Meinisin Ra Mochen Eáni eú Manaw mi Núkúnúkéch lón Mwach
Met sókkun manaw lón mwachkkan ka mochen eáni? Eli ka usun lape ngeni aramas le mochen pwe ámi me óm famili oupwe eáni eú manaw mi núkúnúkéch lón mwachkkan. Eú sókkun manaw mi apwapwa, uren péchékkúlen inis, kinamwe, me nónnóméch.
Iwe nge, chómmóng aramas ra tipemwaramwar ika ra tongeni eáni eú manaw mi núkúnúkéch lón fansoun mwer. Ra kúna weiweitáán fisin chómmóng mettóch, áwewe chék ren ewe COVID-19 mi áweiresi manawen aramas, efisi mwelele, pwal mwo nge nieló chómmóng aramas. Pokiten ekkena mettóch, ra meefi pwe ese chúen núkúnúkéch manawer lón fansoun mwer.
Pokiten núkúnúkúngawen manawen aramas, chómmóng ra achocho le kútta eú mettóch epwe emmwen ngeniir manaw mi múrinné lón fansoun mwer. Ekkóch ra lúkú pwe a fen kkótóló manawer ren och manaman sise tongeni kúna. Chómmóng ra akkomwa pekin sukul me wéúúr, me ra ekieki pwe ekkena mettóch epwe enletin atoto met ra mochen. Ekkóch ra meefi pwe ar achocho le manawéch, ina chék met a lamot ren ar repwe eáni eú manaw mi núkúnúkéch.
Itá eú me lein ekkena mettóch epwe tongeni atoto ngonuk ewe sókkun manaw ka mochen eáni lón mwachkkan? Ren óm kopwe silei, a lamot óm kopwe etittina pélúwen ekkeei kapas eis:
Met manawom lón mwachkkan a lóngólóng wóón?
Itá sukul me moni epwe anúkúnúkéchú manawach lón fansoun mwach?
Itá án emén manawéch epwe anúkúnúkéchú manawan lón fansoun mwan?
Met epwe álisikich le eáni eú manaw mi núkúnúkéch lón mwachkkan?
Ei Leenien Mas a tongeni álisuk le kúna pélúwen ekkena kapas eis.