Kopwe Sopwoch Lon Manauom!

“Mi feioch ewe mwan mi esap fetal lon pungupungun aramas mi ingau . . . Mettoch meinisin minne a fori epwe sapoch.”​—KÖLFEL 1:1, 3.

1. (a) Ifa ekiekin chommong sarafo ussun sopwoch? (b) Ifa ussun ewe Paipel a awewei emon mi sopwoch?

SOPWOCH​—met weween ena kapas me reom? “Ewe mettoch ua achocho ngeni lap seni meinisin, sopwoch lon business,” alon emon aluwon. Emon sarafo fopwul a apasa: “Ua mochen ai famili epwe pwapwa.” Nge pwal emon sarafo fopwul a apasa: “Ua mochen eu imw mi murinno, sedan mi murinno . . . Ua ekieki ngang pwisin chok.” Nge sap minne sipwe auku sopwoch mi enlet ren moni, famili, are pwal mwo angang mi murinno. Lon Kol Fel 1:1-3, sia alleani: “Mi feioch ewe mwan mi esap fetal lon pungupungun aramas mi ingau . . . A fakkun pwapwaiti allukun ewe Samol . . . Mettoch meinisin minne a fori epwe sapoch.”

2. Ia sipwe kuna sopwoch mi enlet, me epwe ifa ussun chok epwe torikich?

² Ikei ie ewe Paipel a pwon eu mettoch esor emon aramas a tongeni awora​—sopwoch mi enlet! Nge ese fos ussun winnach lon pekin moni. Ewe Paipel a ourour: “Mochenia moni, iei ewe popun ingau meinisin.” (1 Timoti 6:10) Sopwoch mi enlet epwe torikich ika sipwe apwapwai Kot​—kapachelong ach sipwe alleasochisi allukun Jiowa. Ina chok ewe mettoch epwe wato menemenoch me pwapwa mi enlet! Eli aramas resap saani ar repwe nom fan an Jiowa kewe alluk me an ereniir met repwe fori. Nge, Jises a apasa: “Feioch, ir mi woungau lon ngun.” (Mattu 5:3) Ika ka miritiiti ei mettoch are aapw, a nom reom ei osupwang lon pekin ngun seni om foruta​—kapachelong eu mochen pwe kopwe silei Kot me weweiti an kewe kokkot. Ina popun, kopwe tongeni kuna pwapwa mi enlet chok ika kopwe tumunu ekkena mettoch me alleasochisi “allukun Jiowa.”

Ewe Popun Mi Lamot Ngenikich An Kot Kewe Alluk

3. Met popun sipwe ita pwapwa le mut ngeni Jiowa an epwe ‘emmweni ach fetal’?

³ Ewe soufos Jeremaia a makkei: “Ai Samol mi Lapalap, ua silei pwe aramas resap pusin nemeni manauer, resap pwal tongeni akota mine repwe fori.” (Jeremaia 10:23) Ei mettoch mi enlet fan iten aramas meinisin, kukkun me chinnap. Sise chok osupwangen mirit, kunach, me sile pwe sipwe akkota minne sipwe fori; ese pwal nom rech ewe pwuung le fori ekkeei mettoch. Lon Pwarata 4:11, ewe Paipel a apasa: “Mi fich ngonuk, ach Samol o ach Kot, pwe kopwe angei ling o iteuoch o manaman, pun ka fen forata mettoch meinisin, o mettoch meinisin a fis o a nom ren letipom.” Ussun ewe Chon Forikich, Jiowa i “ewe puachen manau.” (Kol Fel 36:9) Ina ussun, Jiowa a silei lap seni meinisin ifa ussun sipwe nounou manauach. Ina popun a fori ekkewe alluk pwe sipwe pwisin efeiochukich, esap pwe epwe ti senikich pwapwa. (Aisea 48:17) Tunalo an Kot kewe alluk, iwe, kopwe sopwongau.

4. Met popun chommong sarafo ra asolapa manauer?

⁴ Awewe chok, ka fen ekieki ewe popun chommong sarafo ra aeamwaalli manauer ren safeien opuchopuch, lisowu mwaal, me sokkopaten fofforingau? Kol Fel 36:1, 2 a awewei: “Foforun chon fofor ingau a kapas ngeni chok pwisin letiper; esor niuokusun Kot mwen meser. Ra pwisin michi ir ren ar ekiek, pwe Kot esap tongeni kuna o oputa ar kewe fofor ingau.” Pokiten nafangauen “niuokusun Kot,” chommong sarafo ra pwisin otupuur le luku pwe resap kuna liwinin ar fofforingau. Iwe nge, lo, lo, lo, repwe kuna pwungun ei emmwen ese siwil: “Minne emon epwe fotukatiu, iei chok epwe pwal kini. Pun emon mi fotukatiu ngeni pwisin fitukan epwe kini malo seni ewe fituk; nge emon mi fotukatiu ngeni ewe Ngun epwe kini manau esemuch seni ewe Ngun.”​—Kalesia 6:7, 8.

