Fiffiu Fan Iten Ach Luku

“Oupwe asamolu Kraist ach Samol lon letipemi. Oupwe ammo lata fansoun meinisin pwe oupwe polueni emon are epwe eis ussun popun ewe apilukuluk allim mi nonnom lon ami.”​—1 PITER 3:15.

1, 2. Pwata ekkewe Chon Pwarata Jiowa rese mairu ren an aramas u ngenir, nge ifa ar mochen?

LON lap ngeni ekkewe fonuen fonufan meinisin, aramas ra kan silei pwe ekkewe Chon Pwarata Jiowa mi wenechar me limelimoch. Chommong ra meefi pwe ir chon orur mi murinno me rese efisata osukosuk. Iwe nge, ekkeei Chon Kraist mi kukutta kinamwe ra kuna riaffou watte nge ese wor popun​—lon ekkewe fansoun maun me fansoun kinamwe. Rese mairu pwe aramas ra u ngenir. Ra pwal mwo nge witiwiti pwe epwe fis. Popun, pun ra silei pwe ekkewe Chon Kraist lon ewe aeuin senturi C.E. ra kuna “oput,” iwe, pwata ir kewe mi achocho ar repwe appiru Kraist ikenai repwe meefi pwe epwe sokkolo an aramas foffor ngenir? (Mattu 10:22) Pwal eu, ewe Paipel a apasa: “Ir meinisin mi mochen manaueni ewe manau mi fich ngeni Kot lon Kraist Jises repwe kuna riaffou.”​—2 Timoti 3:12.

² Chon Pwarata Jiowa rese kukkutta riaffou, iwe, rese pwal pwapwaesini fansoun weires epwe toto rer​—paking, kalapus, kawet. Ra mochen ‘eani eu manau mi kinamwe” pwe repwe tongeni afalafala ewe kapas allimen an Kot we Muu, nge esap wor pinepinen. (1 Timoti 2:1, 2) Ra aucheani ar tufichin feffel mi suuk ngenir lon lap ngeni ekkewe fonu meinisin, iwe, ra pwal foffori minne mi tufich ngenir pwe repwe “kinamwe ren aramas meinisin,” pachelong ekkewe sou nemenemen ekkewe muu. (Rom 12:18; 13:1-7) Pwata aramas repwe “oputer”?

3. Ifa eu popun ekkewe Chon Pwarata Jiowa ra kuna oput nge esor popun?

³ Ewe popun ekkewe Chon Pwarata Jiowa repwe kan kuna oput seni aramas a lollo ngeni ewe popun ekkewe Chon Kraist lom lom ra kuna riaffou. Aeuin, ekkoch ra oput ifa ussun ekkewe Chon Pwarata Jiowa ra anganga ar luku. Awewe chok, ra akkachocho le afalafala ewe kapas allim ussun an Kot we Muu, nge fan chommong aramas ra wewengau ar tinikken, iwe, ra ekieki pwe a kon ssenuk ar angangen epwe “okullu aramas ngeni ar luku”. (Alollo ngeni Foffor 4:19, 20) Iwe, pokiten rese pwal angolong lon mwokutukutun ekkewe muu me maunen ekkewe muun fonufan, fan ekkoch aramas ra ekieki pwe ekkewe Chon Pwarata rese tuppwol ngeni en me an muu.​—Mika 4:3, 4.

4, 5. (a) Ifa ussun Chon Pwarata Jiowa ra kuna tipimwaal? (b) Fan chommong, io kewe ra efisata riaffou ngeni noun Jiowa kewe chon angang?

