Pwarata Pwe Ka Eani Ekiek Mi Mosonottam!

“Upwe pwarata pwe ua eani ekiek mi mosonottam ren ewe Koten ai amanau. Ai Kot epwe auselingaei.”​—MAIKA 7:7, New World Translation.

1, 2. (a) Ifa ussun ekiek mi mwaal a eu minen efeiengau ngeni chon Israel lon ewe fonupoon? (b) Met epwe tongeni fis ngeni emon chon Kraist ika ese akkachocho ngeni an epwe eani ekiek mi pwung?

REN chommong mettoch lon manauach, sipwe tongeni eani ekiek mi murinno(positive) are ekiek mi mwaal(negative), nge epwe longolong won menni leir sipwe filata. Lupwen chon Israel ra nonnom lon ewe fonupoon, a kawor ngeniir ewe manna ren och manaman. Repwe ita nennefeil lon ena leeni mi pwasapwas me meefi kilisou ngeni Jiowa ren an awora aner mongo. Epwe ina ussun repwe pwarata pwe ra eani ekiek mi murinno. Nge ra chechchemeni ekkewe sokkopaten mongo lon Isip me ra ngunungunu pwe ese anno ewe manna. A fet watteen ar ekiek mi mwaal!​—Numperis 11:4-6.

² Ekiekin emon chon Kraist ikenai epwe pwal tongeni an epwe ussun saram are rochopwak. Ika emon chon Kraist ese eani ekiek mi pwung, a mecheres an epwe pout seni an chengel, me ina eu mettoch mi chou, pun iei alon Nehemaia: “Chengelin Jiowa, iei ach minen tumun mi pochokkul.” (Nehemaia 8:10, NW) Ewe sokkun ekiek mi murinno, nge mi fiti chengel, a kan alisikich pwe sipwe pochokkul me a alapalo kinamwe me tipeeu lon ewe mwichefel.​—Rom 15:13; Filipai 1:25.

3. Ifa ussun ekiek mi pwung a alisi Jeremaia lupwen a kuna fansoun weires?

³ Inaamwo ika Jeremaia a manau lon fansoun weires, nge a eani ekiek mi murinno. Lon pwal mwo nge fansoun an nengeni ekkewe mettoch mi aniuokkus lupwen Jerusalem a talo lon 607 B.C.E., a tongeni kuna mettoch mi murinno. Jiowa esap monuki Israel, me ena muu epwe sopwosopwolo. Iei makkeien Jeremaia lon ewe puken Kolun Kechiu: “Pokiten an Jiowa kewe fofforun tong mi enlet, sise mwo sopwolo, pun an kewe fofforun umoumoch esap fokkun muchulo. Ir minefo iteiten lesossor. Om tuppwol a somolo.” (Kolun Kechiu 3:22, 23, NW) Seni lom lom, feffeito, noun Jiowa kewe chon angang ra achocho le eani ekiek mi murinno are ekiek mi fiti chengel lupwen epwe toriir fansoun mi fokkun weires.​—2 Korint 7:4; 1 Tesalonika 1:6; Jemes 1:2.

4. Met sokkun ekiek Jises a eani fansoun meinisin, me ifa ussun ena sokkun ekiek a alisi i?

⁴ Wonupuku ier mwirin Jeremaia, a kawor alillis ngeni Jises fan iten an epwe likiitu pokiten an eani ekiek murinno. Sia alleani pwe “Atewe mi likiitu won ewe irapenges pokiten ewe pwapwa mi nom mwen i, ese mo lolileniesini asauan, o a mottiu pelimwanin ewe leenien motun Kot.” (Ipru 12:2) Ese lifilifil met sokkun oput are riaffou Jises a kuna​—pwal mwo nge riaffoun ewe iraan nninni​—nge a chok ekkekieki “ewe pwapwa mi nom mwen i.” Ena pwapwa a wewe ngeni an tufichin pwarata pwe mi pwung an Jiowa nemenem me an epini itan we me pwal an tufichin atoto feioch mi lapalap ngeni aramas mi alleasochis lon fansoun epwe feito.

