Mwasangasangaeiti Le Esileefeili Ewe Kapas Allim

“Oupwe mokutukut lon ngunumi. Oupwe angang ngeni ewe Samol.”​—ROM 12:11.

1, 2. Chon Kraist mi afalafala ewe kapas allim ra mochen eani menni ekiek?

EMON anuwol a mwasangasangaeiti an minefoon angang. Lon ewe aewin ran an angang, a fokkun auselingaochu ekkewe kapasen emmwen seni noun we boss. A pwapwa ren ewe angang epwe fori akkom me a meefi lamotan. Atewe a achocho le fori angang mi murinno.

² Kich Chon Kraist mi tongeni eani ekiek pwe sia ussun chok ena minefoon chon angang. Pokiten ach apilukulukun manau tori feilfeilochok, a ussun ita pwe sia keran poputa le angang fan iten Jiowa. Ese mwaal ewe Chon Forikich a fen ammonlata sokkopaten angang sipwe tongeni angolong lon atun sia manaueni ewe manau feilfeilo. Nge ewe aewin angang Kot a fen awiisa ngenikich ewe angangen afalafala ewe kapas allim ussun Muun we. (1 Tesalonika 2:4) A ifa ussun meefiach ussun ei angang seni Kot? Ussun chok ewe anuwol, sia mochen apwonuetaochu ewe angang ren ukukuun ach tufich, ren tiniken, ren chengel​—ewer, ren mwasangasang!

3. Met a lamot ika sipwe sopwoch ussun chok emon chon afalafala ewe kapas allim?

³ Ach tumunu ekiekioch ussun ei angang mi tongeni weires. Mei wor chommong wiisach lukun ewe angangen afalafal, me ach apwonuureta mi tongeni chounikich lon pekin aion me pekin ngun. Sia kan tumunuochu ekkeei wiis atun sia apwonuetaochu ach angangen afalafal. Iwe nge, epwe tongeni weires. (Mark 8:34) Jises a menlapei lamoten ewe angang weires ren an emon Chon Kraist epwe sopwoch.​—Luk 13:24.

4. Ifa ussun ekkewe aurekin manau mi tongeni kku ach ekiek lon pekin ngun?

⁴ Pokiten a fen wor chommong wiisach kewe, sipwe tongeni meefi pwe ra kon somelo seni ach tufich me a kon chouti manauach. “Aurekin ei manau” mi tongeni ataielo ach achocho me ach pwapwaiti ewe angang mi theocratic. (Luk 21:34, 35; Mark 4:18, 19) Pokiten sise unusoch, epwe tongeni pout senikich ‘ach we tongen le popun.’ (Pwarata 2:1-4) Ekkoch kinikinin ach angang ngeni Kot mi tongeni wiliiti och mettoch sia chok ekkepiepini le foffori nge sise kon lien ekieki auchean. Ifa ussun ewe Paipel a awora ewe kapasen pesepes mi lamot pwe sipwe amwochu ach tiniken ngeni ewe angangen afalafal?

Ussun Chok “Ekkei” Lon Letipach

5, 6. Ifa ekiekin Paul ussun wiisan lon ewe angangen afalafal?

⁵ Sise mochen alamotangaua ewe angagen afalafal Jiowa a fen awiisa ngenikich pokiten ei angang a fokkun auchea. Ewe aposel Paul a eani ewe ekiek pwe ena angang eu wiis mi fokkun auchea, me a meefi pwe ese fich ngeni ena wiis. A apasa: “Inaamo ika ua kisifochofoch me lein ekkewe aramas mi fel meinisin, nge a fen ngeniei ei chen pwe upwe esineifeili ngeni ekkewe Jentail ewe pisekisekin Kraist, ewe sise tongeni aukuk. O upwe aiti ngeni aramas meinisin meeta ewe ekiek usun ewe poraus mi monomon, ewe mi monelo seni chok lom lom lon Kot, ewe mi foriata mettoch meinisin.”​—Efisus 3:8, 9.

⁶ An Paul ekiekoch ussun ewe angangen afalafal eu leenien appiru fan itach. Lon ewe taropwe ngeni Chon Rom, a apasa: “Ua fokkun mochen pwal afalafala ewe kapas allim.” Ese sauesini ewe kapas allim. (Rom 1:15, 16) Paul a ekiekioch me a mwasangasang le apwonueta an angangen afalafal.