⁴ Oruuan, aramas ra tipimwaal ngeni ekkewe Chon Pwarata Jiowa​—ra kapas chofona me sorei minne ra wesewesen luku. Ina minne, chon ekkoch fonu ra eriaffour nge ese wor popun. Pwal eu, pokiten ra kutta alillis seni tokter mi tipeeu ngeni ar mochen alleasochisi allukun Paipel pwe repwe “tumunur seni chcha,” aramas ra eita ngenir “chon nielo semirit” me “eu mwichen chon nielo pwisin ir.” (Foffor 15:29) Nge a wesewesen pwung pwe ekkewe Chon Pwarata Jiowa ra fokkun aucheani manauer, iwe, ra kan kukkutta alillis mi murinno fan asengesir me nour kewe. Ese fokkun pwung ewe poraus pwe chommong noun ekkewe Chon Pwarata Jiowa semirit ra malo iteiten ier pun rese mochen angei IV chcha. Pokiten ewe enlet seni Paipel ese kku letipen chon eu famili meinisin, ekkoch ra tipimwaal ngeni ekkewe Chon Pwarata pwe ir chon atai ewe kotun famili. Iwe nge, ir kewe mi silei ekkewe Chon Pwarata Jiowa ra silei pwe ra fokkun aucheani ewe kokkotun famili me achocho le alleasochisi allukun ewe Paipel pwe emon mwan me puluan we repwe tongfengen lefiler me sufolfengennir, iwe, ekkewe nau repwe pwal alleasochisi semer kewe me iner, nge ese lifilifil ika repwe chon luku are chon lukun.​—Efisus 5:21–​6:3.

⁵ Fan chommong, ekkewe chon efisata riaffou ngeni Chon Pwarata Jiowa, ir akkaeuin ekkewe nouwisil lamalam mi aea ar chiechi ngeni ekkewe sou nemenem me ekkewe chon aporausa porausen fonufan pwe repwe sotun eppeti angangen ekkewe Chon Pwarata. Epwe ifa ussun kich, Chon Pwarata Jiowa, sipwe polueni ena sokkun fofforun u ngenikich​—mi popu seni ach luku me fofforun fel are pokiten ekkewe tipimwaal ngenikich?

“Ami Mirit Epwe Pwapwalo ngeni Aramas Meinisin.”

6. Pwata a lamot ach sipwe eani eu ekiek mi itepok me ruepek ussun ekkewe chon lukun ewe mwichefelin Chon Kraist?

⁶ Akkom, a lamot ach sipwe eani ewe ekiek pwung​—an Jiowa ekiek​—ussun ekkewe rese nguuri ach luku. Ika esap ina ussun ach ekiek, eni sipwe tongeni efisi an aramas eriaffoukich are oputakich. Ewe aposel Paul a makkei: “Ami mirit epwe pwapwalo ngeni aramas meinisin.” (Filipai 4:5) Ina pwata, ewe Paipel a peseikich ach sipwe itepok me ruepek lon ach ekiek ussun ekkewe chon lukun ewe mwichefelin Chon Kraist.

7. Met weween ach sisap “tikitikipwul seni fonufan”?

⁷ Aeuin, ewe Paipel a wesewesen affata lamoten ach sisap u tikitikipwul seni fonufan.” (Jemes 1:27; 4:4) Ussun an a mak fan chommong lon ewe Paipel, ewe kapas “fonufan” a wewe ngeni ewe mwichen aramas lukun ewe mwichen Chon Kraist mi enlet. Kich sia manau lein ei mwichen aramas; sipwe nom rer lon ach angang, lon sukul, lon sopwuch kewe. (Jon 17:11, 15; 1 Korint 5:9, 10) Iwe nge, sipwe tumunukich seni tikitikipwulun fonufan ren ach sisap eani ar ekiek, ar fos, me ar kewe foffor mi u ngeni ewe alen Kot mi pwung. A pwal lamot ach sipwe weweiti ewe sokkun feiengau epwe tongeni fis seni ach chiechi ngeni ei fonufan, akkaeuin ir kewe mi pwarata ar tunalo an Kot kewe alluk.​—Än Salomon Fos 13:20.

8. Pwata ewe kapasen fon pwe sipwe tumunukich seni tikitikipwulun fonufan ese wewe ngeni pwe sipwe turunufasei ekkewe ekkoch?

⁸ Iwe nge, ewe kapasen fon pwe sisap tikitikipwul ren fonufan ese ita awora ngenikich popun ach sipwe esiita ekkewe chon lukun. (Än Salomon Fos 8:13) Chechemeni mwo porausen ekkewe nouwisin lamalamen Jus ewe lesen mwen ei a kapas ussun. Ewe sokkun lamalam ra forata ese kuna chen seni Jiowa, iwe, ese pwal efisata kinamwe lefiler me ekkewe chon lukun. (Mattu 21:43, 45) Pokiten ar tipetekia, ekkena mwan ra turunufasei ekkewe chon Jentail. Sise eani ena sokkun ekiek me sufolungau ngeni ekkewe chon lukun. Ussun chok ewe aposel Paul, sia tipeni pwe ir meinisin mi rongorong an ewe Paipel poraus mi enlet repwe kuna an Kot we chen.​—Foffor 26:29; 1 Timoti 2:3, 4.

