Pwapwa Mi Enlet Met Epwe Atoto Ena Mettoch?

ITA ururun pwe aramas repwe pwapwa. Pwata sia tongeni achifoua ena? Iwe, ekieki mwo manauen aramas le poputaan.

Jiowa Kot a forata ewe akkaewin pean aramas pwe repwe tufichin kuna pwapwa. A anomu Atam me If lon eu paratis, eu leenien apwapwa itan Ichen. Ewe Chon Forir a awora ngenir mettoch meinisin mi lamot ngeni manauer. A nom lon ena leeni “sokkun ira meinisin mi apwapwai aramas le katol o murinno le mongo.” (Keneses 2:9) Inisin Atam me If a pochokkul, me ra lingoch, weween, ra unusoch me enletin pwapwa.

Iwe nge, ifa ewe mettoch mi atoto ar pwapwa? Ita ina maaniour lon ewe paratis are eli unusochun inisir? Ekkena liffang seni Kot a alapalo pwapwaan lon manauer. Nge ar pwapwa ese longolong won ekkena mettoch. Sap minne Ichen eu chok leenien ira mi lingoch. Nge ina eu pwal leeni mi kaimulo, weween, eu leeni repwe fel ngeni Kot lon. Ewe mettoch epwe atoto pwapwa esemuch, iei ar foratiu me alikiitu eu ririin tong lefiler me ewe Chon Forir. Ren ar repwe kuna pwapwa, repwe akkom aucheani ekkewe mettochun ngun.​—Alollo ngeni Mattu 5:3.

Manau lon Pekin Ngun a kan Emmwen ngeni Pwapwa

Le poputaan a wor eu riri lon pekin ngun lefilen Atam me Kot. Ina eu ririin tong mi ussun ewe riri lefilen emon sam me noun at. (Luk 3:38) Lon Ichen, nonnomur mi unusoch a mut ngeni Atam me If ar repwe tufichin apwonueta ar mochen fel ngeni Kot. Ren ar alleasochis ngeni Jiowa fan tong me tipemecheres, ar atekiata me alinga Kot epwe fokkun lap seni minne ekkewe man repwe tufichin fori. Fan mirit, repwe tongeni mwareiti Kot ren lapalapan kewe mi amwarar me repwe tongeni peni an nemenem. Repwe pwal tongeni kukkuna seni Jiowa an tumun me alillis mi kawor fan tong.

Ar ririfengen me ewe Chon Forir me ar alleasochis ngeni an kewe alluk a atoto ngeni popuch kewe pwapwa mi enlet. (Luk 11:28) Esap ururun pwe Atam me If repwe sotun pwisin kutta lon fitu ier met epwe emmwen ngenir pwapwa. Ra pwapwa seni chok ewe fansoun ar ra forutiu. Ar kinamwefengen me Kot me ar alleasochis ngeni an nemenem a atoto ngenir pwapwa.

Iwe nge, ena pwapwa a ukutiu lupwen ra alleasolapa Kot. Ren ar u ngeni i, Atam me If ra mmuti ewe riri lon pekin ngun lefiler me Jiowa. Rese chuen chiechien Kot. (Keneses 3:17-19) Eli seni ewe ranin ar katowu seni Ichen, Jiowa a unusen aukatiu an fos ngenir. A pout senir manauer mi unusoch, ewe apilukulukun ar repwe kuna manau esemuch, me maaniour lon ewe leeni mi lingoch. (Keneses 3:23) Nge lap seni ena, pokiten an pout senir ar riri ngeni Kot, a tiuelo senir ewe mettoch mi atoto pwapwa.

Ach Tufichin Filata Alach

Mwen ar malo, Atam me If ra likiti ngeni mwirimwirir kewe lapalaper, lapalapen aramas, mwelien letiper, me ar tufichin aucheani mettochun ngun. Sap minne aramas ra sapwilitiu pwe repwe ussun ekkewe man. Aramas repwe tongeni chasefal ngeni ewe Chon Forikich. (2 Korint 5:18) Pokiten aramas ra mirit, ra chuen tufichin filata ar repwe alleasochisi Kot are resap. A ffatolo ena fitepuku ier mwirin lupwen Jiowa a ngeni ewe minefon muun Israel ewe tufichin ar repwe filata manau are malo. Kot a nounou Moses le uwawu ei kapas: “Ua isetiu mwemi ikenai manau me sopwoch, pwal malo me sopwongau.”​—Tuteronomi 30:15-18.

