Lingen Imwen Jiowa A Lapalap Seni Lingen Ewe Me Lom

“‘Upwe aurala ei imwenfel ren ling,’ Jiowa Sapaot a apasa.”​—AKAI 2:7.

1. A ifa usun ngun mi fel a riri ngeni luku me angang?

ATUN emon Chon Pwarata Jiowa a afalafal imw me imw, a chuuri emon chon Pentecostal fefin mi ereni: ‘Am (chon Pentecostal) aua angei ewe ngun mi fel, nge ami kana aramas oua foffori ewe angang.’ Ren kirokiroch, ewe Chon Pwarata a awewei ngeni pwe emonewe mi eani ngun mi fel epwe pukun mwokutukut pwe epwe foffori an Kot angang. Jemes 2:17 a apasa: “A iei usun ren luku, are a chok alaemon, o esor ekkewe foffor ren, iwe, a malo.” Ren alillisin an Jiowa we ngun mi fel, noun kewe Chon Pwarata ra amarata luku mi pochokkul, iwe, a ‘auralo imwan we ren ling’ ren an awisa ngenir ar repwe foffori angang mi pwung​—akkaeuin ‘afalafalfetalei ei kapas allim usun ewe Muu won unusen fonufan pwe epwe pwar ngeni einang meinisin.’ Lupwen epwe wesochulo ei angang me ren letipen Jiowa, “iwe, a ina sopwolon.”​—Mattu 24:14.

2. (a) Ach unusen foffori an Jiowa angang epwe atoto menni feioch? (b) Pwata sipwe pwapwa ren an a ita “mangeto”?

² Seni alon Jises keei, sipwe weweiti pwe ach angang ikenai epwe akkaewin wewe ngeni ach afalafala ngeni aramas “ewe kapas allim mi lingoch me ren ewe Kot mi pwapwa”, ewe a alukuluku ngenikich. (1 Timoti 1:11) Ukukun ach pwapwaiti ach angang ngeni Jiowa ren unusen ngunuch, epwe pwal ina ukukun an ewe sopwolon epwe muttirito. Lon Apakuk 2:2, 3, sipwe alleani alon Jiowa kewe: “Kopwe makketiu minne upwe pwari ngonuk won och leenien mak, nge epwe fokkun ffat, pwe chokewe mi sa repwe mecheres le alleani. Pun minne upwe pwari ngonuk epwap pwonueta lon eu fansoun mi kefilita. Nge fansoun an epwe pwonueta epwe fokkun muttir, nge esap chofona. Are epwe mang le pwonueta, kopwe chok witiwit. Epwe fokkun pwonueta, nge esap mang.” Ewer, “minne epwe pwar ngeni” epwe fokkun pwonueta, inaamwo ika “epwe mang.” Pokiten iei sia nonnom lon ewe wanik-me-aulungatin ierin an Jises we Muu, eni ekkoch repwe mefi pwe iei sia nonnom lon eu fansoun an a mangeto. Iwe nge, sisap ita pwapwa pwe ewe sopwolon esaamwo war? Lon ekkeei ier seni 1990, usun ita nge ren och manaman, ese chuen pinepin ewe angangen afalafala ewe kapas allim lon Otiuen Iurop, lon ekkoch kinikinin Afrika, me lon pwal ekkoch fonu. An a usun ita nge “mangeto” a wesewesen mutata fansoun fan iten pwal ekkoch “siip” repwe ionfengen seni ekkena fonu mi keran suuk.​—Jon 10:16.

3. Met popun siwilin ach ekiek usun weween “ei tappin aramas” epwe amwokutukich ach sipwe atapwalapwal le foffori an Kot angang?

