‘O Kot, Tinato Om We Saram’

“Kopwe tinato om we saram o om we enlet; pwe repwe emmweniei.”​—KOL FEL 43:3.

1. Ifa ussun Jiowa a pwaralo an kewe kokkot?

JIOWA a fokkun pwarata tong lupwen a esile ngeni noun kewe chon angang an kewe kokkot. A asarama kich ekis me ekis, nge ese pwaralo ewe enlet lon chok eu saram mi achunakichelo. Eli sipwe alollofengenni ach feffetal won ewe alen manau ngeni an emon fetal won eu alattam. A muttir poputa le fetal unumweiran nge a ekis emerereii chok mettoch. Ekis me ekis ewe akkar a tota seni meseiran, me ewe chon fetal a tongeni esinna ekkoch mettoch. Ekkewe ekkoch mi chok topotop. Nge atun an ewe akkar tottota, ekis me ekis a pwal ffatelo met a kuna me towau. A pwal ina ussun ren ewe saram lon pekin ngun Kot a awora. A mut ngenikich ach sipwe miritiiti ekkoch chok mettoch lon eu fansoun. A pwal ina ussun noun Kot, Jises Kraist, a awora saram lon pekin ngun. Sipwe ekieki ifa ussun Jiowa a fen asarama noun kewe aramas loom me ifa ussun a pwal fori ikenai.

2. Ifa ussun Jiowa a awora saram lon ewe fansoun mwen Kraist?

² Neman ekkewe chon makkei Kol Fel 43, ir noun Korah kewe. Pokiten ir Chon Lifai, ra wiiseni wiisen asukula aramas ussun an Kot Alluk. (Malakai 2:7) Pwungun pwe, Jiowa nour Sou Kait mi Lapalap, me ewe Popun tipatchem meinisin. (Aisea 30:20) “O Kot, . . . tinato om we saram o om we enlet,” ewe soumak kol fel a iotek. “Pwe repwe emmweniei.” (Kol Fel 43:1, 3) Ika ekkewe Chon Israel ra tuppwol ngeni Jiowa, epwe aiti ngeniir an we kokkot. Fitepuku ier mwirin, Jiowa a efeiochuur ren saram me enlet mi fokkun amwarar. Kot a fori ei mettoch lupwen a tiinato Noun we ngeni fonufan.

3. Ifa ussun ekkewe Chon Jus ra kuna sossot seni aitien Jises?

³ Atun Noun Kot, Jises Kraist emon mwan, i ewe “saramen fonufan.” (Jon 8:12) A aiti ngeni aramas “chommong mettoch lon kapas monomon”​—mettoch minefo. (Mark 4:2) A ereni Pailat: “Muui we esap seni ei fonufan.” (Jon 18:36) Ena, och minefoon ekiek fan iten emon Chon Rom me fan iten emon Chon Jus mi tongei fonuan, pokiten ra ekieki pwe ewe Messaia epwe akkufu Muun Rom me alingalosefalli Israel. Jises a pwarata saram seni Jiowa, nge an kewe kapas rese apwapwai ekkewe nouwisin Chon Jus, ekkewe mi “mochen kutta iter me ren aramas lap seni iter me ren Kot.” (Jon 12:42, 43) Chommong lein ekkewe aramas ra filata ar repwe fiti eorenien aramas lap seni ar repwe etiwa ewe saram lon pekin ngun me ewe enlet seni Kot.​—Kol Fel 43:3; Mattu 13:15.

4. Ifa ussun sia silei pwe miritin noun Jises kewe chon kaeo epwe maarita?

⁴ Iwe nge, ekkoch mwan me fefin mi letip wenechar ra pwapwa le nguuri ewe enlet Jises a aiti ngeniir. Ra feffeita lon ar weweiti an Kot kewe kokkot. Nge, lupwen epwele muchulo manauen nour we Sense, mi chuen chommong mettoch repwe kaeo. Jises a ereniir: “Mi chuen wor chommong mettoch minne upwe apasa ngenikemi, nge iei rese tongeni ki remi.” (Jon 16:12) Ewer, ekkewe chon kaeo repwe maarita lon ar weweiti poraus mi enlet seni Kot.

