Suuki Letipom Pwe Kopwe Weweoch Ren

“Jiowa a pwisin fangolo tipatchem; i a atowu silelap me weweoch.”​—ÄN SALOMON FOS 2:6.

1. Epwe ifa usun sipwe tongeni suuki letipach ngeni weweoch?

JIOWA, i ach we Sense mi Lapalap. (Aisea 30:20, 21) Nge met sipwe fori ika sia mochen kuna feioch seni “silelapen Kot” mi pwapwalo lon an we Kapas? Iei och, sipwe ‘suuki letipach pwe sipwe weweoch ren’​—sipwe mochen angei me pwarata ena lapalap seni lon letipach. Ren ena, sipwe nennengeni Kot, pun ewe mwan mi tipatchem a era: “Jiowa a pwisin fangelo tipatchem; i a atowu silelap me weweoch.” (Än Salomon Fos 2:1-6) Meta silei, tipatchem, me weweoch?

2. (a) Met weween ewe mettoch silei? (b) Epwe ifa usun kopwe awewei ewe kapas tipatchem?

² Silei a wewe ngeni an aramas angei poraus seni minne a fis ngeni, minne a kuna, are kaeo. Tipatchem, ina ewe tufichin anganga an silei. (Mattu 11:19) King Solomon a pwarata tipatchem lupwen ruuemon fefin ra apasa pwe nour emon chok semirit, iwe, a aea an silei usun an inelap tongei noun pwe epwe apwungalo ewe fitikoko. (1 Kings 3:16-28) Weweoch, ina “pwungun kapung.” Ina “ewe manamanen are tufichin tupuach le esinna eu mettoch seni pwal eu mettoch.” (Webster’s Universal Dictionary) Ika sipwe suuki letipach ngeni weweoch, Jiowa epwe ngenikich ren Noun we. (2 Timoti 2:1, 7) Nge ifa usun weweoch epwe kku sokkopaten kinikinin manauach?

Weweoch me Ach Kapas

3. Epwe ifa usun kopwe awewei Än Salomon Fos 11:12, 13, me met weween “osupwang ren miritin letip”?

³ Weweoch epwe alisikich le mirititi pwe mei wor “eu fansoun ach sipwe fanafanalo me eu fansoun kapas.” (Än Salomon Afalafal 3:7) Ena lapalap epwe pwal alisikich ach sipwe tumunu minne sipwe apasaou. An Salomon Fos 11:12, 13 a apasa: “Emon mi tiparoch a aitengaua chon orun, nge emon mi mirit a fanafanalo. Emon mi kukuloufeil o luapas a apworausa minne a monomon, nge atewe mi allukuluk a amonomona.” Ewer, emon mwan are emon fefin mi oput emon a “osupwang ren miritin letipan.” Me ren ewe sou kaeo fos itan Wilhelm Gesenius, ena sokkun aramas a “osupwang ren weweoch.” A nafangau ren miritoch, iwe, an nounou ewe fos “letip” a pwarata pwe a nafangau ekkewe lapalapochun ewe aramas lon. Ika emon mi era pwe i emon chon Kraist epwe etileepat tori an epwe pweni are aitengaua emon, ekkewe elter mi seikita repwe fokkun mwokutukut pwe epwe wesoch ena osukosuk lon ewe mwichefel.​—Lifitikos 19:16; Kol Fel 101:5; 1 Korint 5:11.

4. Met ekkewe chon Kraist mi mirit repwe fori ren och poraus mi monomon?

⁴ Sokko seni ir kewe mi “osupwang ren miritin letiper”, aramas mi “weweoch” repwe chok fanafanalo atun epwe fich ngeni. Resap akkaffata minne epwe ita monomon. (Än Salomon Fos 20:19) Pokiten ra silei pwe tumunungau le kapas epwe efisi feiengau, ekkewe mi weweoch repwe “tuppwol lon ngunur”. Repwe tuppwol ngeni chiener kewe chon luku me resap pwarata poraus mi monomon mi tongeni efeiengaua chiener kewe chon luku. Ika ekkewe Chon Kraist mi mirit ra angei sokkun poraus mi monomon ese lifilifil usun ewe mwichefel, repwe chok isoni nge resap affata tori fansoun an Jiowa we mwicheich epwe ekieki pwe epwe pwaralo ren an pwisin peresei.

