“Apposa Letipemi”

“A lamot ngenikemi likiitu, pwe mwirin ami ffori letipen Kot, oupwe tongeni angei pwonutaan ewe pwon.”​—IPRU 10:36.

1, 2. (a) Met a fis ngeni ekkoch chon Kraist lon ewe aewin senturi? (b) Pwata a mecheres an epwe apwangapwangelo ach luku?

ME LEIN meinisin mi wisen makkei Paipel, minne ewe aposel Paul a makkei ussun luku a lap seni ir meinisin. Iwe, fan chommong a mak ussun chokkewe mi fen apwangapwangelo are morolo ar luku. Ren chok awewe, Aiminios me Aleksanter ra “kuna kataloon ar luku ussun efoch siip mi kokolo.” (1 Timoti 1:19, 20) Timas a su seni Paul pokiten “an tongei ewe otot minen lom.” (2 Timoti 4:10) Ren ar ipweri allukun chon Kraist are ar uwopwangapwang, ekkoch ra “amam ewe luku.” Pwal fitemon ra ttupulo ren tipachchem sola, iwe, ra “tokolo seni ewe luku.”​—1 Timoti 5:8; 6:20, 21.

² Pwata ekkena chon Kraist mi kepit ra sopwongau? Iwe, “luku a wewe ngeni ach achifoua ren unusen letipach ekkewe mettoch sia apilukuluk ngeni, me pwapwaloon minne epwe enletin fisita, inaamwo ika sisaamwo kuner.” (Ipru 11:1) Sia kan luku minne sisap tongeni kuna. Ese lamot luku fan iten ekkewe mettoch sia fen kuna. A mmen mecheres ach sipwe angang fan iten woun fonufan mi lingeta mwen mesach lap seni ach angang fan iten woun lang ese pwapwalo. (Mattu 19:21, 22) Chommong mettoch sia kan kuna ren mesach, awewe chok ren “mochenien ewe futuk me mochenien mesach,” ra pochokkul le luki inisich mi apwangapwang me ra tongeni akisalo ach luku.​—1 Jon 2:16.

3. Met sokkun luku chon Kraist repwe ita amaarata?

³ Iwe nge, Paul a apasa pwe “emon mi arap ngeni Kot epwe luku pwe a wor emon Kot me epwe wiliiti chon liwini ir mi kukkutta i fan tinikken.” Moses a eani ena sokkun luku. Atewe a “nengenifichi ewe fansoun an epwe kamotiuen liwinin” me a “uppos ussun ita nge a kuna ewe Emon sise tongeni kuna.” (Ipru 11:6, 24, 26, 27) A lamot ngeni chon Kraist ena sokkun luku. Ussun a mak lon ewe lesen mwen ei, Eperiam a awora eu leenien appiru mi murinno fan iten ena mettoch.

Ewe Leenien Appiru Eperiam a Isetiu fan iten Luku

4. Ifa ussun lukuen Eperiam a nemeni aalen manauan?

⁴ Eperiam a nonnom lon Ur lupwen a angei an Kot pwon pwe epwe wor emon mwirimwirin, iwe, meinisin einang repwe kuna feioch ren. (Keneses 12:1-3; Fofor 7:2, 3) Pokiten ena pwon, Eperiam a alleasochisi Jiowa ren an akkom mwokut ngeni Haran, iwe mwirin, ngeni Kenaan. Me ikewe ie, Jiowa a pwonei pwe epwe ngeni mwirimwirin Eperiam ena fonu. (Keneses 12:7; Nehemaia 9:7, 8) Iwe nge, chommong me lein ekkewe mettoch Jiowa a pwonei epwap pwonuta mwirin maloon Eperiam. Awewe chok, Eperiam ese fonueni och kinikinin Kenaan, chilon chok ewe pwangen achau lon Makpela, nge a moni ena fan iten eu leenien peias. (Keneses 23:1-20) Iwe nge, a luku alon Jiowa. Lap seni meinisin, a luku eu “telinimw mi enlet longolongun, nge Kot ewe chon aueta me chon fforata,” iwe, epwap fisita lon fansoun epwe feito. (Ipru 11:10) Ena sokkun luku a alikiitu i lon unusen manauan.

5, 6. Ifa ussun lukuen Eperiam a sossot fan iten an Jiowa pwon?