7. Paul a ouroura Chon Rom ussun met lon noun we taropwe?

⁷ Ewe aposel Paul a silei lamoten ewe tiniken. Ina popun a pesei ekkewe Chon Kraist lon Rom: “Oute chipwang lon ami angang. Oupwe mokutukut lon ngunumi. Oupwe angang ngeni ewe Samol.” (Rom 12:11) Ewe kapas lon fosun Kris “chipwang” a wewe ngeni ‘tomangamang, mwokutukut ussun pwechar.” Neman sise wesewesen chipwang le apwonueta ach angangen afalafal, nge mei lamot ach sipwe tumunu ika sia fen poputa le ekis chipwangelo lon pekin ngun, me achocho le siwili ach ekiek ika sia meefi ina ussun.​—An Salomon Fos 22:3.

8. (a) Ifa ewe mettoch a ussun chok “ekkei” lon letipen Jeremaia me met popun? (b) Menni lesen sipwe kaeo seni Jeremaia?

⁸ Ngunun Kot epwe pwal tongeni alisikich lupwen sia letipengau. Fan eu, ewe soufos Jeremaia a letipengau me a ekiekin ukutiu seni an angangen soufos. A fen fos ussun Jiowa: “Usap chuen founi iten ewe Samol mi Lapalap ika kapas fan itan.” Weween pwe Jeremaia mi apwangapwang lon pekin ngun? Aapw. An Jeremaia pochokkul lon pekin ngun, an tong fan iten Jiowa, me an tiniken fan iten ewe enlet, ra fen apochokkula an epwe likiitu lon an angangen soufos. Jeremaia a awewei: “Murin om kapas a usun chok ekkei mi ku me lon lelukei, a pwourur me lechui. Ua resin apwosalong, nge usap chuen tongeni.” (Jeremaia 20:9) Sisap mairu lupwen noun Kot kewe chon angang repwe letipengau fan ekkoch. Nge lupwen ra tingorei an Jiowa alillis lon iotek seni letiper, Jiowa epwe nennelong lon letiper me ffangolo ngeniir an we ngun mi fel, ika, ussun chok Jeremaia, an we kapas a nonnom lon letiper.​—Luk 11:9-​13; Fofor 15:8.

“Ousap Kunuelo ewe Ngun”

9. Met epwe tongeni eppeti angangen ewe ngun mi fel fan itach?

⁹ A iei ussun ewe aposel Paul a pesei ekkewe Chon Tesalonika: “Ousap kunuelo ewe ngun.” (1 Tesalonika 5:19) Ewer, foffor me ekiek mi u ngeni an Kot kewe kapasen emmwen mi tongeni eppeti angangen ewe ngun mi fel fan itach. (Efisus 4:30) Chon Kraist ra wiisen afalafala ewe kapas allim. Sia aeafichi ei wiis mi fokkun auchea. Sisap mairu pwe chokkewe rese silei Kot ra esiita ach we angangen afalafal. Nge, lupwen emon Chon Kraist a tumunungaua wiisan le afalafal, neman epwe kunuelo ewe ngun mi fel mi amwokutu i.

10. (a) Ifa ussun ach ekiek ussun aramas mi tongeni kkukich? (b) Ifa ewe ekiek mi murinno ussun ach angangen afalafal a pwalo lon 2 Korint 2:17?

¹⁰ Neman ekkoch chon lukun repwe ekieki pwe ach angang sou aineti puk me chassi chok. Pwal ekkoch mi tongeni eani ekiek pwe sia feilo imw me imw fan iten ach etiwa liffangen moni chok. Ika sia mut ngeni ekkeei sokkun ekiek an epwe etipetipengaua letipach, iwe ach sopwoch lon ewe angangen afalafal epwe kisikiselo. Sise mochen mut ngeni etipetipen aramas an epwe kku ekiekich ussun ewe angangen afalafal, nge sia mochen eani ekiekin Jiowa me Jises. Ewe aposel Paul a aporausa ei ekiek mi tekia ussun ewe angangen afalafal lupwen a fen apasa: “Pun am ausap usun chok chommong aramas mi ani amomo kapasen Kot, nge am mi usun chok aramas mi letip limelimoch, ir mi fen angei wiser me ren Kot; iwe, am aua chok kakapas lon Kraist mwen mesen Kot.”​—2 Korint 2:17.