Weweoch me Ach Foffor

5. Met ekiekin ‘ekkewe mi tiparoch’ usun fofforun sikepwach, iwe, pwata?

⁵ Ekkewe mwitun lon Paipel ra alisikich le aea mirit me ti senikich foffor ese pwung. Awewe chok, Än Salomon Fos 10:23 a era: “Emon chon tiparoch a pwapwa are a fori minne a mwaal, nge emon mwan mi weweoch a pwapwa ren an tipatchem.” Ir kewe mi “pwapwaiti foffor-mwaal” rese mefi ukukun ngauen ar kewe foffor me tunalo Kot, pun meinisin repwe pwarata en me manauan ngeni Kot. (Rom 14:12) Ekiekin chon ‘tiparoch’ a fokkun mwaalilo pun ra ekieki pwe Kot ese kuna ar kewe fofforingau. Ren ar kewe foffor, ra ita apasa: “Esor emon Jiowa.” (Kol Fel 14:1-3; Aisea 29:15, 16) Pokiten rese alleasochisi ekkewe kapasen emmwen seni Kot, a nafangau ar weweoch me esap pwung ar apwungalo mettoch meinisin.​—Än Salomon Fos 28:5.

6. Pwata sipwe apasa pwe fofforun sikepwach, ina eu foffor mi tiparoch, iwe, epwe met ach ekiek usun ena foffor ika sipwe mirit?

⁶ “Ewe mwan mi weweoch” a mirititi pwe fofformwaal esap usun och “urumot”. A silei pwe a aletipengaua Kot me epwe tongeni ataielo ach riri ngeni. A tiparoch ena sokkun foffor pun a ataielo an aramas mefi lamoter, a aingaua ekkewe pupulu, a efeiengaua tupuach me inisich, me a emmwen ngeni apwangapwang lon pekin luku. Ina minne sipwe incline letipach ngeni mirit me ti senikich fofforingau are fofforun sikepwach meinisin.​—Än Salomon Fos 5:1-23.

Weweoch me Ngunuch

7. Ikkefa ekkoch mettoch epwe tongeni fis ngenikich pokiten song?

⁷ Inclining letipach ngeni mirit epwe pwal alisikich le nemeniochu ngunuch. Än Salomon Fos 14:29 a apasa, “Emon mi mang ngeni song a watte an weweoch, nge emon mi muttir ngeni song a pwarata watten an tiparoch”. Iei eu popun emon mi mirit epwe achocho le tumunu seni nisosong, pun epwe tongeni efeiengaua pwisin inisin. Epwe uri feita chcha me efisi semmwenin ngasangasan. Ekkewe tokter ra era pwe song me lingeringer ra tongeni aingaua are efisata mwi, semmwenin unuchen, semmwenin luk, me ulcers.

8. Met epwe tongeni fis ika sisap mosonottam, nge ifa usun ewe mettoch weweoch epwe alisikich lon ei mettoch?

⁸ Sap minne sipwe weweoch me “mang le song” pokiten chok sipwe mochen tumunu pochokkulen inisich. Ika sisap mosonottam, sipwe tongeni fori minne mi umwes sipwe mengiringiriiti mwirin. Weweoch epwe alisikich le ekieki met epwe fis ika sisap tumunu ach kapas are foffor, iwe, epwe tumunukich seni ach “atekiata minne mi tiparoch” ren ach fori minne mi umwes. Weweoch epwe akkaewin alisikich le mirititi pwe lingeringer epwe tongeni aosukosuka ach tufichin ekiek pwe sisap eani ekiek pwung. Epwe aingaua ach tufichin fori letipen Kot me manau ren an Kot kewe kapasen emmwen. Ewer, sipwe feiengau lon pekin ngun ika sipwe nom fan nemenien sossong. Enlet, “ach sipwe sossong” a nonnom lein ekkewe “angangen fituk” mi anioput epwe pinei ach sipwe alemwiri an Kot we Muu. (Kalesia 5:19-21) Iwe, kich chon Kraist mi mirit, sipwe muttir le rong; mang le kapas, mang le song.”​—Jemes 1:19.

9. Ifa usun weweoch me tong repwe alisikich ach sipwe awesalo osukosuk?

⁹ Ika sipwe mefi song, weweoch epwe amwokutukich ach sipwe fanafanelo fan iten ach sisap efisi fitikoko. Än Salomon Fos 17:27 a apasa: “Emon mi mang le fos a wor an silelap, nge emon mi mosonottam i emon mi weweoch.” Weweoch me tongen pwipwi epwe alisikich le kuna lamoten ach sipwe nemeniochu ach mochen apasaou och mettoch mi hurtful. Ika a fen fis song, tong me tipetekison epwe amwokutukich ach sipwe omusomus me chasefal. Nge met ika emon a amangauakich. Iwe, sipwe kaeo ngeni i chok ren mosonoson me tipetekison fan iten ach sipwe efisata kinamwe.​—Mattu 5:23, 24; 18:15-17.