‘Eiteita Ranin Manauom’

5, 6. (a) Met popun mi lamot pwe ekkewe sarafo repwe ‘eiteita ranin manauer’ me met weween ar repwe fori ena mettoch? (b) Met weween ‘chechemeni ach Chon Forata’?

⁵ Ifa ussun kopwe sopwoch lon manauom me “kini manau esemuch”? Moses a makkei: “Ekkewe ierin am manau mi fiik, are, pokiten chok am pochokkul, walik . . . Ra muttir feilo, o am aua asilo.” (Kol Fel 90:10) Eli kese, are fan ekkoch chok, kopwe ekieki ussun malo. Pwungun pwe, a pwalo seni fofforun chommong sarafo ar luku pwe rese tongeni malo. Nge Moses a pwarata eu enlet mi alolilen pwe manauach a mwochomwoch chok. Sise pwal mwo wesewesen silei ika sipwe manau tori 70 are 80. “Fansoun me mettoch sise ekieki” epwe tongeni poku pwal mwo ekkewe kukkun me pochokkul. (Än Salomon Afalafal 9:11, NW) Iwe, ifa ussun kopwe aea ewe manau mi auchea ka pwapwaesini iei? Moses a iotek: “Kopwe aiti ngenikem minne am aupwe fori lon am keei ran, pwe am aupwe tongeni ani letip mi tipatchem.”​—Kol Fel 90:12.

⁶ Met weween om kopwe eiteita ranin manauom? Esap minne kopwe lolileniesini epwe ifa ttamen manauom. Moses a iotek pwe Jiowa epwe aiti ngeni noun kewe aramas ifa ussun repwe aea ekkewe ier lusun lon manauer, pwe repwe aitochuelo Jiowa. Ka eiteita ranin manauom​—me aucheani eu me eu ran pwe kopwe mwareiti Kot? Ewe Paipel a awora ei kapasen pesepes ngeni ekkewe sarafo: “Kopwe atoauala ourek seni letipom, kopwe pwal ti seni inisum mine a ngau. Pun lealualum me lepochokulom a pon chok. Iwe, lealualum kopwe chechemeni ewe mi foruk, mwen ekewe ran mi ngau repwe feito.” (Än Salomon Afalafal 11:10–​12:1) Ach chechchemeni ewe Chon Forata esap chok wewe ngeni ach luku pwe mei wor emon Kot. Lupwen ewe chon atai alluk a tingorei Jises, “Kopwe chechemeniei lupwen om kopwe pwato lon om manamanen king,” ese chok mochen pwe Jises epwe chechchemeni itan we. A mochen pwe Jises epwe fori och mettoch, amanauasefalli i! (Luk 23:42; alollo ngeni Keneses 40:14, 23; Hiop 14:13.) Ussun we chok, om chechchemeni Jiowa a wewe ngeni om fori och mettoch, kopwe foffori met epwe apwapwai i. Sipwe tongeni apasa pwe en ka chechchemeni Jiowa?

Kesap Lolowoiti Ekkewe Chon Fofforingau

7. Met popun ekkoch sarafo ra filata pwe repwe monuki ewe Chon Forata? Awora eu kapas awewe.

⁷ Chommong sarafo ra filata pwe repwe tunalo Jiowa pokiten ra meefi pwe lupwen ra wiliiti emon Chon Pwarata a kon chommong ekkwe mettoch epwe pinei seniir. Emon brother seni Spain a chechchemeni meefian lupwen a chuen sarafo: “Ua saani ewe fonufan pokiten ewe enlet a kon weires me titchik. A wewe ngeni ai upwe mommot, kaeo, fiffiti ekkewe mwich, aea necktie, nge ikkena ekkewe mettoch use pwapwaiti.” Fan ekkoch, ka meefi pwe a pout sonuk och mettoch mi och pokiten om fel ngeni Kot? Eli kopwe mairu le silei pwe emon sou makkei ewe Paipel a fen meefi ina ussun. Kose mochen suuki noum Paipel me alleani Kol Fel 73.

