“Iei Unusen Wisen Aramas”
“Oupwe niueiti Kot o alleasochisi an kewe alluk pun iei unusen wisen aramas.”—ÄN SALOMON AFALAFAL 12:13.
1, 2. Pwata mi fich ach sipwe ekieki wisach ngeni Kot?
“MET Jiowa a kan kutta sonuk?” Emon soufosun lom a eani ena kapas eis. Iwe mwirin, a affata minne Jiowa a kutta pwe a makkei nge repwe fori minne mi pwung, tongei kirokiroch, me pwarata tipetekison mwen mesen Kot.—Mika 6:8.
2 Lon ei fansoun lupwen aramas ra mochen uta fan pwisin ar nemenem, chommong rese lien efich ewe ekiek pwe Kot a kan kutta mettoch senir. Rese mochen an epwe wor wiser ngeni emon. Nge ifa ussun ewe mettoch Solomon a apwungalo lon Än Salomon Afalafal? “Iei pwunguloon ewe poraus, mwirin ach rong mettoch meinisin: Oupwe niueiti Kot o alleasochisi an kewe alluk. Pun iei unusen wisen aramas.”—Än Salomon Afalafal 12:13.
3. Pwata sipwe ita ekiekifichi ewe puken Än Salomon Afalafal?
3 Ese lifilifil ika mei fet nonnomuch are ach ekiek ussun manau, nge sipwe tongeni kuna feioch lapalap ika sipwe nengeni ifa ussun an a pwungulo ena mettoch. King Solomon, ewe mi wisen makkei ena puk mi fel, a nengeni ekkoch me lein ekkewe mettoch mi fiffis lon manauach iteiten ran meinisin. Eli ekkoch repwe muttir apasa pwe minne a apwungalo a pwarata ekiekingau. Iwe nge, a mak fan an lang emmwen me a tongeni alisikich ach sipwe chosani met sia kan foffori me akkomwa lon manauach, iwe mwirin, epwe lapelo ach pwapwa.
Ach Tottori Ekkewe Mettoch mi Akkaewin Lamot lon Manauach
4. Met Solomon a nengenifichi me aporausa ussun lon Än Salomon Afalafal?
4 Solomon a nengenifichi ‘angangen noun aramas kewe.’ “Ua appwosa letipei pwe upwe kutta me kaeofichi mirit fan iten mettoch meinisin mi fen fis fan lang.” Sap minne Solomon a nounou ewe kapas “angang” fan iten chok an aramas angang ngeni emon, pwe fan iten mettoch meinisin mwan me fefin ra kan fori lon unusen manauer. (Än Salomon Afalafal 1:13) Sipwe popporaus ussun ekkoch mettoch are foffor mi akkaewin lamot, iwe mwirin, sipwe eani apopo ngeni pwisin ach kewe foffor me met sia kan akkomwa lon manauach.
5. Ifa eu me lein ekkewe mettoch aramas ra akkaewin kukkutta?
5 A enlet pwe ekiekin me fofforun chommong aramas ra akkom weneiti ewe mettoch moni. Esap pwung an emon apasa pwe ekiekin Solomon ussun moni a ussun ekiekin ekkoch mi pisekisek, weween, me rer nge a ussun ita pwe moni och chok minen urumot. Atewe a makkei pwe mi lamot an epwe wor nouch moni, iwe, mi murinno an epwe nafoch nouch moni lap seni ach sipwe manau lon osupwang are woungau. (Än Salomon Afalafal 7:11, 12) Nge ese mwaal ka fen kuna pwe moni, pokiten an a tufichin kamo pisek chommong, epwe tongeni wiliiti ewe akkaewin mettoch ekkewe mi woungau me ekkewe mi pisekisek repwe achocho ngeni lon manauer.
