‘Ami Feffetal Epwe Tipeeu Ngeni Kraist’

“Iwe, usun chok oua nguuri Kraist Jises ach Samol, ami feffetal epwe tipeeu ngeni.”​—KOLOSE 2:6.

1, 2. (a) Met ewe Paipel a apasa ussun manauen Enok mi tuppwol lon an angang ngeni Jiowa? (b) Ifa ussun Jiowa a alisikich le feffetal ren I, ussun Kolose 2:6, 7 a pwarata?

EN mi fen katol emon semirit mi feffetal ren seman we? Ewe semirit epwe appiru mwokutukutun seman we, iwe, mesan epwe pwarata an ingeiti; ewe sam epwe alisi, me pwisin mesan epwe pwarata an tong me pwapwa. Mei fich ngeni an Jiowa nounou ei lios pwe epwe liosueta manauen emon chon angang ngeni mi tuppwol. Awewe chok, an Kot we Kapas a apasa pwe ewe mwan mi tuppwol itan Inok a “feffetal ren ewe Kot mi [enlet].”​—Keneses 5:24; 6:9.

² Ussun chok emon sam mi tumunuoch epwe alisi noun we at pwe epwe feffetal ren, Jiowa a fen ngenikich ewe alillis mi murinno seni meinisin. A tinatiu ngeni fonufan Noun we alaemon. Lon iteiten ipwan kewe won ei fonufan, Jises Kraist a unusen appiru Seman we lon lang. (Jon 14:9, 10; Ipru 1:3) Ina minne ika sipwe feffetal ren Kot, epwe lamot ngenikich ach sipwe feffetal ren Jises. Ewe aposel Paul a makkei: “Iwe, ussun chok oua nguuri Kraist Jises ach Samol, ami feffetal epwe tipeeu ngeni, waremi epwe nom lon ewe luku ussun chok oua fen kaeo. Iwe, ami kilisou epwe lapelo.”​—Kolose 2:6, 7.

3. Me ren Kolose 2:6, 7, pwata sipwe tongeni apasa pwe ach atipeeufengenni ach fetal ren Kraist epwe lu seni ach sipwe chok papataiselo?

³ Pokiten ra mochen pwe ar fetal epwe tipeeu ngeni Kraist, me ipweri ipwan kewe mi unusoch, ekkewe chon kaeo Paipel repwe papataiselo. (Luk 3:21; Ipru 10:7-9) Lon chok 1997 won unusen fonufan, lap seni 375,000 ra papataiselo​—weween, lap seni 1,000 iteiten ran. A fokkun apwapwa! Iwe nge, alon Paul kewe mi mak lon Kolose 2:6, 7 a pwarata pwe an aramas atipeeufengenni ar feffetal ren Kraist epwe wewe ngeni lap seni ar repwe chok papataiselo. Ewe kapasen Krik mi wewe ngeni “feffetal” a kapas ussun eu foffor mi sopwosopwolo. Pwal eu, Paul a apasa pwe an aramas feffetal ren Kraist a wewe ngeni ruanu mettoch: warach epwe nom lon i, sipwe aukicheta lon i, sipwe uta lukuchar lon ewe luku, me ach kilisou epwe lapelo. Sipwe kaeo iteiten kinikin meinisin me pii ifa ussun repwe alisikich le sopweilo lon ach feffetal fan tuppwol ren Kraist.

‘Waremi a Nom Lon Kraist’?

4. Met weween ‘warach epwe nom lon Kraist’?

⁴ Paul a makkei pwe akkom, a lamot pwe ‘warach epwe lom lon Kraist.’ (Alollo ngeni Mattu 13:20, 21) Met emon epwe fori pwe waran we epwe nom lon Kraist? Iwe, sisap tongeni kuna waren efoch ira, nge a fokkun lamot ngeni​—a alukuchara ewe ira me awora minne epwe pochokkul ren. Iwe, pwal ussun chok ena, akkom sisap tongeni kuna ifa ussun an Kraist leenien appiru me afalafal repwe kku kich, atun repwe tolong lon ekiekich me letipach. Repwe amongouni me apochokkulakich ikewe ie. Lupwen sipwe mut ngenir ar repwe nemeni ach ekiek, ach kewe foffor, me filiach kewe, repwe amwokutukich ach sipwe fangelo manauach ngeni Jiowa.​—1 Piter 2:21.