Eani Ekiek mi Mosonottam

5. Lon menni sokkun fansoun ekiek mi mosonottam epwe alisikich ach sipwe eani ekiek mi pwung ussun mettoch meinisin?

⁵ Ika sipwe achocho ngeni ach sipwe eani ewe sokkun ekiek Jises a eani, esap pout senikich chengelin Jiowa, inaamwo ika minne epwe fis lon manauach esap ussun minne sia ekiekin kuna. Iei alon ewe soufos Maika: “Nge ren ngang, upwe witiwiti Jiowa. Upwe eani ekiek mi mosonottam ren ewe Koten ai amanau.” (Maika 7:7, NW; Kolun Kechiu 3:21) Kich sipwe pwal tongeni eani ekiek mi mosonottam. Ifa ussun? Lon chommong mettoch. Aewin, eli sia meefi pwe emon brother mi wor wiisan a fen mwaallilo me a lamot pwe emon epwe muttir apwungu i. Ika sia eani ekiek mi mosonottam, epwe iei ussun ach memmeef: ‘Atewe a wesewesen mwaallilo, are fen ngang ua mwaallilo? Ika pwe atewe a mwaallilo, epwe tufich pwe Jiowa a mutata minne a fiffis pokiten an meefi pwe atewe epwe amurinnolo lapalapan, iwe, esap wor lamoten an epwe kuna apwung mi chou?’

6. Ifa ussun ekiek mi mosonottam epwe alisi emon mi angang weires le pwakini och osukosuk lon pwisin manauan?

⁶ Eli epwe lamot ach sipwe eani ekiek mi mosonottam ika a wor och osukosuk lon manauach are sia angang weires le pwakini och mettoch sia apwangapwang lon. Epwe ifa ussun ika sipwe tingorei Jiowa ren an alillis, nge ewe osukosuk mi chuen sopwosopwolo? Sipwe foffori chok minne mi tufich ren ach sipwe pwakini ewe osukosuk, iwe, sipwe luku alon Jises ei: “Oupwe titingor, o epwe ngenikemi; oupwe kukutta, o oupwe kuna; oupwe fichifich, o epwe suuk ngenikemi.” (Luk 11:9) Sipwe ikkiotek me eani lukuluk won Jiowa. Lon eu fansoun mi ffich me pwal lon eu lapalap a pwisin filata, Jiowa epwe polueni ach kewe iotek.​—1 Tesalonika 5:17.

7. Ifa ussun ekiek mi mosonottam epwe alisikich pwe sipwe eani ekiek mi pwung ussun porausen Paipel an a kan fatafatelo ekis me ekis?

⁷ Lupwen ekkewe oesini lon Paipel ra pwopwonuta, a kan fatafatelo ekis me ekis ach weweiti masouen Paipel. Iwe nge, fan ekkoch eli sipwe ekieki pwe a mmang an katowu aweween och poraus. Ika ese katowu aweween lon ewe fansoun sia mochen an epwe katowu, sipwe tongeni witiwit? Chechchemeni mwo pwe Jiowa a pwari “ewe poraus mi monomon usun Kraist” ekis me ekis lon 4,000 ier. (Efisus 3:3-6) Ina minne, a ita wor popun sipwe kon atapwal lon ngunuch? A ita wor ach tipemwaramwar pwe eu “chon angang mi tuppwel o tipatchem” a fen seikita pwe epwe awora ngeni noun Jiowa kewe aramas “aner mongo lon fansoun mi ffich”? (Mattu 24:45, NW) Pwata sipwe tti senikich chengel mi fel pokiten ach sise weweiti mettoch meinisin? Chechchemeni pwe Jiowa a kan wiisen filata inet me ifa ussun an epwe pwari an kewe ‘poraus mi monomon.’​—Amos 3:7.

8. Ifa ussun mosonottamen Jiowa a fen efeiochu chommong aramas?

⁸ Eli ekkoch repwe letipechou pokiten ar meefi pwe mwirin chommong ierin ar angang fan tuppwol, eli resap manau tori ar repwe kuna “ranin Jiowa we, ewe mi lapalap me aniuokkus.” (Joel 2:30, 31, NW) Iwe nge, repwe tongeni meefi pwapwa lupwen repwe nengeni ochchun ena mettoch. Iei an Piter fon: “Oupwe ekieki usun mosonottamen ach Samol, pwe iei amanauen ngunumi.” (2 Piter 3:15) Mosonottamen Jiowa a fen mut ngeni fite milion aramas mi wenechar letiper ar repwe silei ewe enlet. Esap ina eu mettoch mi murinno? Pwal och, fansoun mosonottamen Jiowa epwe sopwosopwolo, epwe lapalo ach fansoun fan iten ach sipwe “akkangang fan iten pwisin amanauach fan niuokkus me chechchech.”​—Filipai 2:12, NW; 2 Piter 3:11, 12.