6. Met sipwe tongeni kaeo ussun moni seni eu me lein an Jises kewe kapas awewe me minne Solomon a kuna?
6 Chechemeni mwo an Jises kapas awewe ussun ewe mwan mi pisekisek mi achocho le achommonga pisekin pun ese menemenoch. Met popun? Pun ‘manauach ese kan popu seni ekkewe mettoch sia pisekini.’ (Luk 12:15-21) Kunaen Solomon, nge ina epwe lap seni kunaach, a anneta alon Jises. Alleani mwo ewe poraus lon Än Salomon Afalafal 2:4-9. A ttam ewe fansoun an Solomon achocho ngeni an epwe pisekisek. A aueta ekkewe imw me leenien ira sokkopat mi fokkun lingoch. A tufichin moni me nouni chienan kewe fefin mi lioch. Woun fonufan me minne a atufichi i an epwe fori a ita atoto an meefi pwe fofforun kewe me manauan a enletin auchea? Iei poluan lon an eani kapas mi wenechar: “Mwirin ua nennengeni meinisin minne ua fori, pwal ewe angang weires ua fori. Iwe, ua meefi pwe meinisin a poon, a ussun chok turufi asapwal, esor och mettoch mi lamot fan ewe akkar.”—Än Salomon Afalafal 2:11; 4:8.
7. (a) Met kunaen aramas a anneta ussun aucheaan moni? (b) Met ka fen pwisin kuna mi pwarata pwe mi pwung minne Solomon a apwungalo?
7 Ina eu poraus mi wenechar, eu kapas enlet mi pwalo lon manauen chommong. Esor tipemwaramwar pwe ach nouni chommong moni esap pwakini meinisin osukosuk are fitikoko. Eli epwe tongeni pwakini ekkoch, awewe chok ren an a mecheresilo ach kamo mongo me uf. Nge emon aramas a tongeni ufouf echo chok ufan lon eu fansoun me a kan kauk ewe ukukun mongo a tongeni aea. Me ka fen rong porausen ekkewe aramas mi pisekisek, nge ra kuna watte osukosuk pokiten mufesen, ar unummong sakau me safeien opuchopuch, me ar aninifengen me mararir kewe. Iei alon emon mi fokkun pisekisek itan J. P. Getty: “Sap minne moni epwe atoto pwapwa fansoun meinisin. Nge eli ina ewe mettoch a kan efisata letipechou.” A pwung an Solomon ririfengenni tongen silifer me mettoch mi poon. Nge kunaen Solomon ei a mwaalfesen me ena: “Emon mi angang weires a mour kinamwe, ika a wor ekis chok anan ika chommong. Nge emon mi fokkun woummong esap tongeni mour kinamwe ren an aureki woun.”—Än Salomon Afalafal 5:10-12.
8. Ifa ewe popun ach sisap essenuku lamoten moni?
8 Moni me pisek rese pwal atoto lukulukoch fan iten mwach kkan. Ika epwe wattelo noum moni me om pisek, neman epwe lapalo om aurek ren ifa ussun kopwe tuttumunur, me epwe chuen chok wor om tipemwaramwar ussun met epwe fis lesor. Epwe tongeni poutalo ekkena mettoch meinisin, fitifengen me manauom? (Än Salomon Afalafal 5:13-17; 9:11, 12) Pokiten an a ina ussun, esap ita weires ach sipwe weweiti ika pwata manauach are ach angang, epwe ita tekia are auchea seni ach sipwe chok achocho ngeni moni me pisek.
Famili, Itepwa, me Aramas Foummong
9. Pwata a pwung an epwe piita porausen famili lon minne Solomon a chosani?
9 An Solomon chosani manau a pwal weneiti porausen an aramas kon ekiek watte ussun ar famili. Ewe Paipel a menlapei porausen famili, pachelong an aramas kuna pwapwa seni ar nounou me ar amaarata nour kana. (Keneses 2:22-24; Kol Fel 127:3-5; Proverbs 5:15, 18-20; 6:20; Mark 10:6-9; Efisus 5:22-33) Iwe nge, ita ina ewe mettoch mi lamot seni meinisin lon manauach? A ussun ita nge ina ekiekin chommong, pun lon chommong fonu, ra menlapei pupulu, nounou, me ririin lon famili. Iwe nge, Än Salomon Afalafal 6:3 a pwarata pwe inaamwo ika emon epwe nouni ipuku, nge esap ina ewe mettoch epwe atoto pwapwa lon manauch. Ekieki mwo ifa ussun chommong sam me in ra fen ita pennuku manauer fan iten nour kewe ren ar repwe awora ngenir ekkewe mettoch mi murinno le poputaan manauer me met resap osupwang ren. Inaamwo ika a mmen murinno ena mettoch, nge sap minne ina letipen ewe Chon Forikich pwe sipwe kuna manau fan iten chok ach sipwe nounatiu pwal eu tappin aramas, pwe ekkewe man ra kan ina ussun pwe resap rosolo seni fonufan.