⁵ A akkaewin pwalo ena ren ewe pwon pwe mwirimwirin Eperiam epwe wiliiti eu muu mi lapalap. Ren an epwe fis ena, Epweriam epwe nounatiu emon at, me a witiwit fansoun langattam ren an epwe kuna ena feioch. Ese ffat ika fite ierin lupwen a keran aewin rong an Kot pwon, nge lupwen a saittam ngeni Haran, Jiowa esaamwo liffang ngeni emon at. (Keneses 11:30) A nomottam lon Haran pwe a tufichin ‘achommonga pisekin me nouni chon angang,’ iwe, lupwen a mwokut ngeni Kenaan, a 75 ierin me Sera a 65 ierin. Iwe nge, esaamwo wor nour at. (Keneses 12:4, 5) Lupwen Sera a ier 75 are watte seni, neminnewe a ekieki pwe esap tongeni nounou me won Eperiam pwe a fen kon chinnapelo. Ina minne, me ren eu eorenien chon lom, a ngeni Eperiam noun we chon angang itan Ekar, iwe, atewe a nouni emon at me won. Nge esap ina ewe at mi pwonetiu. Iwe, lo, lo, Ekar me noun we, Ismael, ra titiilo. Iwe nge, lupwen Eperiam a uwawu an tingor fan asengesir, Jiowa a pwonei pwe epwe efeiochu Ismael.​—Keneses 16:1-4, 10; 17:15, 16, 18-20; 21:8-21.

⁶ Lon eu fansoun Kot a pwisin filata, nge ina eu fansoun mi fokkun ttam mwirin ar rong ewe pwon, Eperiam(100 ierin) me Sera(90 ierin) ra nouni emon at itan Aisek. Ese mwaal ra mmen pwapwa! Ren ekkena pupulu mi chinnap, a ussun ita eu manausefal lupwen inisir “mi ma” a efisata manau mi fo. (Rom 4:19-21) Ra witiwit fansoun langattam, nge lupwen a pwonuta ewe pwon, a pwalo pwe ese lamotongau ar witiwit.

7. Ifa ussun luku a riri ngeni likiitu?

⁷ Porausen Eperiam a achchema ngenikich pwe sap minne luku epwe nom rech fansoun mwochomwoch. Paul a ririfengenni luku me likiitu pwe iei makkeian: “A lamot ngenikemi likiitu, pwe mwirin ami ffori letipen Kot, oupwe tongeni angei pwonutaan ewe pwon. . . . Esap kich ewe sokkun mi nimeremersefal ngeni kiteter, nge ewe sokkun mi eani ewe luku mi tongeni selani manauach.” (Ipru 10:36-39) Chommong ra fen witiwit fansoun langattam ren pwonutaan ewe pwon. Ar luku mi pochokkul a fen alikiitur. Iwe, ussun Eperiam, repwe angei liwinir lon ewe fansoun Jiowa a filata.​—Apakuk 2:3.

Akkauseling ngeni Kot

8. Ifa ussun sia kan akkauseling ngeni Kot ikenai, me pwata ena mettoch epwe apochokkula ach luku?

⁸ A wor ina epwe ruaanu mettoch mi apochokkula lukuen Eperiam, me ra pwal tongeni alisikich. Akkom, a pwarata an ‘luku pwe a wor emon Kot’ ren an auseling lupwen Jiowa a kapas. Ina minne, a sokko seni chon Jus lon fansoun Jeremaia we, pwe ra luku Jiowa nge rese luku alon. (Jeremaia 44:15-19) Ikenai, Jiowa a kan fos ngenikich ren ewe Paipel, an we Kapas mi fel, iwe, Piter a apasa pwe ina “eu lam mi tittin lon eu leeni mi kiroch . . . lon letipemi.” (2 Piter 1:19) Lupwen sia alleafichi Paipel, sia kan “maarita ren kapasen ewe luku.” (1 Timoti 4:6; Rom 10:17) Pwal och, lon ekkeei ranin le sopwoloon, “ewe chon angang mi tuppwol me tipachchem” a akkawora “mongo lon fansoun mi fich,” mongoon ngun, weween, emmwen fan iten ifa ussun sipwe apwonueta an Paipel kkewe fon me weween an Paipel kkewe oesini. (Mattu 24:45-47) Luku mi pochokkul a longolong won ach akkauseling ngeni Jiowa ren ekkena mettoch.