5. Ifa ussun sipwe tongeni “amarata ach mwoneiti” ewe mongoon ngun?

⁵ Jises a tongei ewe sile seni Kot. A pwal mwo apasa pwe a ussun chok mongo. (Mattu 4:4) Iwe, lon an we Afalafal won ewe Chuuk, a aloni alon 21 ekkewe sou mak seni wanu puken ewe Tesin Ipru. Ren ach sipwe appiru an we leenien appiru, epwe lamot ach sipwe fori minne ewe aposel Piter a peseikich​—“oupwe fokkun mochen” angei ekkewe mongoon ngun “ussun chok emon monukol mi koran uputiu.” (1 Piter 2:2) Lupwen emon monukol mi koran uputiu a mochen oup, a fokkun affata an mochen. Ika lon ei fansoun, ese ina ussun meefiach ussun ekkewe mongo lon pekin ngun, alon Piter kewe ra peseikich ach sipwe “amarata” ena sokkun mochen. Ifa ussun? Eni ewe poraus lon Kol Fel 34:8 epwe alisikich: “Oupwe chok neni o nengeni pwe Jiowa mi murinno.” Ika sipwe “neni” an Jiowa we Kapas, ewe Paipel, iteitan ren ach sipwe alleani eu kinikin iteiten ran, sipwe kuna pwe epwe murinno ngenikich lon pekin ngun. Mwirin och fansoun, epwe mammarita ach mochen.

6. Pwata a lamot ach sipwe ekkekieki ussun minne sipwe alleani?

⁶ Iwe nge, a lamot ach sipwe kuna feioch seni ewe mongo sipwe ani. Ina minne, a lamot ach sipwe ekkekieki ussun minne sipwe alleani. (Kol Fel 77:11, 12) Awewe chok, atun sipwe alleani ewe puk The Greatest Man Who Ever Lived, epwe lapelo ach feioch ika mwirin eu me eu sopwun sipwe kaulo me pwisin eisinikich: ‘Ifa lapalapen Kraist we ua kuna lon ei poraus, me ifa ussun upwe tongeni lapalapeni lon manauei?’ Ika epwe ina ussun ach ekkekieki ussun ekkena poraus epwe atufichikich ach sipwe apwonueta minne sipwe kaeo. Iwe mwirin, lupwen epwe torikich och kefil, eni sipwe pwisin eisinikich met Jises epwe fori. Ika epwe ina ussun filiach kewe, sipwe pwarata pwe warach a enletin nom lon Kraist.

7. Met sipwe ekieki ussun ewe mongo pochokkul lon pekin ngun?

⁷ Paul a pwal peseikich ach sipwe ani “mongo pochokkul,” weween, ekkewe poraus enlet mi alollol lon an Kot we Kapas. (Ipru 5:14) Sipwe akkom achocho ngeni ach sipwe alleani unusen ewe Paipel. Iwe, mei pwal wor ekkewe poraus mi titchik sipwe tongeni kaeo, awewe chok ren porausen an Jises asorun moon kepich, ekkewe sokkopatten pwon Jiowa a ngeni noun kewe aramas, are ekkoch oesini lon ewe Paipel. Mei wor chommong puk mi alisikich ach sipwe kaeo me kuna feioch seni ekkena mongoon ngun. Epwe ifa ewe feioch seni ach sipwe angei ei sokkun sile? Esap fan iten ach sipwe sikasini, pwe fan iten ach sipwe amarata ach tong ngeni Jiowa me luki kich ngeni. (1 Korint 8:1; Jemes 4:8) Ika sipwe achocho le angei ei sokkun sile, akkapwonueta lon manauach, me aea fan iten ach sipwe alisi ekkewe ekkoch, sipwe enletin akkappiru Kraist. Ei mettoch epwe alisi warach we an epwe nom lon i.