9. Ifa ussun eu ekiek mi itepok me ruepek mi popu seni Paipel epwe kku ifa ussun ach sipwe kapas ussun ekkewe chon lukun?

⁹ Ewe ekiek mi itepok me ruepek me pwal alongolong won Paipel epwe nemeni ifa ussun sipwe fos ussun ekkewe chon lukun. Paul a ereni Taitos an epwe achema ngeni ekkewe Chon Kraist lon ewe fonu Krit pwe resap “esiita emon, resap aninifengen, repwe mirit, o repwe mosonoson ngeni aramas meinisin.” (Taitos 3:2) Nengeni pwe ekkewe Chon Kraist resap esiita “emon”​—esap pwal mwo nge ekkewe chon lukun won ewe fonu Krit, nge ekkoch leir ra sinnelo pwe ir chon kapas chofona, chon mongommong, me chipwang le angang. (Taitos 1:12) Ina minne esap och me ren ewe Paipel ika sipwe eani kapasen esiit lupwen sipwe kapas ussun ir kewe rese tipeeu ngeni ach luku. Ach eani lamalam tekia esap luki aramas ngeni ach fel ngeni Jiowa. Iwe nge, lupwen ach ekiek me foffor epwe tipeeu ngeni an Kot we Kapas, sipwe “alinga ewe afalafal” ussun Kot.​—Taitos 2:10.

Fansoun Sipwe Fanafanelo, Fansoun Sipwe Kapas

10, 11. Ifa ussun Jises a pwarata pwe a silei inet epwe (a) “fansoun fanafanalo”? (b) “fansoun fos”?

¹⁰ Eklesiastis 3:7 a apasa: “A wor fansoun fanafanalo me fansoun kakapas.” Iwe, iei ewe osukosuk: ach filata ekkewe fansoun sipwe tunalo ekkewe chon u ngenikich me ekkewe fansoun sipwe fos fan iten ach luku. Sipwe tongeni kaeo seni ewe leenien appiru an emon mi unusoch ren an mirit a isetiu​—Jises. (1 Piter 2:21) A silei inet epwe “eu fansoun fanafanalo.” Awewe chok, lupwen ekkewe samolfel mi lapalap me ekkewe chinnap mwan a tipi ngeni i mwen mesen Pailat, Jises “ese mwo polueni.” (Mattu 27:11-14) Ese mochen apasa och mettoch mi epwe tongeni eppeti pwonuetaan letipen Kot ngeni i. Iwe nge, a filata pwe an kewe foffor repwe pwarata ussun. A silei pwe esap pwal mwo nge ewe enlet epwe siwili ekiekir me letiper mi lamalam tekia. Ina minne a tunalo ar tipimwaal, iwe, a chok fanafanelo.​—Aisea 53:7.

¹¹ Iwe nge, Jises a pwal silei inet epwe eu “fansoun fos.” Fan ekkoch, a polueni ekkewe chon esiit, me a pwarata pwe mei mwaal minne ra tipi ngeni. Awewe chok, lupwen ekkewe soumak me Farasi ra esiita i mwen mesen ekkewe aramas ren ar apasa pwe a asulo ekkewe timon me ren Peelsepul, Jises a filata pwe esap fanafanelo. Ren an aweweiochu me an eani eu kapas monomon, a pwapwalo pwe ra kapas chofona. (Mark 3:20-30; pwal nengeni Mattu 15:1-11; 22:17-21; Jon 18:37) Fan eu, mwirin an Jutas amam Jises me an kuna ares, lupwen a nonnom mwen ewe Sanhedrin, ewe samolfel mi lapalap itan Keafas a apasa: “Upwe akkapwon ngonuk fan iten ewe Kot mi manau, pwe kopwe chok apasa ngenikem ika en ewe Kraist, Noun Kot!” Ina pwal eu “fansoun fos,” pun ika epwe chok fanafanelo, repwe tongeni ekieki pwe a amam pwe i ewe Kraist. Ina minne Jises a polueni: “Ngang i.”​—Mattu 26:63, 64; Mark 14:61, 62.