11. Met a atufichi Chon Kraist ar repwe chuen tiniken inaamwo ika ra nom fan riaffou mwaal me ifa ussun ar we leenien appiru epwe kkukich?

¹¹ Ekiselo chok mwirin maloon Jises, a fen tori noun kewe chon kaeo lon Jerusalem eu fansoun riaffou mwaal. Nouwis ra amosokuur me ra alluk ngeniir pwe resap chuen afalafal. Iwe nge, ewe Paipel a apasa pwe ra “ur ren ewe Ngun mi Fel, o ra pworacho le apasata ewe kapasen Kot.” (Fofor 4:17, 21, 31) Alon Paul kewe ngeni Timoti fite ier mwirin ra pwarata ewe sokkun ekiekioch Chon Kraist ra wiisen amwochu. Paul a apasa: “Kot ese mo ngenikich ngunun niuokus, pwe ngunun manaman o tong o mirit. Iwe, kosap sau ren om pwarata usun ach Samol, are pwal usun ngang, emon noun chon fotek, nge kopwe etiei le riaffou fan asengesin ewe kapas allim ren manamanen Kot.”​—2 Timoti 1:7, 8.

Ifa Wiisach Ngeni Chon Oruch?

12. Ifa ewe popunlapen ach fori ei angangen afalafala ewe kapas allim?

¹² Ren ach eani ewe sokkun ekiek mi murinno ussun ach angangen afalafal, mi lamot sipwe eani ewe popun mi pwung sia feilo afalafal. Iwe, met popun sia feilo afalafal? Ewe popunlap a fen pwalo lon kapasen ewe sou mak kol fel: “Om kewe aramas mi fel meinisin repwe mwareituk [Jiowa]! Repwe aporausa usun lingen muum we, o repwe pwal aporausa usun om manaman, pwe repwe esinei ngeni aramas porausun om kewe fofor mi manaman, o pwal poraus usun muom me an we lingoch chapur.” (Kol Fel 145:10-​12) Ewer, sia afalafal fan iten ach sipwe mwareiti Jiowa me epinalo itan mwen aramas meinisin. Inaamwo ika chon auseling mi chokisikis, ach tuppwol le esileefeili ewe porausen amanau epwe mwareiti Jiowa.

13. Met a amwokutukich le ereni aramas ussun ach we apilukulukun manau?

¹³ Pwal eu, sia afalafal pokiten ach tongei aramas me pokiten sise mochen eani tipisin nni manau. (Isikiel 33:8; Mark 6:34) Ussun met Paul a apasa lupwen a fos ussun chon lukun: “Mi wor ai angang ngeni chon Kris pwal ngeni ekkewe ekkoch chon lukun, ir mi tipatchem o pwal ir mi tiparoch.” (Rom 1:14) Paul a meefi wiisan le afalafala ewe kapas allim ngeni aramas, pun letipen Kot pwe “aramas meinisin repwe kuna amanauen ngunur.” (1 Timoti 2:4) Ikenai, sia pwal tongei me meefi wiisach ngeni chon oruch. An Jiowa we tong ngeni aramas a fen amwokutu i le tiinalo Noun we won fonufan ren an epwe malo fan iter. (Jon 3:16) Ena eu asor mi lapalap. Sia appiru an Jiowa we tong lupwen sia aea ach fansoun me achocho le esilei ngeni aramas ussun ewe kapas allimen ach amanau mi alongolong won an Jises we asor.

14. Ifa ussun ewe Paipel a awewe won ewe fonufan lukun an Chon Kraist we mwichefel?

¹⁴ Chon Pwarata Jiowa ra eani ewe ekiek pwe ekkewe chon fonufan mi tongeni wiliiti chiechier lon pekin ngun. Sipwe pworacho le afalafal, nge ach pworacho esap ewe sokkun pworacho mi efisi anini. Pwungun pwe ewe Paipel a aea kapas pochokkul lupwen a fos ussun ewe fonufan. Lon makkeien Paul we, a pacheta ngeni ewe kapas “fonufan” och ekiek mi ngau lupwen a weneiti “tipatchemen ei fonufan” me ‘mochenien fonufan.’ (1 Korint 3:19; Taitos 2:12) Paul a pwal achema ngeni ekkewe Chon Kraist lon Efisus pwe lupwen ra fetal “lon pungun ei fonufan,” repwe fen “malo” lon pekin ngun. (Efisus 2:1-3) Ekkeei poraus ra tipeeu ngeni met ewe aposel Jon a makkei: “Fonufan meinisin a nonnom fan nemenien ewe mi ingau.”​—1 Jon 5:19.

