Weweoch Epwe Tumunuk

“Iwe, mirit epwe mamasok, nge weweoch epwe tumunuk.”​—ÄN SALOMON FOS 2:11.

1. Weweoch epwe tumunukich seni met?

JIOWA a mochen om kopwe weweoch. Pwata? Pun a silei pwe epwe tumunuk seni sokkopaten feiengau. Le poputaan Än Salomon Fos 2:10-19 a apasa: “Lupwen tipatchem epwe tolong lon lelukom, o silelap epwe apwapwai ngunum, iwe, mirit epwe mamasok, nge weweoch epwe tumwunuk.” Tumunuk seni met? Seni ekkeei sokkun mettoch, awewe chok, “ewe al mi ingau,” “ir kewe mi likitala ekkewe al mi wenechar, o fetal won ekkewe alen rochopwak me tipis.”

2. Meta weweoch, iwe, met sokkun weweoch chon Kraist ra akkaeuin mochen eani?

² Ese mwaal kopwe chechemeni pwe weweoch, ina ewe mettoch mi atufichikich ach sipwe esinna lefilen ruu mettoch. Emon mi weweoch a esinna lefilen ruu sokkun ekiek are mettoch mi sokkofesen, iwe, a pwal angoch le apungu mettoch. Kich chon Kraist sia akkaewin mochen angei weweoch lon pekin ngun mi alongolong won ach sileifichi minne mi enlet usun an Kot we Kapas. Lupwen sipwe kakkaeo ewe Paipel, a usun ita nge sipwe aueta weweoch ekis me ekis. Minne sipwe kaeo epwe tongeni alisikich le filita minne epwe apwapwai Jiowa.

3. Epwe ifa usun sipwe angei weweoch lon pekin ngun?

³ Lupwen Kot a eisini ewe kingen Israel itan Solomon met sokkun feioch a mochen angei, ewe sou nemenem a apasa: “Kopwe fang ngeniei ngang noum chon angang eu leluk mi mirit pwe upwe tongeni nemeni noum aramas fan pwung o alefila minne a och me minne a ngau.” Solomon a tingor mirit, iwe, Jiowa a fangolo ngeni watten weweoch. (1 Kings 3:9; 4:30) Ren ach sipwe angei weweoch, epwe lamot ach sipwe iotek pwal kakkaeo an Kot we Kapas ren alillisin ekkewe puk mi kawor ren “ewe chon angang mi tuppwol o tipatchem.” (Mattu 24:45-47) Epwe alisikich le amarata weweoch lon pekin ngun fan iten ach sipwe “usun ekkewe mi tipenmwan ren ach ekiek,” pwal tufichin “esinna lefilen minne mi pwung me minne mi mwaal.”​—1 Korint 14:20; Ipru 5:14.

A Fokkun Lamot Ach Sipwe Weweoch

4. Met weween pwe mesach epwe “murinno”, iwe, epwe ifa usun an epwe efeiochukich?

⁴ Ren weweoch mi fich, ach kewe foffor repwe tipeeu ngeni alon Jises Kraist kewe, a era: “Oupwe kuttafichi lom an muu o an pwung; iwe, ekkeei mettoch meinisin repwap kapach ngenikemi.” (Mattu 6:33) Jises a pwal apasa: “Mesom, iei lampen inisum. Are mesom mi pochokkul, iwe, unusen inisum epwe ur ren saram.” (Luk 11:34) Ewe foun mas a usun chok eu lamp lon kapas monomon. Mesach mi “murinno” epwe letip-wenechar, epwe eani ekiek eu chok. Ren ena sokkun mas, sipwe tongeni pwarata weweoch me feffetal nge sisap chepetek lon pekin ngun.