12. Ifa ewe mettoch a amwokutu Paul me Parnapas pwe repwe pworacho le fos lon Ikonium?

¹² Pwal ekieki ussun Paul me Parnapas. Foffor 14:1, 2 a apasa: “Lon Aikonium, ra mwinelong lon ewe sinakoken re Jus me lapalapen ar afalafal a amwokutu chommong chon Jus me chon Krik le wiliti chon luku. Nge ekkewe re Jus mi lukulukumang ra etipetipa chon ekkewe muu ar repwe u ngeni ekkewe soulang.” The New English Bible a apasa: “Nge ekkewe chon lukulukummang chon Jus ra amwokutu ekkewe re Jentail pwe repwe u ngeni ekkewe Chon Kraist.” Ekkewe chon Jus mi u ngeni rese chok pwisin oputa ar afalafal, nge ra pwal mwo nge pweniir pwe repwe etipetipa ekkewe chon Jentail ar repwe pwal oputa ekkewe Chon Kraist.a A wesewesen alollol ar oputa ewe lamalamen Kraist! (Alollo ngeni Foffor 10:28) Paul me Parnapas ra meefi pwe ina eu “fansoun fos,” pun ika resap kapas, ekkewe minefoon Chon Kraist repwe letipeta pokiten an aramas oputer. “Iwe, [Paul me Parnapas] ra nonnom ikewe fansoun langattam, ra pworacho le kapas fan iten Jiowa,” iwe, a pwarata an chen ngenir ren an atufichir ar repwe fori ekkoch manaman. Iwe, a fis pwe ekkoch ra “eti ekkewe re Jus, nge ekkoch ra eti ekkewe chon kuno.”​—Foffor 14:3, 4.

13. Atun epwe wor kapasen esiitakich, inet epwe “eu fansoun fanafanalo”?

¹³ Iwe, met sipwe fori ika aramas repwe esiitakich? Epwe alongolong won lapalapen ewe fansoun. Fan ekkoch, epwe wewe ngeni ach sipwe apwonueta ewe kapasen emmwen pwe mei wor “eu fansoun fanafanalo.” Epwe akkaeuin ina ussun lupwen ekkewe chon u ngenikich ra sotun efisata anini. Sisap monuki pwe ekkoch aramas resap chok mochen silei ewe enlet. (2 Tesalonika 2:9-12) Epwe lusmwaal ach fansoun ika sipwe achocho le fos ngeni ir kewe mi wesewesen lukulukumang. Lap seni ena, ika sipwe aninifengen me iteiten chon u ngenikich, sipwe tongeni tokolo seni ewe angang mi lamot lap seni meinisin​—ach sipwe alisi ekkewe mi letipwenechar mi wesewesen mochen kaeo ewe enlet seni Paipel. Ina minne, lupwen ekkewe chon appoluakich repwe chofonata poraus ussuch, iei ewe kapasen fon seni Paipel: “Oupwe sap senir.”​—Rom 16:17, 18; Mattu 7:6.

14. Ifa ussun sipwe tongeni fiffiu fan iten ach luku mwen mesen ekkewe ekkoch?

¹⁴ Pwungun, sap minne sisap fiffiu fan iten ach luku. Popun, pun a pwal wor “eu fansoun fos.” Sipwe ekieki ussun ekkewe aramas mi letipwenechar mi rongorong ekkewe kapasen esiit ussuch. Sipwe mochen aweweiochu ngeni ekkewe ekkoch ussun ach luku, iwe, sipwe pwal mwo nge etiwa ekkena fansoun. Piter a makkei: “Oupwe asamolu Kraist ach Samol lon letipemi. Oupwe ammolata fansoun meinisin pwe oupwe polueni emon are epwe eis ussun popun ewe apilukuluk allim mi nonnom lon ami, nge oupwe fori ei sokkun fan mosonoson o mennin.” (1 Piter 3:15) Lupwen ekkewe mi wesewesen mochen silei repwe eis ussun ekkewe pisekin annet fan iten minne sia luku mi auchea ngenikich, lupwen repwe kapas eis ussun an chon u ngenikich tipimwaal, ina wisach ach sipwe fiffiu fan iten ach luku ren ach nounou ewe Paipel. Pwal eu, ach kewe foffor murinno epwe eu pisekin pwarata mi lapalap. Atun ekkewe chon nennengeni manauach repwe kuna pwe sia enletin achocho le atipeeufengenni manauach ngeni an Kot kewe alluk mi pwung, epwe mecheres ngenir ar repwe kuna pwe ese pwung an aramas tipimwaal ngenikich.​—1 Piter 2:12-15.