9. Met epwe fis ika sia enletin achifoua ewe apilukuluk mi nom ren chon Kraist?

⁹ Lukuen Eperiam a ririoch ngeni an apilukuluk. “Pokiten an apilukuluk, a wor an luku pwe epwe wiliiti semelapen chommong einang.” (Rom 4:18) Ina ewe oruuen mettoch epwe tongeni alisikich. Sisap ita monuki fan eu pwe Jiowa “ewe chon liwini ir mi tinikken le kukkutta i.” Iei alon ewe aposel Paul: “Sia kan angang weires me akkachocho ngeni, pun sia fen anomu ach apilukuluk won emon Kot mi manau.” (1 Timoti 4:10) Ika sia enletin achifoua ewe apilukuluk mi nom ren chon Kraist, unusen manauach epwe pwarata ach luku, pwe a ina ussun Eperiam.

Kakkapas ngeni Kot

10. Met sokkun iotek epwe apochokkula ach luku?

¹⁰ Eperiam a kakkapas ngeni Kot, me iei ewe aulungatin mettoch mi apochokkula an luku. Ikenai, sipwe pwal tongeni kapas ngeni Jiowa ren an akkaea ewe liffangen iotek fan iten Jises Kraist. (Jon 14:6; Efisus 6:18) Mwirin an Jises eani eu kapas awewe mi menlapei lamoten an aramas iotek fansoun meinisin, a eani ei kapas eis: “Lupwen ewe Noun aramas epwe war, epwe wesewesen kuna ewe luku won fonufan?” (Luk 18:8) Iotek mi apochokkula luku esap ewe esin sia kan alleani seni eu puk are apiapini. A wesewesen popu seni alollolun letipach. Ren chok awewe, iotek seni ewe letip a mmen lamot lupwen a wor kefil mi fokkun lamot are lupwen och mettoch epwe wesewesen aweiresi letipach.​—Luk 6:12, 13; 22:41-44.

11. (a) Ifa ussun Eperiam a pochokkuleta lupwen a suuki letipan ngeni Kot? (b) Met sipwe tongeni kaeo seni minne a fis ngeni Eperiam?

¹¹ Lupwen Eperiam a chinnapelo me Jiowa esaamwo ngeni i ewe mwirimwir mi pwonetiu, a kapas ngeni Kot ussun. Jiowa a apochokkula letipan. Met mwiriloon? Eperiam “a luku Jiowa; iwe, a apwungalo pwe i emon mwan mi pwung.” Iwe mwirin, Jiowa a awora eu esissin ren an epwe alukulukatiu alon. (Keneses 15:1-18) Ika sipwe suuki letipach ngeni Jiowa lon iotek, etiwa an Jiowa kkewe kapasen alukuluk lon an we Kapas, ewe Paipel, me alleasochisi i ren luku mi unus, iwe, Jiowa epwe pwal apochokkula ach luku.​—Mattu 21:22; Juta 20, 21.

12, 13. (a) Ifa ussun Eperiam a kuna feioch lupwen a appiru an Jiowa emmwen? (b) Met sokkun mettoch epwe apochokkula ach luku?

¹² Ewe aruaanun mettoch mi apochokkula lukuen Eperiam, iei an Jiowa peni i lupwen a apwonueta an Kot emmwen. Lupwen Eperiam a ssa ren an epwe selani Lot seni ekkewe king mi toki ewe fonu, Jiowa a alisi i pwe epwe akkufur. (Keneses 14:16, 20) Lupwen Eperiam a nonnom ussun emon chon siamu lon ewe fonu mwirimwirin kkewe repwe alemwiri, Jiowa a efeiochu i ren chommong pisek. (Alollo ngeni Keneses 14:21-23.) Jiowa a emmweni noun we chon angang pwe epwe kutta emon fefin mi murinno fan iten puluwen Aisek. (Keneses 24:10-27) Ewer, Jiowa a “efeiochu Eperiam lon mettoch meinisin.” (Keneses 24:1) Iwe, pokiten a mmen pochokkul an luku mwirin me an ririoch ngeni Jiowa, ina minne, Jiowa a ko ngeni i “chiechiei.”​—Aisea 41:8; Jemes 2:23.

¹³ Ikenai, sipwe tongeni eani ena esin luku mi pochokkul? Ewer. Ika kich, ussun Eperiam, sipwe alleasochisi Jiowa ren ach sipwe pi ifa ussun epwe tongeni alisikich, iwe, epwe pwal efeiochukich, me ena mettoch epwe apochokkula ach luku. Ren chok awewe, ach nengeni ewe 1998 Service Year Report epwe pwarata pwe chommong ra kuna feioch mi amwarar lupwen ra alleasochisi an alluk fan iten ach sipwe afalafala ewe poraus allim.​—Mark 13:10.

