Itá án Emén Manawéch Epwe Anúkúnúkéchú Manawan lón Fansoun Mwan?

Ren fite fite ier, chómmóng ra meefi pwe án emén manawéch me eáni eú manaw mi liméch, ina alen an epwe núkúnúkéch manawan lón fansoun mwach. Áwewe chék, aramasen Asia ra aúcheani alon ei souáák me sense itan Confucius (551-479 mwen Kraist) mi erá: “Kosap féri ngeni aramas minne kese sani ar repwe féri ngonuk.”a

MINNE CHÓMMÓNG RA LÚKÚ

Chómmóng ra chúen lúkú pwe ika ra féfféréch, iwe repwe eáni eú manaw mi núkúnúkéch lón fansoun mwer. Ra achocho le ésúfélú aramas are pwári fáiro, mirititi wiser lón sópwur kewe, me eáni eú mwelien letip mi múrinné. Iei alon emén fefin itan Linh, seni Vietnam: “Ua kan lúkú pwe ika ua wenechar me enlet, iwe upwe feiéch.”

Pwal ina i chék ewe fefin a amwéngééni chókkewe mi osupwang me ese wor leenier.

Ekkóch ra achocho le féfféréch pokiten ina met ra lúkú seni ar lamalam. Iei alon emén mwán itan Hsu-Yun, seni Taiwan: “Ua káé pwe ika emén a féfféréch, iwe epwe pwapwa mwirin an máló, nge ika a féfféringaw, iwe epwe riáfféú.”

MET MWIRILÓÓN?

Emén fefin a letipechou me pekkus fán néún we kúkkún át lepwin.

Mi pwúng pwe atun sia féfféréch ngeni aramas, a atoto chómmóng feiéch. Iwe nge, chómmóng chókkewe mi enletin achocho le féfféréch ngeni aramas, ra kúna pwe esap iteitan aramas ra pwal féfféréch ngeniir. Iei alon emén fefin itan Shiu Ping, seni Hong Kong: “Ua káé seni minne a fis ngeniei pwe chókkewe mi féfféréch ngeni aramas, esap iteitan aramas ra pwal féfféréch ngeniir. Ua fókkun achocho le túmúnú chón ai we famili me féfféréch. Nge a sópwongaw ai we pwúpwúlú, me pwúlúwei we a likitikemiló me néúm we át.”

Chómmóng ra kúna pwe esap meinisin chókkewe mi achocho lón lamalam, iir aramaséch. Iei alon emén fefin itan Etsuko, seni Japan. “Ua fiti eú lamalam me ua poputá le akkóta mwékútúkútún ekkewe sáráfé. Ua máirú ren ai kúna limengawen manawen ekkóch chón ai na lamalam, ar okkuffengen wóón nemenem, me ar áeángawa monien ám na lamalam.”

“Ua fókkun achocho le túmúnú chón ai we famili me féfféréch. Nge a sópwongaw ai we pwúpwúlú, me pwúlúwei we a likitikemiló me néúm we át.”—SHIU PING, HONG KONG

Ekkóch chókkewe mi fókkun achocho lón lamalam me féfféréch, ra lichippúng atun a fis ngeniir minne mi ngaw. Ina met emén fefin itan Van, seni Vietnam a meefi. A erá: “Iteiten rán ua kan kamé féún irá, péén irá, me mwéngé me uwealó wóón antaren ai kewe lewo mi fen máló, me áneánei pwe upwe kúna feiéch lón fansoun mwach. Inaamwo ika ua féfféréch me féfféri eérenien ai we lamalam ren fite fite ier, nge pwúlúwei we a ppúngútiw lón eú semmwen mi fókkun chou. Mwirin, nei we nengngin a máló atun a ló sukul wóón pwal eú fénú.”

POPUN AN ESE NAF ÁN EMÉN MANAWÉCH

A aúchea án emén manawéch, nge ese naf ena ren an epwe eáni eú manaw mi núkúnúkéch lón fansoun mwach. Pwata? Nengeni met án Kot we Kapas a apasa.

ESAP MEINISIN RA FILATÁ LE FÉRI MINNE MI ÉCH

“Eman chon tipis a ataela chomong mettoch mi öch.”—ÄN SALOMON AFALAFAL 9:18.

Ikaamwo ka fókkun achocho le manawéch, nge ka tongeni tolong lón feiengaw ren met ekkóch aramas ra féri pokiten ar achéchééi pwisin iir. Áwewe chék, atun eú pandemic, eli ka apwénúetá ekkewe emmwen seni mwúún fénúom we me túmúnú óm kosap kkan ngeni aramas. Nge ifa usun ika ekkewe ekkóch rese mochen álleasochisi ekkena emmwen? Minne ra féri a tongeni esemweni chókkewe iir mi achocho le féri minne mi pwúng.

A TONGENI MWÁÁL ÁN ARAMAS EKIEK USUN MINNE MI PWÚNG ARE MINNE MI MWÁÁL

“Eman aramas a tongeni ekieki pwe ewe al a fetal won a pwüng, nge lesopolan ewe al a ale ngeni mäla.”—ÄN SALOMON FOS 14:12.

Chómmóng aramas ra féri ekkewe mettóch tiper pwe mi éch, nge mwirin ra mirititi pwe mi ngaw. Inaamwo ika ra ekieki pwe a éch minne ra féri, nge ra chúen riáfféú ren ar kefilingaw.

SISE SILEI MET EPWE FIS NGENI MANAWACH

“Ämi ousap fen mwo nge silei met epwe fis ngeni manauemi lesor.”—JAMES 4:14.

Pwal mwo nge emén aramas mi manawéch, a tongeni chék weiweitá málóón. Áwewe chék, atun ewe COVID-19 pandemic, a chómmóng chókkewe ra máló pokiten ar achocho le álisi aramas. Are ekieki pwóróusen emén fefin itan Liting, seni China, seman we a má seni ren an ákseten wóón tarakú. Iei alon: “Use weweiti pwata ena esin aramas mi kirekiréch e tongeni máló. Semei we, i emén mi angang weires, fókkun tipetekison, me wenechar. Fókkun i chék me lein chón waan we a máló.”

Ika án emén achocho le manawéch ese naf ngeni núkúnúkéchún manawan lón fansoun mwan, iwe met epwe anúkúnúkéchú manawan? Ren an epwe pélú ena kapas eis, a lamot ngenikich emmwen mi alúkúlúk mi tongeni pélúweni ach kewe kapas eis me emmwen ngenikich eú manaw mi núkúnúkéch lón fansoun mwach. Ia sia tongeni kúna me ie ena esin emmwen?

a Ren pwal ekkóch pwóróus usun áitien Confucius kewe ppii ei puk Mankind’s Search for God sópwun 7, parakraf 31-35, férien Chón Pwáraatá Jiowa me a pwal kawor online wóón www.pr418.com.