³ “Esap mang,” ina alon ewe soufos. Jises a apasa pwe ei tappin aramas mi ingau esap morelo me mwen “an ekkeei mettoch meinisin epwe fisita.” (Mattu 24:34) Ach saramelo usun weween alon kewe usun ‘ei tappin aramas’ a ita wewe ngeni pwe ewe angangen afalafal esap chuen atapwalapwal?a Ekkewe poraus mi enlet a pwarata pwe esap fokkun ina! Ach ei tappin aramas a chok ngangauelo lon ei fansoun fofforingau me pworongau esaamwo fis seni le poputaan tori ikenai. (Alollo ngeni Fofor 2:40.) Sipwe ita atapwalapwal le foffori ach angang. (2 Timoti 4:2) Ekkewe oesini meinisin usun fansoun an epwe fis ewe riaffou mi lapalap ra pwarata pwe epwe muttir fisita, lon eu chok seken sise mwo ekieki, epwe anifeto​—usun chok emon chon sola. (1 Tesalonika 5:1-4; Pwarata 3:3; 16:15) “Iei popun ami oupwe pwal ammolnata pun ouse silei menni fansoun ewe Noun-Aramas epwe feito.” (Mattu 24:44) Iei atun ei tappin aramas mi touau seni Kot epwele tori kiteter, enlet, sisap mochen poutalo ach apilukulukun manau esemuch mi auchea ren ach liwiniti “iwello lon ewe pwokak”, pwokaken an ei fonufan kewe minen arikirik!​—2 Piter 2:22; 3:10; Luk 21:32-36.

4. Met popun a lamot an epwe chommongelo forun “mongo lon fansoun mi fich,” iwe, ifa usun an a pwakini ena osupwang?

⁴ Me ren enletin an Jises we oesini, lon 1914 a “fis poputaan riaffou” atun aramas ra tolong lon “ewe fansoun sopwolon ei ototen mettoch.” Riaffou, kiteter, me atai alluk ra chochommongelo tori ach ei ran. (Mattu 24:3-8, 12) Lon chok ena fansoun, Jiowa a awisa ngeni ewe chon angang mi tuppwol me tipatchem mi kepit ar repwe awora “mongoon ngun lon fansoun mi fich” fan iten chon le imwen nour we Masta, Kraist. (Mattu 24:45-47) Seni an we leenien mot lon lang, ei Messaia King iei a wisen emmweni eu kokkotun amongouni aramas lon pekin ngun won unusen fonufan.

Chommong “Mongoon Ngun”

5. A ifa usun an a kawor ewe sokkun “mongo” mi lamot watte?

⁵ Ekieki usun mmolnetaan “ewe mongoon ngun.” (Luk 12:42) Ewe akkaeuin mettoch sipwe “ani”, ina an Kot we Kapas, ewe Paipel. Ren ach sipwe angoch le aiti ngeni aramas ewe Paipel, a lamot an epwe wor eu sokkun Paipel mi pwung me mecheres aramas repwe alleani. Ren fitu ier, a pwonueta ekis me ekis, akkaeuin poputa lon 1950 lupwen ewe New World Translation of the Christian Greek Scriptures a katowu lon fosun Inglis. Seni 1961 a kawor unusen ewe Paipel mi iteni ewe New World Translation, me ekiselo mwirin, a pwal katowu lon pwal ekkoch fosun fonufan. Kapach ekkewe 3 volumes mi katowu lon 1996, iwe, a tori 27, nge 14 lein ekkena Paipel ra unus. Ren an epwe fisoch ena angangen affouni ewe Paipel, me pwal ekkewe puken alillis, 1,174 som chon Kraist mi fen fangelo manauer ngeni Kot ra angang full-time lon 77 ofesin ewe Watch Tower Society.