Eu Repot fan iten Luku Ikenai

14. Ifa ussun Jiowa a efeiochu ewe angangen ainetfetalei Kingdom News Nampa 35?

¹⁴ Lon 1997 fan October, a mmen fisoch ewe angangen ainetfetalei Kingdom News Nampa 35 won unusen fonufan pokiten tinikkenin me mwasangasangen fite million Chon Pwarata. Minne a fis lon Ghana a affata ena mettoch. Arapakan 2.5 million kapi ra ainetfetal lon ruaanu fos, ina minne, a wor arap ngeni 2,000 tingor fan iten Bible study. Lon Cyprus, ruuemon Chon Pwarata mi ainetfetalei Kingdom News ra kuna emon patere mi tapwelo mwirir. Ekiselo mwirin, ra ainet ngeni echo kapiin Kingdom News. Nge atewe a fen angei echo kapi, iwe, iei alon: “Ua kon ingeiti ewe poraus lon, ina minne, ua mochen pwarata ai kilisou ngeni chokkewe mi wisen fforata.” Lon Denmark, a ainetfetal 1.5 million kapi me a fisoch ewe angang. Iei alon emon fefin mi angang lon pekin public relations ikewe ie: “Ewe poraus lon ewe taropwe a weneiti aramas meinisin. A mecheres an aramas weweiti, me a achungu ewe letip, a efisata ach mochen alapalo sileiach. A wesewesen ochiiti aramas!”

15. Met sokkun poraus a affata pwe Jiowa a efeiochu ach achocho le afalafal ngeni aramas ekis meinisin?

¹⁵ Lon 1998 sia sotun afalafal ngeni aramas ekis meinisin, nge esap lon chok imwer kkewe. Lon Côte d’Ivoire ruuemon misineri mi pupulu ra afalafal won 322 siip mi ineiti ekkewe oror. Ra anounou ngeni chon angang won ekkena siip 247 puk, 2,284 chassi, 500 kukkun puk, fitepuku tract, me ekkoch video ir mi tongeni katol lupwen a ssa waar kkewe. Lon Canada emon Chon Pwarata a feilo ren eu leenien ffor chitosa. Ewe emon, minne an ena business, a mochen auseling, iwe, ewe brother a nonnom ikewe ie ruaanu me esopw awa, nge a afalafal ngeni ukuukun eu awa chok pokiten chon etto ren ewe business. Lo, lo, ra akkota pwe repwe kaeo kulok 10 lepwin. Iwe nge, fan ekkoch ewe kaeo a poputa lukenipwin me epwap wes kulok 2 lesossor. Neman a ekis weires kkotun ar kaeo, nge a uwaoch. Ewe mwan a ekiekieta pwe epwe kesip an business lon Raninfel pwe epwe tongeni fiti mwich. Ekiselo mwirin, i me an famili ra feffeita lon pekin ngun.

16. Ikkefa ekkewe poraus mi pwarata pwe ewe kukkun puk itan Kutta me ewe puk itan Knowledge ra awora watte alillis lon ewe angangen afalafala me asukula aramas?

¹⁶ Ewe kukkun puk Met Kot epwe Kutta Senikich? me ewe puk Knowledge That Leads to Everlasting Life ra chuen akkawora watte alillis lon ewe angangen afalafala me asukula aramas. Lon Italy emon nienkatek mi witi efoch paas a nouni echo kapiin ewe Kingdom News. Sorota ewe ssoran, ewe chon afalafal a chuurisefalli neminnewe, iwe, a nouni ewe kukkun puk itan Kutta. Iteiten ran mwirin ena fansoun, ra kaeo Paipel lefilen 10 me 15 minich lon ewe leenien sousou paas. Mwirin eu me esopw maram a ekiekieta pwe epwe lo seni ewe leenien nienkatek me liwiniti fonuan itan Guatemala ren an epwe sopweilo an kaeo. Lon Malawi, Lobina, emon fefin mi achocho le fiffititi fel, a song lupwen noun kkewe fopul ra poputa le kaeo Paipel ren alillisin Chon Pwarata Jiowa. Nge ekkewe fopul ra kapas ngeni iner we ussun ewe enlet lon Paipel ukuukun ar tufich. Lon 1997, fan June, Lobina a kuna ewe Knowledge puk me a mochen silei weween ewe kapas “Sile Mi Emmwen Ngeni.” Fan July a tipeeu ngeni an epwe kaeo Paipel. Fan August a fiti ewe district convention me a auselingaochu ekkewe afalafal meinisin. Lupwen a tori le sopwoloon ena maram, a fen towu seni an lamalam me a tufichin wiliiti emon chon afalafal esaamwo papatais. A papatais fan November, 1997.

