Ekkewe Leenien Appiru Mi Murinno Ka Kuna Feioch Senir?

“OUA pwal wiliti leenien appiru ngeni ekkewe chon luku meinisin lon Masetonia, pwal lon Akaia.” Ewe aposel Paul a makkei ekkeei kapas ngeni ekkewe chon Kraist mi tuppwol lon Tesalonika. A fokkun murinno ewe leenien appiru ra isetiu fan iten pwiich kewe. Iwe nge, ekkewe chon Tesalonika ra pwal chok tapwelo mwirin an Paul me chienan kewe leenien appiru. Paul a era: “Pun ach kapas allim ese fisita remi lon kapas chok, pwe lon manaman pwal lon ewe Ngun mi Fel me apilukuluk allim chapur; ussun chok ami oua fen sinei lapalapen manauem leimi fan itemi. Iwe, ami oua appirukem me ach Samol.”​—1 Tesalonika 1:5-​7.

Ewer, Paul ese chok afalafala aramas. Pwisin manauan a ussun chok eu afalafal​—eu leenien appiru fan iten luku, likiitu, me fangelo manauan. Pokiten ei mettoch, Paul me chienan kewe ra wiliiti eu leenien appiru mi fokkun pochokkul ngeni manauen ekkewe chon Tesalonika, ra amwokutur ar repwe etiwa ewe enlet fan “riaffou.” Nge sap minne Paul me chienan kewe chon angang chok ra apochokkula ekkewe chon luku. Pwal an ekkewe ekkoch leenien appiru atun ra likiitu fan sossot ra pwal appochokuler. Paul a mak ngeni chon Tesalonika: “Pun ami pwii kena, oua appiru ekkewe mwichefelin Kot mi nom Jutia lon Kraist. Pun ami oua pwal kuna riaffou me ren chon fonuemi usun chok ewe riaffou ra fen kuna me ren ekkewe re Jus.”​—1 Tesalonika 2:14.

Kraist Jises—Ewe Akkaeuin Leenien Appiru

Inaamwo ika Paul a eu minen nengeni mi fich ngeni le appiru, a pwal aiti pwe Chon Kraist repwe akkaeuin tapwelo mwirin Jises Kraist. (1 Tesalonika 1:6) Kraist ina i ach we akkaeuin leenien appiru. Ewe aposel Piter a mak: “Pun iei popun a fen korikemi, pun Kraist a pwal kuna riaffou fan asengesimi, o a isetiu eu leenien appiru mwemi, pwe ami oupwe tapwelo mwirin lon ipwan.”​—1 Piter 2:21.

Iwe nge, manauan Jises ussun emon aramas a fen muchulo 2,000 ier som loom. Iei, Jises “a nonnom lon ewe saram sise tongeni arap ngeni” ussun emon ngun esap tongeni malo. Ina popun, “esor emon aramas mi katol i, o ese pwal wor emon mi tongeni katol i.” (1 Timoti 6:16) Iwe, epwe ifa ussun sipwe tongeni appiru i? Ren ach kakkaeo ekkewe ruuanu puken porausen manauan Jises lon Paipel. Ekkewe Puken Mattu, Mark, Luk, Jon lon Paipel ra asaramakich ussun an Jises lapalap, manauan, me an “ekiek”. (Filipai 2:5-​8) Sipwe pwal kuna ekkoch awewe ren ach kakkaeo ewe puk The Greatest Man Who Ever Lived. A titchikietu me awewei porausen manauen Jises we me a atettelatiu met a fis ngeni i.a

An Jises leenien appiru le fangelo manauan a fokkun kku aposel Paul. A ereni ekkewe Chon Kraist lon Korint: “Upwe fakkun pwapwa ren amomolo minne ai, ewer, pwal tori manauei, fan asengesin ngunumi.” (2 Korint 12:15) A fokkun lapalapeni lapalapen Kraist! Fansoun sia ekieki ussun an Kraist we leenien appiru mi unusoch, ita epwe pwal amwokutukich le appiru i lon ach manaueni manauach.

