En mi Luku Reincarnation?
MUKUNDBHAI a mak ngeni noun we at mi fiti eu university lon ewe United States, “En ka chechemeni ewe fopul chon oruch we ka pin tongei le aluwolum lon India? Epwe pupulu fitu wiik seni ikenai. Ua chok mefi pwe epwe lamot om kopwe silei.”
Pwata ewe sam a esilei ngeni noun we ena poraus? Pun fitu ier lom, Mukundbhai a affata pwe a wes ar ririfengen. Pwal eu, noun we a pwal mwo nge fiti sukul tekia lon ewe United States ukukun onu ier. Lon ena ukukun fansoun, ese kan mammak ngeni ewe fopul me Mukundbhai a fen silei ena.
Pwata epwe aureki ena mettoch? Popun, pun Mukundbhai a luku reincarnation, are ewe ekiek pwe aramas ra tongeni upsefal mwirin malo lon pwal eu inis.a Ika ewe riri lefiler le kukkunur a popu seni ar pin pupulufengen lon pwal eu inis me lom, epwe kirikiringau ika aramas repwe aimufesennir iei atun ra watteta me tongeni pupulu. Mukundbhai a chok mochen noun we epwe silei me mwen ewe fopwul epwe pulueni pwal emon lon ei manau.
Ekieki mwo pwal eu poraus. Emon nengin, ruanu ierin, a riaffou atun a niuing lon Mumbai, India, fan fitu. A uri semmwenin foun ngasangasan. Seman me inan mi pisekisek ra fokkun letipechou ren riaffoun noun we. Nge ra ekieki: “Sipwe chok mokurechou fan. Ese mwaal iei liwinin an tipis lon manauan me mwan we.
Ar luku reincarnation a lamot lon manauen ekkewe fitu million chon Hindu, Buddha, Jain, Sikh, me ekkewe ekkoch lamalam mi poputa lon India. Ra ekieki pwe minne a fis lon manauen emon—seni an tongei emon tori an kuna riaffou watte—epwe chok mwiriloon minne a pin fori lon manauan me mwen ei.
Chommong lon ekkewe fonuen West ra pwal luku ewe ekiekin reincarnation. Emon sou kachito lon Merika itan Shirley Maclaine a era pwe a luku ena. Emon sou mak itan Laurel Phelan seni Vancouver, British Columbia, Canada, a apasa pwe a tongeni chechemeni poraus seni 50 manauan kewe me mwan ei. Lon 1994 CNN/USA Today a eisini aramas ar ekiek, iwe, lap seni 270 lein 1,016 aramas ra apasa pwe ra luku reincarnation. Reincarnation a pwal kapachelong lon ewe New Age movement. Nge ikkefa ekkewe pisekin annet mi pwarata enletin ei sokkun ekiek?
Ekkewe chon luku reincarnation ra polueni “An aramas chechemeni manauer me lom lon pwal eu inis!” Ina minne, lupwen Ratana, emon semirit, ulungat ierin lon Bangkok, a poputa le “chechemeni manauan me lom atun i emon fefin mi luku Kot mi malo atun a orun 60 ierin,” lap ngeni aramas meinisin mi auseling ngeni ra nguuri pwe ina eu pisekin annet pwe a fis reincarnation.
Iwe nge, chommong aramas ra tipemwareiti. Iwe, mei wor pwal och awewe ren an aramas ita chechemeni manauer mwen ei.b Lon noun we puk itan Hinduism: Its Meaning for the Liberation of the Spirit, emon sou ekiek chon Hindu itan Nikhilananda a apasa pwe ‘sise tongeni aweweiochu minne aramas ra era a fis ngenir mwirin ar we ra malo.’ Nge a era pwe “ua luku pwe mei tufich pwe aramas ra upsefal mwirin ar we ra malo lap seni ai luku pwe ese tufich.”
Nge ewe Paipel a ita apochokkulata ena poraus? Iwe, ifa ewe apilukuluk ewe Paipel a awora fan iten ekkewe mi fen malo?
[Footnote]
a “Reincarnation,” me ren The New Encyclopædia Britannica, a wewe ngeni “upsefallin ewe soul lon eu are ekkoch tettelin manau, nge lon lapalapen emon aramas, emon man, are ira fan ekkoch.” Aramas ra nounou ewe kapas “(rebirth) upsefal” fan ekkoch, nge lap ngeni fansoun meinisin ra nounou me weweiti ewe kapas “reincarnation.” Fitu dictionary lon kapasen India ra nounou ir me ruu ekkena kapas.
b Nengeni pekin taropwe 5-7 lon Awake!, minen June 8, 1994.
[Ekkewe sasing lón pekin taropwe 4]
A ita kuna liwinin an kewe tipis a pin fori lon pwal eu manauan me mwen ei?