter mi saifetal” “Ousap mut ngeni letipemi an epwe rukulo ren ekkewe brother mi pisekisek pokiten minne repwe tongeni fori fan asengesimi, are chiechi ngeni chok chokena, nge fansoun meinisin oupwe pwarata pwe ouse lifilifil aramas.” (2 Kronika 19:6, 7) Emon elter mi saifetal mi enletin tipetekison esap eani ewe ekiek pwe i emon aramas tekia pokiten an wisen tupuni ewe Society. A pwung alon emon district overseer: “Sipwe tipetekison me auseling ngeni ekkewe brother. Fansoun meinisin sipwe tipemecheres.” Pokiten i ewe mwan mi lap seni meinisin aramas, Jises Kraist a tongeni amef ngeni aramas pwe ir aramas mi kisikis chok, nge pokiten a wesewesen tipetekison me tipemecheres, ekkewe pwal mwo nge semirit ra mefi kinamwe ren ar nonnom ren. (Mattu 18:5; Mark 10:13-16) Ekkewe elter mi saifetal ra mochen pwe ekkewe kukkun, ekkewe sarafo, me ekkewe chinnap, weween, meinisin lon ewe mwichefel, ar repwe mefi kinamwe le fos ngenir.
11. Ika pwe mi lamot an epwe wor omusomus, met epwe tongei fis seni?
11 Pwungun pwe “kich meinisin sia fori chommong sokkun mwaal,” iwe, sap minne ekkewe elter mi saifetal resap tongeni mwaallilo. (Jemes 3:2) Lupwen repwe mwaallilo, ar omusomus a awora ngeni ekkewe elter eu leenien appiru fan iten tipetekison. Me ren An Salomon Fos 22:4, “wou me iteuoch me manauattam, iei ewe liwin fan iten emon mi tipetekison o niuokkusiti Jiowa. Iwe, esap pwe a lamot ngeni noun Kot kewe chon angang meinisin ar repwe ‘tipetekison le fiffiti ar we Kot”? (Mika 6:8, 1960 Edition) Iei alon emon circuit overseer lupwen emon a eisini ika met an emmwen ngeni emon minefon elter mi saifetal: “Sufoliiti me asamolu ekkewe brother meinisin, me eani ewe ekiek pwe ir mi murinno sonuk. Kopwe tongeni kaeo chommong mettoch seni ekkewe brother. Eani tipetekison fansoun meinisin. Pwarata chok pukun lapalapom kewe. Kosap sotun pwisin aitochuk.”—Filipai 2:3.
12. Pwata a wesewesen auchea tiniken fan iten an chon Krast angangen afalafal?
12 Tiniken fan iten an chon Kraist angangen afalafal a kan alapalo lamoten alon emon elter mi saifetal. A enlet pwe lupwen ir me puluwan we repwe tiniken fan iten ewe angangen afalafal, ekkewe elter, puluwer kewe, me lusun chon ewe mwichefel ra kan pochokkuleta pwe repwe pwarata tiniken lon ar angangen afalafal. Emon circuit overseer a eani ei pesepes: “Sipwe tiniken fan iten ewe angangen afalafal.” A pwal apasa pwe “Ua kuna pwe lupwen eu mwichefel epwe tiniken lon ewe angangen afalafal, ese kon lien wor osukosuk lon.” Iei alon pwal emon circuit overseer: “Ua luku pwe ika ekkewe elter repwe fiti ekkewe brother me sister lon ewe angangen afalafal me alisir pwe repwe pwapwa lon ewe angang, ena mettoch epwe efisata kinamween letiper me pwapwa mi lapalap lon ar angang ngeni Jiowa.” Ewe aposel Paul a ‘apworai letipan pwe epwe kapas ussun ewe poraus allimen Kot ngeni ekkewe chon Tesalonika fan mettoch mi fokkun aweires.’ Ese mwaal ina ewe popun ra chemeni ren pwapwa an chuurir me an afalafal me ra aneanei ar repwe kunasefalli i!—1 Tesalonika 2:1, 2; 3:6.
13. Met emon elter mi saifetal epwe afanni lupwen epwe fiti chienan kewe chon Kraist lon ewe angangen afalafal?
13 Lupwen emon elter mi saifetal epwe fiti chienan kewe chon Kraist lon ewe angangen afalafal, epwe kan afanni nonnomur me minne esap pwak rer. Inaamwo ika an fon epwe murinno, nge a silei pwe eli ekkoch repwe pireir lupwen repwe fiti emon elter mi angoch. Ina minne, fan ekkoch, eli kapasen apochokkul epwe murinno lap seni fon. Lupwen atewe epwe fiti chon afalafal are pioneer lon eu Bible study, eli repwe tingor pwe i epwe wisen eani ewe kaeo. Neman ena mettoch epwe aiti ngenir ifa ussun repwe tongeni amurinnolo lapalapen ar asukula aramas.