5. Ren porausen angangen business, met sipwe chechemeni usun popun an a forutiu ewe mwichefelin chon Kraist?

⁵ Ekkoch rese tumunu meser, ina minne ra pwisin aosukosuka manauer pwal manauen ekkoch ren ar kewe foffor lon pekin sopai. Nge sipwe chechemeni pwe ewe mwichefelin chon Kraist, ina “urelapen o pwal longolongun ewe enlet.” (1 Timoti 3:15) Usun chok urelapen eu imw, ewe mwichefel a kan apochokkula an Kot enlet, nge sap an emon sopai. Sap minne ekkewe mwichefelin Chon Pwarata Jiowa, ir leenien alisata ekkoch business mi amomolo pisek are angang. Sipwe fokkun tumunukich seni ach foffori fofforun business lon ewe Kingdom Hall. Weweoch epwe alisikich le kuna pwe an Chon Pwarata Jiowa kewe Kingdom Hall, Congregation Book Studies, me mwichelap, ir leenien an chon Kraist chiechifengen me porausfengen usun ekkewe mettochun ngun. Ika sipwe aea ach chiechifengen lon pekin ngun fan iten ach sipwe apochokkula och sokkun sopai, esap pwarata nafangauen ach aucheani ekkewe mettochun ngun? Sisap fokkun aeamwaalli ach riri ngeni chon ewe mwichefel fan iten ach sipwe win lon pekin business.

6. Pwata aramas resap amomolo are apochokkula pisek are angang lon an ewe mwichefel kewe mwich?

⁶ Ekkoch ra sotun amomo ngeni pwiir kewe pisekin apochokkula inisin aramas are minne ekkewe fefin repwe lioch ren, telecommunication services, pisekin kauta imw, alillis ngeni ekkewe chon sai, me met kkan. Iwe nge, ese pwung an epwe fis ekkena angangen amomo are aiti aramas ekkoch pisek are fos ngeni aramas usun och angangen business atun an epwe fis ekkewe mwichen ewe mwichefel. Sipwe tongeni weweiti ekiekin Kot ika sipwe chechemeni pwe Jises “a atourou ekkewe siip me kou meinisin seni lon ewe imwen fel. A pwal niinalo ekkewe moni kisikis, monien ekkewe chon siwili moni, o a oturalo ar kewe chepel. A pwal apasa ngeni ekkewe chon amomolo lisom: ‘Oupwe walo ekkeei mettoch seni ikei! Ousap fori ngeni imwen Semei imwen amomo!’ ”​—Jon 2:15, 16.

Met ren Om Awora Monien Alisata Eu Business?

7. Pwata epwe lamot weweoch me mirit lupwen emon epwe ekiekin awora monien alisata eu business?

⁷ Epwe lamot ewe mettoch mirit me tumunuoch lupwen emon epwe ekiekin awora och moni fan iten alisataan eu business. Ekieki mwo ika emon epwe mochen paaro moni me eani ekkeei sokkun pwon: “Ua fokkun pwon pwe epwe chommongolo noum senis. Kosap tongeni lus. Epwe chommongolo om monien alillisin business (investment).” Iwe, kopwe tutumunu ekiekum ika emon epwe eani ekkeei sokkun pwon ngonuk. Eni ese fen ekieki met epwe tongeni fis are ese kon lien wenechar, pun ese tongeni wesewesen alukuluku pwe epwe sopwoch an aramas awora moni fan iten eu business. Pwungu pwe ekkoch mi pwor me angoch le fos ra fen otupu chon ewe mwichefel. A achema ngenikich usun ekkewe “mwan mi ingau” mi anifelong lon ewe mwichefel lon ewe aewin senturi me “awilielo ewe chenin Kot ngeni angol”. Ra usun chok fau mi ken fan sat mi tongeni ekilasa me nielo chon aa. (Juta 4, 12) Pwungun pwe minne a amwokutu ekkewe chon otupu a sokko seni ekkewe chon rikilo, nge ra pwal sotun niapeni chon ewe mwichefel.

8. Met a fen fis ren ekkoch business mi ita tongeni winnoch?

⁸ Pwal mwo nge ekkoch Chon Kraist mi ekiekin alisi ekkewe ekkoch ra esilei ngeni chiener kewe chon Kraist usun och business repwe ita pisekilo ren, nge mwirin, a pout senir me ir kewe mi fitir nour moni pokiten fisingauen ewe business. Mwiriloon, a pout seni fitemon chon Kraist wiser kewe lon ewe mwichefel. Lupwen a pwalo pwe ina eu fofforun otupotup ewe kokkot pwe aramas repwe tongeni ita muttir pisekisekilo ren, ewe chok chon otupu a kuna feioch, ewe a su fan ewe moni. Ifa usun ewe mettoch mirit epwe alisi emon pwe epwe tumunu seni ekkeei sokkun lapalap?

9. Pwata a lamot weweoch fan iten an emon epwe chosani minne aramas ra apasa usun ar repwe walong moni lon eu business?

⁹ Weweoch a wewe ngeni ewe tufichin mirititi minne ese pwa ngeni mesach. A lamot ei sokkun mirit fan iten ach sipwe atittina ewe business sipwe ita awora moni ngeni. Ekkewe chon Kraist ra kan lukulukfengen, me eni ekkoch repwe ekieki pwe pwiir kewe lon pekin ngun resap fori minne chiener kewe chon Kraist repwe lus moni ren. Nge sap minne emon chon Kraist mi eani eu business epwe chok angoch are sopwoch lon an business.

10. Pwata ekkoch chon Kraist ra mochen paaro moni seni chiener kewe chon luku, iwe, met epwe tongeni fis ngeni ewe moni?

¹⁰ Ekkoch chon Kraist repwe sotun paaro moni seni chiener kewe chon Kraist fan iten ar business pun ekkewe bank aramas repwe tongeni paaro moni seni rese luku pwe epwe sopwoch an business. Chommong ra fen tupulo ren ewe ekiek pwe repwe tongeni muttir pisekisekilo ren ar repwe chok awora moni ngeni ewe business, nge epwe chok kisikis are esap wor ar angang. Pokiten ar kutta ling seni aramas, ekkoch ra awora moni ngeni eu business nge a lus nour moni meinisin! Emon chon Kraist a awora chommong moni fan iten eu business pun a ekieki pwe epwe lapalo won 25-percent mwirin chok ruu wiik. Iwe, a pout seni ewe moni lupwen ewe business a ukkutiu seni an angang. Lon pwal eu business, emon chon amomo fonu a paaro chommong moni seni ekkoch lon ewe mwichefel. A pwonei pwe epwe fokkun lapalo nour moni nge a sopwongau, iwe, a lus meinisin ewe moni a pin paaro.

Lupwen a Sopwongau eu Business

11. Ifa an Paul kapasen fon usun tipemmong me tongen moni?

¹¹ Ekkoch chon Kraist ra lichipung me pwal mwo nge apwangapwangelo lon pekin luku lupwen ekkewe business ra awora moni ngeni ra sopwongau. A fis letipengau me song lupwen aramas rese mut ngeni ewe mettoch mirit an epwe tumunur. Tipemmong a fen asera chommong. Paul a makkei, “Ousap kakkapas lefilemi usun . . . mochenia, usun chok minne mi murinno lefilen aramas mi fel.” (Efisus 5:3) A pwal ouroura: “Ir mi mochen pisekisekilo repwe turutiu lon sossot, lon ser, lon chommong sokkun mochenia mi umwes o afeiengau, ekkewe sokkun mochenia mi akokatiu aramas lon feiengau o kiteter. Pun mochenia moni, iei ewe popun ingau meinisin. Pokiten ei sokkun mochenia, ekkoch aramas ra feilseni ewe luku, o ra tu ngeni letiper chommong sokkun lolilen.”​—1 Timoti 6:9, 10.

