“Oupwe Achocho le Angang nge Ousap Chipwang”
1. Ifa ewe napanap itä epwe esissillatä ach angangen afalafal?
1 Meinisin kinikinin ach angangen Chon Kraist a feffeitä. Ina minne, a wor pesepes ach sipwe ‘achocho le angang nge sisap chipwang’ me ‘sipwe angang ngeni ewe Samol ren unusen letipach.’ (Rom 12:11) Iwe nge, a wor chommong mettoch mi tongeni akükkünalo ach tinikken. Iwe, ifa usun sipwe tongeni “alapala” ach tinikken me mwasangasang lon ei angangen afalafal?—2 Tim. 1:6, 7?
2. Ifa usun a ririfengen ach pwisin käeö me ach tinikken lon ewe angangen afalafal?
2 Pwisin Käeö Paipel: Emön chon afalafal mi lipwäköch a tongei än Kot we allük me ekkewe enlet lon a kküü letipan. (Kölf. 119:97) Ach pwisin käeö ekkewe pworaus mi aüchea lon Paipel a amwökütü letipach me alapalo ach tinikken. Ach tongei ewe chon Awora ekkeei pworaus mi enlet pachelong ach mochen afalafala ewe kapas allim ngeni ekkoch a amwökütükich le mwareiti Kot me esilefetälei itan we. (Ipru 13:15) A ffat pwe ach tinikken le esilefeili ewe kapas allim a pwäratä alolloolun ach aücheani ei angang.
3. Ifa usun än Kot ngün mi fel a tongeni älisi ach angangen afalafal?
3 Tingor än Kot we Ngün mi Fel: Ach lipwäköch lon ewe angangen afalafal ese fis pokiten pwisin ach pöchökkül. Tinikken mi enlet a feito seni älillisin än Kot we ngün mi fel. (1 Pit. 4:11) Ika sia arap ngeni ewe Emön mi fokkun ‘watte an tufich’ epwe ngenikich ewe pöchökkül le afalafal fän pwora. (Ais. 40:26, 29-31) Lupwen aposel Paul a küna weires lon an we afalafal ‘Kot a alisi i.’ (Fof. 26:21, 22) Än Jiowa ngün mi fel mi akkapöchökkülakich epwe älisikich le achocho lon ach angang, ina popun mi lamot sipwe iotek fän iten än we ngün mi fel.—Luk 11:9-13.
4. Ifa uwaöchün än emön epwe tinikken nge met sipwe tümünükich seni?
4 Fän chommong ach tinikken me achocho le afalafal a alollolatä chienach kewe Chon Kraist ar repwe pwal alapalo ar tinikken. (2 Kor. 9:2) Lon ewe territory, ekkewe chon imw repwe pwapwaiti le rongorong ewe pworaus mi apworausa fän tipeppos me mwasangasang. Iwe nge, tinikken epwe fiti süföl me mosonoson iteitan. (Tait. 3:2) Fansoun meinisin sipwe süföliti an ewe chon imw pwüng le pwisin filatä met a mochen.
5. Ifa ewe kapasen pesepes seni Kot sipwe achocho le apwönüetä?
5 Amwo kich Chon Kraist sipwe ‘achocho le angang nge sisap chipwang.’ Sipwe ämääraatä ach tinikken ren ach pwisin käeö ewe Paipel me iotek ngeni Jiowa, ewe mi ngenikich ngün mi fel mi fokkun manaman. Ren ena, sipwe tongeni apwönüetä wisach le afalafal fän tinikken ren ewe ‘ngünmifel, pwal ren ach wesewesen lükü pwe a let ewe kapas.’—1 Tes. 1:5.