Tipeppos Le Apochokkulata Aitien Kot
“Kopwe luku Jiowa ren unusen letipom, nge kosap lukuluku pwisin om sile. Kopwe chechemeni i won meinisin kopwe fori, iwe, i epwe pwisin awenechara om we al.”—PROFERP 3:5, 6, New World Translation.
1. Ifa ussun an a suuk ngeni aramas tipatchemen fonufan lap seni lom?
LON ei fansoun, mei wor orun 9,000 simpung iteiten ran won unusen fonufan. Iteiten ier a for orun 200,000 puk lon chok ewe United States. Me ren eu ekiek, atun a tori March 1998, mei wor arun 275 million Web pages won ewe Internet, weween, ussun ita echo pekin taropween poraus nge lon ewe computer. Iwe, a chommongelo ren ukukun 20 million pekin taropwe lon computer iteiten maram. Lap seni lom, aramas ra tongeni angei poraus won arapakan ekkewe poraus meinisin. Inaamwo ika epwe tongeni wor alillis seni, nge chommongun sokkun poraus epwe pwal tongeni efisi osukosuk.
2. Ifa ewe osukosuk epwe tongeni fis seni an aramas tongeni angei chommong poraus?
2 Ekkoch aramas ra wiliti chon kukkutta poraus, iwe, repwe kan kukkuta ekkewe minefoon poraus nge repwe likitalo ekkewe ekkoch mettoch mi lamot lap seni. Pwal ekkoch repwe ekis kaeo och poraus ussun eu mettoch mi weires an aramas weweiti me ekieki pwe ir sousilei ewe poraus. Nge fan ar sile kisikis, eni repwe tongeni filata ewe alen feiengau ngeni pwisin ir are ekkewe ekkoch. Iwe, epwe pwal tufich an epwe wor feiengau seni ekkewe poraus mi chofona are ese kon lien pwung. Iwe, fan chommong esap wor minne emon epwe tongeni cheki ika ekkewe poraus mi enlet pwal itepok me ruepek.
3. Ifa ekkewe kapasen ourour lon Paipel ussun an aramas kukkutta tipatchem?
3 Aramas ra foruta pwe repwe mochen silei poraus. A ffat pwe aramas repwe tongeni asolapa ar fansoun fan iten ar repwe chei ekkewe poraus mi lamot mwaal are pwal mwo nge efeiengau lon ranin King Salomon. A apasa: “Iei eu kapas ourour: Fofforun chommong puk esap fokkun ukkutiu, iwe, an emon kakkaeo chommong poraus epwe aweiresi ewe inis.” (Eklesiastis 12:12, NW) Fitepuku ier mwirin, ewe aposel Paul a mak ngeni Timoti: “Iwe, mwa Timoti, kopwe tumunufichi ekkena mettoch Kot a luku ngonuk. Kopwe pwisin aimu seni ekkena kapasen rochopwak esor lamoter, o pwal seni ekkena kapas wippin me ren ir mi tipatchem chofona, pun ekkoch aramas ra fen tupulo ren, o ra tok seni ewe luku.” (1 Timoti 6:20, 21) Ewer, a lamot ngeni ekkewe Chon Kraist ikenai ar repwe su seni ekkewe sokkun ekiek mi efeiengau.
4. Ifa eu me lein ekkewe mettoch epwe pwarata pwe sia eani lukuluk won Jiowa me an kkewe afalafal?
4 Epwe murinno ngeni noun Jiowa kkewe aramas ar repwe pwal alleasochisi alon Proferp 3:5, 6 (NW) a era: “Kopwe luku Jiowa ren unusen letipom, nge kosap lukuluku pwisin om sile. Kopwe chechemeni i won meinisin kopwe fori, iwe, epwe awenechara om we al.” Ach eani lukuluk won Jiowa epwe pwal wewe ngeni ach sipwe likitalo ekkewe ekiek ese tipeeu ngeni an Kot we Kapas, ese lifilifil ika epwe popu seni pwisin ach ekiek are ekiekin pwal emon. Ren ach sipwe tumunu ach pochokkul lon pekin luku, epwe lamot ach sipwe amarata ach tufichin esinna minne mi och me ngau pwe sipwe tongeni esinna ekkewe poraus mi efeiengau me tumununukich seni. (Ipru 5:14) Sipwe kaeo ekkoch populapen ekkena sokkun poraus.