Ren chok awewe, Jises a asukulakich pwe sipwe apilukuluk won an Kot we pwon pwe epwe tumunukich lon pekin aion. Nge a fori lap seni ena ren an pwaralo ena sokkun tuppwol me luku won Jiowa iteitan ran. A era: “Mi wor pwangen ekkewe foks, o fasen ekkewe mansusu fan lang; nge esor leenien ewe Noun-Aramas an epwe akonalo mokuran.” (Mattu 6:25; 8:20) Aurekin pisek a kan nemeni om ekiek me foffor? Are manauom a pwarata pwe ka kutta akkom ewe Muu? Me ifa ussun om ekiek ussun om angang ngeni Jiowa? A ussun chok ach we leenien appiru, Jises? Ewe Paipel a aiti ngenikich pwe Jises ese chok afalafal ussun ekitekit nge a pwal pwarata fan chommong an ekitekit. (Jon 2:14-​17) Pwal eu, a ifa ochun ewe leenien appiru Jises a isetiu ussun tong! Mwa met, a fangelo pwisin manauan fan itan noun kewe chon kaeo! (Jon 15:13) En mi appiru Jises ren an pwarata tong ngeni pwiin kewe chon Kraist? Are ka chok affota ekiekum won ar kewe mwaal ina popun a weires ngonuk om kopwe tonger?

Fan chommong sise tongeni unusen tapwelo mwirin ipwan Jises kewe inaamwo ika sia achocho. Nge, Jiowa a fokkun pwapwa ren ach achocho le “pwilitalong ach Samol Jises Kraist.”​—Rom 13:14.

“Leenien Appiru Ngeni Ekkewe Siip”

Mei wor ekkoch lon ewe mwichefel ikenai ra isetiu och leenien appiru fan itach? Ewer, mi fokkun wor! Akkaeuin mi lamot fan iten ekkewe brother ra eani och wis lon ewe mwichefel ar repwe leenien appiru fan itach. Paul a ereni Taitos, emon a angang fan iten ekkewe mwichefel lon Krit me a kan wisen seikata ekkewe sou mas, pwe emon me emon elter mi fen seikita epwe emon ‘mwan esor tipisin.’ (Taitos 1:5, 6) Ewe aposel Piter a pwal pesei “ekkewe elter” ar repwe wiliiti “leenien appiru ngeni ekkewe siip.” (1 Piter 5:1-​3) Me ifa ussun ekkewe ra eani wis ministerial servants? Repwe pwal ussun “ekkewe soukoa mi angangoch.”​—1 Timoti 3:13.

Enlet pwe sise tongeni ekieki pwe ekkewe elter are ministerial servant repwe angoch lon meinisin kinikinin angangen Chon Kraist. Paul a ereni ekkewe Chon Kraist lon Rom: “Pun mi wor liffangach kewe liffangen ngun mi sokkofesen, usun ewe chen a fen fangeto rech.” (Rom 12:6) Emon me emon brother mi sokkolo lon ar angangoch. Ese pung ach sipwe ekieki pwe ekkewe elter repwe unusoch lon ar apwonueta ar angang. “Pun kich meinisin sia fori chommong sokkun mwal,” alon ewe Paipel lon Jemes 3:2. “Nge are emon esap mwalilo lon an kapas, iwe, atewe a fen unusochulo; o a pwal tongeni nemeni unusen inisin.” Inaamwo ika ekkewe elter rese unusoch, ussun chok Timoti ir mi tongeni “wiliti eu leenien appiru ngeni ekkewe chon luku, ren kapas o fofor, ren tong, o luku, o limelimoch.” (1 Timoti 4:12) Lupwen ekkewe elter ra ina ussun, ir kewe ra nom lon ewe mwichefel repwe tipemecheres le apwonueta alon Ipru 13:7: “Oupwe chechemeni ekkewe chon emmwenikemi, . . . Oupwe ekieki usun uwan manauer, o oupwe appiru ar luku.”

