Watchtower ONLINE LIBRARY
Watchtower
ONLINE LIBRARY
Chuuk
  • PAIPEL
  • PUK
  • MEETINGS
  • w99 1/1 p. 26-31
  • Iei Ewe Ranin Amanau!

Ese wor video fán iten ei kinikin.

Omusaaló, a wor osukosuk le eppietá ewe video.

  • Iei Ewe Ranin Amanau!
  • Ewe Leenien Mas a Esilefeili án Jiowa We Mwú—1999
  • Itelap Kisikis
  • Pwal Ekkóch
  • “Sia Etipetipa Aramas”
  • An Kraist Tong a Amwokutuk?
  • “Sipwe Chasefal ngeni Kot”
  • “Ewe Fansoun mi Fich”
  • ‘Sipwe Pwarata Pwisin Kich Ussun Chon Angangen Kot’
  • Eani Lukuluk won ewe Angangen Amanau Seni Jiowa
  • “Ikenai Fokun Fansoun Fich”
    Ewe Leenien Mas a Esilefeili án Jiowa We Mwú—2010
  • Tumunuochu Lingen Ewe “Apilukuluk Allimen Amanauen Ngunuch!”
    Ewe Leenien Mas a Esilefeili án Jiowa We Mwú—2000
  • Esilefeili ewe Kapas Allim Usun Úméúméchún Kot
    Ewe Leenien Mas a Esilefeili án Jiowa We Mwú—2016
Ewe Leenien Mas a Esilefeili án Jiowa We Mwú—1999
w99 1/1 p. 26-31

Iei Ewe Ranin Amanau!

“Nengeni! Ei fansoun iei ewe fansoun mi fich. Nengeni! ei fansoun iei ewe ranin amanau.”​—2 KORINT 6:2.

1. Ifa ewe mettoch epwe lamot fan iten ach sipwe uoch mwen Kot me Kraist?

JIOWA a fen akkota pwe epwe fis ewe ranin kapwung ngeni aramas meinisin. (Foffor 17:31) Ika epwe eu ranin amanau ngenikich, epwe lamot ach sipwe uoch mwen mesen Jiowa me noun we soukapwung, Jises Kraist. (Jon 5:22) Ach sipwe uoch epwe wewe ngeni pwe sipwe atipeeufengenni ach kewe foffor ngeni an Kot we Kapas me pwal eani ewe sokkun luku mi amwokutukich le alisi ekkewe ekkoch pwe repwe wiliti noun Jises kewe chon kaeo mi enlet.

2. Pwata ekkewe aramasen fonufan ra towau seni Kot?

2 Pokiten ewe tipis seni Atam, aramasen fonufan ra towau seni Kot. (Rom 5:12; Efisus 4:17, 18) Ina minne, ir kewe sipwe afalafal ngeni repwe chok tongeni kuna manau ika repwe chasefal ngeni Kot. Ewe aposel Paul a affata ei mettoch lupwen a mak ngeni ekkewe Chon Kraist lon Korint. Iwe, sipwe atittina 2 Korint 5:10–6:10 fan iten ach sipwe kuna met Paul a apasa ussun ewe mettoch kapwung, chasefal ngeni Kot, me ewe angangen amanau.

“Sia Etipetipa Aramas”

3. Ifa ussun Paul a “afalafala aramas,” iwe, pwata sipwe pwal foffori ina ussun ikenai?

3 Paul a apachafengenni ewe mettoch kapwung me ewe angangen afalafal lupwen a makkei: “Pun kich meinisin sipwe pwapwalo mwen an Kraist we leenien apwung, pwe emon me emon epwe angei en me liwinin an kewe foffor lon inisin, are mi murinno are mi ingau. Iei minne, pokiten sia meefi niuokusun ewe Samol, sia afalafala aramas.” (2 Korint 5:10, 11) Ewe aposel a ‘etipetipa aramas’ ren an afalafala ewe kapas allim. Nge ifa ussuch? Pokiten muchuloon ei otot mi ingau epwele torikich, ukukun ach tufich, sipwe mochen alisi ekkewe ekkoch pwe repwe kuna kapwungoch seni Jises me chen seni Popun ewe angangen amanau, Jiowa Kot.

4, 5. (a) Pwata sisap sikasini minne sipwe tongeni fori lon ach angang ngeni Jiowa? (b) Ifa ussun Paul a sikasini “fan iten Kot”?