6. A ifa usun ewe Society a awora ekkewe puken awewe Paipel mi lamot?

⁶ Ren ar repwe apwonueta wiser kewe fan iten ekkeei chommong chon chiyaku, an ewe Watch Tower Society kewe 24 ofis (branch office) mi wisen fori ekkewe puk ra kan achommongalo ekkewe puk ra peresei. Ren ar repwe fori ei mettoch, ra eani pwal ekkoch mwesinen for puk mi fokkun muttir lon ekkoch ekkewe branch ofes. A chommongelo peresen ekkewe chassi Watchtower me Awake! won 13.4-percent, a tori 943,892,500 kapi. Ewe ukukun Paipel me puk mi peres lon ewe United States, Brazil, Finland, Germany, Italy, Japan, me Mexico ra chommongelo won 40 percent seni 1995 tori 76,760,098 kapi lon 1996. Pwal ekkoch branch ofes ra pwal awora ar alillis watte ngeni lapeloon forun ekkewe Paipel me puk.

7. Pwata a lapelo atapwalapwalen Aisea 54:2 iei?

⁷ A lamot an epwe chommongelo ekkewe puk ra forata lon ekkewe ier seni 1990 feffeilo pokiten ese chuen pinepin an Chon Pwarata Jiowa angang lon Otiuen Iurop me Afrika. A watte an aramas mwoneiti mongoon ngun lon ekkena leeni. Ina minne a lapelo lamoten alon Aisea kewe, a era: “Kopwe awattelai imwomw imw mangaku, kopwe pwal ameresala chechen lon rumwom, pwe kopwe awattelai. Iwe, kopwe alangatama selin imwom o alukuchara chufolun.”​—Aisea 54:2.

8. Ifa ewe alillis a kawor lon pekin moni?

⁸ Ina minne, a lamot an epwe awattei ekkewe imwen forata puk lon chommong me lein an ewe Society kewe 104 branch ofes. Pokiten a kan weires lon pekin moni lon lap ngeni meinisin ekkewe fonu mi suuk ngeni ewe angangen afalafal, lap ngeni liwinin ena angang a popu seni an aramas awora monien alillis seni ekkewe fonu mi pisekisek. Mi apwapwa ach sipwe era pwe ekkoch mwichefel me aramas ra kisaseu ren unusen letiper, me ren minne a mak lon Ekistos 35:21: “Murin ra liwinto emon me emon fan meefien letipan, pwal fan pusin an mochen, o uwato ar alillis ren Jiowa fan iten ewe imw mangaku ia aramas ra chuuri Kot ie me angangan meinisin, pwal fan iten ekkewe uf mi pin.” Sia mochen kilisou ngeni meinisin mi kisaseu le awora monien alillis.​—2 Korint 9:11.

9. A ifa usun Rom 10:13, 18 a pwonueta ikenai?

⁹ Lon 1996 ekkewe puk mi peres ren ewe Watch Tower Society ra alingalo iten Jiowa we me an kewe kokkot tori sopwolon fonufan. A usun chok minne ewe aposel Paul a oesini. A aloni alon an Joel we oesini me Kol Fel 19 lupwen a makkei: “‘Iteiten aramas mi kori iten Jiowa repwe kuna manau.’ Nge upwe eis, rese mo rong? Ewer, ra rong, pun ‘Ngingir a fen feilo won fonufan meinisin o ar kewe fos a tori le sopun fonufan.’” (Rom 10:13, 18) Ren ar epinalo ewe it mi auchea, JIOWA, a wor wisen noun kewe aramas ar repwe auralo imwan we imwen fel ren ling. Iwe nge, ifa usun ena angangen arongafeili poraus allim a sopwoch lon 1996? Kese mochen kopwe atola ewe chart mi mak lon pekin taropwe 18 tori 21.

Ewe Angangen Ras Won Unusen Fonufan

10. Ikkefa ekkewe poraus mi lamot watte ren angangen noun Jiowa kewe aramas, usun sia kuna lon ewe chart lon pekin taropwe 18​—21?