12. Ika ekkoch chon Kraist repwe forfengenni och angangen business, met repwe akkaewin chechemeni?

¹² Ika emon chon Kraist a poputa le tongei moni, epwe efeiengaua pwisin i lon pekin luku. Ekkewe Farisi ra tongei moni, iwe, a pwal ina usun chommong aramas lon ekkeei ranin le sopwolon. (Luk 16:14; 2 Timoti 3:1, 2) Sokko seni ena, “tongen moni esap nonnom lon letipen” chon Kraist. (Ipru 13:5) Pwungun pwe ese ngau ngeni ekkewe chon Kraist ar repwe fori och angangen business lefiler are angangfengen lon eu business. Iwe nge, ika repwe fori ena, repwe fosfengen usun kokkotun ar business lukun angangen ewe mwichefel. Iwe, chechemeni mwo: Pwal mwo nge lefilen pwiir kewe lon pekin luku, chon fori business repwe makketiu iteiten fansoun meinisin lon echo taropween atipeeu titchikin minne epwe fis lon ewe angangen business. Eu minen alillis usun ei mettoch a nom lon ewe poraus “Makketiu Minne epwe Fis!,” lon ewe Awake! minen February 8, 1983, pekin taropwe 13 tori 14.

13. Epwe ifa usun Än Salomon Fos 22:7 epwe weneiti angangen business?

¹³ Än Salomon Fos 22:7 a erenikich: “Ewe chon paaro, i noun ewe chon mwutata chon kichiniwel.” Esap ina eu alen tipatchem ach sipwe pwisin filata pwe kich chon kichiniwel pokiten ach kewe angang. Lupwen emon epwe tingor senikich moni fan iten eu angangen business, epwe murinno ika sipwe ekieki usun an tufichin eniwinato ngenikich ewe moni. I emon mi kan akkapwonueta minne a apasa me aramas ra kan tongeni lukuluk won? Pwungun pwe ika sipwe mut ngeni emon an epwe paaro moni senikich, sipwe chok weweiti pwe sipwe tongeni lus pun chommong business ra kan sopwongau. Echo taropween atipeeu esap alukuluku pwe epwe sopwoch ewe angangen business. Iwe, esap eu alen tipatchem an emon epwe awora ngeni eu angangen business lap seni ewe ukukun senis esap weiresin alusalo ika esap tongeni angeisefalli.

14. Pwata sipwe pwarata mirit ika emon pwiich we chon Kraist a fen paaro moni senikich nge a sopwongau an we business?

¹⁴ Epwe lamot ach sipwe pwarata mirit ika sia fen ngeni emon chon Kraist moni fan iten an business, nge a poutulo ewe moni nge sap ren och fofforun otupotup. Ika sopwongauen ewe business esap tipisin chienach we chon luku, ewe mi paaro moni senikich, sipwe tongeni apasa pwe a tipis ngenikich? Aap, pun sia fen pwisin tipeeu ngeni ach awora ngeni monien alillis, iwe, eni sia fen kuna och feioch seni, me ese fis och fofformwaal. Pokiten ena mettoch, esap wor popun ach sipwe kapwung ngeni ewe chon paaro. Epwe ita ifa feiochuch ika sipwe kapwung ngeni emon chienach we chon Kraist mi letipwenechar, nge a chok ukkutiu seni an angangen business (file for bankruptcy) pokiten a sopwongau nge a fen fokkun achocho ngeni?​—1 Korint 6:1.