9. Ika pwe mi kauk minne sia tufichin fori lon ach angang ngeni Jiowa, ifa ussun ekiek mi mosonottam epwe alisikich le likiitu fan ena lapalap?

⁹ Ekiek mi mosonottam a kan alisikich pwe sisap letipechou lupwen osukosuk epwe eppetikich lon ach angang fan iten ewe Muu, awewe chok ren an aramas oputakich, samau, me ach chinnapelo. Jiowa a ekiekin kuna senikich ach sipwe angang ngeni ren unusen letipach. (Rom 12:1) Iwe nge, Noun Kot we, ewe mi “lolileniesini ekkewe aramas mi apwangapwang, o ekkewe mi osupwang,” ese kutta senikich lap seni minne sia kan tufichin fori, iwe, a pwal ina ussun Jiowa. (Kol Fel 72:13) Ina minne, a wor pesepes ngenikich pwe sipwe apwonueta minne mi pwak rech, iwe, sipwe witiwit fan mosonottam tori an epwe siwil nonnomuch​—lon ei otot minen lom are lon enan epwe feito. Chechchemeni mwo pwe “Kot mi pung, o esap monukalo ami angang me tong fan asengesin itan, mi ami oua pwaralo lon ami angang ngeni ekkewe aramas mi fel, seni lom tori ikenai.”​—Ipru 6:10.

10. Emon mi eani ekiek mi mosonottam epwe tongeni tti seni manauan menni lapalap Kot a oput? Awewei mwo.

¹⁰ Mosonottam a pwal alisikich pwe sisap lamalam tekia. Ekkoch mi rikilo seni ewe enlet rese tongeni witiwit. Eli ra meefi pwe a lamot an epwe siwil weween ekkoch porausen Paipel are och kokkot lon ach mwicheich. Nge, rese miritiiti pwe an Jiowa ngun mi fel a akkamwokutu ewe chon angang mi tuppwol me tipachchem an epwe siwili ekkoch mettoch lon eu fansoun Jiowa a pwisin filata, nge esap lon eu fansoun kich sia meefi pwe a lamot an epwe siwil och mettoch. Iwe, ika och mettoch epwe siwil, epwe tipeeu ngeni letipen Jiowa, nge esap minne sia pwisin ekieki. Chon rikilo ra kan mut ngeni lamalam tekia an epwe angaua ar ekiek me oturukaper. Nge ika ra fen eani ekiekin Kraist, repwe fen tufichin amwochu ar chengel me nonnom lein noun Jiowa kewe aramas.​—Filipai 2:5-8.

11. Ifa ussun sipwe tongeni aeaochu ach fansoun witiwit, nge sipwe kan appiru fofforun io?

¹¹ Pwungun pwe ach eani ekiek mosonottam esap wewe ngeni ach sipwe chipwang are tenechepwak. A wor mettoch sipwe fori. Awewe chok, a lamot ach sipwe achocho le pwisin kaeo Paipel, iwe, epwe iei ussun ach sipwe pwarata tinikken fan iten mettochun ngun, nge iei ewe sokkun tinikken a nom ren ekkewe soufos mi tuppwol me pwal mwo nge ekkewe chonlang. Iei makkeien Piter ussun ena sokkun tinikken: “Ekkewe soufos mi oesini ewe chen mi epwe ngenikemi, ra fen kukutta o eisfichi usun ei sokkun amanau . . . Ekkewe mettoch ekkewe chonlang ra mochen kuna.” (1 Piter 1:10-​12) Sap minne sipwe chok pwisin kaeo nge a pwal lamot ach sipwe fiffiti mwich me ikkiotek. (Jemes 4:8) Ir mi pwarata ar meefi lamoten ekkewe mettochun ngun ren ar akkangei mongoon ngun me ar fiffiti mwich ra affata pwe ra fen eani ekiekin Kraist.​—Mattu 5:3.

Eani Ekiek mi Wenechar

12. (a) Atam me If ra mochen ar repwe imulo seni met? (b) Met a fen fis pokiten an chon fonufan tapwelo mwirin alen Atam me If?