Ewe Saram A Chuen Tittin

5. Menni kapas eis a piita lon ewe aewin senturi, me io a wiisen polueni ewe kapas eis?

⁵ Mwirin an Jises malo me manausefal, saram seni Kot a chuen ttin lap seni loom. Lon eu langepwi Kot a ngeni Piter, Jiowa a pwarata pwe ekkewe Jentail rese sirkumsais repwe tongeni wiliiti noun Kraist chon kaeo. (Fofor 10:9-​17) Ina och poraus mi fo! Iwe nge, eu kapas eis a piita mwirin: Jiowa a mochen pwe ekkena Jentail repwe sirkumsais mwirin ra fen wiliiti Chon Kraist? Ena kapas eis ese polu lon ewe langepwi, me ekkewe Chon Kraist ra poputa le anini won. A lamot pwe ei kapas eis epwe polu ika esap apwangapwangalo ar tipeeu mi fokkun auchea. Ina popun, “ekkewe chon kuno me ekkewe elter ra mwichfengen pwe repwe pungupungfengen usun ei sokkun poraus” lon Jerusalem.​—Fofor 15:1, 2, 6.

6. Menni kokkot ekkewe aposel me mwan mi asimau ra appiru lupwen ra ekieki ussun ewe kapas eis ussun sirkumsais?

⁶ Ifa ussun ekkewe mi choni ena mwich repwe tongeni esinna letipen Kot fan iten ekkewe chon Jentail mi luku? Jiowa ese tiinato emon chonlang pwe epwe emmweni ewe mwich, me ese pwal tiinato eu langepwi fan iter. Nge, sap minne Kot a chok likitiirelo me esap wor emmwen. Ra ekieki porausen ekkewe ekkoch Chon Jus Chon Kraist mi fen kuna fofforun Jiowa ngeni aramasen ekkewe fonu, an ninatiu an we ngun mi fel won ekkewe Chon Jentail rese sirkumsais. Ra pwal kukkuta emmwen seni ewe Paipel. Iwe mwiriloon, ewe chon kuno Jemes a apasawu poraus mi alongolong won eu wokisin mi tongeni asaramer. Atun ra ekieki ussun ewe pisekin annet, letipen Kot a ffatolo. Ese lamot pwe ekkewe Jentail repwe sirkumsais ika ra mochen apwapwai Jiowa. Ekkewe aposel me ekkewe mwan mi asimau ra muttir makkeei met ra fen pwungupwung won pwe chiener kewe Chon Kraist repwe pwal kuna emmwen seni.​—Fofor 15:12-​29; 16:4.

7. Ifa ussun ekkewe Chon Kraist lon ewe aewin senturi ra feffeita?

⁷ Lap me lein ekkewe Chon Jus Chon Kraist ra chengel lupwen ra rongorong ei minefoon poraus mi amwarar ussun an Kot kokkot ngeni aramasen ekkewe muu, inamwo ika ar nguuri ei poraus a wewe ngeni ar siwili ekiekir ussun ekkewe Chon Jentail. Rese ussun ekkewe nouwisin lamalamen Jus mi chok kamwochunnuk eorenien samasamer. Jiowa a efeiochu ar ngunun tipetekison, me “ekkewe mwichefel ra pochokkulelo lon ar luku, o iteiter a chommongelo iteiten ran.”​—Fofor 15:31; 16:5.

8. (a) Ifa ussun sia silei pwe och saram epwe pwal ttin mwirin wesiloon ewe aewin senturi? (b) Menni kapas eis mi fich ngeni ei poraus sipwe poraus won?

⁸ Saram lon pekin ngun a chuen tittinoch atun ewe aewin senturi. Nge Jiowa ese pwaralo unusen an kewe kokkot ngeni ekkewe minefoon Chon Kraist. Ewe aposel Paul a ereni chienan kewe chon luku lon ewe aewin senturi: “Lon ei fansoun sia kuna usun chok nge lon kilas mi topotop.” (1 Korint 13:12) Ese ffattoch met sia kuna seni ena esin kilas. Iwe, akkom, epwe aukuk ach weweiti ewe saram lon pekin ngun. Mwirin maloon ekkewe aposel, ewe saram a kunulo ren ekis fansoun, nge lon ekkewe fansoun mi kanoto, sile ussun ewe Paipel a fen lapelo. (Taniel 12:4) Ifa ussun Jiowa a asarama noun kewe aramas ikenai? Me ita met sipwe fori ika a wawaalo ach weweiti ewe Paipel?