4 Iwe nge, ika Kot epwe efeiochu ach angangen afalafal, sisap sikasini. Ekkoch lon Korint ra lamalam tekia ussun pwisin ir are pwal ekkoch mwan, iwe, a efisata tipefesen lon ewe mwichefel. (1 Korint 1:10-13; 3:3, 4) Lon an kapas ussun ei lapalap, Paul a makkei: “Sisap pwal aitiochu pwisin kich ngenikemi, nge sia chok fang ngenikemi minen ami sikasinikem, pwe oupwe tongeni polueni ir mi sikasini wisen emon, nge sap letipan. Pun are sia fen puchelo, epwe fan asengesin Kot are sia tipatchem, epwe fan asengesimi.” (2 Korint 5:12, 13) Ekkewe mi lamalam tekia rese ekieki ussun an chon ewe mwichefel tipeeufengen me pochokkul lon pekin luku. Ra mochen sikasini ekkewe mettoch mi pwapwalo me lukun, nge rese ekiekin alisi chiener kewe chon luku pwe repwe amarata eu letip mi murinno mwen mesen Kot. Ina minne, Paul a apwungu ewe mwichefel mwirin, iwe, a apasa: “Are emon epwe sikasini, epwe sikasini lon Jiowa.”​—2 Korint 10:17.

5 Nge Paul ese pwisin sikasini? Eni ekkoch ra eani ena ekiek pokiten minne a apasa ussun wisan we, ewe wis aposel. Nge, a “sikasini lon Kot.” A sikasini an tufichin eani ewe wis aposel fan iten ekkewe chon Korint resap likitalo Jiowa. Paul a fori ena mettoch pwe epwe aliwinir ngeni Kot pun ekkewe aposel mi chofona ra arikirelo. (2 Korint 11:16-21; 12:11, 12, 19-21; 13:10) Nge, Paul ese ekiekin mwareiti pwisin i mwen mesen aramas ren fofforun kewe.​—Än Salomon Fos 21:4.

An Kraist Tong a Amwokutuk?

6. Ifa ussun an Kraist we tong epwe ita kku kich?

6 Ussun emon aposel mi enlet, Paul a asukula ekkewe ekkoch ussun an Jises asorun moon kepich. A kku manauen Paul, pun a makkei: “Pun ewe tongen Kraist a nemenikich, pun sia lemenata pwe emon a fen malo fan asengesin aramas meinisin; iei minne ir meinisin ra malo. O atewe a malo fan asengesin aramas meinisin pwe ir mi chuen manau resap manau ngeni pwisin ir, nge ngeni atewe mi malo o manausefallita fan asengesir.” (2 Korint 5:14, 15) Ifa watten ewe tong Jises a pwarata lon an asoresini manauan fan asengesich! Pwungun pwe epwe eu minen mwokutukut lon manauach. Ach kilisou ngeni Jises ren an fangelo manauan fan itach epwe amwokutukich ach sipwe achocho le afalafala ewe kapas allim ussun ewe angangen amanau seni Jiowa me ren Noun we mi achengicheng. (Jon 3:16; Alollo ngeni Kol Fel 96:2.) “Ewe tong a nonnom ren Kraist” a kan amwokutuk pwe kopwe akkachocho le fiti ewe angangen afalafala ewe Muu me foralo chon kaeo?​—Mattu 28:19, 20.

7. Met weween “sisap silei och mettoch ussun emon aramas lon pekin futuk”?

7 Ren ar manauesini manauer pwe repwe pwarata ar kilisou ren minne Kraist a fori fan asengesir, ekkewe mi kepich ‘rese chuen manau fan asengesin pwisin ir, nge fan itan.’ Paul a apasa: “Iwe, seni iei feilfeilo sisap chuen ekieki och mettoch ussun emon lon pekin fituk. Nge meit mwo ika lom sia fen ekieki ussun Kraist lon pekin fituk, nge iei sisap chuen ekieki iei ussun.” (2 Korint 5:16) Ekkewe chon Kraist resap ekieki ussun aramas lon pekin fituk, awewe chok, ren ar acheni ekkewe chon Jus lap seni ekkewe chon Jentail are ekkewe mi woummong lap seni ekkewe mi woungau. Ekkewe mi kepit rese “ekieki aramas lon pekin fituk,” pun ar riri ngeni chiener kewe chon luku lon pekin ngun, ina ewe mettoch mi lamot. Ir kewe mi fen ‘silei Kraist lon pekin fituk,’ esap ir chok mi wesewesen kuna Jises atun a nonnom won fonufan. Inaamwo ika ekkoch mi eani lukuluk won ewe Messaia ra pin ekieki pwe Jises emon chok aramasen fituk, iwe, resap chuen ekieki ina ussun. A fen fangelo inisin we ussun eu moon kepich me manausefallita emon ngun mi amanaua aramas. Pwal ekkoch mi manausefallita lang repwe fangelo inisir lon pekin fituk, nge rese fen kuna Jises lon pekin fituk fan eu.​—1 Korint 15:45, 50; 2 Korint 5:1-5.