En mi ‘Aueta lon Kraist’?

8. Met weween ach sipwe ‘aukicheta lon Kraist’?

⁸ Iei pwal eu lapalapen ach feffetal ren Kraist lon tipeeu, Paul a siwil seni ewe kapas awewe ussun efoch ira ngeni pwal eu ussun kautaan eu imw. Lupwen sipwe ekieki ussun kautaan eu imw, sisap chok ekieki ussun longolongun we pwe pwal kautaan unusen ewe imw ren angang weires. Iwe, ussun chok ena, sipwe angang weires pwe sipwe lapalapeni ekkewe lapalapen Kraist. Ena sokkun achocho esap monomon, ussun Paul a mak ngeni Timoti: ‘Om feffeita epwe pwapwalo ngeni aramas meinisin.’ (1 Timoti 4:15; Mattu 5:16) Ikkefa ekkoch fofforun Chon Kraist repwe aukicheta?

9. (a) Ren ach sipwe appiru Kraist lon ach angangen afalafal, ikkefa ekkoch mettoch sipwe achocho le isetiu mwach? (b) Pwata sia silei pwe Jiowa a mochen ach sipwe pwapwa lon ach angangen afalafal?

⁹ Jises a awisa ngenikich ach sipwe afalafal me asukula aramas ewe kapas allim. (Mattu 24:14; 28:19, 20) A isetiu mwach eu leenien appiru mi unusoch ren an pwora me lipwakoch lon an angangen afalafal. Pwungun pwe sisap tongeni lollo ngeni. Iwe nge, ewe aposel Piter a isetiu mwach ei mettoch sipwe achocho ngeni: “Oupwe asamolu Kraist ach Samol lon letipemi. Oupwe ammolnata fansoun meinisin pwe oupwe polueni emon are epwe eis ussun popun ewe apilukuluk allim mi nonnom lon ami, nge oupwe fori ei sokkun fan mosonoson o mennin.” (1 Piter 3:15) Ika kese kan meefi pwe ka “ammolata fansoun meinisin pwe kopwe polueni emon,” kesap letipeta. Kopwe isetiu mwom ekkoch mettoch kopwe achocho ngeni pwe repwe alisuk le tikeri. Eni om kopwe mmolneta epwe atufichuk om kopwe eani fitu sokkun afalafal are kopwe tongeni alleani eu ika ruu wokisin. Kopwe tongeni ekiekin achommonga ekkewe puk kopwe anounou ngeni aramas, achommonga noum kewe return visit, are poputani eu Bible study. Sisap chok ekieki ussun fitu aua, fitu puk ika chassi, are fitemon chon kaeo, nge ussun ochun ach angang. Ach sipwe isetiu mwach ekkewe mettoch mi murinno sipwe achocho ngeni epwe alisikich pwe sipwe kuna pwapwa lon ewe angangen afalafal. Ina letipen Jiowa​—ach sipwe angang ngeni “ren pwapwa.”​—Kol Fel 100:2; alollo ngeni 2 Korint 9:7.

10. Ikkefa pwal ekkoch fofforun Chon Kraist a lamot ach sipwe foffori, me ifa ar alillis ngenikich?

¹⁰ Mei pwal wor fofforuch kewe lon ewe mwichefel mi aukicheta lon Kraist. Iei ewe mi lamot seni meinisin, ach sipwe tongfengen lefilach, pun ina esissinin ekkewe Chon Kraist mi enlet. (Jon 13:34, 35) Atun sipwe chuen kaeo, chommong leich sipwe chiechioch ngeni ewe emon mi kaeo ngenikich. Iwe nge, iei, sipwe tongeni apwonueta an Paul we kapasen fon le “suukalo letipach” ren ach sipwe sileilo ekkewe ekkoch lon ewe mwichefel? (2 Korint 6: 13) A pwal lamot ngeni ekkewe elter ach tong me kinisou. Ren ach sipwe tipemecheres ngenir, me kutta pwal nguuri ar kewe kapasen fon seni Paipel, sipwe amecheresi ar angang. (Ipru 13:17) Iwe, epwe pwal aukicheta lon Kraist.