Ewe Saram a Sassaramelo Ekis Me Ekis

9. Ifa ewe kkotun kaeo Paipel mi sokkolo me murinno ekkewe Bible Students loom ra aea?

⁹ Lon ei fansoun ewe aewin morupen saram a poputa le pwalo le muchuloon ewe 19en senturi lupwen eu mwichen mwan me fefin Chon Kraist ra tinikken le kaeo ewe Paipel. Ra akkota eu kkotun kaeo Paipel mi murinno. Emon epwe eani eu kapas eis; mwirin ewe kumi epwe atittina ekkewe wokisin meinisin ra weneiti ewe kapas eis. Ika eu wokisin epwe ita u ngeni pwal eu, ekkeei Chon Kraist mi wenechar ra sotun le atipeeufengenniir. Ekkewe Bible Students (ina iten Chon Pwarata Jiowa lon ena atun) rese ussun chok ekkewe nouwisin lamalam lon ena atun, pokiten ra uppos le mut ngeni ewe Paipel an epwe emmweniir, esap chok eoreni are allukun aramas. Mwirin ra wes le pwungupwungfengen won ekkewe pisekin annet meinisin seni ewe Paipel, ra makketiu met ra fen tipeeufengen won. Iei ussun ar weweiti chommong aitien Paipel a ffatolo.

10. Charles Taze Russell a makkei menni puken aweween Paipel mi alillisoch?

¹⁰ Emon mi itefoulo lein ekkewe Bible Students itan Charles Taze Russell. A makkei wonu puken aweween Paipel, itelaper Studies in the Scriptures. Brother Russell a ekiekin makkei ewe afisuen puk pwe epwe awewei ekkewe puken Isikiel me Pwarata. “Lupwen ua kuna ewe kii,” a apasa, “Upwe makkei ewe Afisuen Puk.” Iwe nge, a pwal apasa: “Ika ewe Samol a ngeni pwal emon ewe kii, i epwe makkei ewe puk.”

11. Ifa ewe riri lefilen fansoun mi fich me ach weweiti an Kot kewe kokkot?

¹¹ Met C. T. Russell a fen apasa a pwarata eu mettoch mi lamot lon ach tufichin weweiti ekkoch wokisin lon ewe Paipel​—fansoun mi fich. Brother Russell mi silei pwe i ese tongeni eriani ewe saram an epwe ttinatiu won ewe puken Pwarata ussun chok emon chon fetal mi atapwalapwal ese tongeni amuttiri totaan ewe akkar.

A Fen Pwalo​—Nge Lon Ewe Fansoun Kot A Filata

12. (a) Ineet sia weweochuti oesini seni Paipel? (b) Menni poraus a pwarata pwe ach tufichin weweiti oesini seni Paipel a alongolong won an Kot kokkotun fansoun? (Nengeni ewe footnote.)

¹² Ekkewe aposel ra weweiti chommong oesini ussun ewe Messaia mwirin an Jises malo me manausefal. Iwe, a pwal ina ussun ren ekkewe Chon Kraist ikenai, ra titchik le weweiti oesini seni Paipel mwirin an a pwonueta. (Luk 24:15, 27; Fofor 1:15-​21; 4:26, 27) Pwarata eu puken oesini, ina popun sipwe ekiekin weweochuti mwirin ekkewe mettoch a awewe won ra fen fisita. Ren chok awewe, C. T. Russell esap tongeni weweochuti weween ewe manmwocho mi parapar a mak lon Pwarata 17:9-​11, pokiten ekkewe mwicheich ena manmwocho a weneiti, weween ewe League of Nations me ewe United Nations, resaamwo fisita tori mwirin an malo.a