Eu Fonufan mi Unusen Nonnom Fan Nemenien Satan
5. Ifa popunlapen eu ekiek mi efeiengau, nge a popu seni io?
5 A katou seni ei fonufan chommong ekiek mi efeiengau. (1 Korint 3:19) Jises Kraist a iotek ngeni Kot ussun noun kkewe chon kaeo: “Usap tingor pwe kopwe angei ir seni fonufan, nge kopwe chok amwochu ir seni ewe mi ingau.” (Jon 17:15) An Jises tingor pwe noun kkewe chon kaeo repwe kuna tumun seni “ewe mi ingau” a affata pochokkulen an Satan nemenem won chon fonufan. Ach nom lon ewe it Chon Kraist esap tumunukich seni etipetipaen ei fonufan. Jon a makkei: “Sia silei pwe kich seni Kot, nge unusen fonufan a nonnom fan nemenien ewe mi ingau.” (1 Jon 5:19, NW) Akkaeuin lon ei amuchuloon kinikinin ekkewe ranin le sopoloon, sia silei pwe Satan me noun kkewe timon repwe auralo fonufan ren ekkewe poraus mi efeiengau.
6. Ifa ussun minne aramas repwe katol are auseling ngeni epwe tongeni angaua manauer?
6 Sipwe pwal weweiti pwe epwe ussun ita nge murinno ekkoch me lein ekkena poraus mi efeiengau. (2 Korint 11:14) Awewe chok, ekieki ussun ekkewe minen apwapwaan fonufan, ussun ekkewe program won TV, kachito, kol, me puk. Chommong aramas ra tipeeu pwe a lapalapelo lon ekkoch sokkun minen apwapwa ar apochokkulata ekkewe foffor mi ingau, ussun cho an lisou-mwaal, fofforun akkachofesa, me aeamwaalli safeien opuchopuch. Eni atun aramas repwe koran katol ena sokkun mi fokkun ngau, repwe ruko. Nge mwirin ar kakkatol fan fite, epwe tongeni fis pwe repwe eoreni ena sokkun fofforingau. Iwe, sisap etiwa are meefi pwe esap efeiengauakich minne mi apochokkula ekkena sokkun ekiek mi efeiengau.—Kol Fel 119:37.
7. Met sokkun tipatchemen aramas epwe tongeni ataielo ach achifoua ewe Paipel?
7 Ekieki mwo won pwal eu popun poraus mi efeiengau—ekkewe chommong puk seni ekkewe sou tipatchem me sou ekiek mi u ngeni pwungun ewe Paipel. (Alollo ngeni Jemes 3:15.) Fan chommong, ekkoch ekkena poraus ra katou lon ekkewe chassi me puk aramas ra kan alleani, iwe, repwe tongeni ataielo an aramas luku ewe Paipel. Ekkoch aramas ra pwapwaesini ar sotun ataielo pwungun an Kot we Kapas ren chommong kapas eis. A pwal fis ena sokkun foffor mi efeiengau lon ranin ekkewe aposel, ussun an a ffatalo lon alon ewe aposel Paul: “Oupwe tumunukemi pwe esap wor emon epwe liapenikemi ren tipatchemen fonufan are otupotup-mwaal, ussun chok uruwoon re lom, are ekkewe popun anuun fonufan, nge esap ussun Kraist.”—Kolose 2:8.
Ekkewe Chon U Ngeni ewe Enlet
8, 9. Ifa ussun ewe angangen rikilo a pwalo ikenai?