8. Ifa ussun an a fis pwe ekkoch aramas ra “nonnom ren Kraist”?

8 Lon an chuen kapas ngeni ekkewe chon kepit, Paul a pwal apasa: “Iei minne are emon a nonnom lon Kraist, epwe wor an manau mi fo, ekkewe mettochun lom ra morelo; nengeni, ekkewe mettoch mi fo ra fen feito. (2 Korint 5:17) An “emon a nonnom lon Kraist” a wewe ngeni pwe manauan epwe tipeeu ngeni. (Jon 17:21) Ei ririfengen a fis ngeni emonewe lupwen Jiowa a emmweni i ngeni Noun we me a nouni ren ewe ngun mi fel. Epwe wiliti emon noun Kot we me ren ewe ngun mi fel, epwe eu “manau mi fo,” nge a nonnom ren ewe apilukulukun eti Kraist lon ewe Muun lang. (Jon 3:3-8; 6:44; Kalesia 4:6, 7) Ekkena Chon Kraist mi kepit ra eani eu angang mi sokkolo aucheaan.

“Sipwe Chasefal ngeni Kot”

9. Met Kot a fori pwe aramas repwe tufichin chasefal ngeni?

9 Jiowa a acheni ewe “manau mi fo”! Paul a apasa: “Ekkeei mettoch meinisin seni Kot, ewe mi achasefalli-kich ngeni pwisin i ren Kraist, o a awisa ngenikich wisach, afalafala ussun chasefal, o iei weween, Kot a nonnom lon Kraist pwe epwe achasefal ngeni pwisin i chon fonufan, o ese chuen liwini ngenir ar kewe tipis, o a pwal ngenikich ewe kapasen chasefal.” (2 Korint 5:18, 19) Aramas ra fen towau seni Kot seni fansoun Atam a tipis. Nge ren tong Jiowa a pwisin mwokutukut pwe epwe suuki ewe alen chasefal me ren an Jises we asor.​—Rom 5:6-12.

10. Jiowa a awisa ngeni io kewe ewe angangen achasefal, iwe, met ra fen fori fan iten ar repwe apwonueta wiser?

10 Pokiten Jiowa a alukuluku ngeni ekkewe mi kepit ewe afalafal ussun ewe mettoch chasefal, Paul a tongeni apasa: “Iwe, am chon tupuni muun Kot fan asengesin Kraist, pun Kot epwe titingor ngenikemi ren am. Iwe, am aupwe titingor ngenikemi fan asengesin Kraist, pwe ‘oupwe achasefalli pwisin ami ngeni Kot.’” (2 Korint 5:20) Lon ewe fansoun lom lom, ekkewe chon tupuni muu ra akkaeuin titilo lon ekkewe fansoun fitikoko fan iten ar repwe pinei maun. (Luk 14:31, 32) Pokiten ewe fonufanen aramas mi tipis ra towau seni Kot, a tinalo noun kewe chon tupuni mi kepit pwe repwe esilei ngeni aramas met repwe fori fan iten ar repwe chasefal ngeni. Lon wiser, wisen chon tupuni Kraist, ekkewe mi kepit ra tittingor: “Oupwe achasefal ngeni Kot.” Ena tingor epwe eu kapasen pesepes mi umoumouch fan iten ar repwe kutta kinamwe ren Kot me nguuri ewe angangen amanau a awora me ren Kraist.