10. Pwata epwe tongeni an epwe poon chok an aramas kon ekilapei ar famili?
10 Solomon a makkei fan mirit ekkoch poraus mi enlet ussun ewe famili. Awewe chok, eli emon mwan epwe akkaewin achocho ngeni an epwe awora tufichin noun kewe me noun noun kewe. Nge repwe aramas mi mirit? Are repwe umwesin asolapa minne a fen achocho le ioni fan asengesir? Ika repwe umwes, epwe ifa watten “lamot mwaallin me sopwongauen” ena mettoch!—Än Salomon Afalafal 2:18-21; 1 Kings 12:8; 2 Kronika 12:1-4, 9.
11, 12. (a) Ekkoch ra fen chechchei met sokkun mettoch lon manauer? (b) Pwata sipwe tongeni apasa pwe an aramas achocho ngeni ar repwe itepwa a “usun chok turufi asapwal”?
11 Nge chommong ra ssorei ena mettoch pwe ra kan akkaewin achocho ngeni ar repwe itefoulo are aramas foummong, nge rese lien ekieki ar kewe famili. Eli ina eu lapalap mi kon choufetal lein mwan. Ka fen kuna ena lapalap lon chienom kewe chon sukul are chon angang, are lon chon orum kewe? Chommong ra kan achocho ngeni ar repwe itepwa are eani pochokkulen nemenem won aramas. Nge ifa ukukun aucheaan ena mettoch?
12 Ekieki mwo ifa ussun ekkoch ra kan achocho ngeni ar repwe itefoulo lon fonuer are lon unusen fonufan. Sia kan kuna ena mettoch lon sukul, lon sopwuch kewe, me pwal lon ekkewe sokkopaten kumiin aramas. Ina pwal eu minen amokut lein ir kewe mi mochen ar repwe itefoulo lon och pekin kaeo, lon ekkewe minen apwapwa, me lon pekin nemenem. Iwe nge, esap pwe ina och foffor mi poon? A pwung an Solomon apasa pwe ina eu mettoch mi “ussun chok turufi asapwal.” (Än Salomon Afalafal 4:4) Inaamwo ika emon sarafo epwe itepwa lon eu kumiin chon urumot are eu kumiin chon nikattik, are emon mwan are fefin epwe itefoulo lon eu sopai are lon sopwun we, nge fitemon repwe wesewesen silei ena mettoch? Chommong aramas won fonufan (are pwal mwo nge chommong chon fonuan) ra ita silei pwe ena emon a manau? Are, mi chok sopwosopwolo manauer, nge sanne ra silei och ussun itefouloon ena emon? Iwe, a pwal ina ussun ewe pochokkul are nemenem emon epwe tongeni eani lon an angang, lon eu telinimw, are lon eu kumi.
13. (a) Ifa ussun Än Salomon Afalafal 9:4, 5 a alisikich pwe sipwe eani ekiek mi pung ussun an aramas achocho ngeni ar repwe itefoulo are foummong? (b) Ikkefa ekkewe poraus mi enlet sipwe sap ngeni ika pwe a iei chok ewe manau sipwe eani? (Pi footnote.)
13 Le sopwolon, met a kan fis ngeni ekkena aramas mi itepwa are foummong? Lupwen eu tappin aramas epwe morolo me pwal eu epwe fisita, ekkewe aramas itefoulo are foummong ra kan morolo, iwe, esap wor epwe chuen chemenir. Mi enlet ena ren ekkewe chon aueta imw, chon nikattik, me ekkewe mi angoch lon ekkewe pwal fitu pekin angang, ussun chok an a enlet ena ren ekkewe sou nemenem me ekkewe meilapen sounfiu. Ka ita silei iten fitemon mi manau lefilen 1700 me 1800, nge ir mi eani ekkena sokkun angang? A pwung minne Solomon a apwungalo ussun ena mettoch pwe iei makkeian: “Emon kolak mi manau a murinno mwen emon laion mi pe. Pun ekkewe chon manau ra silei pwe repwe malo. Nge ekkewe sotup resap silei och mettoch, . . . esap pwal wor emon a chechemenir.” (Än Salomon Afalafal 9:4, 5) Iwe, ika pwe a iei chok ewe manau sipwe eani, iwe, mi wesewesen poon chok an aramas achocho ngeni ar repwe itepwa are foummong.a