14. Pwata sia tongeni apasa pwe tinikenin ekkewe elter mi saifetal a kan efisata tiniken lon chiener kewe?
14 Ekkewe elter mi saifetal mi tiniken ra kan efisata tinikenin chiener kewe. Emon circuit overseer lon Uganda a fetal le woluwol ukukun eu awa lupwen a fiti emon brother mi chuuri eu famili mi kaeo, nge ir rese kon lien mammaar lon pekin ngun. Lupwen ekkewe wonumon lon ena famili ra silei pwe ewe emon mi etto rer emon elter mi saifetal, ra fokkun ingelo. Ra silei pwe ekkewe sounpetak lon ar lamalam resap fokkun tongeni eani ena sokkun ekiekin awora alillis ngeni chon ar we pekin. Lon ewe eu Raninfel mwirin, a ina keran aewin ar fiti mwich me ra apasa pwe ra mochen wiliiti Chon Pwarata Jiowa.
15. Ifa ewe mettoch mi murinno a fis ngeni emon circuit overseer mi tiniken lon Mexico?
15 Lon ewe leeni itan Oaxaca lon Mexico, emon circuit overseer a fori eu mettoch aramas rese ekiekin kuna seni. A akkota an epwe nonnom ruanu pwin lon eu kalapus pwe epwe chuuri ekkoch chon kalapus mi fen wiliiti chon afalafal fan iten ewe Muu. Ren fitu ran a fiti ekkena chon kalapus lupwen ra afalafal ngeni ekkewe chon kalapus me eani ekkewe Bible study. Pokiten a watte ar mochen kaeo, a wesewesen ttam ekkoch ekkena fansoun kaeo. Ena circuit overseer mi tiniken a makkei pwe “Le muchuloon ewe wiik, am me ekkewe chon kalapus aua ur ren chengel pun am meinisin aua fen pochokkuleta.”
16. Pwata sia wenewenen feioch lupwen ekkewe elter mi saifetal me puluwer kewe ra apochokkulakich?
16 Ekkewe elter mi saifetal ra kan achocho le apochokkula aramas. Lupwen Paul a wareiti ekkewe mwichefel lon Masetonia, a ‘apochokkulereta ren chommong kapas.’ (Fofor 20:1, 2) Kapasen apochokkul epwe tongeni awora watten alillis le emmweni ekkewe kukkun me watte pwe repwe achocho ngeni ekkewe mettochun ngun. Lon eu watte ofesilap ren ewe Watch Tower Society, eu repot a pwarata pwe ekkewe circuit overseer ra fen pesei arap ngeni 20 percent lein ekkewe mi angang ie pwe repwe eani ewe angang full-time. Puluwen ewe elter mi saifetal a pwal tufichin apochokkula aramas ren an isetiu eu leenien appiru mi murinno lon wisan we, wisen emon chon afalafal fan iten ewe Muu mi angang full-time.
17. Ifa mefien emon circuit overseer mi chinnap ussun an tufichin awora alillis ngeni aramas?
17 A akkaewin lamot ngeni ekkewe mi chinnap me ekkewe mi letipechou kapasen apochokkul. Iei makkeien emon circuit overseer mi chinnap: “Ewe eu mettoch lon ei angang mi efisata chengel mi kkolo watten, iei ai tufichin awora alillis ngeni ekkewe mi kaulo lon ach angang me ekkewe mi apwangapwangen chinnap lein noun Kot kewe siip. Alon Rom 1:11, 12 a kkolo aucheaan ngeniei, pun a watte ai pochokkuleta fansoun ua ‘awora och liffangen ngun ngeni chokena pwe repwe lukucharetiu.’”
Liwinir lon Ar Angang mi Apwapwa
18. Ikkefa ekkewe kokkot mi longolong won Paipel ekkewe elter mi saifetal ra kan achocho ngeni?
18 Ekkewe elter mi saifetal ra akkom kutta met epwe akkaewin ochiti chiener kewe chon luku. Ra kan mochen apochokkula ekkewe mwichefel me amaarireta lon pekin ngun. (Fofor 15:41) Emon elter mi saifetal a kan achocho le “eani kapasen apochokkul, awora asosoon letiper, me alapalo an aramas mochen apwonueta ewe angangen afalafal, me ar likiitu le akamwochu ewe enlet.” (3 Jon 3) Pwal emon a achocho le alukuchara chienan kewe chon Kraist lon ar luku. (Kolose 2:6, 7) Chechemeni pwe ewe elter mi saifetal emon “wesewesen chienach chon angang,” nge esap i ewe masta won lukuen aramas. (Filipai 4:3; 2 Korint 1:24) An waroto, ina eu fansoun ach sipwe pochokkuleta me alapalo ach angang, me pwal ina eu fansoun an ekkewe elter pi ika mei fet angangen ewe mwichefel me met repwe tongeni ekiekin apwonueta lon fansoun mwer. Ren an kapas me foffor, ekkewe chon afalafal, pioneer, ministerial servant me elter ra tongeni eani ewe ekiek pwe repwe pochokkuleta me mefi tiniken fan iten ewe angang lon fansoun epwe feito. (Alollo ngeni 1 Tesalonika 5:11.) Ina minne, sipwe peni ren unusen letipach warotoon ewe circuit overseer, me unusen alamota ewe alillis ewe district overseer a kan awora.