¹² Lupwen Kot a forata ewe akkaewin pean aramas, a amwochu ewe pwuung fan iten an epwe pwisin allukatiu minne a pwung me mwaal. (Keneses 2:16, 17) Atam me If ra mochen ar repwe imulo seni an Kot emmwen, me minne ra filata a efisata minne sia kuna won fonufan ikenai. Iei makkeien ewe aposel Paul: “Iei minne, usun chok tipis a tolong lon fonufan ren emon aramas, o pwal malo ren tipis, iei usun malo a pwal tori aramas meinisin, pun aramas meinisin ra tipis.” (Rom 5:12) Wonu ngerou ierin uruwoon chon fonufan poputa seni fansoun Atam we a pwarata pwe mi enlet makkeien Jeremaia ei: “Ua sileifichi, O Jiowa, pwe esap nemenien aramas pwisin aler. Esap wiisen aramas mi feffetal ar repwe pwal mwo nge ekkemmweni ipwer.” (Jeremaia 10:23, NW) Ach nguuri alon Jeremaia esap weween pwe ach ekiek a mwaal. Fen ina ewe ekiek mi wenechar. A awewei ewe popun “aramas ra fen nemenemengau won aramas, iwe, ra feiengau ren” lon ekkewe fitepuku, fitepuku ier pokiten an aramas pwisin uta fan ar kewe nemenem mi imulo seni Kot.​—Eklesiastis 8:9, NW.

13. Ifa ewe ekiek mi wenechar Chon Pwarata Jiowa ra eani ussun minne aramas repwe tufichin apwonueta?

¹³ Pokiten an a ina ussun minne mi fiffis lein aramas iei, Chon Pwarata Jiowa ra weweiti pwe mi kauk minne repwe tongeni fori lon ei otot minen lom. Ach eani ekiek mi murinno epwe tongeni alisikich pwe sipwe amwochu ach chengel, nge sap minne ena sokkun ekiek epwe tufichin pwakini mettoch meinisin. Mwirin 1950, emon chon afalafal lon Merika a makkei eu puk itan The Power of Positive Thinking me a moolo chommong kapiin. Ena puk a apasa pwe aramas repwe tongeni pwakini chommong ar kewe osukosuk ika repwe eani ekiek mi murinno. Nge kunaen aramas a affata pwe silelap, tipachchem, pisek, me pwal chommong sokkun mettoch me lukun ra kan aukuuku met aramas ra tufichin fori. Iwe, ren ekkewe osukosuk won unusen fonufan, sia kuna pwe ra kon watte, ina minne, aramas resap tufichin pwakiniir​—inaamwo ika ra eani ekiek murinno!

14. Chon Pwarata Jiowa ra kan eani ekiek mi mwaal? Awewei mwo.

¹⁴ Pokiten ar eani ekiek mi wenechar ussun ekkena mettoch, fan ekkoch aramas ra apasa pwe Chon Pwarata Jiowa ra kan eani ekiek mi mwaal. Iwe nge, ra tinikken le esile ngeni aramas ussun ewe Emon chok mi tufichin amurinnolo lapalapen fonufan. A pwal ina ussun ar eani ekiekin Kraist. (Rom 15:2) Ra pwal achocho le alisi aramas pwe repwe forata ar ririoch ngeni Kot. Ra silei pwe ina ewe mettoch epwe atoto feiochfochofoch ngeniir.​—Mattu 28:19, 20; 1 Timoti 4:16.

15. Ifa ussun angangen Chon Pwarata Jiowa a kan amurinnolo manauen aramas?

¹⁵ Chon Pwarata Jiowa rese kan tunalo ekkewe osukosuk mi choufetal​—akkaewin, ekkewe foffor mi limengau me ra u ngeni Paipel. Ika emon a mochen wiliiti emon Chon Pwarata Jiowa, epwe akkom siwili manauan, iwe, fan chommong epwe wewe ngeni an pworaiti ekkewe foffor Kot ese pwapwa ren. (1 Korint 6:9-​11) Ina minne, Chon Pwarata Jiowa ra fen alisi aramas mi tipemecheres pwe resap chuen unupuch, ukkun safeien opuchopuch, lisowu mwaal, me pet won moni. Chokana mi fen siwili manauer ra miritilo fan iten ar repwe awora tufichin ar famili fan uwonuk me tipewenechar. (1 Timoti 5:8) Lupwen a wor ena sokkun alillis ngeni chokana me ar kewe famili, a kan kisikisilo osukosuk lon leenier​—weween, a kisilo chon unumi safeien opuchopuch, me a kukkunulo kawet lon famili, me met kan mwo. Ren ar akkalleasochisi ekkewe allukun muun me ar alisi aramas ar repwe amurinnolo manauer, Chon Pwarata Jiowa ra kan akukkunalo angangen ekkewe ofesin muun mi wiisen alisi aramas ren ar kewe osukosuk.