Met Sipwe Ita Annefota me Wisen Apwonueta
14. Pwata ewe puken Än Salomon Afalafal epwe ita alisikich lon pwisin manauach?
14 Solomon ese mak ussun chommong foffor, kokkot, me minen apwapwa aramas ra akkaewin achocho ngeni. Iwe nge, minne a mak a naf. Esor popun sipwe letipechou are apilukulukungau ren ach nengeni masouen ewe puk pun fan poraus mi wenechar sia fen kaeo eu puken Paipel Jiowa Kot a akkota an epwe mak fan iten feiochuch. Epwe tongeni alisikich meinisin pwe sipwe awenechara ach ekiek ussun manau me met sipwe kan annefota. (Än Salomon Afalafal 7:2; 2 Timoti 3:16, 17) A akkaewin ina ussun pokiten minne Jiowa a alisi Solomon an epwe apwungalo.
15, 16. (a) Ifa an Solomon ekiek ussun an aramas kuna pwapwa lon manauer? (b) Me ren Solomon, an aramas kuna pwapwa lon manauer a longolong won met?
15 Eu poraus Solomon a epiieta fan chommong, iei ewe poraus pwe chon angangen ewe Kot mi enlet repwe ita kuna chengel lon ar kewe foffor me angang mwen mesan. “Iwe, ua silei pwe esap wor och a murinno lap seni an emon epwe pwapwa o fori minne a murinno lon fansoun manauan. Nge ua pwal silei pwe aramas meinisin repwe mongo o un, repwe pwal pwapwa lon ar angang weires. Pwal iei eu liffang me ren Kot.” (Än Salomon Afalafal 2:24; 3:12, 13; 5:18; 8:15) Nengeni mwo pwe Solomon ese apochokkula ewe ekiekin chei minen apwapwa, esap pwal ewe ekiek mi apasa, ‘Sipwe chok mommongo o ukun, pwe lesor sipwe malo.’ (1 Korint 15:14, 32-34) Alon a wewe ngeni pwe sipwe kuna pwapwa lon met sia kan efich, awewe chok ren ach mongo me un, fansoun ach ‘sipwe foffor murinno lon manauach.’ Esor tipemwaramwar pwe ena mettoch a awenewena manauach ngeni letipen ewe Chon Forikich, ewe mi apwungalo minne a enletin murinno.—Kol Fel 25:8; Än Salomon Afalafal 9:1; Mark 10:17, 18; Rom 12:2.
16 Iei makkeien Solomon: “Iwe, kopwe chok mongo onom mongo, kopwe pwal unumi unumom wain fan pwapwa, pun iei minne Kot a tipeeu ngeni.” (Än Salomon Afalafal 9:7-9) Ewer, emon mwan are fefin mi wesewesen eani ewe sokkun manau mi enletin auchea a kan akeani ekkewe foffor mi apwapwai Jiowa. Iwe, ena mettoch a wewe ngeni ach sipwe ekkekieki i fansoun meinisin. A mmen sokkofesen ena ekiek seni ekiekin chommong aramas, pun ekkewe foffor ra kan eani a longolong won ekiekin aramas!
17, 18. (a) Met aramas ra kan foffori pokiten minne ra kukkuna lon manauer? (b) Fansoun meinisin sipwe ita chechemeni met ussun ewe mettoch sopwongau me sopwoch?