17, 18. Ifa ussun ekkewe video ewe Society a ffori a alisi aramas pwe repwe weweiti mettoch lon pekin ngun?

¹⁷ Ekkewe video ewe Society a ffori a fen alisi chommong pwe repwe weweiti mettochun ngun. Lon Mauritius emon mwan a towu seni an lamalam pokiten a wor kinikinfesen lon. Emon misineri a aiti ngeni i ussun ewe tipeeu lefilen Chon Pwarata Jiowa ren an nounou ewe video United by Divine Teaching. Iei alon ewe mwan pokiten an ingelo: “Ami kkana Chon Pwarata Jiowa, oua fen nonnom lon Paratis!” A tipeeu ngeni an epwe kaeo Paipel. Emon sister lon Japan a fichi ngeni puluwan we ewe video Jehovah’s Witnesses​—The Organization Behind the Name, nge ewe mwan esap emon Chon Pwarata, iwe, pokiten a chung letipan, a tipeeu ngeni an epwe kaeo Paipel. Mwirin an katol United by Divine Teaching, a mochen wiliiti emon Chon Pwarata Jiowa. Ewe video a wor ulufou cassette lon itan The Bible​—A Book of Fact and Prophecy a alisi atewe pwe epwe apwonueta an Paipel kkewe emmwen lon manauan. Iwe saingo, Jehovah’s Witnesses Stand Firm Against Nazi Assault a aiti ngeni pwe Jiowa a kan apochokkula noun kkewe aramas lupwen Setan epwe maun ngenir. Ewe mwan a papatais fan Oktoper, 1997.

¹⁸ Ikkena ekkoch chok me lein ekkewe poraus sia pwapwa le rong ussun lon ewe service ier a lo. Ra pwarata pwe a nom ren Chon Pwarata Jiowa ewe sokkun luku mi manau me Jiowa a kan apochokkula ar luku ren an ekkefeiochu ar angang.​—Jemes 2:17.

Amaarata Luku Ikenai

19. (a) Pwata nonnomuch a murinno seni nonnomun Eperiam? (b) Fitemon ra mwichfengen lon ewe ier a lo ren ar repwe ffori achechchemenien maloon Jises? (c) Lon menni ekkan fonu a sokkolo chochoon chon fiti ewe Achechchem lon ewe ier a lo? (Pi pekin taropwe 12 tori 15.)

¹⁹ Lon chommong lapalap, a murinno nonnomuch ikenai mwen nonnomun Eperiam. Sia silei pwe Jiowa a apwonueta meinisin an kkewe pwon ngeni Eperiam. Mwirimwirin Eperiam kkewe ra alemwiri Kenaan, me ra wiliiti eu muu mi lapalap. (1 King 4:20; Ipru 11:12) Pwal och, 1,971 ier mwirin an Eperiam lo seni Haran, emon mwirimwirin, Jises, a papatais lon konik ren Jon Papatais, iwe mwirin, lon ngun mi fel ren Jiowa pwe epwe wiliiti ewe Messaia, Mwirimwirin Eperiam we lon pekin ngun. (Mattu 3:16, 17; Kalesia 3:16) Lon Nisan 14, 33 C.E., Jises a asoresini manauan pwe epwe eu moon kepich fan asengesin ir kkewe repwe luku i. (Mattu 20:28; Jon 3:16) Iwe mwirin, fite million repwe tongeni pwisin efeiochur ren atewe. Lon ewe ier a lo, 13,896,312 ra mwichfengen lon Nisan 14 pwe repwe ffori achechchemenien ena ffoffor auchea mi pwarata tong. A ifa watteen an aitochu Jiowa, ewe Chon Apwonueta an kkewe pwon!

20, 21. Ifa ussun aramas seni muu meinisin ra pwisin efeiochur ren Mwirimwirin Eperiam we lon ewe aewin senturi, me ifa ussun ra kan pwisin ekkefeiochur ikenai?