8 Ekkewe chon rikilo repwe pwal tongeni efeiengauakich lon pekin ach luku. Ewe aposel Paul a oesini pwe ewe rikilo epwe poputa lein ekkewe mi era pwe ir mi Chon Kraist. (Foffor 20:29, 30; 2 Tesalonika 2:3) Ren pwonuetaan alon, mwirin maloon ekkewe aposel, eu tokolo mi lap a emmwen ngeni forutaan Kristendom. Ikenai, ese fis eu rikilo mi lapalap lein noun Kot kkewe aramas. Iwe nge, mei wor ekkoch mi fen tou senikich, nge ekkoch leir ra tinikken lon ar ekiekin aitengaua Chon Pwarata Jiowa ren ar eani kapas chofona me poraus mi mwakel. Ekkoch ra fiti pwal ekkoch mwichen aramas pwe repwe u ngeni ewe fel mi limelimoch. Ren ar foffori ena, ra peni ewe akkaemonun chon rikilo, Satan.
9 Ekkoch chon rikilo ra alapalo ar aea ekkewe sokkun minen esilefeili poraus, pachelong ewe Internet, fan iten ar repwe esilefeili ekkewe kapas chofona ussun Chon Pwarata Jiowa. Pokiten ena, lupwen ekkewe mi mochen silei ussun ach luku repwe kutta poraus, repwe tongeni alleani ekkewe poraus mi chofona seni ekkewe chon rikilo. Iwe, pwal mwo nge ekkoch Chon Pwarata ra fen alleani ekkena poraus mi efeiengau. Pwal eu, fan ekkoch ekkewe chon rikilo repwe pwalo lon ekkewe programin TV are reitio. Pokiten ei mettoch, ifa ewe alen tipatchem?
10. Ifa ewe alen tipatchem ika epwe torikich ekkoch poraus seni ekkewe chon rikilo?
10 Ewe aposel Jon a fonou ekkewe Chon Kraist ar resap etiwalong ekkewe chon rikilo lon imwer kkewe. A makkei: “Are emon epwe torikemi, nge esap uwou ei sokkun afalafal, iwe, ousap etiwa i lon imwemi, o ousap pwal kapong ngeni i. Pun are emon epwe kapong ngeni i, epwe chiechi ngeni an kkewe foffor-ingau.” (2 Jon 10, 11) Ach su seni ekkena chon u ngeni epwe tumunukich seni ar kkewe ekiek-mwaal. Ach katol are alleani ekiekin ekkewe chon rikilo seni ekkewe minen esilefeili poraus epwe ussun chok ach sipwe etiwalong emon chon rikilo lon imwach we. Sisap mut ngeni ach mochen silei minne ra apasa an epwe lukikich won ewe alen efeiengau!—Proferp 22:3.
Lon ewe Mwichefel
11, 12. (a)Ekkoch ekiek mi efeiengau a popu seni ia lon ewe mwichefel lon ewe aeuin senturi? (b) Ifa ussun ekkoch Chon Kraist rese akkamwochu an Kot kkewe alluk?
11 Ekieki mwo pwal eu popu ekkewe sokkun ekiek mi efeiengau. Inaamwo ika emon Chon Kraist mi fen papatais esap ekiekin arongafeili minne ese pwung, nge fan ekkoch epwe wor emon mi ese ekkekieki akkom me mwen an kakkapas. (Proferp 12:18) Pokiten sise unusoch, fan ekkoch oukich meinisin sipwe tipis ren tinauach. (Proferp 10:19; Jemes 3:8) Ese mwaal, lon ranin ewe aposel Paul, mei wor ekkoch lon ewe mwichefel rese nemeniochu tinauer, iwe, ra kan anini ussun kapas. (1 Timoti 2:8) Mei wor pwal ekkoch mi lamalam tekia, iwe, ra pwal mwo nge u ngeni an Paul pwungun emmwen. (2 Korint 10:10-12) Ena sokkun ngunun u ngeni a efisata fitikoko mi lamotongau.
