Ewe Kapas Allim Ussun Ewe Muu Met Ena?
Lon ewe ier lon 235 fonu won unusen fonufan, 6,035,564 aramas, kukkun me chinnap, ra eani 1,171,270,425 awa le fos ngeni aramas ussun ei mettoch. Ra esilei poraus ren fos me ren ar anounou 700 milion puk me chassi ngeni aramas. Ra pwal ainetifetallei fite ngerou audiocassette me videocassette ren ar repwe aporausa porausan. Porausen met?
“ENA PORAUS” a wewe ngeni ewe kapas allim ussun an Kot we Muu. Pwungun pwe, ach afalafala “ei kapas allim ussun ewe muu” ikenai ren ei ukuukun angang esaamwo fis fan eu.—Mattu 24:14.
Chokkewe mi fori ei angangen afalafal me asukula aramas won unusen fonufan ir volunteer. Eli ekkoch aramas repwe ekieki pwe chokkeei rese tufichin fori ei angang. Nge, met popun ra pwora me sopwoch lon ar angang? Aewin, ra sopwoch pokiten manamanen ewe kapas allim, pun ina eu poraus ussun ekkewe feioch epwe tori aramas. Ikkeei ekkewe feioch aramas meinisin ra tipeni—pwapwa, wesiloon osukosuken moni, muu mi murinno, kinamwe me lukulukoch, me pwal eu mettoch chommong aramas ra ekieki pwe mi amwarar—manau esemuch! Pwungun pwe iei eu kapas allim ngeni aramas mi kukkutta met weween me met popun manauer. Ewer, ekkeei feioch meinisin me pwal chommong mettoch epwe toruk ika ka etiwa me auseling ngeni ewe kapas allim ussun ewe Muu.
Meta Ewe Muu?
Nge meta ewe kapas allim ussun ewe Muu? Ina ewe Muu fite milion ra fen kaeo le ioteki lon ekkeei kapas: “Semem mi nonnom lang, itom epwe fel, muom epwe feito, letipom epwe pwonueta won fonufan usun chok lon lang.”—Mattu 6:9, 10.
Ina ewe Muu ewe soufos loom itan Taniel a fos ussun lap seni 2,500 ier loom lupwen a makkeei: “Ewe Koten lang epwe aueta eu mwu esap tongeni tala, esap pwal wor eu mwu epwe tongeni akufu. Iwe, ei mwu epwe ataela o arosala ekewe lusun mwu, nge epwe pusin nom tori feilfeilachok.”—Taniel 2:44.
Iwe, ewe kapas allim a weneiti Muu, are nemenem, Kot epwe aea le awesalo fofforingau meinisin me mwirin epwe nemeni unusen fonufan lon kinamwe. Epwe apwonueta an ewe Chon Forata kokkot me le poputaan fan iten aramas me fan iten ewe fonufan.—Keneses 1:28.
“Muun Lang A Arapoto”
Arapakan 2,000 ier me loom, ewe kapas allim ussun ewe Muu a akkom esile ngeni aramas ren emon mwan mi fokkun achocho. Aramas ra ingelo ren foutan me lapalapan. Iten ena mwan, Jon Papatais, noun ewe emon samol fel Chon Jus, Sekaraia, me puluwan we itan, Elisapet. Jon a ufouf ufan mi ffor seni unen kamel me ririin lukanapan a ffor seni unuchen man ussun chok Elias, ewe emon a liosueta Jon. Nge chommong aramas ra ingeiti an Jon we poraus. Jon a apasa: “Oupwe aier, pun muun lang a arapoto.”—Mattu 3:1-6.
Chokkewe mi auseling ngeni Jon ir Chon Jus, aramas mi apasa pwe ir chon fel ngeni ewe Kot mi enlet, Jiowa. Orun 1,500 ier me mwan, ewe muun Israel a fen angei ewe Alluk fan iten ewe pwon ren Moses. Ewe imwen fel mi amwarar a chuen nonnom lon Jerusalem, ia ra asoresini ekkewe asor ie me ren alon ewe Alluk. Mwen mesen Kot, ekkewe Chon Jus ra fokkun lukuluk pwe ar fel mei pwung.