16. Pwata Chon Pwarata Jiowa rese fiffiti an aramas kewe kokkot fan iten ar repwe amurinnolo fonufan?

¹⁶ Iwe met, Chon Pwarata Jiowa ra fen alisi afeffeitaan fofforoch lein aramas won unusen fonufan? Iwe, lon ekkewe engol ier ra lo, nampaan ekkewe Chon Pwarata a chommongolo seni orun 3,800,000 tori arapakan 6,000,000. Weween, ra fen lapalo won orun 2,200,000, nge chommong leir ra likitalo foffor ese pwung lupwen ra wiliiti chon Kraist. Manauen chommong a fen murinnolo! Iwe nge, ena ukuukun a wesewesen kukkun lupwen sia kuna lapaloon chochoon chon fonufan lon chok ena ukuukun fansoun​—weween, a lapalo won 875,000,000! Chon Pwarata Jiowa ra kuna watte chengel seni ar alisi aramas mi tipemecheres, inaamwo ika ra weweiti pwe ekkoch chok me lein chon fonufan repwe fetal won ewe al mi ale ngeni manau. (Mattu 7:13, 14) Atun ekkewe Chon Pwarata ra witiwiti an epwe fis ekkewe siwil fan iten an epwe murinnolo unusen fonufan, nge ikkena ekkewe siwil Kot chok epwe tufichin apwonueta, rese fiti an aramas kewe kokkot, kokkotun siwili lapalapen fonufan, pwe fan chommong a murinno minne ra ekiekin apwonueta me le poputaan, nge le sopwoloon a wor lichipung are pwal mwo nge foffor mi mwanesol.​—2 Piter 3:13.

17. Met Jises a fori pwe epwe alisi aramas, nge met ese fori?

¹⁷ Ren ar fori ena mettoch, Chon Pwarata Jiowa ra pwarata pwe ra eani lukuluk won Jiowa, nge iei ewe chok sokkun lukuluk Jises a eani lupwen a nonnom won fonufan. Lon ewe aewin senturi, Jises a fori ekkewe manaman, manamanen achikara chon samau. (Luk 6:17-​19) A pwal mwo ngeni amanauata chon malo. (Luk 7:11-​15; 8:49-​56) Nge ese amoielo ewe mettoch samau are ewe chon oput malo. A silei pwe esaamwo tori an Kot fansoun fan iten ena mettoch. Pokiten Jises a unusoch, a eani ekkewe sokkun tufich mi lapalap, iwe, neman a tongeni fori chommong mettoch ren an epwe pwakini ekkewe osukosuk mi fokkun chou lon pekin nonnomun aramas me pwal lon pekin muu. A ussun ita nge ekkoch pilon kewe ra mochen pwe epwe angei pochokkulen nemenem me fori ena mettoch, nge Jises ese tipeeu ngeniir. Sia alleani pwe “Lupwen ekkewe aramas ra kuna ei esisin a fori, ra apasa, ‘Enlet, atei ewe soufos epwe feito fonufan.’ Nge Jises a meefi pwe repwele feito supuri i, o repwe seikata pwe i epwe king, Iwe, a chok alaemonuta ngeni ewe chuk.”​—Jon 6:14, 15.

18. (a) Ifa ussun Jises a pwarata pwe a eani ekiek mi mosonottam fansoun meinisin? (b) Ifa ussun angangen Jises a fen siwil poputa seni 1914?

¹⁸ Jises ese fokkun mochen angolong lon fofforun ekkewe muu are lon ekkewe sokkopaten pekin awora alillis ngeni aramas mi osupwang pun a silei pwe esaamwo war ewe fansoun fan iten an epwe angei manamanen king me wiisen apwonueta ewe angangen achikara chon fonufan meinisin. Pwal mwo nge mwirin an feita lang pwe epwe eani manauen emon ngun mi manaufoch, a tipemecheresin witiwit ren ewe fansoun Jiowa a filata mwen an epwe mwokut. (Kol Fel 110:1; Fofor 2​34, 35) Iwe nge, mwirin an wiliiti Kingen an Kot we Muu lon 1914, a sassa pwe epwe “pworacho, o pwal pworacho.” (Pwarata 6:2; 12:10) A ifa me watteen ach kilisou pokiten ach tipemecheresin anomukich fan an nemenem, iwe nge, chommong mi apasa pwe ir chon Kraist rese mochen kaeo an Paipel kewe afalafal ussun ewe Muu!