13. Fan ekkoch met a fis lupwen a saramelo och poraus seni Paipel?

¹³ Lupwen ekkewe Chon Kraist lon ewe aewin senturi ra silei pwe ekkewe Jentail rese sirkumsais repwe tongeni wiliiti chiechier lon luku, ena siwil a efisata eu minefoon kapas eis mi lamot: ar repwe sirkumsais ussun ekkewe aramasen fonufan. Ei mettoch a amwokutu ekkewe aposel me ekkewe mwan mi asimau le atittinaochu unusen ewe porausen sirkumsais. Ena esin kokkot a chuen pwung ikenai. Fan ekkoch eu saram mi fokkun saramaram a ttinoch won eu porausen Paipel me a emmweni noun Kot kewe mi kepit, “ewe chon angang mi tuppwel o tipatchem,” le atittinasefalli ekkewe mettoch a weneiti ewe poraus, ussun ewe kapas awewe mi mak mwirin a aitingenikich.​—Mattu 24:45.

14-16. Ifa ussun eu siwil lon ach luku ussun ewe imwen fel lon pekin ngun a kku ach wewe ussun Isikiel sopwun 40 tori 48?

¹⁴ Lon 1971 aweween an Isikiel oesini a mak lon ewe puk “The Nations Shall Know That I Am Jehovah”​—How? Eu sopwun lon ena puk a ekis poraus ussun an Isikiel oesini ussun ewe imwen fel. (Isikiel, sopwun 40-​48) Lon ena atun, ra itelapei ifa ussun an Isikiel langepwi ussun ewe imwen fel epwe pwonueta lon ewe fonufan sefo.​—2 Piter 3:13.

¹⁵ Iwe nge, ruu poraus mi mak lon Ewe Leenien Mas lon fosun Merika, minen December 1, 1972, a kku ach luku ussun an Isikiel langepwi. Ra poraus ussun ewe imwen fel mi lapalap lon pekin ngun ewe aposel Paul a awewe ussun lon Ipru sopwun 10. Ewe Leenien Mas a awewei pwe ewe leeni mi Pin me kiannin ewe imwen fel me kukkulong lon ewe imwen fel lon pekin ngun a weneiti lapalapen ekkewe mi kepit lupwen ra chuen nonnom won fonufan. Lupwen ra enniwili Isikiel sopwun 40 tori 48 fitu ier mwirin, ra miritiiti pwe pokiten a fiffis angang lon ewe imwen fel lon pekin ngun iei, weween pwe epwe pwal fiffis angang lon ewe imwen fel Isikiel a kuna lon an langepwi ikenai. Ifa ussun?

¹⁶ Lon an Isikiel we langepwi, a pwalo pwe ekkewe samol fel ra feffetal lon kiannin ewe imwen fel me kukkulong lupwen ra angang ngeni ekkewe einang, nge ir resap samol fel. A ffat pwe ekkeei samol fel ra weneiti ewe “mwichen samol-fel mi tekia,” noun Jiowa kewe chon angang mi kepit. (1 Piter 2:9) Iwe nge, resap angang lon kiannin ewe imwen fel me kukkulong won fonufan lon unusen ewe Engerou Ierin an Kraist Nemenem. (Pwarata 20:4) Lon lape ngeni are unusen ena fansoun, ekkewe mi kepit repwe angang ngeni Kot lon leenien ewe imwen fel mi Unusen Pin, weween “lon lang.” (Ipru 9:24) Pokiten a pwalo pwe ekkewe samol fel ra feffetal lon kiannin ewe imwen fel me kukkulong lon an Isikiel imwen fel, weween pwe ena langepwi a pwoppwonueta ikenai, pokiten ekkoch lein ekkewe mi kepit ra chuen nonnom won fonufan. Ina minne, ei chassi, minen July 1, 2000, a pwaralo eu luku mi ekis siwil won ei poraus. Iwe, tori le muchuloon ewe 20en senturi, saram lon pekin ngun a ttinoch won an Isikiel oesini.

