A Fokkun Lapalapalo Oput
“Esap fan eu an aramas weweiti ekkewe aramas ra oput.”—JAMES RUSSELL LOWELL, ESSAYIST AND DIPLOMAT.
A USSUN ita pwe oput a nom ekis meinisin ikenai. Ussun ita esap tongeni molo seni ekiekich sasingin imw mi karelo, ekkewe peias watte aramas ra keran ttu, me chommong soma.
A fen ukutiu an aramas aneanei an epwe molo oput, maun, me fofforun nni aramas lon fansoun epwe feito. Danielle Mitterand, puluwen ewe peresitentin France me lom, nge a fen malo puluwan, a chechchemeni ei mettoch ussun manauan le fopwulun we: “Aramas ra aneanei ar repwe manau lein eu kumiin aramas mi ussun pwipwi, iwe, repwe aramas tipewen; me ra ekiekin kuna ar repwe nomfengen me aramas meinisin fan tipeeu; me ra aneanei pwe repwe eani manau mi pochokkul, kinamwe, me ammafel lon eu otot mi lukuchar me kisaseu, nge repwe kuna tumun fan ena otot.” Met a fis ngeni ekkena mettoch mi fokkun murinno ra aneanei ar repwe kuna? Fan letipechou neminnewe a apasa pwe “Lime ier mwirin, sia kuna pwe a wor mettoch mi tufichin atai minne sia anean ngeni.”
Sisap tongeni tunalo chok lapaloon oput lon ei fansoun. A fen choufetal seni lom, me a kan pwalo lon lapalap mi sokkolo ngauan. Ewe lukulukoch mi nom ren fite milion aramas, iwe nge, rese lien afanni me mwan, a fen molo ren watteloon fofforun oputa aramas, nge eu me eu ekkena foffor a ngau seni ewe mi fis mesemwan. Inaamwo ika sise kan kuna ena esin oput lon imwach are fonuach, nge a tongeni mweterikich me ekis. Neman oput a pwa ngenikich iteiten ran lon tv lupwen a ffich prokram fan iten porausen fonufan. Ekkoch ena sokkun poraus a pwal feilfetal won ewe Internet. Nengeni mwo ekkoch leir.
Lon ekkewe engol ier ra lo, a kon watteta seni fansoun lom meinisin an aramas pwarata ar acheni wesetaan fonuer. Joseph S. Nye, Jr., ewe meilap lon ewe Harvard Center for International affairs, a apasa pwe “An aramas acheni fonuer a fen lapalapelo lon arapakan fonu meinisin, nge ese kisikisilo. Sap minne a wor eu chok kumiin aramas mi ririfengen won unusen fonufan, pwe a wor fitu kumi won unusen fonufan, nge a fen lapalo ar meefi sokkofesenin eu seni eu. Iwe, ina eu mettoch mi alapalo ewe tufichin fisita koumfengen lefilen aramas.”
Pwal fitu sokkun fofforun oputa aramas ese lien pwalo, pwe chon eu fonu are sopw ra kan aoper. Lupwen limmon skinhead ra nnielo emon chon Sikh mi chinnap lon Canada, ena mettoch “a affatalo minne aramas ra meefi a fen pwukutasefal, weween, fofforun oputa aramas lon ena fonu, nge fan chommong aramas ra fen apunga chon ena fonu pokiten ar rese lifilifil aramas.” Lon Tois, mwirin an a fen kisikisitiu fofforun oputa aramas pokiten ewe mettoch lifilifil aramas ren ir mi tipeforea lon ekkewe fitu ier mwan, a lapalo ena sokkun foffor won 27 percent lon 1997. Interior Minister Manfred Kanther a apasa pwe “Ina eu poraus sia lichipung ren.”
Lon ennefenin Albania eu repot a pwarata pwe lap seni 6,000 semirit ra ussun ita kalapus lon pwisin imwer pokiten ar niueiti pwe chon oputa ar kewe famili repwe pekkiir. Ekkena semirit ra riaffou pokiten chon ena fonu ra eoreni ewe ekiekin enniwili ngeni aramas ar fofforingau, “iwe, a fen ussun ita fotekini fitu ngerou famili.” Lon ewe United States, me ren ewe Federal Bureau of Investigation (FBI), “lap seni esopw me lein ekkewe 7,755 fofforun oputa aramas mi fis lon 1998 ewe FBI a angei repot ussun ra fis pokiten ewe mettoch lifilifil aramas.” Ren ekkewe lusun fofforun oputa aramas, ra fis pokiten apap lon pekin lamalam, sokkofesenin an aramas kewe lewo, me tterin inisin aramas.
Pwal och, iteiten ran ekkewe simpung ra kapas ussun watteloon an aramas oputa chon ekis, nge a akkaewin weneiti ekkewe choisa, iwe iei, ra lap seni 21 milion. Sia letipechou ren ach kuna pwe a lap me lein ir mi pwarata oput ngeni chon ekis, ir sarafo, nge ra piitelo ren ir mi itefoulo lon pekin angangen muun me ir mi ekiekin aranga aramas fan iten och popun ese pwung, nge esap ir aramas wenechar. Ewe chok sokkun ekiek a pwalo ren an aramas akkamoson me apap ngeni aramas mi sokko seniir, me ar meefi pwe meinisin chon eu fonu ra eani eu chok sokkun lapalap are ekiek.
Ikkefa ekkoch popun a mmen lapalo oput? Iwe, met aramas repwe tongeni fori ren ar repwe amoielo oput? Ena eu lesen mwirin ei epwe polueni ekkena kapas eis.
[Picture Credit Line on page 2]
Cover, top: UN PHOTO 186705/J. Issac
[Picture Credit Line on page 3]
Daud/Sipa Press