11. Ifa ewe ekiek sipwe eani ussun ewe mettoch papatais?

¹¹ Ewe fansoun papatais, ina eu fansoun meseik! Iwe nge, sisap ekieki pwe epwe ina ussun manauach iteiten fansoun meinisin. Ach sipwe aueta lon Kraist epwe wewe ngeni pwe “minne sia fen fori, sipwe chok feffetal lon.” (Filipai 3:16) Esap weween sipwe chipwang lon manauach. Nge a chok wewe ngeni ach sipwe fetalwenewen​—weween, sipwe eorenalo ekkewe foffor mi murinno lon pekin luku me akkamwochur ran me ran, pwal ier me ier meinisin. Chechemeni mwo, “are emon epwe likiitu tori sopwolon, iwe, epwe manau.”—Mattu 24:13.

En mi “Uta Lukuchar lon ewe Luku”?

12. Met weween ach sipwe “uta lukuchar lon ewe luku”?

¹² Lon an we aulungatin poraus ussun ach atipeeufengenni ach fetal ren Kraist, Paul a peseikich ach sipwe “uta lukuchar lon ewe luku.” Eu Paipel a apasa, “lukuluk ren ewe luku,” pun ewe kapasen Krik Paul a nounou epwe tongeni wewe ngeni “apwungu, alukuluku, me esap tongeni siwil me ren alluk.” Atun sipwe alapalo ach silei, epwe wor pwal ekkoch popun ach sipwe alukuchara ach luku lon Jiowa Kot, me epwe alongolong won alluk. Mwiriloon, epwe lapelo ach lukuchar. Epwe weiresilo pwe an Satan fonufan epwe arikikichelo. Iwe, a achema ngenikich ussun an Paul we kapasen pesepes pwe sipwe “feffeilo ngeni asimau.” (Ipru 6:1) Ekkewe mettoch asimau me uta lukuchar ra ririfengen.

13, 14. (a) Ikkefa ekkewe sossot ngeni ar lukuchar a tori ekkewe chon Kolose Chon Kraist lon ewe aeuin senturi? (b) Eni ifa ewe mettoch Paul a lolilen ussun?

¹³ A tori ekkewe Chon Kraist chon Kolose lon ewe aeuin senturi sossotun ar lukuchar. Paul a eani ei kapasen ourour: “Oupwe tumunukemi pwe esap wor emon epwe liapenikemi ren tipatchemen fonufan are otuputup-mwaal, ussun chok uruwoon re lom, are ekkewe popun anuun fonufan, nge esap ussun Kraist.” (Kolose 2:8) Paul ese mochen ekkewe chon Kolose, ir kewe mi wiliti chon “ewe muun Noun [Kot] we mi achengicheng,” ar repwe rikirik, are tokolo seni leenier lon pekin ngun. (Kolose 1:13) Rikilo ren met? Paul a apasa, ren “tipatchemen fonufan are otuputup-mwaal (philosophy),” nge ina ewe eu chok fansoun an a mak lon ewe Paipel. A ita kapas ussun ekkewe sou tipatchem chon Krik, awewe chok, Plato me Socrates? Inaamwo ika lon na fansoun chokana ra tongeni efeiengaua ekkewe Chon Kraist mi enlet, nge ewe kapas “tipatchemen fonufan (philosophy)” ese kku eu chok weween. A kan wewe ngeni chommong mwichen aramas me sokkun ekiek​—pwal mwo nge lon pekin lamalam. Awewe chok, ekkoch chon Jus lon ewe aeuin senturi ussun Josefus me Plato ra eita ngeni pwisin ar lamalam eu philosophy​—eni fan iten an epwe apwapwai aramas.