17 Inaamwo ika ekkoch lamalam ra kan afalafal ussun manau mwirin malo, nge chommong aramas ra luku pwe a iei chok ewe manau repwe wesewesen eani. Eli ka fen kuna ar fori minne Solomon a awewei: “Pokiten apwungun och fofforingau ese muttir pwonuta, ina ewe popun an a fen lukulukutiu lon letipen aramas ewe ekiekin ar repwe fori mettoch mi ingau.” (Än Salomon Afalafal 8:11) Pwal mwo nge ekkewe rese ppwosotiu lon foffor mi ingau ra kan pwarata pwe ra akkaewin ekieki ewe manau mi nom rer iei. Ina eu popun a fen kon ssenuk lon letiper lamoten moni, pisek, pochokkulen nemenem won aramas, ar famili, me met kewe. Iwe nge, esap ina amuchuloon makkeien Solomon. A pwal makkei pwe: “Inaamwo ika emon chon tipis a fofforingau fan ipuku, nge a pwal manauattam, ua chok silei pwe chokewe mi niueiti Kot o menniniti repwe feioch. Nge ekkewe chon fofforingau resap feioch. Manauer a ussun chok ngunuer, resap pwal tongeni manauattam, pun resap niueiti Kot.” (Än Salomon Afalafal 8:12, 13) A ffat pwe Solomon a wesewesen luku nge sipwe sopwoch ika sipwe ‘niueiti ewe Kot mi enlet.’ Epwe ifa ukukun sopwochuch? Sipwe tongeni kuna poluan lon ekkewe mettoch a amwaalfeseni me asan. Jiowa epwe tongeni ‘attama ranin manauach.’
18 Ekkewe mi chuen kukkun ierir repwe ita akkaewin ekieki ei kapas enlet mi wesewesen lukuchar mi era pwe repwe sopwoch ika repwe niueiti Kot. Eli ka fen pwisin kuna pwe ewe chon ssa mi muttir seni meinisin epwe tongeni nikatuttum me kkuf lon ewe kitir. Eu mwichen sounfiu mi wesewesen pochokkul epwe tongeni kkuf. Emon chon sopai mi mwokos epwe tongeni woungauolo. Iwe, pwal chommong mettoch sia kan tipemwaramwar ussun a kan efisata lukulukungau lon manauach. Nge mi lukuchar ei mettoch: Ewe al mi kon tipatchem me lukulukoch seni meinisin, iei ewe alen ach sipwe pwapwaesini manau fansoun ach sipwe eani foffor murinno fan nemenien an Kot kewe alluk me fan letipan. (Än Salomon Afalafal 9:11) A kan kapachelong ach kakkaeo seni Paipel minne letipen Kot, ach fangolo manauach ngeni i, me ach wiliiti chon Kraist mi papatais.—Mattu 28:19, 20.
19. Ifa ussun ekkewe sarafo repwe tongeni aea manauer, nge ifa ewe alen tipatchem?
19 Ewe Chon Forikich esap eriani ekkewe sarafo are io ekkan mwo pwe repwe tipeeu ngeni an emmwen. Ir mi tongeni achocho ngeni ar repwe sukul, iwe, eli repwe kakkaeo chommong, chommong puk, makkeien aramas, lon unusen manauer. Iwe nge, lo, lo, ina eu mettoch repwe chipwang ren. Are ir mi tongeni feffetal fan emmwenien letiper ese unusoch are tapwelo mwirin met meser a kan efich. Ina eu mettoch epwe wesewesen atoto osukosuken letiper, me lo, lo, epwe letelo pwe mi lamot mwaal chok ar eani ena sokkun manau. (Än Salomon Afalafal 11:9–12:12; 1 Jon 2:15-17) Ina minne, Solomon a eani ei kapasen pesepes ngeni ekkewe sarafo, nge iei eu pesepes oukich meinisin sipwe ekilapei, ese lifilifil ika fitu ierich: “Iwe, le aluwolum kopwe chechemeni ewe mi foruk, mwen ekkewe ran mi ngau repwe feito. Pun epwe war ewe fansoun kopwe apasa ussun, ‘Usap fokkun efich ei fansoun ua nom lon.’”—Än Salomon Afalafal 12:1.
20. Ifa ewe ekiek mi pwung ussun ewe poraus lon Än Salomon Afalafal?
20 Iwe, met sipwe apwungalo? Iwe, a ifa ussun ewe mettoch Solomon a apwungalo? A kuna, are nengenifichi, “meinisin minne aramas ra fori won fonufan. Iwe, ua kuna pwe mettoch meinisin ra poon, a ussun chok turufi asapwal.” (Än Salomon Afalafal 1:14) Sise kuna lon ewe puken Än Salomon Afalafal alon emon mwan mi maras are sorongau lelukan. Ekkena kapas ra kapachelong lon an Kot Kapas mi fel me mi fichitir ach sipwe nengeniochur.