Weweoch me Ach Famili

10. Epwe met lamoten tipatchem me mirit lon manauen eu famili?

¹⁰ A lamot chon eu famili repwe pwarata tipatchem me mirit, pun ekkena lapalap repwe aufichieta eu famili. Än Salomon Fos 24:3, 4 a apasa: “Eu imw a kauta ren tipatchem o nukunuk ren mirit, nge ia a wor silelap ie, ekkewe ruumwen lon ra ur ren sokkopaten pisek mi auchea me murinno.” Tipatchem me weweoch ra usun chok ekkewe pilak le aueta eu imw mi murinno. Mirit epwe alisi chon Kraist sam me in ar repwe uwawu mefien me aurekin nour kewe semirit. Emon aramas mi mirit a tongeni pwarata mefian, auseling ngeni, me mirititi mefien me ekiekin puluwan we.​—Än Salomon Fos 20:5.

11. Ifa usun emon fin pupulu mi weweoch epwe ‘apochokkulata chon le imwan kewe’?

¹¹ Tipatchem me mirit ra fokkun lamot fan iten pwapwan famili. Awewe chok, Än Salomon Fos 14:1 says: “Emon fefin mi tipatchem a aueta imwan, gne emon mi tiparoch a pwisin ataietiu imwan.” Emon fin pupulu mi tipatchem me mirit mi alleasochisi puluwan we epwe angang weires fan iten an epwe ochiti chon le imwan kewe me aueta an famili. Epwe ‘aueta imwan we’ ika epwe kapasoch usun puluwan we me alapalo an aramas sufoluti atewe. Iwe, emon fin pupulu mi lipwakoch me weweoch mi niuokkusiti Jiowa epwe fori pwe aramas repwe mwareiti.​—Än Salomon Fos 12:4; 31:28, 30.

Weweoch me Alen Manauach

12. Met ekiekin ir kewe mi “osupwang ren miritin letiper” usun ekkewe foffor mi umwes are michimich, iwe, pwata?

¹² Weweoch epwe alisikich le aleni ewe aleni pwung lon ach kewe foffor meinisin. Ina weween Än Salomon Fos 15:21, a apasa: “Emon esap wor an mirit a pwapwaiti umwes, nge emon mi mirit a fori minne a pwung.” Epwe ifa usun sipwe weweiti ena mwitun? Ewe fofforun michimich, are urumot chok, ina eu minen apwapwa ngeni mwan, fefin, me semirit mi umwes. Ra “osupwang ren minne epwe popu seni ewe letip,” minne epwe kan amwokutur, me ra kon tiparoch pwe ra pwapwaiti minne mi umwes.

13. Met Salomon a weweiti usun takir me an aramas ekkekieki chok urumot?

¹³ Ewe Kingen Israel itan Solomon a kuna pwe a chok lamot-kisikis pwapwan fonufan. A pwarata: “Iwe, ua ekieki lon letipei: ‘Upwe sotuni pwapwan fonufan pwe upwe chok pwapwa.’ Nge a pwa pwe pwal ei poon chok. Nge murin ua mefi pwe takir umwes chok. Met echok lamoten pwapwa?’” (Än Salomon Afalafal 2:1, 2) Emon mwan mi mirit, Solomon a kuna pwe takir me pwapwa chok rese lamot, pun rese efisata pwapwa mi enlet mi nomottam. Eni takir epwe alisikich le monukalo ach kewe osukosuk ren fansoun mwochomwoch, nge mwirin ekkewe osukosuk repwe tongeni watteta. Epwe pwung an Solomon apasa pwe takir a “umwes.” Pwata? Pun epwe tongeni topotopelo ekiek pwung ren ewe mettoch takir mi umwes. Eni epwe amwokutukich ach sisap alamota minne epwe lamot ngenikich. Ewe sokkun apwapwa mi fiti ekkewe kapas me fofforun emon sou forata an aramas takir epwe lamot-kisikis. Ach mirititi minne Salomon kuna me apasa usun ewe mettoch pwapwa epwe alisikich ach sipwe tumunukich pwe sisap “tongei minne repwe pwisin pwapwa ren nge resap tongei Kot.”​—2 Timoti 3:1, 4.