Pwal mwo nge iei chok, fitu ngerou ier mwirin an poutulo ewe Paratis le popun, kich aramas sia chuen tufichin filioch. Mwelien letipach a chuen nom rech, me sia tufichin alleasochisi an Kot kewe alluk. Paipel a kapas ussun “ewe aramas leutuch” me ewe aramas mi nom “loch.” (2 Korint 4:16; Rom 7:22) Ekkena wokisin ra weneiti pukun tufichich fan iten ach sipwe appiru lapalapen Kot kewe, eani an kewe ekiek, me manaueni manau lon pekin ngun.

Iei makkeien ewe aposel Paul ussun lapalapach lon pekin ngun me mwelien letipach: “Ewe alluk ese nom ren ekkewe Jentail, nge lupwen ra pwisin fori ekkewe fofforun ewe alluk, ra alluku ngeni pwisin ir, inaamwo ika ewe alluk ese nom rer. A pwa pwe ekkewe fofforun ewe alluk a makketiu lon letiper, o meefier kewe ra pwal pwarata, inaamwo ika ekiekin letiper ese wewefengen, nge repwe tipi ngeni pwisin ir, are poluen ngenir.”​—Rom 2:14, 15.

Mirit seni Kot me Alleasochis epwe Atoto Pwapwa

Nge eli emon epwe eis, ‘Ika a pukun nom rech ewe ekiekin fel ngeni Kot, nge sipwe tongeni kuna pwapwa mi enlet ren, iwe, pwata chok a choufetal letipechou?’ Popun, pun ren ach sipwe kuna pwapwa, sipwe mammaarita lon pekin ngun. Ikaamwo aramas ra forutiu lon lapalapen Kot le poputaan, nge ra fen towauolo seni ewe Chon Forir. (Efisus 4:17, 18) Ina minne, mi lamot ach sipwe foratiu me alikiitu eu riri lon pekin ngun lefilach me Kot. Ena sokkun riri esap pukun fisita.

Jises a affata ruu kapasen emmwen mi lamot fan iten an aramas mammaarita lon pekin ngun. Eu a wewe ngeni ach sissilei poraus mi enlet ussun Kot, me ewe eu a wewe ngeni ach alleasochisi letipan. (Jon 17:3) Iei alon Jises lupwen a uwawu och poraus seni ewe Kapasen Kot: “A makketiu, ‘Aramas resap manau ren pilaua chok, pwe ren iteiten kapas meinisin mi towu seni auen Jiowa.’” (Mattu 4:4) Lon pwal eu fansoun, Jises a apasa: “Iei enei, pwe upwe fori letipen ewe emon mi tinieito, o upwe pwal awesi an angang.” (Jon 4:34) Esor popun ach sipwe sotuni le pwisin kutta pwapwa ren fitu ier. Pwisin kunaach esap emmwen ngenikich pwapwa. Nge, mirit seni Kot me alleasochis ngeni ewe Chon Forikich epwe tongeni emmwen ngeni chengel mi enlet lon manauach.​—Kol Fel 19:7, 8; Eklesiastis 12:13.

A ffat pwe ewe pwapwa mi toto ren ach eani mirit seni Kot me ach uoch mwen mesan, esap ina eu mettoch sisap tufichin kuna. (Fofor 17:26, 27) A kan suuk ngeni meinisin porausen Jiowa me an kokkot. A wor fitu billion kapiin Paipel lon chommong fos, iwe, ina ewe puk mi kon choufetal seni meinisin won unusen fonufan. Ewe Paipel epwe tongeni alisuk pwe kopwe wiliiti chiechien Kot me kuna pwapwa mi enlet, pun Paipel a apasa pwe “Ekkewe aramas mi eani Jiowa ar Kot repwe pwapwa!”​—Kol Fel 144:15.

[Sasing lón pekin taropwe 7]

“Mi pwapwa ir kewe mi meefi osupwanger lon pekin ngun.”​—Mattu 5:3