21, 22. (a) Solomon a nengeni met sokkun mettoch lon manauen aramas? (b) Le sopwolon, ifa ewe mettoch mi mirit a apwungalo? (c) Ifa ussun ach nengenifichi masouen Än Salomon Afalafal a weneiti manauom?
21 Solomon a nengeni an aramas kewe angang, ar pworacho ngeni mettoch mi weires, me minne ra ekiekin apwonueta. A ekiekifichi sopwolon ekkewe foffor aramas ra kan eani me an aramas kuna pwe mi poon chok chommong mettoch ra achocho ngeni. A nengeni apwangapwangen aramas me ewe malo mi fis seni. Iwe, a apachalong met Kot a aiti ngeni ussun lapalapen ekkewe mi malo me met sokkun apilukuluk a nom ren aramas fan iten manau lon mwach kkan. A chosa ekkena poraus meinisin ren emon mwan mi eani ewe sokkun tipatchem lang a suuki ngeni, ewer, i emon lein ekkewe aramas mi kon tipatchem seni meinisin. Iwe mwirin, minne a apwungalo a kapachelong lon ewe Paipel mi Fel fan iten feiochun meinisin mi mochen eani ewe sokkun manau mi enletin auchea. Sisap ita tipeeu ngeni ena mettoch?
22 “Iwe, oupwe rong ei kapasen le sopwolon: Oupwe niueiti Kot o alleasochisi an kewe alluk, pun iei unusen wisen aramas. Nge Kot epwe apwungu foffor meinisin, pwal iteiten foffor mi fis le monomon, ika a murinno ika a ngau.”—Än Salomon Afalafal 12:13, 14.
[Footnote]
a Fan eu a mak ei kapas mi mirit lon Ewe Leenien Mas: “Sisap asolapa manauach ren ach chei mettoch mi poon . . . Ika pwe a iei chok ewe manau sipwe eani, iwe, ese wor och mettoch mi lamot, Manauach iei a ussun chok efou por emon a moneta lon ewe asapwal, iwe, a muttir turutiu le ppwul. A ussun nurun och mettoch mi muttir morolo, eu poon ira mi pwaselo, efoch fetil mi pokupok, iwe, a muttir pwaselo. . .Manauach a ussun och tikitik ese lien pwa lon fetalin ekkewe ier seni lom lom tori feilfeilo chok. Esap pwal ussun echchi konik lon ewe chanpupuun fetalin fansoun. A wesewesen pwung [Solomon] lupwen a nengeni ekkewe chommong mettoch aramas ra kan ekieki me fori lon manauer, iwe, a apasa pwe ir mi chok lamot mwaal. Sia kon muttir morolo, ina minne, a ussun ita nge ese fen wor popun ach sia manau, pwe kich emon lein fite, fite billion mi fen uputiu me malo, iwe, fokkun chokukkun chok ra silei pwe sia fen manau. Sap minne a mak ei poraus fan iten esiit are minen aletipechou are lichipung are apilukulukungau. Iei eu poraus mi enlet, eu kapas enlet sipwe sap ngeni, eu ekiek mi pwung, ika pwe a iei chok ewe manau sipwe eani.”—August 1, 1957, pekin taropwe 472, wokisin 16.
En mi Chechemeni?
◻ Ifa ewe ekiek mi pwung ussun lamoten pisek lon manauom?
◻ Pwata sipwe pi pwe esap kon ssenuk ach ekieki ach famili, itepwa, are pochokkulen nemenem won aramas?
◻ Ifa ewe ekiek mi fel ussun pwapwa Solomon a pesei aramas ar repwe eani?
◻ Ifa ussun ka fen kuna feioch seni ach nennelong lon ewe puken Än Salomon Afalafal?
[Ekkewe sasing lón pekin taropwe 27]
Moni me pwapwa rese kan alukulukatiu kinamween letip
[Sasing lón pekin taropwe 29]
Ekkewe sarafo repwe tongeni wesewesen achifoua pwe repwe sopwoch ika repwe menniniti Kot