Met Ren An Sou Peresei Poraus Pwenikich?

15. Ifa eu poraus mi pwarata ifa ussun emon chon repotei porausen fonufan a tipimwaal ngeni ekkewe Chon Pwarata Jiowa?

¹⁵ Fan ekkoch, ekkewe sou repotei porausen fonufan repwe makkei poraus mi mwaal ussun ekkewe Chon Pwarata Jiowa. Awewe chok, fan Akos 1, 1997, eu simpung lon Russia a atou eu poraus mi pweni ekkewe Chon Pwarata ren an apasa pwe a alluk ngeni ekkewe Chon Pwarata ar repwe ‘poutalo puluwer kewe me semer kewe me iner ika rese weweiti are fiti ar luku.’ Iwe, aramas meinisin mi wesewesen silei ekkewe chon Pwarata Jiowa repwe silei pwe ese pwung ena poraus. Ewe Paipel a apasa pwe ekkewe Chon Kraist repwe tongei me sufoluti chon le imwer kewe inaamwo ika rese eani ar luku, iwe, ekkewe Chon Pwarata ra achocho le foffori ena. (1 Korint 7:12-16; 1 Piter 3:1-4) Iwe nge, a katou ewe poraus me chommong ra tupulo ren. Epwe ifa ussun sipwe tongeni esile ngeni aramas ach luku lupwen ekkoch repwe tipimwaal ngenikich?

16, 17, pwal ewe pwor lon pekin taropwe 22. (a) Met Ewe Leenien Mas a pin apasa ussun ach ekiek ngeni ekkewe poraus mi chofona mi katou seni ekkewe simpung? (b) Fan met sokkun lapalap eni ekkewe Chon Pwarata Jiowa repwe polueni ekkewe poraus mi mwaal me ren ekkewe chon aporausa porausen fonufan?

¹⁶ Ren ei poraus, mei pwal wor “eu fansoun fanafanelo me eu fansoun fos.” Ewe Leenien Mas a pin apasa ussun ei mettoch: “Ach sipwe tunalo poraus chofona mi katou ren ekkewe chon repotei porausen fonufan are sipwe polueni ren minne mi fich epwe alongolong won ekkewe mettoch mi fis lon na fansoun, ion ewe chon esiit, me met an ekiekin apwonueta.” Fan ekkoch epwe murinno ach sipwe chok tunalo minne ra apasa, pwe esap feffeita ewe kapas chofona.

¹⁷ Lon pwal ekkoch fansoun, ina epwe “eu fansoun fos.” Eni emon chon repotei porausen fonufan a wewengau ussun ekkewe Chon Pwarata Jiowa me epwe etiwa poraus mi enlet ussuch. (Nengeni ewe pwor “Apwungu eu Poraus mi Mwaal.”) Ika ekkewe poraus mi chofona repwe efisata oput me eppeti ach angangen afalafal, eni ekkoch chon tupuni ewe branch ofesin ewe Watch Tower Society repwe mwokutukut fan iten ar repwe polueni ewe poraus ese pwung. b Awewe chok, eni ekkewe elter mi lipwakoch repwe wisen pwarata ekkewe poraus mi enlet lon eu programin TV, pun ika repwe etiwalo, aramas repwe tongeni ekieki pwe ekkewe Chon Pwarata Jiowa resap tongeni polueni. Emon me emon Chon Pwarata epwe tipatchem ika epwe mwokutukut fan emmwenien ewe Watch Tower Society me ekkewe chon tupuni lon ekkeei sokkun mettoch.​—Ipru 13:17.

Ach Fiffiu fan iten ewe Kapas Allim ren Allukun ewe Muu

18. (a) Pwata ese lamot ach sipwe akkom angei an ekkewe muun fonufan mumuta ngenikich fan iten ewe angangen afalafal? (b) Ifa ewe al sipwe aleni lupwen eu muu ese mut ngenikich ach sipwe afalafal?

