Eani Luku Lon An Kot We Kapasen Oesini!

“Ewe kapasen oesini mi fakkun nukuchar.”​—2 PITER 1:19.

1, 2. Ifa ewe aewin oesini a fen makketiu, me ifa eu me lein ekkewe kapas eis a piita pokiten ena oesini?

JIOWA apasawu ewe aewin oesini mi fen makketiu. Mwirin Atam me If ra tipis, Kot a ereni ewe serepenit: “Upwe afiukemi me ewe fefin, pwal mwirimwirum me mwirimwirin. Men epwe puri mokurom, nge en kopwe kuw apilipilin pechen.” (Kenesis 3:1-7, 14, 15) Fite puku ier epwe lo mwen aramas repwe unusen weweiti ena oesini.

² Ena aewin oesini a ngeni aramas mi tipis och apilukulukoch. Mwirin, ewe Paipel a affata pwe Setan ewe Tefil “ewe serpenit lom lom.” (Pwarata 12:9) Nge io ewe Mwirimwir Kot a pwonetiu?

Kukkutta Ewe Mwirimwir

3. Ifa ussun Apel a pwaralo an luku lon ena aewin oesini?

³ Epel ese ussun seman we. A eani luku won ewe aewin oesini. Epel a silei pwe chcha epwe niniitiu ika epwe wor omusomusen tipis. An Epel luku a amwokutu le fori asorun emon man, eu asor Kot a etiwa. (Kenesis 4:2-4) Iwe nge, weween ewe Mwirimwir mi pwonetiu a chuen monomonolo.

4. Ifa an Kot pwon ngeni Eperiam, me met sia kaeo seni ussun ewe Mwirimwir mi pwonetiu?

⁴ Ruu ngerou som ier mwirin ranin Epel, Jiowa a pwon ngeni Eperiam lon ei oesini: “Ngang upwe fokun afeiochuk, upwe pwal achomongala mwirimwirum kana pwe repwe usun chok chomongun ekewe fun lang . . . Chon ekewe mwu won unusen fanufan repwe feioch me ren mwirimwirum kana.” (Kenesis 22:17, 18) Ekkena kapas ra aririfengenni Eperiam me pwonutaan ewe aewin oesini. Weween pwe ewe Mwirimwir mi wiisen awesalo an Setan kewe angang meinisin epwe pwa lein mwirimwirin Eperiam kewe. (1 Jon 3:8) “Ese pwal tipemwaramwar ren an Kot we pwon pokiten lukulukumang” me ekkewe ekkoch chon pwarata mwen ranin Kraist rese pwal tipemwaramwar ikaamwo “rese mo angei feiochun ar kewe pwon.” (Rom 4:20, 21; Ipru 11:39) Ra eani luku won an Kot we kapasen oesini.

5. An Kot pwon ussun ewe Mwirimwir a pwonuta ren io, me pwata a ina ussun me reom?

⁵ Ewe aposel Paul a esinna ewe Mwirimwir Kot a pwonei lupwen a makkei: “Iwe, a apasa ngeni Eperiam ekkewe pwon, o pwal ngeni mwirimwirin we. Ese apasa, ‘pwal ngeni mwirimwirin kewe,’ usun ita ngeni aramas chommong, pwe usun ngeni chok emon, ‘pwal ngeni mwirimwirin we,’ i mi Kraist.” (Kalesia 3:16) Ewe Mwirimwir chon ekkewe muu meinisin repwe kuna feioch ren ese kapachelong mwirimwirin Eperiam kewe meinisin. Mwirimwirin noun we Ismael me noun kewe me won Ketura resap ewe minen feioch ngeni chon fonufan. Ewe Mwirimwir aramas repwe kuna feioch ren a pop seni noun we Aisek me noun noun we Jekop. (Kenesis 21:12; 25:23, 31-​34; 27:18-​29, 37; 28:14) Jekop a pwaralo pwe “chon ekewe mwu” repwe alleasochisi Silo seni ewe einangen Juta, nge a pwal ffatelo mwirin pwe ewe Mwirimwir epwe emon lein mwirimwirin Tafit. (Kenesis 49:10; 2 Samuel 7:12-​16) Chon Jus lon ewe aewin senturi ra kukkutta ewe Messaia, are Kraist. (Jon 7:41, 42) An Kot oesini ussun ewe Mwirimwir a fen pwonuta ren Noun we, Jises Krasit.

Ewe Messaia A Pwa!