11. Ren ar luku ewe moon kepich, io kewe repwe uoch mwen mesen Kot?

11 Aramas meinisin mi anganga ar luku lon ewe moon kepich repwe tongeni chasefal ngeni Kot. (Jon 3:36) Paul a apasa: “Atewe [Jises] ese mwo silei tipis, i [Kot] a fori pwe i chon tipis fan asengesich, pwe sipwe wiliti pwungun Kot lon i.” (2 Korint 5:21) Ewe mwan mi unusoch Jises, i ewe asorun tipis fan iten noun Atam kewe pwe repwe ngaselo seni ewe tipis ra fen alemwiri. Ra wiliti “an Kot pwung” me ren Jises. Ena pwung, are uoch mwen mesen Kot, a fis akkom ngeni noun Kraist kewe 144,000 chon alemwir. Atun ewe Engerou Ierin an Nemenem, noun ewe Sam tori Feilfeilo chok, Jises Kraist, ekkewe aramasen fonufan mi unusoch repwe uoch. Epwe alisir pwe repwe kuna pwung lon ar unusoch pwe repwe tongeni annetata ar tuppwol ngeni Kot me kuna ewe liffangen manau esemuch.​—Aisea 9:6; Pwarata 14:1; 20:4-6, 11-15.

“Ewe Fansoun mi Fich”

12. Ifa ewe angangen afalafal mi lamot a pwonueta ren noun Jiowa kewe chon tupuni me chon kuno?

12 Ika sipwe kuna manau, epwe lamot ach kewe foffor repwe tipeeu ngeni alon Paul kewe: “Iwe, am aua eti i [Jiowa] le angang, o am aua tingor ngenikemi, pwe ousap angeimwalli ewe chenin Kot. Pun a apasa: ‘Lon fansoun mi fich ua fen auselingok, o lon ewe ranin amanau ua fen alisuk.’ Nengeni! Ei fansoun iei ewe fansoun mi fich. Nengeni! Ei fansoun iei ewe ranin amanau.” (2 Korint 6:1, 2) Noun Jiowa kewe chon tupuni mi kepit pwal noun kewe chon kuno, “ekkewe ekkoch siip,” rese angeimwaalli chenin Semer we lon lang me tunalo popun we. (Jon 10:16) Ren ar foffor mi pwung me angangen afalafal lon ei “fansoun mi fich,” ra kutta chen seni Kot me esilei ngeni chon fonufan pwe iei “ewe ranin amanau.”

13. Ifa menlapen Aisea 49:8, iwe, ifa ussun an a akkom pwonueta?

13 Paul a aloni alon Aisea 49:8, iwe, a apasa: “Iei alon Jiowa: ‘Lon fansoun och ua auselinga ami sio, lon ranin kuna manau ua pwal alisikemi. Upwe tumunukemi o fori remi eu pwon ngeni aramasen fonufan meinisin. Ei upwe fori pwe oupwe tongeni fonuensefalli fonuemi mi talo iei.’” Ewe oesini a akkom pwonueta lupwen ekkewe aramasen Israel ra ngaselo seni ar eolo lon Papilon me mwirin ar liwiniiti fonuer mi poonulo.​—Aisea 49:3, 9.

14. Ifa ussun Aisea 49:8 a pwonueta lon Jises?

14 Lon pwal eu pwonuetaan an Aisea we oesini, Jiowa a awora noun we “chon angang” Jises pwe epwe “eu saram fan iten chon ekkewe muu, pwe chon fonufan meinisin repwe kuna manau [an Kot angangen amanau].” (Aisea 49:6, 8; alollo ngeni Aisea 42:1-4, 6, 7; Mattu 12:18-21.) Ewe “fansoun chen” are ewe “fansoun mi fich,” a weneiti Jises atun a nonnom won fonufan. A iotek, me Kot a “polueni.” A wiliti “eu ranin amanau” ngeni Jises pun a akkamwochu an unusen tuppwol me “wiliti popun ar manau esemuch ngeni ir ekkewe meinisin mi alleasochisi i.”​—Ipru 5:7, 9; Jon 12:27, 28.

15. Seni inet ekkewe chon Israel lon pekin ngun ra fen akachocho le fichiti an Kot chen, iwe, met popun?

15 Me ren Paul, Aisea 49:8 a weneiti ekkewe Chon Kraist mi kepit, iwe, a peser pwe resap ‘tunalo popun ewe chenin Kot’ ren ar resap kutta an we chen lon ewe “fansoun mi fich” me ewe “ranin amanau” a awora. Paul a pwal apasa: “Nengeni! ei fansoun iei ewe fansoun mi fich. Nengeni! Ei fansoun iei ewe ranin amanau.” (2 Korint 6:2) Seni Pentekos 33 C. E., ekkewe chon Israel lon pekin ngun ra akkachocho ngeni ar repwe annetata pwe a fich ngenir ewe chenin Kot pwe ewe “fansoun mi fich” epwe eu “fansoun amanau” fan asengesir.