¹⁸ Mei enlet pwe pwungun ach afalafala ewe kapas allim ussun an Kot we Muu a popu seni lang. Jises, ewe emon mi awisa ngenikich ach sipwe apwonueta ei angang, a fen angei ‘wisan lon lang me won fonufan.’ (Mattu 28:18-20; Filipai 2:9-11) Ina minne, esor lamoten sipwe angei ach mumuta le afalafal seni ekkewe muun fonufan. Iwe nge, sia pwal weweiti pwe ach tufichin afalafal fan allukun ekkewe muun fonufan epwe amecheresi ach uweifetalei porausen ewe Muu. Lon ekkewe fonu ikkewe ie ese pinepin ach feffel, sipwe aea ewe kokkotun alluk pwe sipwe tongeni sopweilo. Ikkewe ra eppeti ach angang ie, sipwe angang me ren allukun ewe fonu pwe sipwe tongeni angei ar mumuta. Sap minne sipwe achocho le siwili kokkotun fonufan, nge sipwe “fiffiu fan iten me fotetiu ewe kapas allim me ren allukun aramas.”c​—Filipai 1:7.

19. (a) Met epwe tongeni fis pokiten ach ‘ngeni Kot minne an Kot’? (b) Ifa ewe mettoch sipwe pochokkul le foffori?

¹⁹ Kich Chon Pwarata Jiowa, sia sinneni pwe Jiowa I ewe mi Unusen Tekia. An we alluk a lapalap. Sipwe alleasochisi ekkewe muun fonufan, weween, sipwe ‘ngeni Sisar minne an Sisar.’ Nge sisap mut ngeni och mettoch an epwe eppeti ach akkapwonueta wisach mi lamot lap seni meinisin​—ach sipwe ‘ngeni Kot minne an Kot.’ (Mattu 22:21) Sia unusen weweiti pwe ach foffori ei mettoch epwe atoto rech “oput” seni ekkewe muun fonufan, iwe, sipwe nguuri ei weires mi kapachelong lon ewe liwinin ach sipwe wiliti noun Jises kewe chon kaeo. Uruwoon ekkewe Chon Pwarata Jiowa lon ewe 20th senturi a pwarata ussun ach akkachocho ngeni ach sipwe fiffiu fan iten ach luku ren allukun aramas. Ren an Jiowa alillis, sipwe sopweilo nge sisap “ukutiu seni ach afalafala ewe kapas allim.”​—Foffor 5:42.

[Footnote]

En mi Chechemeni?

◻ Pwata ekkewe Chon Pwarata Jiowa, ir “minen oput”?

◻ Epwe ifa ach ekiek ussun ekkewe chon lukun?

◻ Ifa ewe leenien appiru Jises a isetiu ussun ach foffor ngeni ekkewe chon u ngenikich?

◻ Lupwen sipwe kuna esiit, ifa ussun sipwe tongeni apwonueta ewe poraus pwe epwe wor “eu fansoun fanafanalo me eu fansoun fos”?

[Pwóór lón pekin taropwe 22]

Apwungu eu Poraus mi Mwaal

“Lon Yacuiba, Bolivia, eu mwichen chon lamalam ra akkota pwe eu TV station epwe fichi eu kachito mi for ren ekkoch chon tokolo. Pokiten chommong aramas ra eani ekiekmwaal seni ewe program, ekkewe elter ra filata pwe repwe chuuri meilapen ruu TV station me erenir pwe repwe moni ar repwe fichi ngeni aramas ekkewe video Jehovah’s Witnesses​—The Organization Behind the Name and The Bible​—A Book of Fact and Prophecy. Mwirin an katol an ewe Society kewe fitio, ewe mwan minne an ewe station a song pokiten ekkewe poraus mi mwaal lon programin ekkewe chon rikilo, iwe, a apasa pwe epwe awora fansoun pwe epwe apioni porausen ewe mwichelap fan iten ekkewe Chon Pwarata Jiowa, nge epwe chok free. A chommong chochoon ir kewe mi fiti lap seni lom, me chommong chon letipwenechar ra poputa le eani kapas eis ngeni ekkewe Chon Pwarata lupwen ra chuurir lon ar angangen afalafal.”​—1997 Yearbook of Jehovah’s Witnesses, pekin taropwe 61-2.

[Sasing lón pekin taropwe 23]

Fan ekkoch, Jises a polueni an ekkewe chon esiit kapasen tipimwaal