8. Met popun Esaf a “lolowo ngeni ekkewe aramas mi lamalam tekia”?

⁸ Sipwe atittinafichi ei kol. Wokisin 2 me 3 a apasa: “Nge ngang ekis ngeni chok pecher keei repwe chepetek, ekis ngeni chok upwe faselo ren ai fefetal. Pun ua lolowo ngeni ekkewe aramas mi lamalam tekia, lupwen ai kuna feiochun ekkewe aramas mi ingau.” Me ren ewe superscription, Esaf a makkei ei kol. I emon chon nikkattik re Lefi me a manau lon ranin King Tafit. (1 Kronika 25:1, 2; 2 Kronika 29:30) Inaamwo a wiiseni wiisen chon angang lon an Kot we imwen fel, a ‘lolowoiti’ ekkewe aramas mi sikasini ar fofforingau. Ra sopwoch lon ar angang; ussun ita ra kinamwe me lukulukoch. Pwungun pwe, sopwochur a ussun ita ‘lap seni minne ra fen ekiekiata lon letiper.’ (Wokisin 5, 7) Ra fos ussun minne ra fen fori lon “kapas pochokkul,” weween, ren lamalam tekia. (Wokisin 8) ‘Ra u ngeni ekkewe lang ren auer, o chon-mongor ra fetalen-mwanesol-feil won fonufan,’ weween pwe rese ekieki ussun pwal emon​—lon lang are lon fonufan.​—Wokisin 9.

9. Ifa ussun ekkoch sarafo Chon Kraist ikenai repwe tongeni meefi ussun chok Esaf?

⁹ Eli chienom kewe lon sukul ra pwal ina ussun. Neman ka rongorong ar sik ussun fongur, ar pari mi akurang, me ar unnupuch ren sakau me safeien opuchopuch. Ika ka alollofengenni manauer mi ur ren ena esin pwapwa ren manauom ussun emon Chon Kraist, eli kopwe “lolowo ngeni ekkewe aramas mi lamalam tekia.” (Mattu 7:13, 14) Esaf a pwal mwo nge apasa: “Enlet, esor lamoten ai alimelimochu letipei, are tolu pei pokiten esor tipisi. Pun unusen ran ua kuna riaffou.” (Wokisin 13, 14) Ewer, a poputa le tipemwaramwareiti ewe lamoten an angang ngeni Kot me an manaueni manau mi pwung.

10, 11. (a) Met a efisata an Esaf siwili an ekiek? (b) Ifa ussun ekkewe chon fofforingau ra nom “lon ekkoch leeni mi mitimit”? Awewei mwo.

¹⁰ Nge a mmen och pwe Esaf ese meefi lolilen ren fansoun langattam. A mutti miritiiti pwe ewe kinamwe a nom ren ekkewe mi fofforingau a ussun eu chok ttan​—kinamwe ese tongeni nommottam! A apasa: “Enlet, ka chok isetiu ir lon ekkoch leeni mi mitimit; ka fori minne repwe turutiu ren lon ar poutmwalilo. Ifa lapalapen ar repwe talo lon chok eu minit, ar repwe morelo ren mettoch mi aniuaniu!” (Wokisin 18, 19) Chommong chienom ra pwal nonnom “lon ekkoch leni mi mitimit.” Liwinin ar fofforingau epwe toriir, eli ren pwopwoon lipich, semmwenin sikepwach, pwal mwo nge ar kalapus are malo! Nge lap seni ena mettoch, repwe riaffou pokiten ar touwau seni Kot.​—Jemes 4:4.

¹¹ Emon sarafo Chon Pwarata seni Spain a kuna pwungun ei poraus mi enlet. Lupwen a chuen kukkun, a manaueni ruu sokkun manau ren an chiechi ngeni ekkewe sarafo mi ngau. Lo, lo, lo, a tongei emon leir​—emon a aea safeien opuchopuch. Nge inaamwo ika ese pwisin aea ekkewe safei, a mooni ekkewe safein opuchopuch fan itan. “Ua pwal mwo nge alisi i le opposalong ewe tikek,” neminnewe a apasa. A mmen och pwe ei sister a miritilo me pochokkulelo lon pekin ngun. Nge mwirin och fansoun neminnewe a fokkun ruko lupwen a rongorong pwe noun we kamwet mi aea safeien opuchopuch a fen malo ren AIDS. Ewer, ussun chok alon ewe soumak kol, aramas mi ngau ra nonnom “lon ekkoch leeni mi mitimit.” Ekkoch repwe tongeni malo pokiten ra manaueni ewe sokkun manau mi ngau. Nge ika ekkewe lusun rese siwili lapalapen manauer, ekiselo chok repwe kuna ewe “fansoun ewe Samol Jises epwe pwato seni lang, eti noun kewe chonlang mi manaman lon pulopulen ekkei, pwe epwe liwini ngeni ir ekkewe rese sinei Kot, pwal ir ekkewe rese alleasochisi ewe kapas allim usun ach Samol Jises.”​—2 Tesalonika 1:7, 8.