15. Met sisap fori ren aramas lukun ewe mwichefel me met popun?

¹⁵ Nge, chechchemeni mwo, pwe ekkeei sokkun poraus ra weneiti ewe fonufan mi imulo seni Kot, nge esap ngeni emon me emon aramas lon ewe fonufan. Chon Kraist resap apwungu akkom ika emon epwe etiwa are esap etiwa porausen ar afalafal. Rese tufichin silei ika emon a lapalapeni emon siike. Esap wiisach le apasa met epwe fis lupwen Jises a feito me aimufeseni ekkewe “siip” seni ekkewe “siike.” (Mattu 25:31-​46) Jises a seikita sou kapwung, esap kich. Pwal och, a fen pwalo pwe ekkoch aramas mi fokkun fofforingau ra fen etiwa ewe poraus lon ewe Paipel, siwili manauer, me iei, ir Chon Kraist mi limelimoch. Iwe, inaamwo ika sise chieneni ekkoch sokkun aramas nge, sipwe fos ngeniir ussun apilukulukun Muun Kot lupwen sia tongeni fori. Ewe Paipel a fos ussun ekkoch aramas, esap ir chon luku, nge ir mi “fil ngeni manau esemuch.” Mwirin ra wiliiti chon luku. (Fofor 13:48) Sise tongeni silei io kewe ra fich ngeni manau esemuch tori sia fen afalafaleer​—neman fan chommong. Ina ewe popun sia fos ren “tipetekison” me “mennin,” lupwen sia afalafala chokkewe resaamwo etiwa ewe porausen amanau, ren ach apilukukoch pwe ekkoch me leir repwe chuen etiwa ewe porausen manau.​—2 Timoti 2:25; 1 Piter 3:15.

16. Ifa eu popun sia mochen angangochulo lon pekin sense?

¹⁶ Ach achocho le angangochulo lon pekin sense epwe alisata ach mwasangasangaeiti le esileefeili ewe kapas allim. Ren chok awewe: Neman eu urumot esap kon lien apwapwai emon ika ese silei met epwe fori. Nge emon mi sileifichi ewe urumot epwe pwapwaiti. Ussun we chok, Chon Kraist mi angangoch lon pekin sense, repwe alapalo ar chengel lon ewe angangen afalafal. (2 Timoti 4:2; Taitos 1:9) Paul a fonou Timoti: “Kopwe achocho ngeni om kopwe achengicheng me ren Kot, usun chok emon chon angang esap saueiti och mettoch, emon mi forfichi lon an anganga ewe kapas mi enlet.” (2 Timoti 2:15) Ifa ussun sipwe tongeni angangochulo lon pekin sense?

17. Ifa ussun sipwe tongeni amaaraata ach mochen fan iten ewe sile lon ewe Paipel, me ifa ussun ena esin sile epwe alisaata ach angangen afalafal?

¹⁷ Eu mettoch mi alisikich, alapaloon ach sile mi enlet. Ewe aposel Piter a peseikich: “Usun chok monukol mi a koran uputiu, oupwe fakkun mochen ewe chonun oup mi enlet o mi fich ngeni ngunumi, pwe oupwe mamarita ren ngeni manau.” (1 Piter 2:2) Emon monukol mi pochokkul a mwoneiti milik. Iwe nge, neman emon Chon Kraist epwe amaaraata an mochen fan iten ewe sile lon ewe Paipel. Epwe tongeni fis ren ach amurinnoolo lapalapan ach kaeo me allea. (An Salomon Fos 2:1-6) Achocho me nemeni meefiach ra lamot ika sipwe wiliiti senseen an Kot Kapas mi angangoch, me ach achocho mi tongeni atoto ngenikich ekkewe feioch. Ewe pwapwa a pop seni ach atittina ewe Paipel epwe efisi ach tinoch ren an Kot we ngun, me sipwe mwasangasang le awewe ngeni aramas minne sia fen kaeo.