6. (a) Ifa me rech weween ewe oesini ussun fiik wiik? (b) Ineet me ifa ussun Jises a fen ‘awesalo tipis’

⁶ Ewe soufos Taniel a makketiu ei oesini mi lamot ussun ewe Messaia. Lon ewe aewin ierin nemenemen Tarius seni Metia, Taniel a kaeo pwe ewe 70 ier Jerusalem epwe tatakkis a arapakkan le wes. (Jeremaia 29:10; Taniel 9:1-4) Atun Taniel a iotek, ewe chonlang itan Kapriel a pwalo pwe ‘fiik wiiken ier a fen kaukulo ren muchuloon tipis.’ Ewe Messaia epwe nninniilo lukanapen ewe afiiken wiik. Ekkewe ‘fiik wiiken ier’ ra poputa lon 455 B.C.E. lupwen King Artaxerxes I seni Persia a atowu ewe kapas ‘pwe Jerusalem epwe kausefal.’ (Taniel 9:20-​27; Moffatt; Nehemia 2:1-8) Ewe Messaia epwe feito mwirin fisu wiik me 62 wiik. Ekkena 483 ier ra poputa lon 455 B.C.E. me ra wes lon 29 C.E., lupwen Jises a wiliiti ewe Messaia are ewe Kraist atun an papatais lupwen Kot a epiti i. (Luk 3:21, 22) Jises a ‘awesalo tipis’ ren an fangolo manauan ren an epwe awora ewe moon kepichilo lon 33 C.E. (Mark 10:45) Ena poraus a ngenikich ekkewe popun mi lukuchar sipwe eani luku lon an Kot kapasen oesini!a

7. Nounou ewe Paipel le aitikich ifa ussun a pwonueta ran Jises ekkewe oesini ussun ewe Messaia.

⁷ Luku lon an Kot kapasen oesini a atufichi ach esinna ewe Messaia. Ekkewe sou makkei ekkewe puk lon ewe Tesin Krik ra makkei porausen chommong lein ekkewe oesini mi weneiti ewe Messaia lon ewe Tesin Ipru me ra affata pwe ekkena oesini ra weneiti Jises. Ren chok awewe: Jises a fen uputiu seni emon fefin esaamwo tori mwan lon Petleem. (Aisea 7:14; Mika 5:2; Mattu 1:18-​23; Luk 2:4-​11) A kokkowu seni Isip, me monukol ra fen nninniilo mwirin an uputiu. (Jeremaia 31:15; Osea 11:1; Mattu 2:13-​18) Jises a apochokkula chon semmwen. (Aisea 53:4; Mattu 8:16, 17) Me ren eu oesini, Jises a wawa emon aas lupwen a feilong lon Jerusalem. (Sekaraia 9:9; Jon 12:12-​15) A fen pwonuta kapasen ewe sou mak kol pwe ekkewe sounfiu repwe uttut won ufen Jises mwirin a fen ituata won ewe iraan nninni. (Kol Fel 22:18; Jon 19:23, 24) A fen pwonueta ewe oesini pwe chun Jises resap kup me repwe posu i. (Kol Fel 34:20; Sekaraia 12:10; Jon 19:33-​37) Ikkeei ir ekkoch chok lein ekkewe oesini ekkewe sou mak Paipel mi nom fan nemenemen ngun mi fel ra weene ngeni Jises.b

Mwareiti Messaia Ewe King!

8. Io ewe Kot seni lomlom, me ifa ussun ewe oesini lon Taniel 7:9-​14 a pwonueta?

⁸ Lon ewe aewin ierin ewe Kingen Papilon itan Pelsassar, Jiowa a ngeni noun we soufos Taniel eu ttan me ekkoch langepwi mi amwarar. Ewe soufos a kuna akkom fomon man mwocho mi watte. Noun Kot chonlang a apasa pwe ir “fomon king,” me a affata pwe ra liosueta eu tettelin ruaanu nemenem. (Taniel 7:1-8, 17) Mwirin, Taniel a kuna Jiowa, “Kot ewe a nom seni lomlom,” mi mottiu won an leenien mottun nemenem mi ling. A fen apwungu ekkewe man mwocho me a angei seniir ar nemenem me a ataielo ewe afomonun man mwocho. A fangelo nemenem won “aramasen fanu me mwu, pwal aramas mi eani sokopaten fos” ngeni emon mi “lapalapen eman noun aramas.” (Taniel 7:9-​14) Ena eu oesini a weneiti ewe fansoun ewe ‘Noun aramas,’ Jises Kraist, a poputa an nemenem lon lang lon 1914!​—Mattu 16:13.