19, 20. Ifa ussun ekkewe elter mi saifetal me puluwer kewe ra fen kuna feioch seni ar angang fan tuppwol?
19 Ekkewe elter mi saifetal me puluwer kewe ra kan kuna feioch lapalap seni ar angang fan tuppwol, me ra tongeni luku pwe Jiowa epwe efeiochur ren ekkewe mettoch mi murinno ra kan foffori. (An Salomon Fos 19:17; Efisus 6:8) Georg me Magdalena, ir ruuemon chinnap mi eani ewe angangen saifetal chommong ier. Lon eu mwichelap lon Luxembourg, emon a pwereto ren Magdalena, nge lap seni 20 ier lom Magdalena a afalafal ngeni. Ena fin Jus a mochen silei ewe enlet pokiten ekkewe puken aweween Paipel Magdalena a ngeni, iwe, lo, lo, a papatais. Emon fefin a pwereto ren Georg, nge neminewe a chechemeni an atewe chuuri i lon imwan we arap ngeni 40 ier lom. An tiniken le awewei ewe poraus allim a amwokutu ir me puluwan ar repwe etiwa ewe enlet. Neman ese lien wor popun ach sipwe apasa pwe Georg me Magdalena ra wenewenen chengel.
20 Uwaochun an Paul angangen afalafal lon Efisus a efisata an chengel me eli a amwokutu i pwe epwe aloni alon Jises ei: “Pwapwaan liffangolo a lap seni pwapwaan angei.” (Fofor 20:35) Pokiten ewe angangen saifetal, ina eu fofforun liffangolo iteitan, iwe, ekkewe mi eani ena angang ra kan kukkuna pwapwa, akkaewin lupwen ra kuna uwaochun ar angang. Emon circuit overseer mi alisi emon elter mi letipechou a nouni echo taropwe seni mi apasa: “En wesewesen eu ‘minen apochokkul’ lon manauei lon pekin ngun lap seni minne kopwe wewe ren. . . . Kosap tongeni silei ukukun watten ewe alillis ka fen awora ngeni emon mi ussun Asaph, pun ‘pechen kewe a lukun rikilo.’”—Kolose 4:11; Kol Fel 73:2.
21. Pwata kopwe apasa pwe 1 Korint 15:58 a weneiti angangen ekkewe elter mi saifetal?
21 Emon chon Kraist mi chinnap mi fen pin wiseni ewe wis circuit overseer ren fite ier a efich an epwe ekieki 1 Korint 15:58, ikewe Paul a eani ei kapasen pesepes ie: “Oupwe likiitu, ousap mwokutukut, fansoun meinisin oupwe alapalo ami fori angangen ach we Samol, pun oua fen silei pwe ami angang weires lon ach we Samol esap lamot mwaal.” A enlet pwe ekkewe elter mi saifetal ra foffori chommong mettoch lon angangen ewe Samol. Iwe, a ifa watten ach kilisou pwe ir mi akangang fan chengel lon wiser we, wisen chon souani umoumochun Jiowa!
[Footnote]
a Pi ewe poraus mi iteni “Can You Be Happy With Much to Do?” lon Ewe Leenien Mas, May 15, 1991, pekin taropwe 28-31.
Ifa Ussun Kopwe Polueni?
◻ Pwata sia tongeni apasa pwe ekkewe elter mi saifetal, ir “chon ssouan mi murinno”?
◻ Ikkefa ekkoch lapalap mi alisi ekkewe circuit me district overseer pwe repwe tufichin apwonueta chommong mettoch mi murinno?
◻ Pwata tipetekison me tiniken ra kon lamot ngeni ekkewe mi eani ewe angangen saifetal?
◻ Ikkefa ekkewe mettoch mi auchea ekkewe elter mi saifetal ra kan achocho ngeni?
[Sasing lón pekin taropwe 27]
Ekkewe elter mi saifetal ra kan achocho le apochokkula chiener kewe chon luku
[Ekkewe sasing lón pekin taropwe 28]
Ekkewe kukkun me chinnap repwe tongeni kuna feioch seni ar chiechi ngeni ekkewe elter mi saifetal me puluwer kewe