12 Fan ekkoch, ekkena anini ra marita ngeni “fitikoko lefilen aramas mi chok ekiekingau,” iwe, a atai kinamween ewe mwichefel. (1 Timoti 6:5; Kalesia 5:15) Iei alon Paul ussun ir kkewe mi efisata ekkena anini: “Are emon epwe afalafala och mi sokkofesen, o esap tipeeu ngeni ekkewe kapas mi murinno me ren ach Samol Jises Kraist, o ewe sokkun afalafal mi fich ngeni Kot, iwe, atewe a chok lamalam tekia, ese mwo silei och mettoch, nge a chok efich sokkun eis-mwaal, are anini ussun kapas. Nge ekkeei sokkun ra efisata lolowo, anini, esiit, ekiekingau.”—1 Timoti 6:3, 4.
13. Met lap ngeni ekkewe Chon Kraist meinisin ra fori lon ewe aeuin senturi?
13 Iei eu minen apwapwa, pwe lon fansoun ekkewe aposel, lap ngeni ekkewe Chon Kraist meinisin ra tuppwol me likiitu lon ewe angangen afalafala ewe kapas allim ussun an Kot we Muu. Ra angang weires lon ar tuttumunu ekkewe “semirit mi masen, o pwal ekkewe fefin mi malo puluer lon ar fansoun riaffou” me ra pwisin tumunur pwe resap “tikitikipwul ren manauen fonufan,” iwe, rese asolapa ar fansoun ren ar aninifengen ussun ekkewe kapas. (Jemes 1:27) Ra tumunur seni “ekkewe chiechi mi ngau” pwal mwo nge lon ewe mwichefelin Chon Kraist pwe repwe tumunu ar pochokkul lon pekin luku.—1 Korint 15:33; 2 Timoti 2:20, 21.
14. Ika sise tumunu, ifa ussun an aramas porausfengen ussun minne ra ekieki epwe tongeni wiliti anini mi efeiengau?
14 Iwe, ekkewe lapalap lon wokisin 11 rese kan fiffis lon ekkewe mwichefelin Chon Pwarata Jiowa ikenai. Iwe nge, epwe lamot ach sipwe esinna pwe epwe tongeni fis ekkena sokkun anini. Pwungun pwe aramas ra kan mochen kapasfengen ussun ekkewe poraus lon Paipel me ekieki ussun lapalapen ewe fonufan sefo esaamwo pwalo ngenikich. Iwe, ese pwal wor ngauen ach sipwe pwarata ach memeef ussun lapalapen pwisin manauach, ussun ufach me lapalapen inisich are ekkewe minen urumot. Iwe nge, ika sipwe fokkun atekiata pwisin ach kkewe ekiek me ika sipwe song pun ekkewe ekkoch resap tipeeu ngenikich, epwe tongeni fis tipefesen lein chon ewe mwichefel pokiten chok ekkoch mettoch mi lamot kisikis. Minne a poputa ren eu chok poraus mi kisikis epwe tongeni wiliti eu minen efeiengau.
Tuttumunu Minne A Alukuluku Ngenikich
15. Ifa ussun ekkewe “afalafal seni ekkewe timon” repwe tongeni efeiengauakich lon pekin luku, iwe, ifa ewe kapasen fon seni Paipel?
15 Iei eu kapasen ourour seni ewe aposel Paul: “Iwe, ewe Ngun a affata an kapas pwe lon ekkena fansoun mwirin, ekkoch aramas repwe liwin seni ach we luku ren ar amwochu ekkewe ngunun likotuputup o afalafal ussun ekkewe timon.” (1 Timoti 4:1) Ewer, ekkewe ekiek mwaal repwe fokkun tongeni wiliti eu minen efeiengau. Iwe, sia tongeni weweiti pwata Paul a makkei ei poraus ngeni chienan we mi achengicheng Timoti: “Iwe, mwa Timoti, kopwe tumunufichi ekkena mettoch Kot a luku ngonuk. Kopwe pwisin aimu seni ekkena kapasen rochopwak esor lamoter, o pwal seni ekkena kapasen wippin me ren ir mi tipatchem chofona, pun ekkoch aramas ra fen tupulo ren, o ra tok seni ewe luku.”—1 Timoti 6:20, 21.
