Ia Sipwe Kuna me Ia Pwapwa Enlet?
CHOMMONG aramas ra mefi pwe repwe kuna pwapwa seni ar ikisoni pisek. Nge ifa usun? Iwe, pwungun pwe pisek repwe tongeni alapalo ach pwapwa nge resap alukuluku ach pwapwa; ekkewe pisek resap pwal tongeni aueta ach luku are pwakini ach kewe osupwang lon pekin ngun.
Lon an we Afalafal won ewe Chuuk, Jises Kraist a apasa: “Ra pwapwa ir kewe mi mefi ar osupwang lon pekin ngun, pun nour ewe muun lang.” (Mattu 5:3) Jises a pwal era: “Oupwe tumunukemi seni sokkun mochenien pisek meinisin, pun aramas resap manau ren chommongun pisek.”—Luk 12:15.
Chommong ra kutta pwapwa ren ar foffori fofforun sikepwach me pwal ekkoch “angangen fituk.” (Kalesia 5:19-21) Iwe nge, ach kuf ren apwapwan fitukach esap atoto rech pwapwa enlet mi nomottam. Enlet, ir kewe mi foffori ena sokkun mettoch resap alemwiri an Kot we Muu.—1 Korint 6:9, 10.
Pwal ekkoch ra kukkutta pwapwa lon pwisin letiper ren ar sotun afeffeita ar ekkekieki usun pwisin aucheaar. Ekkewe library me leenien amomo puk ra ur ren puk mi alisi aramas ar repwe amurinnolo pwisin lapalaper, nge ena sokkun puk ese pwal atoto ngeni aramas pwapwa mi nomottam. Iwe, ia sipwe kuna me ia pwapwa mi enlet?
Ren ach sipwe wesewesen pwapwa, epwe lamot ach sipwe esinna ach osupwang lon pekin ngun. Jises a apasa: “Ra pwapwa ir mi mefi ar osupwang lon pekin ngun.” Pwungun, sisap feioch ika sipwe chok mefi ach osupwang nge sisap fori och. Awewe chok: Met epwe fis ngeni emon chon fiti emiisin ssa ika mwirin sarin ewe kitir esap afanni an inisin osupwang ren konik? Esap fen muttir apwangapwang ren nafangauen konik? Pwal usun chok, ika sisap mwokutukut me pwakini ach osupwang lon pekin ngun, ekis me ekis sipwe apwangapwangelo lon pekin ngun. Epwe kukkunulo ach pwapwa me chengel.
Jises a unusen mefi an osupwang lon pekin ngun, iwe, a kakkaeo me ekkekieki usun an Kot we Kapas iteitan. A mecheres ngeni an kuna me alleani ekkoch kinikinin ewe Paipel, me a aiti ngeni aramas ar repwe pwal fori usun chok. (Luk 4:16-21; alollo ngeni Efisus 4:20, 21.) Jises a pwal alollofengenni an foffori letipen Seman we lon lang me anan mongo. An foffori letipen Kot a atoto ren watten pwapwa.—Jon 4:34.
Ewer, sisap tongeni angei pwapwa enlet ren ach sipwe akkangei pisek; esap pwal popu seni ach kutta pwapwan fitukach. Pwapwa enlet, och lapalapen letipach, a alongolong won luku mi enlet me ach ririoch ngeni Jiowa Kot. Ina popun, a fich pwe ewe chon makkei kol fel Tafit a kolu: “Ekkewe aramas mi ani Jiowa ar Kot repwe pwapwa.”—Kol Fel 144:15b.
[Sasing lón pekin taropwe 31]
Luku me om ririoch ngeni Kot epwe atoto reom pwapwa mi enlet