Ekkoch Leenien Appiru Ikenai

Lon ekkewe ier a lo, chommong ra fen isetiu och leenien appiru mi murinno. Ifa ussun ekkewe fitu ngerou misineri mi fangelo manauer, ra fen ‘likitalo imwer kewe, are pwir kewe, are fefiner kewe, are semer, are iner, are nour kewe, are fonuer kewe’ pwe repwe tongeni apwonueta wisen Chon Kraist lon ekkewe fonuen ekis? (Mattu 19:29) Pwal nengeni mwo ekkewe elter mi saifetal me puluwer kewe, ir ekkewe ra volunteer lon ekkewe ofesin Watch Tower Society, me ekkewe pioneer ra angang fan iten ekkewe mwichefel. Ekkeei leenien appiru ese pwal achungu letipan ekkoch? Emon Chon Kraist chon afalafal lon Asia a chemeni emon misineri seni ewe awaluan Watchtower Sukulen Gilead. A era pwe ei brother mi tuppwol a “likiitu fan umwun nikken me raren pwichikar. . . . a pwal kon ingeiti an tufichin afalafal lon fosun Saini me Malay inaamwo ika a feito seni England.” Ifa ussun ei leenien appiru a kku ewe brother? Ewe brother a era: “An mosonoson me luku a amwokutuei pwe upwe achocho le wiliiti emon misineri lupwen ua watte.” Iwe, ese amairu lupwen ei brother a wiliiti emon misineri.

Ewe puk Watch Tower Publications Index a ur ren chommong porausen manauan aramas lon ekkewe chassi Leenien Mas me Awake! Ekkeei porausen aramas ra aporausa ussun ir kewe ra fen poutalo met ekkewe chon fonufan ra chechei, ra pworacho ngeni ar apwangapwang me siwili lapalaper, ra eani ekiek mi positif fan sossot weires, me ra pwarata ar achocho, likiitu, tuppwol, tipetekison, me ngunun fangelo manauer. Emon chon alleani ekkewe chassi a mak ussun ekkeei poraus: “Ra alisiei pwe upwe tipetekison me ua kilisou atun ua alleani sossotun ekkewe ekkoch, me a alisiei pwe usap kon ekieki pwisin ngang chok.”

Pwal och, sisap monuki ekkewe leenien appiru mi murinno lon pwisin om mwichefel: ekkewe mokuren ewe famili ra kon tumunuochu osupwangen ar famili lon pekin ngun me aion; ekkewe sister​—kapachelong ekkewe in esor puluwer​—ra achocho fan weires le emeriti nour kewe pwal achocho lon ar angangen afalafal; ir kewe mi chinnap me semwen ra chuen tuppwol inaamwo ika ra apwangapwangelo. Meet, ese pwal achungu letipach ren ekkeei leenien appiru?

Pungun pwe ei fonufan a ur ren chommong leenien appiru mi ngau. (2 Timoti 3:13) Nge, nengeni an Paul we kapasen pesepes ngeni ekkewe chon Kraist ra nonnom lon Jutia. Mwirin Paul a achchema ngenir porausen ekkewe mwan me fefin chon luku loom me lapalaper kewe mi murinno, Paul a peser: “Iei minne, pokiten mi wor chommong chon pwarata mi pwellifeilikich, usun chok eu kuchu mi lap, iwe, sipwe pwal . . . sa lon ewe kitir mi nom mwach. Sipwe neneloi Jises, Samolun ach Luku, o ewe Chon Aunusochulo.” (Ipru 12:1, 2) Ekkewe leenien appiru ra pwellifeili Chon Kraist ikenai ra ussun chok eu ‘kuchu mi lap’​—loom pwal ikenai. Ka kuna feioch senir? En mi tongeni ika kopwe tipepos pwe “kosap appiru minne mi ingau, nge kopwe appiru minne mi murinno.”​—3 Jon 11.

[Pworous fan]

[Blurb on page 30]

Ese pwung ach sipwe ekieki pwe ekkewe elter me ministerial servant repwe angangoch lon eu me eu kinikinin angangen Chon Kraist

[Sasing lon pekin taropwe 31]

Ekkewe elter repwe “leenien appiru ngeni ekkewe siip”