¹⁴ Paul a lolilen ussun ekkewe ekiekin aramas lon pekin lamalam. Mwirin, lon ewe chok sopwun lon noun we taropwe ngeni ekkewe chon Kolose, a kapas ussun ir kewe mi apasa, “Kese uwei, are neni, are attapa,” iwe, a weneiti ewe Allukun Moses mi ukutiu ren maloon Kraist. (Rom 10:4) Lukun ekiekin ekkewe chon lukun, mei wor pwal ekkoch minen efeiengau ngeni pochokkulen ewe mwichefel lon pekin luku. (Kolose 2:20-22) Paul a ourourer ussun ekkewe sokkun ekiek mi fiti “ekkewe popun anuun fonufan.” Ekkena poraus mi chofona ra popu seni aramas.

15. Ifa ussun sipwe tongeni tumunukich seni ach sipwe rikilo ren ekiekin fonufan mi kan totorikich?

¹⁵ Ekkewe ekiekin aramas rese longolong won an Kot we kapas repwe tongeni efeiengaua lukucharen manauen chon Kraist. A lamot ngenikich ikenai ach sipwe tumunukich seni ekkena minen efeiengau. Ewe aposel Jon a peseikich: “Ami mi achengicheng, ousap luku sokkun ngun meinisin, nge oupwe sotuni ekkewe poraus, pwe oupwe silei are ra fen feito ren Kot.” (1 Jon 4:1) Weween, ika emon chienom we chon sukul epwe sotun ameef ngonuk pwe a chok ekiekin lom lom om atipeeufengenni manauom ngeni Paipel, are emon chon orum we epwe kan etipetipaok pwe kopwe ekiekin chechei pisek, are ika emon chienom we chon angang epwe sotunuk pwe kopwe u ngeni miritin letipom mi alongolong won Paipel, are pwal mwo nge ika emon chienom we chon luku epwe ngunungunungaua are esiita ekkoch lon ewe mwichefel nge a popu seni pwisin an ekiek, kesap nguuri minne repwe apasa. Tunalo minne ese tipeeu ngeni an Kot we Kapas. Ren ach sipwe fori ena, sipwe akkamwochu ach lukuchar me atipeeufengenni ach feffetal ren Kraist.

“Ami Kilisou Epwe Lapelo”

16. Ifa ewe aruarun lapalapen ach atipeeufengenni ach feffetal ren Kraist, me ifa ewe kapas eis sipwe eis?

¹⁶ Ewe aruanuun kinikinin ach feffetal ren Kraist Paul a kapas ussun a wewe ngeni ach sipwe “urelo ren luku me kilisou.” (Kolose 2:7) Ewe kapas “urelo” a achema ngenikich ussun eu chanpupu mi uralo ppan we. Ei mettoch a aiti ngenikich pwe ren kich Chon Kraist, ach kilisou epwe sopwosopwolo are eoreniach. Oukich meinisin sipwe tongeni pwisin eis, ‘Ngang mi kilisou?’

17. (a) Pwata sipwe tongeni apasa pwe mei wor chommong popun ach sipwe kilisou, pwal mwo nge lon ei fansoun weires? (b) Ikkefa ekkoch liffang seni Jiowa sipwe akkaeuin kilisou ren?

¹⁷ Enlet, mei wor popun ach sipwe urelo ren kilisou ngeni Jiowa iteiten ran. Pwal mwo nge lon ekkewe fansoun weires, eni epwe wor och mettoch epwe tongeni awora ekis fansoun asoso. Epwe tongeni fis ren emon chienach we mi pwarata an tongeikich. Emon attongach we epwe attapakich pwe epwe apochokkulakich. Nafochun annut epwe tongeni apochokkulasefallitikich. Mongo mi anno epwe awesalo echik. Tikitikin emon machang, takirin emon semirit, lingen lang mi arauarau, patapaten asapwal​—ekkana me pwal ekkoch mettoch repwe tongeni fis lon eu chok ran. A kan mecheres ach sisap ekieki ussun ekkena liffang. Esap pwung ach sipwe kilisou ren ir meinisin? Ir meinisin ra feito seni Jiowa, ewe Popun “meinisin sokkun liffang mi murinno, o meinisin sokkun minen liffang mi unusoch.” (Jemes 1:17) Iwe, a fen ngenikich ekkewe liffang mi watte senir​—ren chok awewe, manauach. (Kol Fel 36:9) Pwal eu, a ngenikich ewe tufichin kuna manau esemuch. Ren an epwe awora ei liffang, Jiowa a awora ewe asor mi lapalap seni meinisin ren an tinatiu Noun we alaemon, atewe a “meseik ren fansoun meinisin.”​—Proferp 8:30; Jon 3:16.