‘Sipwe Pwarata Pwisin Kich Ussun Chon Angangen Kot’

16. Paul a annetata pwe i noun Kot chon afalafal fan met sokkun sossot me weires?

16 Ekkoch mwan mi choni ewe mwichefelin Korint rese pwarata pwe mi fich ngenir ewe chenin Kot. Ra pweni Paul pwe repwe atai pochokkulen an nemenem ussun emon aposel, inaamwo ika a tumunu pwe esap “isetiu och leenien chepetek” mwer. A fokkun pwarata pwe i noun Kot we chon angang “ren an likiitu chapur, lon riaffou, me feiengau, me weires, lon ninni, lon imwen fotek, ren fitikoko, me angang weires, me mamasa, o pwal ren echik.” (2 Kor. 6:3-5) Mwirin, Paul a eani ewe ekiek pwe ika ekkewe chon u ngeni, ir chon angangen Kraist, a “lap senir” pun a kuna chommong riaffou, fansoun kalapus, ninni, efeiengau, me osupwang lap senir lon manauan.​—2 Korint 11:23-27.

17. (a) Sipwe annetata pwe kich noun Kot kewe chon afalafal ren ach sipwe lapalapeni met sokkun lapalap? (b) Ikkefa ekkewe “pisekin fiu fan asengesin pwung”?

17 Ussun chok Paul me chienan kewe, sipwe tongeni pwarata pwe kich noun Kot kewe chon angang. Ifa ussun? Ren “limelimochun” manauach me ach kewe foffor mi tipeeu ngeni ewe Paipel. Sipwe tongeni fori ena mettoch ren ach sipwe “mosonoson,” weween, ach sipwe mokurechou fan fofforingau ngenikich, “lon kirikiroch” ren ach sipwe alisi ekkewe ekkoch. Pwal eu, sipwe tongeni pwarata pwe kich chon angang ngeni Kot ren ach sipwe nguuri ewe emmwen seni an we ngun mi fel, ren ach sipwe eani “tong mi imu seni fofforun likotupotup,” me ach sipwe kapas enlet, me kutta seni i pochokkul fan iten ach sipwe apwonueta ewe angangen afalafal. Iei eu poraus mi amwarar, pwe Paul a pwal annetata pwe i emon chon angang ngeni Kraist “me ren ekkewe pisekin fiu fan asengesin pwung mi fich ngeni pelimwanich o pwal pelifefinach.” Lon ekkewe maun lom lom, emon epwe kan uwei ewe ketilas lon pelimwanin poun nge lon pelifefinan epwe uwei ewe tittin maun. Lon ewe maun lon pekin ngun ngeni ekkewe sense mi chofona, Paul ese aea ekkewe mettoch lon pekin fituk​—kapasen otupotup, kapasen michimich, me kapas chofona. (2 Korint 6:6, 7; 11:12-14; Än Salomon Fos 3:32) A aea ekkewe “pisek” mi pwung, ren an epwe apochokkula ewe fel mi enlet. Iwe, epwe pwal ina ussuch.

18. Ika kich noun Kot kewe chon afalafal, epwe ifa lapalapach?

18 Ika kich noun Kot kewe chon angang, sipwe pwisin echipakich ussun chok Paul me chienan kewe chon angang. Sipwe lapalapeni lapalapen Chon Kraist ese lifilifil ika sipwe kuna sufol are esiit. Poraus mi ngau ussuch esap aukatiu ach angangen afalafal, iwe, sisap pwal lamalam tekia ren ekkewe poraus murinno ussuch. Sipwe kapas enlet, me eni aramas repwe esinnakich pokiten ach angang ngeni Kot. Lupwen sipwe kuna ninni seni ekkewe chon oputakich, sipwe eani lukuluk won Jiowa. Iwe, ren kilisou sipwe etiwa ekkewe angangen emirit.​—2 Korint 6:8, 9.