¹⁰ Esaamwo fis fan eu me lom pwe a lamot watte alon Jises kewe lon Luk 10:2 lap seni lon ach ei fansoun, a era: “Ewe ras mi lapalap, nge ekkewe chon angang mi chokukkun. Iei minne, oupwe iotek ngeni ewe Samolun ras, pwe epwe tinato chon angang lon an ras.” En mi polueni ena kokko? Fitu million won unusen fonufan ra fori ina usun. A pwapwalo ren an a tori eu minefoon chochoon chon afalafal, ukukun 5,413,769 chon afalafala ewe Muu mi repotei ar angang lon 1996. Pwal eu, 366,579 minefoon brother me sister ra papataiselo. Sia fokkun aucheani ekkena “pisek mi auchea seni mwu meinisin,” iei a wor wiser le ‘auralo imwen Jiowa imwen fel ren ling’!​—Akai 2:7.

11. Met popun kich meinisin sipwe meseik?

¹¹ Repotun feffeitaan ewe angang lon ekkewe fonu mi keran suuk ra fokkun amwarar. Ita ekkoch Chon Pwarata ra lolowoiti ekkena ekkoch Chon Pwarata mi pwapwaiti ar chochommongelo? Aapwi, sia fitir le pwapwa. Poputaan ewe angang lon fonu meinisin a chok kukkun. Chienen Akai soufos, Sekaraia a makkei: “Io kana mi esiita ewe ran lupwen ewe angang a poputa, pun a kukkun?” (Sekaraia 4:10) Sia pwapwa pwe lon ekkewe fonu ikewe ie ewe angangen afalafal a fotetiu ie, mei wor fitu million chon afalafala ewe Muu iei, me ra afalafal ikewe ie fan chommong, pwal mwo nge iteiten wiik lon ekkewe telinimw mi watte. Mei wor popun ach sipwe ita tilikopelo lon ei fansoun atun Jiowa a suuki ewe tufichin kuna amanau lon ekkewe fonu ikewe ie a pinepin ewe angangen afalafal ie me lom? Esap fokkun ina! Jises a apasa, “Ewe malamal a wewe ngeni ewe fonufan.” (Mattu 13:38) A lamot ach sipwe sopweilo le awesochuelo ewe angangen pwarata, usun chok ekkewe popun chon kaeo ra tinikken le afalafal lon fansoun sopwolon ewe ototen chon Jus me lom.​—Fofor 2:40; 10:42; 20:24; 28:23.

Feffeita Chok

12. Met epwe amwokutukich ach sipwe “feffetal wenewen”?

¹² Ewer, a lamot ach sipwe fiti mwokutukutun waan Jiowa we lon lang, iwe, sipwe “fetal wenewen” ren. (Isikiel 1:12) Chechemeni alon Piter, a era: “Jiowa esap amanga an we pwon, usun chok ekkoch aramas ra ekieki usun mang, nge a chok mosonottam ngenikemi, pun ese mochen pwe emon epwe poutmwaalilo, pwe aramas meinisin repwe tori aier.” (2 Piter 3:9) Ita tinikkenin pwiich kewe lon ekkewe fonu mi woungau epwe amwokutukich. An Armaketon ita mangeto epwe mut ngeni fitepuku ngerou ar repwe ionfengen lon ekkena fonu me pwal ikewe ie a fen fisoch ewe angangen afalafal ie. Kosap mwaalilo: “Ranin Jiowa mi lapalap a chok arapoto. A chok kanoto, me epwe fokkun muttirito.” (Sefanaia 1:14) Sipwe ita pwal atapwalapwal me unusen eani ewe amuchuloon afalafal!

13, 14. (a) Met sipwe tongeni apasa usun ainetin nouch kewe puk me chassi lon 1996? (b) Met ekkewe mwichefelin repwe tongeni akkota iteiten ier, iwe, epwe ifa usun om kopwe fiti?

¹³ Inaamwo ika ese tichiki porausen ekkewe puk lon repotun ewe angangen afalafal, nge a fokkun chommongelo ekkewe Paipel, ekkewe puk, me ekkewe chassi sia anounou ngeni aramas lon ewe ier. Ren chok awewe, ekkewe chassi ra feffeita won 19-percent, iwe, a tori ukukun 543,667,923 kapi sia anounou ngeni aramas. Nouch kewe chassi ra amecheresi ekkewe sokkopatten afalafal​—ewe afalafal won al, lon ekkewe leenien kunou, lon ekkewe leenien angang. Ekkewe repot a pwarata pwe lon ekkoch leenien afalafal, ikewe a fis ewe angangen afalafal fan chommong ie, ekkewe chon business ra ingeiti lapalapen nouch kewe chassi me ochun ekkewe poraus, iwe, ra pwal mwokutukut ren ar kaeo ewe Paipel.

¹⁴ Iteiten ier fan ewe maram April, ekkewe mwichefel ra kan akkota eu fansoun ar repwe anounou ngeni aramas ekkewe chassi, ewe epwe fis lon unusen eu ran lon ewe angangen afalafal imw me imw me lon ekkewe leeni ikewe aramas ra kan nom ie. Om we mwichefel epwe pwal fiti ei angangen afalafal fan April 1997? A fen mmolneta ekkewe chassi mi fokkun murinno fan itemi, me ei angangen anounou ngeni aramas ekkeei chassi won unusen fonufan epwe fokkun amwarar! Lon ewe fonuen Saipros, ekkewe mwichefel ra akkota pwe iteiten maram repwe eani eu ranin afalafal ren ekkewe chassi, fan ewe ekiek “sipwe afalafala aramas meinisin ren porausen ewe Muu,” iwe, ra tori eu minefon peak ren 275,359 chaasi ra anouou ngeni aramas lon ewe ier, a wewe ngeni ar feffeita ukukun 54-percent.

An Akai Amuchuloon Poraus

15. (a) Pwata Jiowa a tinalo pwal ekkoch poraus ren Akai? (b) Ifa ewe lesen an Akai aulungatin poraus a aiti ngenikich?

¹⁵ 63 ran mwirin an a katou an we oruuen poraus, Jiowa a tinalo Akai ren ewe aulungatin poraus, ewe sipwe tongeni ekilapei ikenai. Akai a kapas usun ita nge ra koran isetiu longolongun ewe imwenfel, ewe ra fel isetiu 17 ier lom. Iei pwal eu fansoun Jiowa a kuna ewe lamoten an epwe fis eu angangen alimelim. Ekkewe samol fel me ekkewe aramas ra kan tunalo wiser kewe; ina minne, ra limengau mwen mesen Jiowa. A fis pwe ekkoch lein noun Jiowa kewe aramas ra nimaramarsefal ikenai, ra pwal mwo nge fiti ekkewe fofforun fonufan mi chechei pisek? A fokkun lamot pwe oukich meinisin sipwe ekieki me lon letipach “minne epwe fis seni ikenai” pwe sipwe alingalo iten Jiowa we, iwe, sipwe luku an we pwon: “Seni ikenai upwe efeiochukemi.”​—Akai 2:10-19; Ipru 6:11, 12.

16. Menni “chechchech” a chok arapoto, iwe, met epwe fis?

¹⁶ Lon chok ena ran, alon “Jiowa Sapaot” a tori Akai lon ewe aruanuun me amuchuloon fansoun. A pwarata met weween an epwe “achecha lang me fonufan,” ren an apasa: “Upwe oturatiu ekkewe muu. Upwe awesi nemenemen ekkewe king mi nemeni ekkewe muu, upwe pwal alupalo ekkewe woken fiti ekkewe chon wawa. Ekkewe oris me chon waniir repwe malo, pun iteiten emon me emon leir epwe nielo en me chienan.” (Akai 2:6, 21, 22) Ewe “chechech” epwe muchulo lupwen Jiowa epwe unusen alimelimochu ewe fonufan lon Armaketon. “Ekkewe mi murinno seni ekkewe muu meinisin” repwe fen tolong, ir kewe repwe wiliti longolongun ewe fonufan sefo. A chommong ekkewe popun ach sipwe pwapwa me mwareiti Jiowa!​—Akai 2:7; Pwarata 19:6, 7; 21:1-4.