18. Ifa ussun sipwe tongeni pwarata ach kilisou ngeni Jiowa?

¹⁸ Met ren enletin alon ewe sou kol, a era: “Mi chok murinno ach sipwe apasa ach kilisou ngeni Jiowa.” (Kol Fel 92:1) A pwal ina ussun an Paul achema ngeni ekkewe Chon Kraist lon Tesalonika: “Oupwe kilisou fansoun meinisin.” (1 Tesalonika 5:18; Efisus 5:20; Kolose 3:15) Emon me emon leich sipwe mochen alapalo ach kilisou. Ach kewe iotek esap chok masou ren tingor fan iten minne epwe lamot ngenikich iteiten fansoun meinisin. Mei murinno ekkena sokkun iotek lon fansoun fich. Nge, ekieki mwo meefiom ika emon chienom epwe fos ngonuk lon chok ekkewe fansoun epwe mochen angei och mettoch sonuk! Ina minne, pwata kese iotek ngeni Jiowa pwe kopwe apasa om kilisou ngeni are mwareiti? Epwe eu minen apwapwa ngeni lupwen epwe nennetiu ei fonufan mi esor kilisou! Iei pwal eu feioch seni ekkena sokkun iotek, epwe alisikich pwe sipwe ekkekieki ussun ekkewe mettoch mi murinno lon manauach me achema ngenikich ussun ekkewe feioch watte a fen torikich.

19. Ifa ussun alon Paul lon Kolose 2:6, 7 a pwarata pwe oukich meinisin sipwe tongeni amurinnolo ach feffetal ren Kraist?

¹⁹ Esap eu minen amairu ngenikich ifa ukukun watten kapasen emmwen mi tipatchem sipwe tongeni angei seni eu chok poraus lon an Kot we Kapas? Sipwe mochen lefareni an Paul we kapasen fon pwe sipwe feffetal ren Kraist. Iwe, sipwe achocho pwe ‘warach epwe nom lon Kraist,’ “sipwe aukichita lon i,” “sipwe uta lukuchar lon ewe luku,” me ‘urelo ren kilisou.’ Ekkena kapasen fon a akkaeuin lamot ngeni ekkewe mi koran papatais. Nge a pwal weneitikich meinisin. Ekieki mwo ifa ussun waren efoch ira itan taproot epwe totiu me alollol fan pwul me kautaan eu imw epwe feffeita. Iwe, esap muchulo ach feffetal ren Kraist. Oukich meinisin sipwe tongeni mammarita lon pekin ngun. Jiowa epwe alisikich me efeiochukich, pun a mochen ach sipwe sopwosopweilo le feffetal ren I pwal Noun we mi achengicheng.

Ifa Ussun Kopwe Polueni?

◻ Met weween ach sipwe atipeeufengenni ach feffetal ren Kraist?

◻ Met weween ‘warach epwe nom lon Kraist’?

◻ Ifa ussun sipwe ‘aukicheta lon Kraist’?

◻ Pwata a lamot ach sipwe “uta lukuchar lon ewe luku”?

◻ Ikkefa ekkewe popun ach sipwe ‘urelo ren kilisou’?

[Sasing lón pekin taropwe 22]

Eni sise tongeni kuna waren efoch ira, nge epwe awora ngeni mongo me alukuchara