16, 17. Ifa ewe mettoch Kot a aluku ngenikich, iwe, ifa ussun sipwe tumunu?
16 Epwe ifa ussun kich ikenai sipwe tongeni kuna feioch seni ena kapasen ourour mi tong? Timoti a eani eu lukuluk—och mettoch mi auchea pwe epwe tumunu. Ifa ewe? Paul a awewei: “Iwe, kopwe amwochu ekkewe sokkun kapas murinno ka fen rong seniei, lon ewe luku o ewe tong mi nonnom lon Kraist Jises. Kopwe tuttumunu ewe enlet mi luku ngonuk seni ewe Ngun mi Fel, ewe mi nonnom lon kich.” (2 Timoti 1:13, 14) Ewer, a pachelong lon minne a alukuluku ngeni Timoti ekkewe “kapas murinno,” “ewe sokkun afalafal mi fich ngeni Kot.” (1 Timoti 6:3) Ren ar repwe tipeeu ngeni alon na, ekkewe Chon Kraist ikenai repwe akkachocho ngeni ar repwe tumunu ar luku me ekkewe pwin poraus mi enlet a aluku ngenir.
17 Ach tuttumunu ena luku a wewe ngeni ach sipwe kakkaeo ewe Paipel iteitan me ikkiotek, atun sipwe “foffor-murinno ngeni aramas meinisin, nge lapaloon ngeni chon ewe einangen luku.” (Kalesia 6:10; Rom 12:11-17) Paul a pwal peseikich: “Achocho ngeni minne mi pwung, o ngeni ewe manau mi fich ngeni Kot; kopwe pwal achocho ngeni luku, me tong, me likiitu, me umoumoch. Kopwe fiti ewe maun mi murinno, ewe maunen luku, kopwe amwochu ewe manau esemuch, ewe a koruk ren, lupwen ka apasata ewe kapasen pwarata mi murinno mwen mesen chommong chon pwarata.” (1 Timoti 6:11, 12) An Paul eani ekkena kapas, “fiti ewe maun mi murinno” me “amwochu” a affata pwe epwe lamot ngenikich ach sipwe mwokutukut me tipeppos le tumunukich seni minne epwe tongeni efeiengauakich lon pekin luku.
Epwe Lamot ewe Mettoch Mirit
18. Ifa ussun sipwe tongeni itepok me ruuepek lon ach angei ekkewe poraus mi popu seni tipatchemen fonufan?
18 Pwungun pwe lon ach fiffiti ewe maun fan iten ewe luku, epwe lamot ach sipwe mirit. (Proferp 2:11; Filipai 1:9) Awewe chok, esap wewe ngeni ach sisap luku ekkewe poraus meinisin mi popu seni aramas lukun. (Filipai 4:5; Jemes 3:17) Sap minne ekiekin aramas meinisin repwe u ngeni an Kot we Kapas. Jises a kapas ussun lamoten ekkewe mi semmwen ar repwe chuuri emon tokter—eu angangen fonufan. (Luk 5:31) Inaamwo ika ekkewe tokter lon fansoun Jises rese kon lien silelap, nge a apasa pwe mei wor och alillis emon epwe tongeni kuna seni. Ekkewe Chon Kraist ikenai ra pwarata ekiek mi itepok me ruuepek ussun ekkewe poraus mi popu seni fonufan, nge ra u ngeni minne epwe tongeni efeiengauer lon pekin luku.
19, 20. (a) Ifa ussun ekkewe elter repwe pwarata mirit atun repwe alisi ir kewe mi fos-mwaal? (b) Met ewe mwichefel epwe fori ika emon epwe sopweilo le eani afalafal mi chofona?