9, 10. (a) Ifa weween kinikinin ewe uluulun lon ewe ttan? (b) Ifa ussun kopwe awewe pwonuetaan Taniel 2:44?

⁹ Taniel a fen silei pwe Kot a “asapwilatiu king kana o seikirata lon wiser.” (Taniel 2:21) Ren an lukuluk won Jiowa, ewe a “pwari mine mi monomon,” ewe soufos a pwaralo weween an ewe kingen Papilon itan Neputkanessar we ttan ussun ewe uluulun watte. Kinikinin ewe uluulun ra weneiti utaan me turutiuen nemenemen Papilon, Meto-Persia, Kris, me Rom. Kot a pwal nounou Taniel ren an epwe aiti ngenikich ekkoch mettoch repwe fisita lon ach ei fansoun me lon mwach kkan.​—Taniel 2:24-​30.

¹⁰ Alon ewe oesini: “Lon fansoun mwun ekewe king, ewe Koten lang epwe aueta eu mwu esap tongeni tala, esap pwal wor eu mwu epwe tongeni akufu. Iwe, ei mwu epwe ataela o arosala ekewe lusun mwu, nge epwe pusin nom tori feilfeilachok.” (Taniel 2:44) Lupwen ewe “fansoun ekkewe muun Jentail” a muchulo lon 1914, Kot a efisata eu muu lon lang fan an Kraist nemenem. (Luk 21:24; Pwarata 12:1-5) Ren manamanen lang ewe “fau,” Muun Messaia, a turuwu seni eu chuuk a liosueta an Kot nemenem won mettoch meinisin. Lon Armaketon, ena fau epwe kku ewe uluulun me ppwulufeseni. Ewe Muu fan an Messaia nemenem a liosutiu ren eu chuuk mi “amasoua unusen fonufan” me epwe nom tori feilfeilochok.​—Taniel 2:35, 45; Pwarata 16:14, 16.c

11. An Jises wililo a liosueta met, me ifa ussun a kku letipen Piter?

¹¹ Pokiten a ekieki ussun an nemenem lon ewe Muu, Jises a ereni noun kewe chon kaeo: “Mi wor ekkoch . . . mi uta ikei resap malo pwe repwe mo kuna an ewe Noun-Aramas waroto lon muun.” (Mattu 16:28) Wonu ran mwirin, Jises a eweinata Piter, Jemes, me Jon won ewe chuuk mi tekia ikewe Jises a wililo me ia mwen meser. Atun eu kuchu mi saramaram a pwoluelo ekkewe aposel, Kot a apasa: “Iei nei at mi achengicheng rei, ua unusen pwapwa ren.” (Mattu 17:1-9; Mark 9:1-9) A ifa me amwararen lingen ei pwaloon Muun Kraist! Ina ewe popun Piter a fos ussun ena langepwi mi eing ngenikich lupwen a apasa: “Ewe kapasen oeisin a fakkun nukuchar”​—2 Piter 1:16-​19.d

12. Met popun ei fansoun a fich ngeni ach pwaralo luku lon an Kot kapasen oesini?

¹² “Ewe kapasen oesini” ese chok kapachelong ekkewe oesini lon ewe Tesin Ipru nge pwal an Jises kapas pwe epwe feito “ren manaman, me ling mi lapalap.” (Mattu 24:30) An Kraist wililo a anneta ewe kapasen oesini ussun an feito ren ling lon manamanen ewe Muu. Ekiselo chok, pwaloon Jises lon lingan epwe wewe ngeni maloon ekkewe mi lukulukummang me feiochun ekkewe mi anganga ar luku. (2 Tesalonika 1:6-​10) Pwonutaan ewe oesini lon ewe Paipel a anneta pwe ekkeei ran ‘ekkewe ran le sopolon.” (2 Timoti 3:1-5, 16, 17; Mattu 24:3-​14) Maikiel, Jises Kraist, lon wiisan we noun Jiowa Chon Nni Manau, a mmonleta le awesalo ei otot mi ngau atun ewe “riaffou mi lapalap.” (Mattu 24:21; Taniel 12:1) Ina popun, iei ewe fansoun sipwe pwarata pwe sia eani luku lon an Kot kapasen oesini.