14. Ifa usun emon mwan mi weweoch epwe “fetal wenechar”?

¹⁴ Ifa usun emon mwan mi weweoch epwe “fetal wenecharelo”? Weweoch lon pekin ngun me pwonuetaan kapasen emmwen seni Kot a kan emmweni aramas lon efoch al mi pwung me wenechar. Ewe Paipel fofforun Byington a apasa: “Fofforun umwes epwe eu minen apwapwa ngeni emon mwan mi ese ekiekoch, nge emon mwan mi mirit epwe fetal wenechar.” “Ewe mwan mi weweoch” epwe awenecharalo ekkewe al ngeni pechen me esinna lefilen minne mi murinno o minne mi ingau pokiten an apwonueta an Kot Kapas lon manauan.​—Ipru 5:14; 12:12, 13.

Nennengeni Jiowa pwe Epwe Awora Weweoch Fansoun Meinisin

15. Ifa ewe mettoch sia kaeo seni Än Salomon Fos 2:6-9?

¹⁵ Ren ach sipwe aleni ewe alen pwung lon manauach, epwe lamot kich meinisin sipwe pwarata pwe sise unusoch me pwal nennengeni Jiowa pwe epwe awora weweoch. Än Salomon Fos 2:6-9 a apasa: “Jiowa a fangala tipatchem, i a atowu silelap me weweoch. A atufichi ekkewe chon pwung o tumunu chokewe mi wenechar seni feiengau usun eu tit. A mamasa ekkewe chon pwung o tumunu noun kewe mi allukuluk. Are kopwe auselingaei, murin kopwe weweiti minne a pwung, let me wenechar, kopwe pwal silei minne kopwe fori.”​—Alollo ngeni Jemes 4:6.

16. Pwata ese wor tipatchem, mirit, are kapasen fon lon ekkewe fofforun u ngeni Jiowa?

¹⁶ Atun sipwe sinneni ach lukuluk won Jiowa, sipwe achocho le mirititi letipan we ren ach chosani an we Kapas. I a eani tipatchem mi lapalap seni meinisin, iwe, an kapasen emmwen epwe efeiochukich fansoun meinisin. (Aisea 40:13; Rom 11:34) Enlet, a lamotengau kapasen emmwen mi u ngeni an Kot kapas. Än Salomon Fos 21:30 a apasa: “An aramas tipatchem, mirit me kapasen ourour resap tongeni upalu ngeni Jiowa.” (Alollo ngeni Än Salomon Fos 19:21.) Mirit lon pekin ngun chok, ewe sipwe angei ren ach kakkaeo an Kot we Kapas ren alillisin ekkewe puk mi kawor ren “ewe chon angang mi tuppwol o tipatchem,” epwe alisikich le feffetal lon ewe alen pwung lon manauach. (Mattu 24:45-47) Ina minne sipwe atipeeufengenni manauach me ewe kapasen fon seni Jiowa, pun inaamwo ika kapasen emmwen mi u ngeni an we Kapas epwe ita pwung me rech, nge esap fokkun lollo ngeni an we Kapas.

17. Met epwe tongeni fis ika epwe mwaal och kapasen fon?

¹⁷ Chon Kraist mi mirit mi awora kapasen fon ra weweiti pwe epwe unusen alongolong won an Kot we Kapas me ar kakkaeo me ekkekiek won Paipel epwe lamot me mwen ar repwe polueni eu kapas eis. (Än Salomon Fos 15:28) Ika a mwaalilo ar polueni ekkoch kapas eis usun poraus mi lamot watte, epwe tongeni efisata osukosuk are feiengau watte. Ina minne, epwe lamot ekkewe Chon Kraist elter repwe mirit lon pekin luku me repwe iotek fan iten an Jiowa emmwen lupwen repwe achocho le alisata chiener kewe chon luku.

Awattelo Ach Mirit lon Pekin Ngun

18. Ika epwe fis och osukosuk lon ewe mwichefel, epwe ifa usun ewe mettoch weweoch epwe alisikich le akkamwochu ach itepok me ruuepek lon pekin ngun?

¹⁸ Ren ach sipwe apwapwai Jiowa, epwe lamot ach sipwe “mirit lon mettoch meinisin.” (2 Timoti 2:7) Ach kakkaeo ewe Paipel me mwokutukut fan emmwenien an Kot we Ngun mi Fel me an we mwicheich epwe alisikich le mirititi met sipwe fori lupwen epwe torikich och mettoch mi tongeni emmwenikich won ewe al mi mwaal. Awewe chok, epwe ifa usun ika sia mefi pwe ese kon lien fisoch eu mettoch lon ewe mwichefel. Ach mirit lon pekin ngun epwe amef ngenikich pwe sap minne ina eu popun sisap chuen mwimwichfengen ren noun Jiowa kewe aramas me ukkutiu seni ach angang ngeni Kot. Ekieki mwo usun ach kilisou pwe sipwe angang ngeni Jiowa, ach ngaselo lon pekin ngun sia kan pwapwaiti, me ewe pwapwa sipwe tongeni kuna seni ach angangen afalafala ewe Muu. Ach mirit lon pekin ngun epwe atufichikich ach sipwe eani ewe ekiek pwung me weweiti pwe kich chon fangelo manauach ngeni Kot me sipwe acheni ach ririoch ngeni, nge esap lifilifil minne ekkewe ekkoch repwe fori. Ika ese chuen wor och mettoch sipwe tongeni fori fan an Kot we kokkot pwe sipwe awesalo och osukosuk, epwe lamot ach sipwe mosonottam me witiwit won Jiowa an epwap awenechara ewe mettoch. Sisap ukkutiu are letipechou ren, nge sipwe “apilukuluku Kot.”​—Kol Fel 42:5, 11.

