Emon King Mi Woummong Me Tipatchem
Om luku nge chommongeloon pisekum epwe ita efisi pwapwa?
Kesap pwapwa ika emon epwe ngonuk chommong moni? Ese mwaal kopwe pwapwa. Eni kopwe ekieki met kopwe tongeni kamo.
PWUNGUN pwe mei wor chommong mettoch sipwe tongeni moni pwe epwe amecheresi manauach me atoto rech pwapwa. Moni epwe pwal tongeni wiliti eu minen “tumun” seni ekkoch osukosuk sisap meefi epwe fis, awewe chok, semmwen are ach katowu seni ach angang.—Eklesiastis 7:12.
Nge ifa ewe riri lefilen moni me pwapwa? Ka fiti ekiekin chommong pwe pwapwa a kan popu seni pisekich kewe? Eni epwe weires ach sipwe polueni ekkeei kapas eis pun sipwe tongeni aukuku are alleani moni, nge esap ina ussun ren ewe mettoch pwapwa. Kese tongeni watiu pwapwa won eu kilo me paunei.
Pwal eu, ussun ita nge ekkoch aramas mi pisekisek ra pwapwa, nge pwal ekkoch ra letipechou. Iwe, a pwal enlet ren ekkewe mi woungau. Iwe nge, lap ngeni aramas meinisin—pwal mwo nge ir kewe mi fen woummong—ra luku pwe chommongeloon nour moni epwe alapalo ar pwapwa.
King Salomon seni Israel lom lom a fen mak ussun ekkeei sokkun poraus. I emon mwan mi woummong lap seni aramas meinisin. Kopwe tongeni alleani ussun ukukun watten pisekin kewe lon sopwun 10 lon ewe puken Aeuin King. Awewe chok, nengeni pwe wokisin 14 a apasa: “Iwe, choun ewe kolt mi tori Salomon iteiten ier, ina epwe ukukun wonupuku wone me wonu talent.” A wewe ngeni 25 ton kolt. Ikenai, ena ukukun kolt epwe lap seni $200,000,000, U.S.!
Iwe nge, Salomon ese chok pisekisek, nge a pwal feioch ren tipatchem seni Kot. Ewe Paipel a apasa: “Iei ussun ewe King Salomon a pisekisek me tipatchem lap seni ekkewe king meinisin won fonufan. Iwe, chon fonufan meinisin ra mochen feito ren Salomon pwe repwe rongorong an tipatchem Kot a fang ngeni.” (1 King 10: 23, 24) Sipwe kuna feioch seni tipatchemen Salomon, pun makkeian kewe ra kapachelong lon ewe Paipel. Sipwe pii met a apasa ussun ewe riri lefilen woummong me pwapwa.
[Credit Line]
A for seni Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart