Ach Akkalisi Aramas Pwe Repwe Fitipach Ngeni Jiowa

“Esor emon epwe feilo ren ewe Sam are esap pokiten ngang.”​—JOHANNES 14:6.

1. Met Jises a alluku ngeni noun kkewe chon kaeo mwirin an manausefal, me met a fen fis pokiten an Chon Pwarata Jiowa alleasochis ngeni?

JISES KRAIST a alluku ngeni noun kkewe chon kaeo pwe repwe “asoulangalo chon fonu meinisin, oupwe papataisir fan iten ewe Sam, me ewe Nau, me ewe Ngun mi fel.” (Mattu 28:19) Lon ekkewe engol ier ra lo, Chon Pwarata Jiowa ra fen alisi lap seni ulungat million aramas pwe repwe arap ngeni Kot, iwe mwirin, ra papataisir fan iten esissinnen ar fangolo manauer ngeni i pwe repwe ffori letipan. A ifa me watteen ach chengel pokiten ach alisir pwe repwe pacheoch ngeni Kot!​—Jemes 4:8.

2. Inaamwo ika a wor chommong minefoon chon papatais, nge met a fen fis?

² Iwe nge, lon ekkoch fonu ikewe a wor chommong minefoon chon kaeo mi fen papataiselo ie, ese fen chommongolo kapachelapen ekkewe chon afalafal fan iten ewe Muu. Pwungun pwe ekkoch leir ra fen malo, weween, ina epwe 1 percent leir ra kan malo iteiten ier. Iwe nge, lon ekkewe ekkoch ier ra lo, a ekis chommong chokkewe mi fen tturulo. Met popun? Ei lesen me ena lesen mwirin ei epwe awewei ifa ussun aramas ra kan arap ngeni Jiowa me met popun ekkoch ra kan rikilo.

Ewe Popun Sia Afalafal

3. (a) Ifa ussun wisen noun Jises kkewe chon kaeo a ussun wisen ewe chonlang lon Pwarata 14:6? (b) Ifa eu mettoch mi murinno an a tufichin luki letipen aramas pwe repwe auseling ngeni porausen ewe Muu, nge ifa ewe osukosuk mi fisita seni?

³ Lon ei “fansoun sopwolan,” noun Jises kkewe chon kaeo repwe wisen esilefeili “sile mi enlet [NW]” ussun “ei kapas allim usun ewe mu.” (Taniel 12:4; Mattu 24:14) Wiser na a tipeeu ngeni wisen ewe chonlang “mi wor kapas allim esemuch ren, pwe epwe afalafala ngeni ir mi nonnom won fonufan, ngeni iteiten mu, me einang, me sokkun kapas, me sokkun aramas meinisin.” (Pwarata 14:6) Lon ei fonufan mi kon ekilapei mettochun fonufan, ewe nampa eu mettoch sia kan aea le etipetipa me alisi aramas pwe repwe kaeo ussun an Kot we Muu me arap ngeni Jiowa, iei ach erenir ussun ewe apilukulukun manau esemuch lon eu paratis won fonufan. Inaamwo ika a murinno ena mettoch, nge ekkewe mi fiffitinoun Kot kkewe aramas pokiten chok ar mochen tolong lon Paratis rese uppos won ewe alchokkis mi emmwen ngeni manau.​—Mattu 7:13, 14.

4. Me ren Jises me ewe chonlang mi akkas fan lang, ifa ewe popun an a fiffis ach angangen afalafal?

⁴ Iei alon Jises: “Iei ewe manau esemuch, pwe repwe silei en, ewe emon chok Kot mi enlet, pwal Jises Kraist ewe ka akunooto.” (Jon 17:3) Ewe chonlang mi akkas fan lang a esilefeili “kapas allim esemuch” me iei alon ngeni chokkewe mi nonnom won fonufan: “Oupwe niuokusiti Kot, o alingalo i, pun a fen tori klokun an we kapwung. O oupwe fel ngeni i mi foriata lang me fonufan, matau o pwal ekkewe leenien puachen konik.” (Pwarata 14:7) Ina minne, populapen ach afalafal ngeni aramas ewe poraus allim epwe fan iten ach sipwe alisir pwe repwe pacheoch ngeni Jiowa ren Kraist Jises.

Wisach lon An Jiowa Angang

5. Ifa alon Paul me Jises mi affata pwe sia ffoffori an Jiowa angang, nge esap pwisin ach?

⁵ Lon an mak ngeni chienan kkewe chon Kraist mi kepit, ewe aposel Paul a kapas ussun “afalafala ussun chasefal” me a apasa pwe Kot a achasefalli aramas ngeni pwisin i fan iten ewe moon kepich Jises a awora. Paul a apasa pwe “Kot epwe tittingor ngenikemi ren am” me “am aupwe tittingor ngenikemi fan asengesin Kraist, pwe oupwe achasefalli pwisin ami ngeni Kot.” A fet murinnoon ena poraus! Ese lifilifil ika kich “chon siwilin Kraist” mi kepit are chon kuno mi eani ewe apilukulukun manau won fonufan, nge sisap monuki fan eu pwe ei angang an Jiowa, nge esap ach. (2 Korint 5:18-20) Kot a luki letipen aramas me a asukula ir mi feito ren Kraist. Iei alon Jises: “Esor emon epwe tongeni feito rei, ika ewe Sam mi tineito esap emmwenato i. Nge ngang upwe auta i lon ewe sopolon ran. A fen makketiu lon ekkewe puken soufos, pwe ‘ir meinisin repwe pwal kaeo seni Kot.’” Iwe, iteiten aramas meinisin mi rong o sinei seni ewe Sam epwe feito rei.”​—Jon 6:44, 45.

6. Ifa ussun Jiowa a kan achechcha ekkewe muu iei, me lon chok ei atun, io kkan ra kuna lukulukoch lon “imwan we,” imwen fel?

⁶ Lon ekkeei ranin le sopwoloon, ifa ussun Jiowa a kan luki letipen aramas me suuki ngenir ewe “asamen luku”? (Foffor 14:27, footnote; 2 Timoti 3:1) Akkaewin, a awisa ngeni noun kkewe Chon Pwarata pwe repwe esilefeili an kkewe poraus fan iten ewe aalen amanau me ewe kapwung won ei otot mi ngau. (Aisea 43:12; 61:1, 2) Ei poraus mi esilesil won unusen fonufan a kan achchecha ekkewe muu​—iei eu esissin ussun ewe kapwung mi lapalap epwele fis. Lon chok ei atun, aramas mi “auchea” mwen mesen Kot ra kan ionfengen me lon ei otot minen lom me ra kuna lukulukoch lon “imwan we,” are an fel mi enlet. A ina ussun an Jiowa akkapwonueta an we oesini Akai a wisen makkei: “Upwe amwokutukutu mwun fanufan meinisin, wour meinisin epwe tori ei leni, upwe pwal aurala ei imwenfel ren ling.”​—Akai 2:6, 7, footnote; Pwarata 7:9, 15.

7. Ifa ussun Jiowa a kan suuki letipen aramas me lukiir ngeni pwisin i me Noun we?

⁷ Jiowa a kan suuki letipen ekkena chon niuokkusiti Kot​—nge ir “ekkewe mettoch mi kon auchea lon ekkewe muu meinisin”​—pwe repwe “auselinga minne” noun kkewe Chon Pwarata repwe kapas ussun. (Akai 2:7, Jewish Publication Society; Fofor 16:14) Ussun lon ewe aewin senturi, fan ekkoch Jiowa a kan nounou noun kkewe chonlang pwe repwe emmweni noun kkewe Chon Pwarata ngeni aramas mi wenechar letiper, nge ir mi fen kokko ngeni ren an alillis. (Fofor 8:26-31) Lupwen aramas repwe kaeo ussun ewe mettoch mi amwarar Kot a fen awora ngenir ren Noun we, Jises Kraist, letiper a kan arap ngeni Jiowa pokiten an tong. (1 Jon 4:9, 10) Ewer, Kot a kan luki letipen aramas ngeni pwisin i me pwal ngeni Noun we ren an “tong mi fiti umoumoch,” are “tong mi tuppwol.”​—Jeremaia 31:3, footnote.

Io kkana Jiowa a kan Luki Letiper?

8. Jiowa a kan luki letipen met sokkun aramas?

⁸ Jiowa a kan luki ngeni pwisin i me pwal ngeni Noun we chokkewe mi kukkutta i. (Fofor 17:27) A kapachelong aramas mi “letipeta o kechu ren ekewe fofor mi anioput ra fis” lon Christendom me pwal won unusen fonufan. (Isikiel 9:4) Ir mi “woungau lon ngun.” (Mattu 5:3) Enlet, ikkena ir ekkewe “mi mosonoson [“tipetekison,” footnote] won fonufan,” iwe, repwe nonnom lon ewe paratis won fonufan tori feilfeilo chok.​—Sefanaia 2:3.

9. Ifa ussun Jiowa a tongeni kuna ika aramas ra “fichiiti ewe apilukulukun manau esemuch,” me ifa ussun a kan luki letiper?

⁹ Jiowa a tufichin silei masouen letipen emon. Iei alon King Tafit ngeni noun we Solomon: “Ewe Samol Lapalap [Jiowa, NW] a etittina letip meinisin o weweiti iteiten akot me ekiek. Are ka kul ngeni Kot, i epwe etiwok.” (1 Kronika 28:9) Ren an nengeni nikinikin me ngunun emon, Jiowa epwe tongeni kuna ika emonnewe epwe etiwa minne a kawor fan iten omusomusen tipis me ewe apilukulukun manau esemuch lon an Kot we minefoon otot mi pwung. (2 Piter 3:13) Ren an we Kapas noun kkewe Chon Pwarata ra kan afalafala me asukula ngeni aramas, Jiowa a kan luki ngeni pwisin i me pwal ngeni Noun we ‘ir meinisin mi fil ngeni manau esemuch,’ iwe, ra kan ‘wiliiti chon luku.’​—Fofor 13:48.

10. Met a affata pwe an Jiowa luki letipen ekkoch nge esap pwal ekkewe lusun esap wewe ngeni pwe lang a emmweni mettoch meinisin lon manauen aramas?

¹⁰ An Jiowa luki letipen ekkoch me an likitalo ekkewe lusun a ita wewe ngeni pwe lang a emmweni mettoch meinisin epwe fis lon manauen aramas? Aapwi! An Kot luki letipen aramas a longolong won met ra pwisin ekiekin achocho ngeni. A sufoliiti ar pwuung le pwisin nemenir. Ikenai Jiowa a kan isetiu mwen chon fonufan meinisin ewe chok sokkun kefil a isetiu mwen chon Israel lap seni 3,000 ier lom, lupwen Moses a apasa: “Ua iseis mwemi manau me feioch, mala me feiengau. . . . Ua kokkori lang me fanufan pwe repwe chon pwarata usumi ikenai, pwe ua anomu mwemi manau me mala, feioch me anumamau. Iei mine oupwe filata manau, pwe ami me mwirimwirimi kana oupwe manau. Oupwe acheni ewe Samol mi Lapalap ami we Kot, oupwe aleasochisi alon o fitipacheiti. Pun ren ei oupwe manau o ranin manauemi repwe langatamalo.”​—Tuteronomi 30:15-20.

11. Ifa ussun ekkewe chon Israel repwe filata manau?

¹¹ Nengeni mwo pwe ekkewe chon Israel repwe filata manau ‘ren ar tongei Jiowa, ren ar auseling ngeni alon, me pwal ren ar fitipacheiti i.’ Lupwen ra rong ekkena kapas, ekkewe chon Israel resaamwo fonueni ewe Fonu mi Pwonetiu. Ra nom le Masiesin Moap, iwe, ra ammolnereta pwe repwe feilo epekin ewe Jortan me tolong on Kenaan. Inaamwo ika a fich ngenir ar repwe ekieki ewe fonu mi “murinno me watte” me ewe mi “urourelo ren milik me chonun pulech” repwele fonueni, nge pwonutaan minne ra aneanei a longolong won ar tong ngeni Jiowa, ar auseling ngeni leuwan, me ar fitipacheiti i. (Eksotos 3:8) Moses a affata ena mettoch, pwe iei alon: “Are oupwe aleasochisi ekewe alluk an ewe Samol mi Lapalap ami we Kot ua alluk ngenikemi ikenai, are oupwe pwal echeni i o aleasochisi alon pwe oupwe apwonueta an kewe alluk meinisin, an kewe pwuung me an kewe ourour, murin oupwe manau o chomongola. Iwe, ewe Samol mi Lapalap ami we Kot epwe afeiochukemi lon ewe fanu oupwe le tolong lon pwe oupwe fanueni.”​—Tuteronomi 30:16.

12. Met ffofforun ekkewe chon Israel epwe ita aiti ngenikich ussun ach angangen afalafala me asukula aramas?

¹² Ewe poraus mi mak asan esap ita aiti ngenikich och mettoch ussun ach angangen afalafala me asukula aramas lon ei fansoun le sopwoloon? Sia kan ekieki ussun ewe Paratis epwele war me sia kan kapas ussun ena mettoch lon ach angangen afalafal. Nge sap minne sipwe kuna pwonutaan ewe pwon ika sia angang ngeni Kot pokiten pwisin mochenich, iwe, a pwal ina ussun ekkewe aramas sia kan kaeo ngenir. Ussun ekkewe chon Israel, kich me chokkewe sia asukuler sipwe kaeo fan iten ach sipwe ‘tongei Jiowa, auseling ngeni leuwan, me fitipacheiti i.’ Ika sipwe chechchemeni ena mettoch lupwen sipwe ffori ach angangen afalafal, sipwe enletin angangfengen me Kot le luki letipen aramas ngeni i.

Chienen Kot kkewe Chon Angang

13, 14. (a) Me ren 1 Korint 3:5-9, ifa ussun sia kan wiliiti chienen Kot chon angang? (b) Io epwe lingelo pokiten lapaloon ewe angang, me met popun?

¹³ Paul a awewei ach angangfengen me Kot ren an mak ussun angang lon atake. Iei makkeian: “Iwe, meeta Apollos? are, meeta Paul? Am chon angang chok mi asoulangalo ami, usun chok ewe Samol a fen awisa ngenikem en me wisem. Ngang, ua fotukatiu, Apollos a achochonu, nge Kot a fen amarata. Iwe, esor lamoten atewe mi fotukatiu, o ese pwal wor lamoten atewe mi achochonu, nge Kot chok mi lamot, ewe mi amarata. Atewe mi fotukatiu o atewe mi achochonu, ir mi chok lollofengen, o repwe angei liwinir ukukun mi fich ngeni ar angang. Pun am chon angangen Kot mi akangangfengen; ami an Kot leenien atake.”​—1 Korint 3:5-9.

¹⁴ Pokiten kich chienen Kot chon angang, sipwe tuppwol le ffotukatiu “kapasen ewe muu” lon letipen aramas, iwe mwirin, sipwe achochonu ekkewe pwikil ren ach liwinitir me ach kaeo ngenir lon Paipel. Ika ewe ppwul, weween, ewe letip, a murinno, Jiowa epwe apwonueta wisan ren an amaari pwikilin ewe enlet seni Paipel pwe epwe wiliiti efoch ira mi uwaoch. (Mattu 13:19, 23) I epwe luki letipen ewe aramas ngeni pwisin i me pwal ngeni Noun we. Iwe, a ffat pwe lapaloon ekkewe chon afalafal fan iten ewe Muu a kan fis pokiten an Jiowa angang won letipen aramas, pwe a amaari pwikilin ewe enlet me a luki letipen ekkena aramas ngeni pwisin i me pwal ngeni Noun we.

Ewe Sokkun Angangen Kau Imw Epwe Nomofoch

15. Menni kapas awewe Paul a eani ren an epwe pwarata ifa ussun sia kan alisi aramas pwe repwe amaari ar luku?

¹⁵ Inaamwo ika sia pwapwa ren lapaloon ewe angang, nge sia enletin mochen kuna an aramas tongei Jiowa, ar auseling ngeni leuwan, me ar fitipacheiti i. Sia kan letipechou lupwen sipwe kuna ekkoch ar ra patapatelo me tturulo. Sipwe tongeni ffori och mettoch pwe esap fis ena? Paul a affata ifa ussun sipwe tongeni alisi aramas pwe repwe amaarata luku. Iei makkeian: “Esor emon epwe tongeni isetiu eu longolong mi sokkoseni ewe ua fen isetiu, iei i Jises Kraist. Iwe, are emon epwe auta won ewe longolong gold, are silfer, are fau auchea, are ira, are aset, are fetil, angangen emon me emon epwe pwapwalo; pun ewe ran epwe pwari usun, o ekkei epwe pwal pwarata. Pun ewe ekkei epwe sotuni lapalapen angangen emon me emon.”​—1 Korint 3:11-13.

16. (a) Ifa ussun ekkewe ruu kapas awewe Paul a eani ra sokkofesen ren ewe popun ar ra mak? (b) Ifa ussun ach angangen kau epwe tongeni sopwongau, iwe, esap likiitu fan ekkei?

¹⁶ Lon an Paul kapas awewe ussun ewe atake, maaritaan masouen ewe atake a longolong won ach achocho le ffotuki foun pwikil, ach achochonu ewe pwikil, me an Kot feioch. Ewe pwal eu kapas awewe ewe aposel a eani a menlapei wisen ewe chon afalafal ren minne epwe fis ngeni an angangen kau imw. A fen kau won eu longolong mi lukulukoch ren pisek mi murinno? Iei an Paul ourour: “Emon me emon epwe tumunufichi lapalapen an auta won.” (1 Korint 3:10) Mwirin ach luki letipen emon ren ach ereni ussun ewe apilukulukun manau esemuch lon Paratis, sia kan menlapei ekkewe chok popun afalafal lon Paipel, iwe mwirin, sia menlapei met emonnewe epwe ffori ren an epwe kuna manau esemuch? A ita chok iei ussun ach kaeo ngeni aramas: ‘Ika ka mochen manau tori feilfeilo chok lon Paratis, kopwe kaeo, fiti mwich, me fiti ewe angangen afalafal’? Ika ina, sise kan aueta lukuen ewe emon won eu longolong mi lukuchar, me eli minne sipwe aueta esap likiitu fan ewe ekkein sossot are esap nomotiu fansoun langattam. Ach sotuni le lukieto letipen aramas ngeni Jiowa ren chok ewe apilukulukun manau lon Paratis ren akkasiwilin ekkoch ierin ar angang ngeni i a ussun chok ach aueta imw ren “ira, aset, me fetil.”

Akkamaarata Tong ren Kot me Kraist

17, 18. (a) Met epwe wesewesen nom ren emon ren an epwe tufichin likiitu an luku? (b) Ifa ussun sipwe tongeni alisi emon pwe Kraist epwe nonnom lon letipan?

¹⁷ Ren an epwe likiitu lukuen emon, epwe longolong won an pacheoch ngeni Jiowa Kot ren Jises Kraist. Pokiten kich sise unusoch, sipwe tongeni chasefal ngeni Kot ren chok Noun we. (Rom 5:10) Chechchemeni alon Jises ei: “Esor emon epwe feilo ren ewe Sam are esap pokiten ngang.” Ren ach sipwe alisi aramas le amaarata luku, “esor emon epwe tongeni isetiu eu longolong mi sokkoseni ewe ua fen isetiu, iei i Jises Kraist.” Ifa weween ena?​—Jon 14:6; 1 Korint 3:11.