17. A ifa usun Jises a fotetiu usun chok efoch “ringen impwang”?

¹⁷ Ren an awesalo an we oesini, Akai a makkei: “‘Lon ewe ran,’ upwe angeiok, en Serupapel . . . , Upwe pwal ngonuk usun efoch ringen impwang. Pun en atewe ua afiluk,’ Iei alon ewe Samol mi Unusen Manaman.” (Akai 2:23) Iei Kraist Jises, i noun Jiowa we king me Samol fel mi Lapalap, a achufengenni ekkewe wis lon lang Serupapel ewe Kepina me ewe Samol Fel mi Lapalap Josua ra eani lon ewe Jerusalem won fonufan me lom. Usun chok ewe impwang lon ewe ring won peliefichin poun Jiowa we, Jises, i ewe emon mi fen wiliti “Ewer”, ewe mettoch Jiowa epwe aea le apwonueta chommongun “an Jiowa kewe pwon”. (2 Korint 1:20; Efisus 3:10, 11; Pwarata 19:10) Ekkewe oesini meinisin lon Paipel ra itelapei an Jiowa awora Kraist ewe King me Samol-Fel mi asoresini manauan.​—Jon 18:37; 1 Piter 1:18, 19.

18. Epwe ifa usun ewe amuchuloon “alon Jiowa mi Unusen Manaman” epwe pwonueta?

¹⁸ Enlet lon ach ei fansoun, ewe ling mi lapalap a nonnom lon an Jiowa we imwen fel lon pekin ngun mi saramaram! Iwe ekiselo chok, mwirin an Jiowa amoielo unusen an Satan we otot, pwonuetaan Akai 2:9 epwe lapelo, ewe a era: “‘Ngang upwe fangeto lon ei leeni wou me kinamwe,’ iei alon Jiowa mi Unusen Manaman.” Kinamwe!​—eu kinamwe epwe likiitu me unus, a alukulukutiu ren an Jiowa we “ringen impwang,” Kraist Jises, ewe “Samolun Kinamwe,” atewe a weneiti minne a makketiu: “Iwe, nemeneman epwe chok wattela, nge mwun epwe chok kinamwe fansoun meinisin . . . Iwe, ewe Samol Jiowa mi Unusen Manaman epwe tiliken le apwonueta ei.” (Aisea 9:6, 7) Tori feilfeilo chok lingen imwen Jiowa we imwenfel epwe pwapwalo lon unusen ewe leeni fan an nemenem won mettoch meinisin. Amwo sipwe nonnom tori feilfeilo chok lon imwan na!​—Kol Fel 27:4; 65:4; 84:10.

[Footnote]

Kopwe Tongeni Awewei?

◻ A ifa usun imwen Jiowa we a ‘aurulo ren ling’ ikenai?

◻ Pwata a fokkun atapwalapwal pwe sipwe afalafala ewe kapas allim iei lap seni me lom?

◻ Met popun sipwe atapwalapwal le afalafal me ren ewe 1996 Service Year Report?

◻ A ifa usun Kraist a usun chok an Jiowa we “ringen impwang”?

[Lios lón pekin taropwe 16-19]

1996 SERVICE YEAR REPORT OF JEHOVAH’S WITNESSES WORLDWIDE

(Ppii ewe puk)

[Sasing lón pekin taropwe 14, 15]

“Ekkewe mettoch mi auchea seni mwu meinisin” ra ionfengen lon ekkewe fonuen leset (1), South Amerika (2), Afrika (3), Eisia (4), North Amerika (5), Iurop (6)