15. Ikkefa ekkewe mettoch sipwe ekieki ika a bankrupt eu business?

¹⁵ Fan ekkoch, chokewe mi lus lon ar kewe business repwe ngaselo (seni ar kewe liwinimmang) ren ar repwe apasa pwe ir bankrupt. Ururun pwe chon Kraist resap tumunungau usun ar kewe liwinimmang, ina minne pwal mwo nge mwirin allukun bankruptcy epwe omusalo ekkoch ar kewe liwinimmang, nge ekkoch chon Kraist ra chuen mefi lamoten ar repwe achocho le pwisin omusatiu ekkoch ar kewe liwinimmang ika ekkewe a paaro seni repwe mochen angei. Nge met epwe fis ika emon chon Kraist a fen lus monien pwiin we pokiten an a sopwongau an business, nge mwirin an a bankrupt, a eani ewe sokkun manau mi woummong? Are, met epwe fis ika ewe chon paaro a bankrupt, nge mwirin, a awattei noun moni pwe epwe tufichin omusatiu an kewe liwinimmang ngeni pwiin kewe nge a chok tunalo? Iwe, epwe wor tipemwaramwar usun fichin an ewe chon paaro eani ekkoch wis mi auchea lon ewe mwichefel.​—1 Timoti 3:3, 8; nengeni The Watchtower, September 15, 1994, pekin taropwe 30-1.

Met Ika A Wor Pworongau?

16. Met sipwe tongeni fori ika emon a otupukich lon pekin moni?

¹⁶ Weweoch a alisikich le weweiti pwe sap minne aramas repwe chok wiwin lon business. Iwe nge, met ika a fen fis pworongau? Pworongau a wewe ngeni “och fofforun michimich are otupotup are kapas chofona emon epwe aea le amwokutu pwal emon an epwe fangolo och mettoch are och pwung mi auchea ngeni.” Jises Kraist a titchiki met emon epwe fori lupwen a ekieki pwe emon chienan we chon fel a fen otupu. Me ren Mattu 18:15-17, Jises a era: “Are pwiiom epwe tipis ngonuk, kopwe feilo apungu i ren lefilemi chok. Are epwe auselingok, ka fen liapeni pwiom. Nge are esap auselingok, kopwe aweina pwal emon are ruuemon pwe repwe etuk, pwe iteiten kapas meinisin epwe wenechar ren ruuemon are ulumon chon pwarata. Nge are ese pwal auselinga ir, kopwe chok esilei ngeni ewe mwichefel. Nge are ese pwal auselinga ewe mwichefel, iwe, epwele usun chok emon re Jentail ika emon chon angei takises.” Ewe kapas monomon Jises a awora mwirin a pwarata pwe a ekieki usun ewe sokkun tipis mi weneiti moni, pachelong pworongau.​—Mattu 18:23-35.

17, 18. Ika emon mi apasa pwe i chon Kraist nge a pworongau ngenikich, epwe ifa usun mirit epwe tumunukich?

¹⁷ Pwungun, esap wor popun mi alongolong won Paipel pwe emon epwe fori minne a mak lon Mattu 18:15-17 ika esor pisekin annet pwe emonewe a pworongau. Iwe nge, met sipwe fori ika emon mi apasa pwe i emon chon Kraist a wesewesen michikich? Weweoch epwe tumunukich seni ach fori minne epwe aitengaua ewe mwichefel. Paul a fonou chienan kewe chon Kraist ar repwe mut ngeni emon pwe epwe solani pisekir nge resap kapung ngeni emon brother.​—1 Korint 6:7.

¹⁸ Pwiich kewe mi enlet rese ‘ur ren sokkun otupotup pwal fofforingau meinisin,’ usun chok ewe sou rong itan Par-Jises. (Fofor 13:6-12) Ina popun sipwe aea weweoch lupwen a pout senikich moni lon ekkoch an chienach we angangen business. Ika sipwe ekiekin kapwung ngeni, sipwe akkom ekieki usun ifa usun epwe kku pwisin manauach, manauen pwiich kewe, pwal chon lukun. Ach kukkutta ar repwe enniwili ngenikich minne ra fen paaro epwe tongeni atai watten ach fansoun, pochokkul, me pwal ekkoch mettoch. Epwe tongeni fis pwe ekkewe chok loier repwe win. Ina eu minen alolilen pwe a pout seni ekkoch chon Kraist wiser kewe lon ewe mwichefel pokiten ar kon osukosuk ren ekkena mettoch. Epwe apwapwai Satan ika sipwe rikilo ren ekkena mettoch, nge sipwe mochen apwapwai letipen Jiowa. (Än Salomon Fos 27:11) Pwal eu, ach mokurechou fan ach lus epwe tongeni ti senikich letipengau me lusmwaal fansoun fan itach pwal ekkewe elter. Epwe amwochu kinamween ewe mwichefel pwal atufichikich ach sipwe kukkutta lom ewe Muu.