Akkamwochu Om Luku Lon An Kot Kapasen Oesini

13. Met epwe alisikich le amwochu ach tong fan iten Kot me alikiitu ach luku lon an we kapas?

¹³ Pwungun sia pwapwa wachemuk lupwen sia akkom kaeo ussun pwonutaan an Kot kapasen oesini. Nge, seni ena fansoun ach luku a kukkunulo me ach tong a patapatelo? Amwo sisap ussun ekkewe Chon Kraist lon Efisus mi ‘likitalo ewe tongen le popun.’ (Pwarata 2:1-4) Ese lifilifil ttamen ewe fansoun sia fen angang ngeni Jiowa, sipwe tongeni feiengau ika sisap chuen ‘kuttafichi lom an mu o an pung’ pwe sipwe tongeni isoni pisek auchea lon lang. (Mattu 6:19-​21, 31-​33) Ach tinikken le kaeo ewe Paipel, pwonutaan wiisach atun mwichen Chon Kraist, me ach tinikken le esilefeili porausen Muun Kot epwe alisata ach akkamwochu tong fan iten Jiowa, fan iten Noun we, me fan iten ewe Paipel. (Kol Fel 119:105; Mark 13:10; Ipru 10:24, 25) Iei ussun, ach luku lon an Kot we Kapas epwe manau.​—Kol Fel 106:12.

14. Ifa feiochun ekkewe Chon Kraist mi kepit pokiten ar luku lon an Kot kapasen oesini?

¹⁴ Pokiten an Kot kapasen oesini a fen pwonueta me loom, sipwe tongeni eani lukuluk lon met ena kapasen oesini a apasa ussun mwach kkan. Ren chok awewe, an Jises nonnom lon lingen Muun we a fiffis iei, me ekkewe Chon Kraist mi kepit mi tuppwol tori ar malo ra fen kuna pwonutaan ewe oesini: “Eka mi pworacho, upwe ngeni i pwe epwe momongo seni ewe iran manau, ewe mi nonnom lon ewe Parataisin Kot.” (Pwarata 2:7, 10; 1 Tesalonika 4:14-​17) Jises a mut ngeni chokkewe mi pworacho le “momongo seni ewe iran manau” lon ewe “Parataisin Kot” lon lang. Ren ar manausefal me ren an Jises alillis, rese chuen tongeni malo me rese tongeni tipis. Ikkeei ekkeei liffang seni Jiowa, ewe “mi king fansoun meinisin, ewe esap malo, ewe sise tongeni kuna,” ewe emon chok Kot. (1 Timoti 1:17; 1 Korint 15:50-​54; 2 Timoti 1:10) A ifa me amwararen ei feioch ra angei pokiten ar tong fan iten Kot mi nomofoch me ar luku mi nukuchar lon an Kot kapasen oeisini!

15. Longolongun ewe “fonufan sefo” a nom ren io, me io chiener kewe?

¹⁵ Ekis chok mwirin ekkewe mi kepit ra fen manausefal ngeni manau lon ewe “parataisin Kot” lon lang, lusun ewe Israel lon pekin ngun ra fen ngaselo seni “Papilon mi Lapalap,” ewe nemenemen lamalam chofona won fonufan. (Pwarata 14:8; Kalesia 6:16) Lon ir, a fen isetiu longolongun ewe “fonufan sefo.” (Pwarata 21:1) “Eu fonu” a fisita, me a wiliiti eu paratis lon pekin ngun mi uwaoch won unusen fonufan iei. (Aisea 66:8) Chommong chienen ewe Israel lon pekin ngun ra feilong lon ena paratis lon pekin ngun iei, “lon fansoun sopolan.”​—Aisea 2:2-4; Sekaraia 8:23; Jon 10:16; Pwarata 7:9.

Met Epwe Tori Chon Fonufan A Fen Oeisini Lon An Kot Kapasen Oeisini

16. Ikkefa ekkewe feioch chokkewe mi alisi ekkewe mi kepit repwe kuna?

¹⁶ Ikkefa apilukulukun chokkewe mi alisata angangen ekkewe mi kepit? Ra pwal eani luku mi pochokkul lon an Kot kapasen oesini, me ra apilukulukun manau lon ewe Paratis won fonufan. (Luk 23:39-​43) Lon ena Paratis repwe un seni ewe “chanpupun konikin manau” me repwe kuna pochokkuleloon inisir seni ‘choon ekkewe ira’ le pekin ewe chanpupu me ruuepek. (Pwarata 22:1, 2) Ika a nom reom ena apilukuluk, amwo kopwe likiitu le pwarata tong mi alollon ngeni Jiowa me luku lon an kapasen oesini. Amwo kopwe nom lein chokkewe mi pwapwaiti ewe chengel mi wachemuk lon Paratis won fonufan.

