MANAWEN CHÓN KRAIST
Paulus A Kilisou Ngeni Kot me A Ápilúkúlúk
Atun ewe mwichefel lón Rom a rong pwe Paulus a feffeito, eú kúmiin mwán seni ena mwichefel ra sái órun 40 mwail pwe repwe chuuri i. Met meefien Paulus ren ar pwári ewe esin tong mi pennúkúóló pwisin mochenin? “Lupwen Paulus a küneer, a kilisou ngeni Kot o letipan a fokun pöchökülela.” (Föf 28:15) Inaamwo ika Paulus a sil ren an kan wisen apéchékkúla ekkewe mwichefel a kan chuuriir, nge lón ei atun a emén chón kalapus, i ewe a wisen kúna apéchékkúl.—2Ko 13:10.
Lón ach ei fansoun, ekkewe chónemmwen mi wisen sáifetál ra kan ló ngeni eú me eú mwichefel pwe repwe apéchékkúla chón. Usun chék meinisin néún Kot kewe aramas, fán ekkóch iir ra meefi pekkus, aúrek, me ápilúkingaw. Lón nan, atun ewe chónemmwen mi wisen sáifetál me pwúlúwan ra chuuri óm mwichefel, met ka tongeni féri pwe kopwe apéchékkúler, pwe ‘oupwe apöchökülafengenikemi ren ami lükülük’?—Ro 1:11, 12.
Fiti ekkewe mwich fán iten ewe angangen afalafal. Ewe chónemmwen mi wisen sáifetál a kúna apéchékkúl lupwen ekkewe chón afalafal ra pennúkúóló chómmóng mettóch ren ar repwe unusen feiéch seni wiiken an we visit. (1Te 1:2, 3; 2:20) Ekieki óm kopwe auxiliary pioneer atun maramen an visit. Ka tongeni etiwa i me pwúlúwan we pwe oupwe mwin le afalafal are luki emén me leir an epwe fituk le chuuri noum chón káé? Ra pwapwa le angangfengen me ekkewe sókkopaten chón afalafal, kapachelong ekkewe minefé me chókkewe mi ekieki pwe rese kon lipwákéch lón ewe angangen afalafal.
Kopwe awasélaéch. Ka tongeni eleenia ewe chónemmwen mi wisen sáifetál me pwúlúwan we lón imwom are etiwer pwe oupwe mwéngéfengen? Ena a pwári ngeniir pwe ka tongeer. Rese pwal ekieki an epwe mesemesekkis ewe leeni are ewe mwéngé.—Luk 10:38-42.
Aúseling ngeni me apwénúetá an emmwen me éúréúr. Fán tong, ewe chónemmwen mi wisen sáifetál a kan álisikich le silei ifa usun sipwe tongeni ámúrinnééló ach angang ngeni Jiowa. Fán ekkóch, neman a lamot an epwe awora ngenikich kapasen éúréúr mi péchékkúl. (1Ko 5:1-5) A pwapwa lupwen sia álleasochis me tipemecheres.—Ip 13:17.
Pwári kilisou. Ereni ewe chónemmwen mi wisen sáifetál me pwúlúwan we ifa usun ka kúna feiéch seni ar achocho. Ka tongeni féri ei ren óm pwisin kapas ngeniir are ren óm mak ngeniir taropwe.—Kol 3:15.