Iwe nge, lupwen ra auseling ngeni Jon, ekkoch aramas ra miritiiti pwe ar lamalam ese pwung. Fofforun me ekiekin Chon Kriis ra fen anifelong lon ewe lamalamen Jus. Iwe, ewe alluk Moses a angei seni Kot a fen limengauolo, are pwal mwo nge lamot mwaal pokiten an aramas kewe luku me eoreni. (Mattu 15:6) Lape ngeniir rese chuen apwapwai Jiowa ren ar fel pokiten emmweningauaen nour kewe nouwis mi tipeforea me rese umoumoch. (Jemes 1:27) A lamot ar repwe aier seni ar kewe tipis ngeni Kot me ngeni ewe Alluk fen iten ewe pwon.
Lon ena fansoun, chommong Chon Jus ra wikkiti warotoon ewe Messaia mi pwoneetiu, are Kraist, me ekkoch ra kan ekieki ussun Jon: “Ika i ewe Kraist, are meet?” Iwe nge, Jon a apasa pwe esap i ewe Kraist nge a emmweniir ngeni pwal emon: “Use fich ngeni ai upwe epichi ririn tukutukun pechen.” (Luk 3:15, 16) Lupwen Jon a pwari Jises ngeni noun kewe chon kaeo, a apasa: “Nengeni, ewe Lamen Kot, ewe epwe uweialo tipisin fonufan!”—Jon 1:29.
Ina wesewesen eu kapas allim, pun Jon a aiti ngeni aramas meinisin ewe aal ngeni manau me pwapwa—Jises, ewe emon epwe “uweialo tipisin fonufan.” Pokiten kich mwirimwirin Atam me If, oukich meinisin mi nonnom fan feiengauaen tipis me malo seni ach uputiu. Rom 5:19 a awewei: “Pun usun chok ewe alleasolap an emon aramas [Atam] a efisata tipis ren chommong aramas, epwe chok iei usun ewe alleasochis an emon [Jises] epwe efisata pung ren chommong.” Jises, ussun chok emon Lam fan iten asor, epwe ‘uweialo tipis’ me siwili lapalapen manauen aramas mi attong. Ewe Paipel a apasa: “Pun liwinin tipis malo, nge liffangen ewe chenin Kot manau esemuch lon Kraist Jises ach Samol.”—Rom 6:23.
Jises emon mwan mi unusoch—ren enletin, ewe mwan mi lapalap seni meinisin—a afalafala ewe kapas allim. Ewe poraus lon ewe Paipel a mak lon Mark 1:14, 15 a erenikich: “Iwe, mwirin an Jon fotek, Jises a feilo ngeni fonuen Kalili, o a afalafala ewe kapas allim usun Kot. Iwe a apasa: ‘Ewe fansoun a pwonueta, o ewe muun Kot a arapoto. Oupwe aier o luku ewe kapas allim.’”
Chokkewe ra auseling ngeni porausen Jises me eani lukuluk won ewe kapas allim ra feioch wachemuk. Jon 1:12 a apasa: “Nge ngeni ir meinisin mi etiwa [Jises], a fangelo manaman pwe repwe noun Kot, ir ekkewe mi luku itan.” Pokiten ir noun Kot, repwe tongeni angei ewe feiochun manau esemuch.—1 Jon 2:25.
Nge ekkewe feioch seni ewe Muu esap chok fan iten aramas lon ewe aewin senturi. Ussun a fen mak akkom, ewe kapas allim ussun an Kot Muu a esilefeili me kait ngeni aramas won unusen fonufan ikenai. Ina popun, aramas mi chuen tongeni angei ekkewe feioch seni ewe Muu. Met kopwe fori ren om kopwe angei ekkena feioch? Ewe poraus mwirin epwe erenikich.