12. Ifa ussun emon aluwon seni Japan a miritiiti umwesin an lolowoiti ekkewe chon fofforingau?

¹² Ina popun, a mmen umwes an emon lolowoiti “ekkewe rese silei Kot”! Pwungun pwe, sipwe lolowoiti ekkewe mi silei Jiowa me mi apilukuluku manau esemuch. Emon brother aluwon lon Japan a miritiiti ena mettoch. Lupwen a chuen sarafo, i a pwal “mochen alapalo an ngaselo.” A apasa: “Ua meefi pwe a pout seniei och mettoch mi murinno. Mwirin ua miritiiti epwe fet manauei ika use silei ewe enlet. Ua tongeni manau 70 are 80 ier me mwirin upwe malo. Nge Jiowa a awora ewe apilukulukun manau esemuch! Ai miritiiti ei mettoch a alisiei le aucheani met a fen nonnom rei.” Meit mwo, ese mecheres ach sipwe tuppwol ngeni Kot ika aramas mi alleasolapa an Kot kewe alluk ra pwellifeilikich. Ikkefa ekkewe mettoch kopwe tongeni fori pwe kese kkuf ren ekkena sossot?

Tumunu Chiechiom!

13, 14. Met popun mi lamot ach filioch ren chiechiach?

¹³ Sipwe atolasefalli weween emon mwan mi sopwoch, mi mak lon Kol Fel 1:1-3: “Mi Feioch ewe mwan mi esap fetal lon pungupungun aramas mi ingau, are uta lon alen aramas mi tipis, are momot won leenien motun aramas mi turunufas; nge a fakkun pwapwaiti allukun ewe Samol, o a fakkun ekieki usun an we alluk, le ran me lepwin. Atewe a wewe ngeni efoch ira mi fotutiu unukkun chanpupu, mi uwa lon an fansoun ras, nge chon esap pwaselo. Iwe, mettoch meinisin minne a fori epwe sapoch.”

¹⁴ Nengeni mwo pwe chiechiom a fokkun lamot. An Salomon Fos 13:20 a apasa: “Eman mi chiechi ngeni aramas mi tipachem epwe tipachemela, nge eman mi chiechi ngeni ekewe chon tiparoch epwe feiengau.” Esap minne pwe sipwe oput are lamalam tekia ngeni ekkewe sarafo rese fiti ewe lamalamen Chon Pwarata Jiowa. Ewe Paipel a peseikich pwe sipwe tongei chon oruch kewe me “kinamwefengen me aramas meinisin.” (Rom 12:18; Mattu 22:39) Iwe nge, eli kopwe kuna pwe ka ‘fetal lon pungupungun’ ekkewe aramas rese alleasochisi allukun ewe Paipel ika ka kon chiechi ngeniir.

Feioch Seni Alleaan Paipel

15. Ifa ussun ekkewe sarafo repwe amaaraata ar mochen alleani Paipel?

¹⁵ Ewe soumak kol a pwal apasa pwe ewe mwan mi sopwoch a pwapwaiti an alleani an Kot kewe alluk “le ran me lepwin.” (Kol Fel 1:1, 2) Pwungun pwe, ese mecheres le alleani ewe Paipel, me a masowu ren “och mi weires ngenikich.” (2 Piter 3:16) Nge esap minne alleaan Paipel epwe eu angang weires. Mi tufich pwe sipwe “fakkun mochen ewe chonun oup mi enlet” lon ewe Kapasen Kot. (1 Piter 2:2) Sotun allea ekis chok iteiten ran. Ika mei wor ekkoch poraus kese weweiti, fori research. Mwirin, ekieki ussun met ka fen alleani. (Kol Fel 77:11, 12) Ika a weires om kopwe ekieki ussun minne ka alleani, sotuni om leuwommong le allea. Lo, lo, lo, kopwe saani om alleani ewe Paipel. Emon sister fopwul seni Brazil a apasa: “A ussun ita Jiowa a fokkun towau seniei. Nge ren fitu maram iei, ua fen amurinnolo ai kaeo me alleaan Paipel. Iei ua meefi pwe a pochokkulelo ai riri ngeni Jiowa. A ussun ita a wesewesen enlet me rei.”