Ach Fansoun Witiwit​—Eu Minen Atoto Mangau are Chengel?

19. Inet fansoun witiwit epwe efisata ‘letipengau,’ me inet epwe efisata chengel?

¹⁹ Solomon a silei pwe fansoun witiwit epwe tongeni efisata mangau. Iei makkeian: “Are an eman apilukuluk a mang le pwonueta, i epwe letipengau.” (An Salomon Fos 13:12) A enlet pwe ika emon aramas a apilukuluku och mettoch, nge ese pwung minne a ekiekin kuna, epwe tongeni letipechoulo pokiten an lichipung. Iwe nge, ach witiwiti fansoun mi apwapwa​—awewe chok ren eu ranin apupulu, an emon fansoun nounou, are ach chufengensefal me attongach kewe​—epwe efisata ach mwasangasang fansoun langattam mwen an epwe war ena ran. Ena chengel epwe lapalo ika sipwe aeafichi ewe fansoun witiwit, weween, ika sipwe akkammolnoch fan iten ena ran epwe war.

20. (a) Met sokkun mettoch mi amwarar sia wesewesen luku ach sipwe kuna? (b) Ifa ussun sipwe tongeni kuna chengel atun ach sipwe witiwiti pwonutaan an Jiowa kewe kokkot?

²⁰ Ika pwe sia luku ren unusen letipach pwe minne sia apilukuluk ngeni epwe pwonuta​—inaamwo ika sise silei inet epwe pwonuta​—ewe fansoun witiwit esap ita eu fansoun ‘letipengau.’ Ekkewe mi tuppwol le fel ngeni Kot ra silei pwe ewe Engerou Ierin an Kraist Nemenem epwele war. Ra luku pwe repwe kuna wesiloon malo me samau. Fan mwasangasang ra witiwiti ewe fansoun lupwen repwe souni fite bilion chon manaueta seni malo, pachelong attonger kewe mi fen malo. (Pwarata 20:1-3, 6; 21:3, 4) Lon ei fansoun lupwen a wesewesen lapalapalo an aramas angaua fonufan, ra mmeseik ren ewe apilukuluk mi lukuchar, apilukulukun ar repwe kuna Paratis an epwe forsefal won fonufan. (Aisea 35:1, 2, 7) Ina minne, sipwe wenewenen mirit ika sipwe aeafichi ach fansoun witiwit, weween, “fansoun meinisin oupwe alapalo ami fori angangen ach we Samol”! (1 Korint 15:58) Akkaea fansoun meinisin ewe mongo lon pekin ngun. Akkapochokkula ach ririfengen me Jiowa. Kukkutta ir mi mochen angang ngeni Jiowa pokiten letiper a amwokutuur. Akkapochokkula chienach kewe chon luku. Akkaeafichi ewe fansoun Jiowa epwe chuen mutata ngenikich. Iwe, ika sipwe ina ussun, ach witiwiti Jiowa esap eu minen atoto ‘letipengau.’ Nge, epwe auralo letipach ren chengel!

En mi Tongeni Awewei?

• Ifa ussun Jises a pwarata pwe a eani ekiek mi mosonottam?

• Fan met sokkun lapalap epwe lamot ngeni chon Kraist ar repwe eani ekiek mi mosonottam?

• Pwata Chon Pwarata Jiowa ra kan meefi kinamwe ren ar witi Jiowa?

• Ifa ussun ach witi Jiowa epwe tongeni wiliiti eu minen atoto chengel?

[Ekkewe sasing lon pekin taropwe 22]

Jises a likiitu ren ewe chengel mi nom mwan

[Sasing lon pekin taropwe 23]

Pwal mwo nge mwirin fitu ierin ach angang ngeni Jiowa, sipwe tongeni akkamwochu ach chengel

[Ekkewe sasing lon pekin taropwe 25]

Fite milion ra fen amurinnolo manauer ren ar wiliiti Chon Pwarata Jiowa