Met Manawom lón Mwachkkan A Lóngólóng Wóón?

MINNE CHÓMMÓNG RA LÚKÚ

PWEE WÓÓN FÚÚ: Ekkóch aramas ra lúkú pwe manawer lón mwachkkan a fen kkótóló me a lóngólóng wóón napanapen tettelin ekkewe fúú atun ra uputiw. Ra kan áeá horoscope pwe repwe silei met epwe fis ngeniir lón mwer me epwe álisiir le féri kefil.

FENG SHUI: Ekkóch ra lúkú pwe ika ra fiti allúkún ena lúkú itan feng shui lón ar aú me anapanapa imwer, iwe repwe sópwéch lón manawer. Iei alon Lo Wing,a seni Hong Kong: “Emén sousile usun ena mettóch feng shui a ereniei pwe ika ua onómu eféú faú mi kkóló aúchean are crystal lón eú leeni mi kefililó lón ai we sitowa, iwe epwe lapóló ai moni tolong.”

FEL NGENI LEWO: Ekkóch ra lúkú pwe a lamot ar repwe fel ngeni ar kewe lewo are ekkewe sókkopaten kot ren ar repwe túmún me feiéch. Iei alon Van seni Vietnam: “Ua lúkú pwe ai ésúfélú ai kewe lewo epwe émúrinnéló manawei iei, me anúkúnúkéchú manawem me ai we famili lón mwachkkan.”

REINCARNATION: Chómmóng ra lúkú pwe atun emén a máló, a sópwósópwóló manawan lón pwal och sókkun ménúmanaw, nge ena mettóch a chék ekkeliwin. Ra lúkú pwe ekkewe mettóch mi éch are mi ngaw a fiffis lón manawer iei, a popu seni minne ra féri lón manawer me lóóm.

Inaamwo ika chómmóng ra erá pwe rese wesewesen lúkú ekkena mettóch, nge ra chúen féfféri angangen pwee lón paw, horoscope, Ouija^® board, tarot card, me pwal ekkóch mettóch. Ra meefi pwe eli ekkena mettóch a tongeni álisiir le silei met epwe fis lón manawer lón fansoun mwer.

ITÁ EKKENA LÚKÚ RA ENLETIN ÁLISI ARAMAS?

Itá chókkewe mi lúkúlúk wóón ekkena esin lúkú me angang, ra eáni eú manaw mi múrinné me eáni eú manaw mi núkúnúkéch lón fansoun mwer?

Iei pwóróusen Hào, seni Vietnam. A fel ngeni an kewe lewo, féri angangen pwee wóón fúú, feng shui pwe repwe emmweni lón manawan. Nge itá a sópwéch lón an féri ena? Iei alon, “A peeló ai we business, a watte ai liwinimmang, me a watte osukosuken lón ai we famili, me ua fókkun letipechou.”

Qiuming, seni Taiwan, a pwal lúkú angangen pwee wóón fúú, lúkú reincarnation, lúkú pwe manawach a fen kkótóló seni me lóóm, lúkú feng shui, me fel ngeni an kewe lewo. Iei alon mwirin an etittinafichi ekkena mettóch: “Ua mirititi pwe ekkena sókkun káit me eéreni ra ú fengen me orukoruk. Ua kúna pwe fán chómmóng, angangen pwee wóón fúú ese kan pwúng. Me ika ka lúkú reincarnation nge kese chemeni met a fis lón manawom me lóóm, iwe epwe ifa usun óm kopwe ekkesiwili manawom iei me émúrinnéló lón ekkan rán mwirin?”

Hào, Qiuming me pwal chómmóng ra mirititi pwe manawach lón fansoun mwach ese lóngólóng wóón ach lúkú pwe a fen kkótóló manawach seni me lóóm, wóón ekkewe fúú, ach kewe lewo, are sópwósópwóló manawach lón pwal och sókkun ménúmanaw mwirin ach máló. Itá a wewe ngeni pwe sise tongeni émúrinnéló manawach lón fansoun mwach?

Chómmóng ra meefi pwe alen ar repwe tongeni eáni eú manaw mi múrinné lón fansoun mwer, ina ren ar akkomwa sukul tekia me wéú. Nge met a fen fis ngeni ekkóch mi eáni ena esin kefil?