¹⁸ Ach angangen kau won ewe longolong Kraist a wewe ngeni ach asukula ewe chon kaeo pwe epwe amaarata tong mi alollol ngeni Jises ren an unusen sileifichi wisan kkewe, wisen Chon Amanau, Mokuren ewe mwichefel, Samol Fel Lapalap, me King mi nemenem iei. (Taniel 7:13, 14; Mattu 20:28; Kolose 1:18-20; Ipru 4:14-16) A wewe ngeni ach alisir pwe repwe enletin luku i fan iten an epwe nonnom lon letiper. Ach iotek fan asengesir epwe ussun an Paul tingor fan iten ekkewe chon Kraist lon Efisus. Iei makkeian: “Ua chok fotupukutiu mwen mesen Semach, . . . pwe epwe ngenikemi ami pochokkul . . . o Kraist epwe nonnom chok lon letipemi ren luku; pwe epwe fotuki ami pwal anukuchara ami lon tong.”​—Efisus 3:14-17.

19. Met epwe fis ika sipwe amaari tong ren Kraist lon letipen nouch kkewe chon kaeo, nge met sipwe asukuler ussun?

¹⁹ Ika lapalapen ach angang epwe amaari tong ngeni Kraist lon letipen nouch kkewe chon kaeo, iwe mwirin, epwe amaari tong ngeni Jiowa Kot. An Jises tong me umoumoch wesewesen liosun lapalapen Jiowa kkewe. (Mattu 11:28-30; Mark 6:30-34; Jon 15:13, 14; Kolose 1:15; Ipru 1:3) Iwe, lupwen aramas repwe silei me tongei Jises, repwe pwal silei me tongei Jiowa.a (1 Jon 4:14, 16, 19) A lamot ach sipwe aiti ngeni nouch kkewe chon kaeo pwe Jiowa a wisen akkota minne Kraist a fen ffori fan iten chon fonufan, ina minne, sipwe pwarata kilisou ngeni i, mwareiti i, me fel ngeni i pokiten i ewe “Kot mi ach amanau.”​—Kol Fel 68:19, 20; Aisea 12:2-5; Jon 3:16; 5:19.

20. (a) Ifa ussun sipwe tongeni alisi aramas pwe repwe fitipacheiti Kot me Noun we? (b) Met sipwe kaeo ussun lon ena lesen mwirin ei?

²⁰ Pokiten kich chienen Kot chon angang, sipwe alisi aramas pwe repwe pacheoch ngeni ir me Noun we, iwe, sipwe alisir pwe repwe amaarata tong me luku lon letiper. Epwe ina ussun Jiowa epwe wesewesen lingeta lon meser. (Jon 7:28) Ren Kraist, repwe tufichin fforatiu ar pacheoch ngeni Kot, me repwe tongei me fitipacheiti i. Esap kauk ewe fansoun repwe angang ngeni i fan tong, me repwe luku pwe an Jiowa kkewe pwon mi amwarar repwe pwonuta lon ewe fansoun a fen filata. (Kolun Kechiu 3:24-26; Ipru 11:6) Iwe nge, lupwen sipwe alisi aramas ar repwe amaarata luku, apilukuluk me tong, kich sipwe pwal amaarata pwisin ach luku pwe epwe ussun efoch sip mi fanafanoch, iwe, a tufichin sai lon molumol watte. Ina ewe mettoch sipwe kaeo ussun lon ena lesen mwirin ei.

[Footnote]

Enniwili Poraus

◻ Fan chommong, ifa ussun sia kan etipetipa aramas pwe repwe mochen auseling ngeni porausen ewe Muu, nge ifa ewe mettoch mi efeiengau a nom ren ena mettoch?

◻ Met sokkun aramas Jiowa a kan luki ngeni pwisin i me Noun we?

◻ An Israel tolong lon ewe Fonu mi Pwonetiu a longolong won met, me met sipwe tongeni kaeo seni ena mettoch?

◻ Ifa wisach lupwen sipwe alisi aramas pwe repwe fitipacheiti Jiowa me Noun we?

[Sasing lón pekin taropwe 10]

Inaamwo ika sia kapas ngeni aramas ussun ewe apilukulukun manau esemuch lon Paratis, nge sia akkaewin achocho le luki letiper ngeni Jiowa

[Ekkewe sasing lón pekin taropwe 13]

Ach liwiniti aramas epwe tongeni sopwoch ika sipwe ammolnaoch