19. (a) Ifa ewe mettoch Paul a itelapei lon an iotek fan iten ekkewe chon Filipai? (b) Ifa usun ewe mettoch weweoch epwe tongeni alisikich ika sise kon lien unusen weweiti och mettoch?

¹⁹ Ach mirit lon pekin ngun epwe alisikich pwe sipwe akkamwochu ach tuppwol ngeni Kot me noun kewe aramas. Paul a ereni ekkewe chon Kraist lon Filipai: “A iei chok usun ai iotek, pwe ami tong epwe fokkun lapelo seni lom, ren ami silei o pwal ren sokkun tipatchem meinisin, pwe ami oupwe tongeni esissinata minne mi murinno, o oupwe limelimoch, o esap wor ami tikitiki-pwul tori ewe ranin Kraist.” (Filipai 1:9, 10) Ren ach sipwe eani ewe ekiek pwung epwe lamot ngenikich “sokkun tipatchem meinisin me ach sipwe unusen mirit.” Ewe kapasen Krik ikkeei ie mi affou ngeni “mirit” a wewe ngeni “wewefichiti minne mi pwung.” Lupwen sipwe kaeo och mettoch, sipwe mochen weweiti an riri ngeni Kot me Kraist me ekkekiekfichi ifa usun an a pwapwarata lapalapen Jiowa kewe me an alillis. Ei mettoch epwe apochokkulata ach mirit me ach aucheani minne Jiowa Kot me Jises Kraist ra fen fori fan asengesich. Ika sise kon lien unusen weweiti och mettoch, ewe mettoch mirit epwe alisikich pwe sipwe mirititi pwe epwe lamot ach sisap poutalo senikich ach luku me ekkewe mettoch meinisin mi lamot sia fen kaeo usun Kot, Kraist, me an kewe kokkot.

20. Ifa usun epwe tongeni wattelo ach weweoch lon pekin ngun?

²⁰ Epwe watte ach weweoch lon pekin ngun ika sipwe atipeeufengenni ach ekiek me foffor ngeni an Kot we Kapas iteiten fansoun meinisin. (2 Korint 13:5) Ach sipwe fofforochu ei mettoch epwe alisikich ach sipwe tipetekison, nge sisap chok apochokkula pwisin ach ekiek me esiita ekkewe ekkoch. Ewe mettoch mirit epwe alisikich ach sipwe kuna feioch seni an emon apwungukich me esissinata minne mi lamot. (Än Salomon Fos 3:7) Ren ach mochen apwapwai Jiowa, sipwe achocho ngeni ach sipwe sileifichi ekkewe poraus mi enlet seni an we Kapas. Ei mettoch epwe atufichikich ach sipwe esinna lefilen minne mi pwung me mwaal, weweiti minne mi wesewesen lamot, me akkamwochu ach ririoch ngeni Jiowa ren tuppwol. Epwe tufich ekkeei mettoch meinisin ika letipach epwe suuk ngeni weweoch. Nge, a lamot pwal eu mettoch. Epwe lamot ach sipwe mut ngeni ewe mettoch weweoch an epwe tutumunukich.

Epwe Ifa Usun Kopwe Polueni?

◻ Pwata sipwe suuki letipach ngeni weweoch?

◻ Ifa usun ewe mettoch weweoch epwe tongeni kku ach kapas me foffor?

◻ Ifa usun ewe mettoch weweoch epwe tongeni kku lapalapach kewe?

◻ Pwata sipwe kan kutta alillis seni Jiowa ren ewe mettoch weweoch?

[Sasing lón pekin taropwe 21]

Weweoch a alisikich ach sipwe nemeni ach ekiek

[Sasing lón pekin taropwe 23]

Ewe King mi mirit Salomon a esissinata pwe ese feioch an aramas ekkekieki chok urumot.