Kopwe Tipemecheres Le Siwili Om Ekiek

17. Ifa ussun ka fen siwili om ekiek lupwen ka poputa le silei ewe enlet, me ifa ussun a efeiochuk?

¹⁷ Ese lifilifil io mi mochen silei ewe enlet epwe tipemecheres le “fotekini sokkun ekiek meinisin pwe repwe alleasochisi Kraist.” (2 Korint 10:5) Ach fori ena mettoch ese mecheres, akkaewin ika ach luku a pochokkul. Ren chok awewe, mwen ka kaeo ewe enlet seni Kot, neman ka fen efich om fori apwapwaan ekkoch ranin pin me om famili. Mwirin om kaeo ewe Paipel, ka miritiiti pwe ekkeei apwapwa ra feito seni lamalamen lukun. Le poputaan, eli kese mochen apwonueta met ka fen kaeo. Nge mwirin, om tong fan iten Kot a pochokkul lap seni om memeef mi popu seni lamalam, iwe ka ukutiu le fiffiti ekkewe apwapwa mi aletipengaua Kot. Jiowa a efeiochu met ka fori.​—Alollo ngeni Ipru 11:25.

18. Met sipwe fori ika a ffatelo ach wewe ussun ewe enlet seni Paipel?

¹⁸ Sia feioch iteiten fansoun sia aleni an Kot we aal. (Aisea 48:17, 18) Ina popun lupwen ach luku ussun och poraus lon Paipel a ffatelo, sipwe chengel pokiten feffeitaan ewe enlet! A enlet pwe ach sassaramelo a alukulukukich pwe sia feffetal won ewe alen pwung. Ina “ewe al ekewe chon pwung ra fetal won,” mi ussun chok “saramen unumweeran mi chok sasaramala tori a unusen ranila.” (An Salomon Fos 4:18) Enlet, ikenai “mi topotop” ngenikich ekkoch kinikinin an Kot kokkot. Nge lupwen a war ewe fansoun Kot a filata, sipwe unusen kuna fatafatochun lingen ewe enlet, ika pechech ra lukucharetiu won “ewe aal.” Nge iei, amwo sipwe pwapwaesini ekkewe enlet Jiowa a fen affata ngenikich, me wikkitiwiti ach saramelo won ekkewe mettoch sise kon weweiti.

19. Ifa ussun sipwe tongeni pwarata pwe sia tongei ewe enlet?

¹⁹ Ifa ussun sipwe tongeni pwarata ach tong fan iten ewe saram lon manauach? Ren ach akkalleani ewe Paipel​—iteiten ran ika sia tawe ngeni. Ka fiffiti eu kkotun alleaan Paipel? Ewe Leenien Mas me Awake! ra awora ngenikich chommong mongo lon pekin ngun sipwe pwapwaiti. Sia pwal tongeni alleani ekkewe puk me brochure a fen kawor fan iten ar repwe efeiochukich. Me epwe ifa ussun ekkewe repot mi apochokkulakich ussun ach angangen afalafala ewe Muu mi mak lon ewe Yearbook of Jehovah’s Witnesses?

20. Ifa ewe riri lefilen saram me enlet seni Jiowa me ach fiffiti ekkewe mwich?

²⁰ Ewer, Jiowa a fen polueni ewe iotek a mak lon Kol Fel 43:3. Le muchuloon ena wokisin, sia alleani: “Pwe [om saram me enlet] repwe emmwenieilo ren om we chuk mi fel, o pwal lon imwom.” Ka apilukuluku om kopwe fel ngeni Jiowa, fitifengen me eu mwicheichen aramas? Jiowa a asaramakich ikenai ren ewe emmwen lon pekin ngun sia angei lon ach kewe mwich. Met sipwe tongeni fori ren ach sipwe alapalo ach aucheani ekkewe mwich? Sia etiwok le ekieki ussun ei mettoch fiti iotek lon ewe poraus mi mak mwirin.

[Pworous fan]

Kopwe Tongeni Polueni?

• Pwata Jiowa a pwaralo an kewe kokkot ekis me ekis?

• Ifa ussun ekkewe aposel me mwan mi asimau lon Jerusalem ra pwakini ewe osukosuk ussun sirkumsais?

• Ifa ewe kkotun kaeo Paipel ekkewe Bible Students loom ra aea, me met popun a sokkolo auchean?

• Pwarata ifa ussun saram lon pekin ngun a pwappwalo lon ewe fansoun Kot a filata.

[Sasing lon pekin taropwe 10]

Charles Taze Russell a silei pwe saram epwe ttinoch won ewe puken Pwarata lon ewe fansoun Kot a filata