²⁰ Lon ewe aewin senturi, chommong seni sokkun muu meinisin, nge poputa ren ewe muun Israel, ra pwarata pwe ra luku Mwirimwirin Eperiam na, iwe, ra wiliiti noun Kot mi kepit, chon eu minefoon “Israelin Kot” lon pekin ngun. (Kalesia 3:26-29; 6:16; Fofor 3:25, 26) Mi alukuluk ngenir pwe repwe kuna manau lon lang lon inisin ngun esap tongeni malo me repwe nemenemfengen lon an Kot Muu. Ipuku faik me ruaanu ngerou chok repwe kuna ena feioch, me ekkoch chok lusun mi chuen manau won fonufan. (Pwarata 5:9, 10; 7:4) Lon ewe ier a lo, 8,756 ra pwarata ar luku pwe ir mi kapachelong lon ena mwich ren ar angei ewe pilawa me wain lon ewe ranin Achechchem.

²¹ Ikenai arapakan meinisin Chon Pwarata Jiowa ra kapachelong lon ewe “mwich mi lapalap,” nge ena oesini a mak lon Pwarata 7:9-17. Pokiten ra pwisin efeiochur ren Jises, ra eani ewe apilukulukun manau esemuch lon eu paratisin fonufan. (Pwarata 21:3-5) Ekkewe 5,888,650 mi fiti ewe angangen afalafal lon 1998 eu pisekin annet pwe ena mwich a enletin “lapalap.” A akkaewin amwarar ach kuna pwe a keran aewin wor lap seni 100,000 chon afalafal lon Russia me pwal lon Ukraine. A pwal sokkolo ochun ewe repot seni ewe United States pwe a wor 1,040,283 chon afalafal ie fan Akos! Ikkena ulungat chok me lein ekkewe 19 fonu a wor lap seni 100,000 chon afalafal lon ewe ier a lo.

Epwele Pwonuta Ach Apilukuluk

22, 23. (a) Pwata sipwe apposa letipach ikenai? (b) Ifa ussun epwe tufich ach sipwe ussun Eperiam, nge esap ussun ir mi lukulukummang Paul a mak ussun?

²² Chon fiti ewe Achechchem ra rong och poraus mi achechchema ngenir pwe chommong, chommong an Jiowa kkewe pwon ra fen pwonuta. Lon 1914, Jises a seikita ngeni Kingen an Kot Muu lon lang, iwe, a poputa le nonnom le monomon fan manamanen King. (Mattu 24:3; Pwarata 11:15) Ewer, Mwirimwirin Eperiam we a nemenem iei lon lang! Iei alon Jemes ngeni chon Kraist lon ranin we: “Oupwe mosonottam; apposa letipemi, pun warotoon ewe Samol a fen arapoto.” (Jemes 5:8) Iwe iei, a fen wesewesen war are nonnom le monomon! Ina minne, epwe lapalo ach achocho le apposa letipach!

²³ Amwo ach achifoua an Kot kkewe pwon epwe pochokkuleta fansoun meinisin ren ach kakkaeo Paipel me ach ikkiotek seni wesewesen letipach. Amwo esap ukutiu ach kukkuna an Jiowa feioch lupwen sipwe alleasochisi an Kapas. Ika ina, iwe, sipwe ussun Eperiam, nge esap ussun ir mi apwangapwangelo me malo ar luku, nge iwe porauser Paul a makkei. Esap wor och mettoch epwe aimukichelo seni ach luku mi fel. (Juta 20) Sia kan iotek pwe epwe ina ussun meinisin noun Jiowa kkewe chon angang lon ewe 1999 service ier me pwal tori feilfeilo chok.

En mi Silei?

◻ Ifa ussun sipwe tongeni akkauseling ngeni Kot ikenai?

◻ Met sokkun feioch epwe toto ika sipwe iotek ngeni Kot seni alollolun letipach?

◻ Ika sipwe alleasochisi an Jiowa emmwen, ifa ussun ach luku epwe pochokkuleta?

◻ Met sokkun mettoch lon ewe repot fan iten ewe ier a lo (pekin taropwe 12 tori 15) a akkaewin amwarar ngonuk?

[Lios lón pekin taropwe 12-15]

1998 SERVICE YEAR REPORT OF JEHOVAH’S WITNESSES WORLDWIDE

(Ppii ewe puk)

[Sasing lón pekin taropwe 16]

Ika sipwe akkauseling ngeni an Jiowa Kapas, epwe pochokkuleta ach achifoua an kkewe pwon

[Sasing lón pekin taropwe 18]

Ach luku a kan pochokkuleta lupwen sipwe fiti ewe angangen afalafal