19. Epwe ifa ussun epwe tufich ach sipwe ‘apiseki chommong’ lon pekin ngun?

19 Ren an epwe awesalo porausen ewe angangen afalafal ussun ewe mettoch chasefal, Paul a kapas ussun pwisin i me chienan kewe lupwen a apasa, “ussun ita sia lolilen, nge sia chok pwapwa fansoun meinisin; ussun ita sia woungau, nge sia apiseki aramas; ussun ita esor rech och mettoch, nge mi wor rech mettoch meinisin.” (2 Korint 6:10) Inaamwo ika a wor popun ekkena chon afalafal repwe lolilen ussun ar kewe osukosuk, nge a wor pwapwaan letiper. Ra woungau, nge ra ‘apiseki chommong’ lon pekin ngun. Iwe, ra ‘eani mettoch meinisin’ pun ar luku a apisekir lon pekin ngun​—pwal mwo nge ar repwe noun Kot kewe lon lang. Iwe, a pwal fokkun apwapwa ar eani manauen Chon Kraist chon afalafal. (Foffor 20:35) Ussun chok ir, sipwe tongeni ‘apiseki chommong’ ren ach fiti ewe angangen afalafala ewe poraus ussun chasefal lon ei fansoun​—lon ei ranin angangen amanau!

Eani Lukuluk won ewe Angangen Amanau Seni Jiowa

20. (a) Met Paul a wesewesen mochen, iwe, pwata esap och an aramas asolapa fansoun? (b) Met a esissinata ewe ranin amanau sia nonnom lon iei?

20 Lupwen Paul a makkei noun we oruuen taropwe ngeni ekkewe chon Korint orun 55 C.E., a chok wor orun 15 ier lusun mwen muchuloon an ekkewe chon Jus ototen mettoch. Ewe aposel a mochen pwe ekkewe chon Jus me chon Jentail repwe chasefal ngeni Kot me ren Kraist. Ina ewe ranin amanau, nge a chok aukuk ewe fansoun. Iwe, kich mi pwal nonnom lon eu fansoun sopwolon eu ototen mettoch seni 1914. Ewe angangen afalafal mi fiffis won unusen fonufan iei a esissinata pwe iei ewe ranin amanau.

21. (a) Ifa ewe lesenin ier fan iten 1999? (b) Met sipwe ita foffori lon ei ranin amanau?

21 A lamot pwe aramas meinisin seni muu meinisin repwe rongorong ussun an Kot awora amanau me ren Jises Kraist. Esap iei ewe fansoun ach sipwe mang are chipwang. Paul a makkei: “Nengeni! Iei ewe ranin amanau.” Alon 2 Korint 6:2, ina ewe lesenin ier (yeartext) fan iten ekkewe Chon Pwarata Jiowa lon 1999. A fokkun fich, pun a nom mwach eu mettoch mi fokkun lapalap seni kiteterin Jerusalem me an we imwenfel! Arapakan chok epwe fis muchuloon unusen ei ototen mettoch, nge epwe kku manauen aramasen fonufan meinisin. Iei​—nge sap lesor​—ewe fansoun mwokutukut. Ika sia luku pwe ewe angangen amanau a popu seni Jiowa, ika sia tongei i, me ika a lamot ngenikich manau esemuch, sisap angeimwaalli popun ewe chenin Kot. Pokiten sia mochen asamolu Jiowa ren unusen letipach, ren ach kewe fos me foffor sipwe annetata pwe ina enletin meefiach lupwen sipwe apasa: “Nengeni! Iei ewe ranin amanau.”

Epwe Ifa Ussun Kopwe Polueni?

◻ Pwata a fokkun lamot chasefal ngeni Kot?

◻ Io ekkewe chon tupuni me chon kuno mi foffori ewe angangen achasefal?

◻ Ifa ussun sipwe annetata pwe kich noun Kot kewe chon afalafal?

◻ Met weween ngonuk ewe lesenin ier fan iten Chon Pwarata Jiowa lon 1999?

[Ekkewe sasing lón pekin taropwe 28]

Ussun chok Paul, en mi tinikken le afalafala me alisi aramas ar repwe chasefal ngeni Kot?

United States

France

Côte d’Ivoire

[Sasing lón pekin taropwe 30]

Lon ei ranin amanau, en mi nonnom lein ekkewe chommong mi chasefal ngeni Jiowa Kot?

    Meinisin mi Peres lón Fósun Chuuk (1987-2025)
    Log Out
    Log In
    • Chuuk
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share