Weweoch me Minne Sipwe Filata Ran me Ran

19. Atun epwe torikich och kefil mi weires, ifa usun weweoch lon pekin ngun me iotek repwe tongeni alisikich?

¹⁹ Epwe tongeni weires ach sipwe filata met sipwe fori fan iten ach sipwe awattei nouch senis are anganga ach business. Nge weweoch lon pekin ngun epwe alisikich le ekkekiekifichi minne epwe kapachelong me filioch. Pwal eu, ach lukuluk won Jiowa lon iotek epwe atoto rech “an Kot kinamwe.” (Filipai 4:6, 7) Ina eu mefien kinamwe me menemenoch mi popu seni ach chiechioch ngeni Jiowa. Enlet, ena sokkun kinamwe epwe alisikich le itepok me ruupek atun epwe torikich och kefil mi weires.

20. Met sipwe tipeppos le fori ren ekkewe mettochun business me ewe mwichefel?

²⁰ Sipwe tipeppos pwe sisap mut ngeni tipefesen lon pekin business an epwe atai ach kinamwe are kinamween ewe mwichefel. A lamot ach sipwe chechemeni pwe wisen ewe mwichefelin chon Kraist pwe epwe alisikich le feffeita lon pekin luku, nge sap fan iten alisataan och pekin business. Fansoun meinisin ekkewe mettochun business repwe imu seni mwokutukutun ewe mwichefel. Epwe lamot ach sipwe mirit me tumunuoch lupwen sipwe poputani och angangen business. Iwe, fansoun meinisin sipwe pwal eani ekiek pwung usun ekkena mettoch, me kukutta lom mettochun ewe Muun Kot. Ika an pwiich kewe business epwe sopwongau, amwo sipwe achocho le fori minne epwe ochiti meinisin.

21. Ifa usun sipwe aea weweoch lon ach apwonueta Filipai 1:9-11?

²¹ Sisap kon aureki ekkewe mettochun moni me ekkewe ekkoch mettoch mi lamot kisikis, nge amwo kich meinisin sipwe suuki letipach ngeni weweoch, iotek fan iten an Kot emmwen, me akkomwa ewe muun Kot. Me ren an Paul we iotek, ‘ach tong epwe fokkun lapelo seni lom, ren silei o pwal ren sokkun tipatchem meinisin pwe sipwe tongeni esissinata ekkewe mettoch mi lamot chapur nge sisap oturukapa aramas’ are pwisin kich. Iei, atun Kraist ewe King a mommot won an we leenien motun king lon lang, sipwe pwarata weweoch lon iteiten kinikinin manauach. Iwe, ‘sipwe ur ren ekkewe uwan pung, ekkewe uwa mi feito ren Jises Kraist, pwe sipwe alinga Kot,’ ewe Samol mi Lapalap Jiowa.​—Filipai 1:9-11.

Epwe Ifa Usun Kopwe Polueni?

◻ Meta weweoch are mirit?

◻ Pwata epwe fokkun lamot ach sipwe pwarata mirit atun chon Kraist repwe forfengenni och angangen business?

◻ Epwe ifa usun weweoch epwe alisikich ika sia mefi pwe emon pwiich kewe chon luku a fen otupukich?

◻ Ifa usun weweoch epwe alisikich atun sipwe filata met sipwe fori?

[Sasing lón pekin taropwe 26]

Weweoch epwe alisikich le apwonueta an Jises kapasen fon pwe sipwe kukkutta lom ewe Muu

[Ekkewe sasing lón pekin taropwe 28]

Fansoun meinisin sipwe makkei echo taropween atipeeu usun ekkewe mettochun business