18. Ifa ussun ekkewe mwich mi tongeni alisaata ach nounoufichi ewe kapasen Kot?

¹⁸ Ekkewe mwich ra pwal alisata ach angangoch le nounou an Kot we Kapas. Mi och ach nengeni pwisin nouch Paipel lupwen emon chon afalafal epwe alleani eu wokisin. A lamot ach auselingaochu ekkena afalafal, kapachelong ekkewe mi awewe won ach angangen afalafal. Sisap alamotangaua lamoten ekkewe pwom ren ach sise atolafichiir. Sia mochen chechchemeni pwe ach nemeniochu ekiekich me ach ekiekifichi ewe poraus a fokkun lamot. (1 Timoti 4:16) An Chon Kraist kewe mwich ra apochokkula ach luku, alisikich le alapalo ach mochen kaeo ewe Paipel, me asukulakich ifa ussun sipwe mwasangasang le esileefeili ewe kapas allim.

Luku Won An Jiowa We Alillis

19. Met popun ach afalafal iteitan a lamot?

¹⁹ Chon Kraist mi ‘tinoch lon ngunur’ me mwasangasang le esileefeili ewe kapas allim ra achocho le afalafal iteitan. (Efisus 5:15, 16) Enlet pwe nonnomun aramas a sokkolo, me mi sokkolo ewe ukuukun fansoun aramas mi tongeni awora lon ei angang mi amanaua aramas. (Kalesia 6:4, 5) Iwe nge, neman ukuukun fan fitu sia fos ngeni aramas ussun ach apilukuluk a lamot seni kapachalapen ekkewe awa sia fen afalafal. (2 Timoti 4:1, 2) Lapeloon ach afalafal epwe wewe ngeni lapeloon ach aucheani lamoten ei angang. (Rom 10:14, 15) Ach tongei aramas me ach meefi meefier kewe epwe lapelo lupwen sia foffos ngeni aramas mi letip enlet, chokkewe mi sio me ngungu me esor ar apilukuluk.​—Isikiel 9:4; Rom 8:22.

20, 21. (a) Menni angang a chuen nom mwach? (b) Ifa ussun Jiowa a alisaata ach angang?

²⁰ Jiowa a fen awiisa ngenikich wiisach le afalafala ewe kapas allim. Iei ewe aewin angang a fen awiisa ngenikich ussun chok kich chienan kewe chon angang. (1 Korint 3:6-9) Sia mwasangasang le apwonueta ei wiis seni Kot ren unusen letipach me ren ach tufich. (Mark 12:30; Rom 12:1) Mei chuen wor chommong aramas mi fich ngeni manau lon ei fonufan me ra echik lon pekin ngun. Mi chuen watte ewe angang esaamwo fis, nge Jiowa epwe alisikich le foralo ika sia unusen apwonueta ach angangen afalafal.​—2 Timoti 4:5.

²¹ Jiowa a awora ngunun we me a ngenikich “katilasen ewe Ngun,” ewe Paipel. Ren an we alillis, sia tongeni suuki auach le ‘pworacho le afalafala me arongafetalei an Kot we kapas allim mi monomon.’ (Efisus 6:17-​20) Amwo aramas repwe apasa ussuch minne Paul a mak ngeni ekkewe Chon Kraist lon Tesalonika: “Pun ach kapas allim ese fisita remi lon kapas chok, pwe lon manaman pwal lon ewe Ngun mi Fel me apilukuluk allim chapur.” (1 Tesalonika 1:5) Ewer, sipwe afalafala ewe kapas allim ren mwasangasang!

Eu Enniwili Poraus mi Mwoch

• Met epwe tongeni fis ngeni ach tiniken pokiten ekkewe aurekin manau?

• Ifa ussun ach mochen le esileefeili ewe kapas allim epwe ussun eu “ekkei” lon letipach?

• Menni ekiekingau ussun ewe angangen afalafal sipwe tunalo?

• Ifa ewe ekiek sipwe eani ussun aramas mi sokkolo ar luku?

• Ifa ussun Jiowa a alisikich le amwochu ach tiniken lon ewe angangen afalafal?

[Sasing lon pekin taropwe 19]

Chon Kraist ra appiru an Paul me Jeremaia tiniken

[Sasing lon pekin taropwe 20]

Ach mwasangasang lon ewe angangen afalafal a pop seni ach tongei Kot me chon oruuch