17. Ikkefa ekkoch feioch epwe tori aramas lon ewe Paratis won fonufan?

¹⁷ Mi weires ngeni aramas le unusen awewei lapalapen manauer lon ewe Paratis won fonufan epwe feito pokiten rese unusoch, nge an Kot kapasen oesini a fen alisata ach weweiti ekkewe feioch repwe tori ekkewe aramas mi alleasochis. Lupwen Muun Kot a nemenem me ese chuen wor chon u ngeni me letipan a fiffis won fonufan ussun chok a fiffis lon lang, esap wor aramas mi mwanesol​—are pwal mwo nge man​—epwe ‘afeiengaua eman ika ataela och won chukun Kot pin.” (Aisea 11:9; Mattu 6:9, 10) Ekkewe mi mosonoson repwe fonueni ewe fonufan, me repwe “pwapwaiti watteen ar kinamwe.” (Kol Fel 37:11) Esap wor aramas mi echik pun “sokkun mongo mi chommong epwe nonnom lon ewe fonu; epwe paepaefeil won ekkewe chukuchukuta.” (Kol Fel 72:16) Esap chuen wor kechiu pokiten letipengau. Esap chuen wor semmwen. Pwal mwo nge malo epwe morolo. (Aisea 33:24; Pwarata 21:4) Anchangei mwo​—esap wor tokter, safei, pioing, me pioing fan iten chon umwes, esap wor felin mi ma. A ifa me amwararan!

18. (a) An Taniel luku lon met a fen lukucharelo? (b) Epwe ifa ussun an Taniel feioch?

¹⁸ An aramas peias epwe poonulo lupwen manausefal a siwili malo. Ena eu apilukuluk a nom ren Jop. (Hiop 14:14, 15) Taniel a pwal eani ena apilukuluk, pun noun Jiowa we chonlang a fen apasa: “Nge en Taniel kopwe likiitu tori sopolan. Murin kopwe mala o manausefalita, pwe kopwe angei wisom lesopolan fansoun.” (Taniel 12:13) Taniel a tuppwol lon an angang ngeni Kot tori an malo. Iei a chuen asoso lon malo, nge epwe uta “lupwen ekkewe mi pung repwe manaueta” atun an Kraist nemenem ren engerou ier. (Luk 14:14) Epwe ifa feiochun Taniel? Iwe, an Isikiel we oesini epwe pwonueta lon Paratis. Ach ekiek seni ena oesini pwe epwe wor leenien noun Jiowa kewe aramas meinisin me fisitaan kiannin ekkewe fonu epwe pwung me kokkotoch. (Isikiel 47:13–​48:35) Iwe, epwe wor leenien Taniel lon ewe Paratis, nge feiochun we epwe lap seni an angei och fonu. Epwe kapachelong wiisan lon pwonuetaan letipen Jiowa.

19. Met sipwe fori iei ika sipwe manau lon ewe Paratis won fonufan?

¹⁹ Ifa feiochum? Ika mei wor om luku lon an Kot we Kapas, ewe Paipel, ese mwaal kopwe mochen manau lon ena Paratis won fonufan. Neman kopwe anchangei om pwapwaesini feiochun ewe Paratis, om angang le tumunuochu ewe fonufan, me om souni ekkewe aramas mi manausefal. Iwe, ena Paratis won fonufan ina leenien chon fonufan. Kot a forata ewe aewin pean aramas fan iten ar repwe manau ie. (Kenesis 2:7-9) Me a mochen pwe aramas mi alleasochis repwe manau lon Paratis tori feilfeilo chok. En kopwe manaueni manauom me ren minne a makketiu lon ewe Paipel pwe kopwe tongeni nonnom lein ekkewe fite bilion aramas lon ena Paratais won fonufan? Kopwe tongeni nonnom ie ika ka tongei semach lon lang, Jiowa, me eani ewe sokkun luku mi nomofoch lon an Kot kapasen oesini.

[Ppii ekkewe pwóróus fan]

Ifa Ussun Kopwe Polueni?

• Ifa ewe aewin oesini, me io ewe Mwirimwir mi pwonetiu?

• Ikkefa ekkoch ekkewe oesini ussun ewe Messaia a fen pwonueta ren Jises?

• Ifa ussun Taniel 2:44, 45 epwe pwonuta?

• Me ren an Kot kapasen oesini, ikkefa ekkewe feioch repwe tori aramas mi alleasochis?

[Sasing lon pekin taropwe 16]

En ka mochen manau lon ewe Paratis won fonufan?