19 Ewe mettoch mirit epwe pwal lamot ngeni ekkewe elter atun repwe alisi ir mi chok foffos nge ese fiti tipatchem. (2 Timoti 2:7) Fan ekkoch, chon ewe mwichefel repwe foffos ussun ekkewe poraus mi lamot kisikis me anini ussun minne esaamwo ffat. Ren ar repwe tumunu kinamween ewe mwichefel, ekkewe elter repwe muttir angang won ekkewe osukosuk. Iwe nge, lon ar angang, resap ekieki pwe mi mwaal leluken ekkewe brother, iwe, resap pwal muttir apwungu pwe ir chon rikilo.
20 Paul a kapas ussun ewe sokkun ngun epwe fiti ewe alillis. A apasa, “Ami pwii kana, ika emon a serengau lon och tipis, ami mi nom lon pekin ngun oupwe aliwinato i ren ngun mosonoson.” (Kalesia 6:1) Ren an kapas ussun ekkewe Chon Kraist mi osukosuk pokiten ar tipemwaramwar, Juta a makkei: “Oupwe umoumoch ngeni ekkoch, ir mi tipemwaramwar. Oupwe angasalo ekkoch, ren ami weitireta seni lon ekkei.” (Juta 22, 23) Iwe nge, ika repwe fen fonou me pesei fan fite, nge emon epwe sopweilo an afalafala ekkewe poraus mi chofona, epwe lamot pwe ekkewe elter repwe mwokutukut fan iten ar repwe tumunu ewe mwichefel.—1 Timoti 1:20; Taitos 3:10, 11.
Auralo Ach Ekiek Ren Minne mi Murinno
21, 22. Met sipwe filiochu, iwe, ikkefa ekkewe mettoch sipwe auralo tupuach ren?
21 Ewe mwichefelin Chon Kraist epwe tunalo ekkewe kapas mi efeiengau mi “fetalfeil ussun paiking.” (2 Timoti 2:16, 17; Taitos 3:9) Epwe pwung ena, ese lifilifil ika ekkena kapas repwe popu seni “tipatchemen” fonufan mi otupotup, are afalafalen ekkewe chon rikilo, are ekkewe poruas mi lamot-mwaal lein chon ewe mwichefel. Inaamwo ika epwe tongeni murinno ach mochen kaeo poraus mi fo, nge ika emon esap filioch minne a mochen silei, epwe tongeni suuk ngeni ekkewe sokkun ekiek mi efeiengau. Sia silei ussun an Satan ekiek. (2 Korint 2:11) Sia fen silei pwe a akkachocho le arikikichelo pwe sipwe tinikkop lon ach angang ngeni Kot.
22 Pokiten kich chon angang ngeni Kot mi murinno, sipwe akkamwochu ekiekin Kot kkewe. (1 Timoti 4:6) Amwo sipwe aeafichi ach fansoun ren ach sipwe filioch ekkewe poraus sipwe kaeo me auseling ngeni. Iwe, sisap mecheresin tupulo ren ekkewe poraus mi popu seni Satan. Ewer, sipwe chok lefareni “minne mi enlet, minne mi mosonoson, minne mi pwung, minne mi limelimoch, minne mi tipemecheres, minne mi iteuoch, are mi wor och mi fokkun murinno, are mi wor och mi fich ngeni ach sipwe mwareiti.” Ika sipwe auralo ekiekich me letipach ren ekkena mettoch, ewe Koten kinamwe epwe nonnom rech.—Filipai 4:8, 9.
Met Sia Fen Kaeo?
• Ifa ussun tipatchemen fonufan epwe tongeni efeiengaua ach luku?
• Met sipwe tongeni fori pwe sipwe pwisin tumunukich seni ekkewe poraus mi popu seni ekkewe chon rikilo?
• Met sokkun fos lon ewe mwichefel sipwe tumunukich seni?
• Ifa ussun an Chon Kraist itepok me ruuepek a pwapwalo atun epwe torir chommong porausen fonufan?
[Sasing lon pekin taropwe 21]
Chommong chassi me puk ra u ngeni ach ekiek lon pekin Chon Kraist
[Sasing lon pekin taropwe 22]
Mei tufich ekkewe Chon Kraist repwe kapasfengen ussun ar kewe memmeef nge resap kon atekiata pwisin ar ekiek