16. Ifa ussun sipwe tongeni alapalo ewe feioch sia angei seni ekkewe mwich?

¹⁶ Fiffiti ekkewe mwich ina pwal eu mettoch mi lamot ngeni om feffeita lon pekin ngun. Ika ka “tumunu usun om rong,” epwe apochokkuloketa. (Luk 8:18) Fan ekkoch, ka meefi chipwang le auseling lon mwich? Iwe, kopwe pwisin eisinuk, ‘Met ua fori pwe usap chipwang le auseling lon mwich? Ua auselingoch? Ua ammonlata? Ua uwau meefiei?’ Popun pun ewe Paipel a erenikich pwe “sipwe ekiekifichi usun ach sipwe apochokkula emon me emon lefilach lon tong o fofor-murinno, . . . sipwe alolofengennikicheta.” (Ipru 10:24, 25) Mi lamot om kopwe uwau meefiom pwe kopwe apwonueta ei fon! Pwungun pwe, epwe lamot om kopwe kaeo me mwan pwe kopwe tongeni uwau om memmeef. Emon sister fopwul a apasa: “A fokkun amecheresi ach uwau meefiach lon ekkewe mwich ika sipwe ammonlata.”

Sipwe Sopwoch Ika Sipwe Tapwelo Mwirin Alen Kot We

17. Ifa ussun emon mi achocho le alleani ewe Paipel a ussun “efoch ira mi fotutiu unukkun chanpupu”?

¹⁷ Ewe soumak kol a pwal apasa pwe ewe mwan mi sopwoch a ussun chok “efoch ira mi fotutiu unukkun chanpupu.” Eli ewe konik a wewe ngeni ekkewe warawar aramas ra aea le achochonu ekkewe ira lon ekkewe malamal. (Aisea 44:4) Alleaan Paipel iteiten ran a ussun chok an emon kapach ngeni ena esin popun mongo me konik. (Jeremaia 17:8) An epwe toruk ewe pochokkul iteitan a lamot pwe kopwe likiitu fan sossot me weires. Pokiten ka fen silei an Kot ekiek, epwe nom reom ewe tipatchem a lamot pwe kopwe filioch.

18. Ifa ussun emon sarafo epwe tongeni sopwoch lon an angang ngeni Jiowa?

¹⁸ Fan ekkoch, eli kopwe meefi pwe a weires om kopwe angang ngeni Jiowa. Nge, kesap meefi pwe a kon weires me kese tongeni likiitu. (Tuteronomi 30:11) Ewe Paipel a pwon ngonuk pwe lo, lo, lo, ‘mettoch meinisin minne ka fori epwe sapoch,’ ika kopwe achocho ngeni minne Jiowa a mochen me ngeni om apwapwai letipan! (An Salomon Fos 27:11) Chechemeni mwo pwe, kese alaemon chok. Mi nom reom alillisin Jiowa me Jises Kraist. (Mattu 28:20; Ipru 13:5) Ra silei om kewe osukosuk, me resap likitukulo. (Kol Fel 55:22) Mi pwal wor reom alillisin “pwiom kewe Soulang” me semom me inom ika ir mi fituk lon om luku. (1 Piter 2:17) Ren ena esin alillis, kapachelong om apposa letipom me om achocho, kopwe tongeni pwapwaesini manau mi sopwoch esap chok iei nge tori feilfeilo!

Kapas Eis Sipwe Enniwili

◻ Met ena sopwoch mi enlet?

◻ Met popun mi lamot pwe Jiowa epwe emmweni manauach?

◻ Ifa ussun ekkewe sarafo repwe ‘eiteita ranin manauer’?

◻ Met popun mi umwes ach sipwe lolowoiti ekkewe chon fofforingau?

◻ Ifa ussun alleaan Paipel iteiten ran me fiffiti mwich epwe alisi ekkewe sarafo le pwapwaesini eu manau mi sopwoch?

[Sasing lón pekin taropwe 28]

Pokiten rese “niuokkusiti Kot,” chommong sarafo ra fofforingau

[Sasing lón pekin taropwe 30]

Fan chommong ekkewe sarafo ra monukalo pwe mei wor liwinin ar kewe foffor