Kopwe Tongeni Angei Ekkewe Feioch Seni Ewe Muu
EWE aposel Paul a fokkun silei le fos ekkoch ekkewe fos mi lamot lon ranin we. An sukul epwe lollo ngeni emon a fen sukul lon university ikenai. A pwal wor ekkewe feiochun chon wiliposun Rom. (Fofor 21:37-40; 22:3, 28) Ita ekkeei mettoch epwe fen atufichi Paul le wiliiti emon mi wouoch me itefoulo. Nge, Paul a apasa: “Minne a win rei ua chok apasa pwe mi lus rei pokiten Kraist . . . upwe apasa pwe mettoch meinisin mi chok lus rei, pokiten ai upwe sinei Kraist Jises ai Samol mi lamot ngeniei lap seni mettoch meinisin.” (Filipai 3:7, 8) Met popun Paul a apasawu ena esin kapas?
Paul a akkom iteni ewe it Saul seni Tarsus, me a eriaffou chokkewe “mi aleni ewe Al,” nge a wiliiti chon luku mwirin an kuna eu langepwi ussun lingen Jises mwirin an manausefal. (Fofor 9:1-19) Fan iten Paul, met a kuna won ewe aal ngeni Tamaskos a annetata pwe Jises ewe Messaia mi pwoneetiu, are Kraist, ewe emon epwe nemenem lon ewe Muu mi pwoneetiu. A pwal wato ei siwil watte ngeni manauen Paul, ussun an kewe kapas mi makkeei asan a fen pwarata. Weween pwe, Paul a aier pokiten i emon mi wenechar me letip enlet.—Kalesia 1:13-16.
Lon ewe Paipel, fan chommong ewe kapas “aier” a chiyaku seni ewe kapasen Kriis mi wewe ngeni “sileimwirin” mi sokko seni “sileimwen.” Ina popun, aier a weneiti eu siwil lon an emon ekiek, memmeef, are kokkot, an emon u ngeni fofforun we me loom pokiten ese och. (Fofor 3:19; Pwarata 2:5) Ngeni Paul, met a fis won ewe aal ngeni Tamaskos ese chok achungu letipan are apochokkula an achocho lon pekin ngun. Fan iten Paul, ina ewe fansoun an keran kuna pwe lapalapen manauan mi lamot mwaal pokiten an ese silei Kraist. A pwal miritiiti ewe lamoten an epwe siwili manauan pwe epwe feioch seni ewe sile a keran angei ussun Kraist.—Rom 2:4; Efisus 4:24.
Eu Siwil Mi Wato Feioch
Me loom, lape ngeni an Paul sile ussun Kot a feito seni ewe lamalamen Farisi. A kapachelong lon ar lamalam chommong ekiekin me eorenien aramas. Pokiten an Paul ekiek ussun lamalam a lifilifil, an achocho me angang ese pwung. Inaamwo ika a ekieki pwe a angang ngeni Kot, nge a wesewesen u ngeni i.—Filipai 3:5, 6.
Mwirin an Paul angei sile mi enlet ussun ewe Kraist me wiisan lon an Kot we kokkot, a tongeni kuna an epwe wiisen filata: Epwe chok sopweilo le fiti ewe lamalamen Farisi me pwapwaesini wiisan we me an aramas mwareiti i, are epwe siwili manauan me poputa le fori met epwe apwapwai Kot? A mmen apwapwa pwe Paul a filioch, pokiten a apasa: “Use mo sau ren ewe kapas allim, pun iei ewe manamanen Kot mi tongeni amanaua iteiten aramas mi luku, ngeni ekkewe Jus akkom, o pwal ngeni ekkewe chon Kris.” (Rom 1:16) Paul a wiliiti emon chon afalafal mi achocho le esilefeili ewe kapas allim ussun ewe Kraist me ewe Muu.
Mwirin chommong ier, Paul a ereni chienan kewe Chon Kraist: “Use mo ekieki pwe ua fen pwisin angei; nge eu chok me rei, upwe monukalo ekkewe mettoch mi nom mwiri, o upwe changeri ekkewe mettoch mi nom mwei, pwe upwe achocho ngeni ewe tepkiri ren winen ewe koko mi tekia, ewe koko seni Kot lon Kraist Jises.” (Filipai 3:13, 14) Paul a kuna alillis seni ewe kapas allim pokiten a pukun filata le su seni ekkewe mettoch mi arikalo i seni Kot me a letip unus lon an achocho ngeni ekkewe mettoch mi tipeeu ngeni an Kot kokkot.
Met Kopwe Fori?
Eli ka keran rongorong porausen ewe kapas allim ussun ewe Muu. A mmen ammeseik ngonuk ewe apilukulukun manau tori feilfeilo lon eu paratis mi unusoch? Epwe chok pwung ika sipwe apasa wuu, pokiten kich meinisin sia mochen manau me pwapwaesini kinamwe me lukulukoch. Ewe Paipel a apasa pwe Kot a fen walong “manau esemuch” lon letipach. (An Salomon Afalafal 3:11) Ina popun esor ngauen ach sipwe apilukuluku ewe fansoun lupwen aramas repwe tongeni manau feilfeilo lon kinamwe me pwapwa. Ina met sipwe ekiekin kuna fan nemenien ewe Muu.
Iwe nge, epwe lamot om kopwe kaeofichi ussun porausen ei kapas allim pwe kopwe tongeni alamota ei luku. Ewe aposel Paul a apasa: “Oupwe wililo ren asefosefallin letipemi, pwe oupwe pwarata minne letipen Kot, minne mi murinno o fich o unusoch.” (Rom 12:2) Iwe, ussun chok Paul, epwe lamot pwe mwirin om angei sile me weweoch kopwe wiisen filata.
Nge, eli mei fen wor om luku ussun met epwe fis ngonuk lon mwach kkan. Chechchemeni mwo pwe mei fen wor pwisin an Saul kewe ekiek ussun letipen Kot mwen an wiliiti ewe aposel Paul. Nge pwata kese fori ei mettoch nge kesap chok witiwit pwe an Kot manaman epwe pwarata ngonuk? Kopwe pwisin eisinuk: ‘Ua wesewesen silei letipen Kot fan iten aramas me ach ei fonufan? Ikkefa ai kewe pisekin annet mi annetata ai kewe luku? Ai kewe pisekin annet mi tipeeu ngeni an Kot Kapas, ewe Paipel?’ Om atittina om kewe luku lon pekin ngun epwe efeiochuk. Ren enletin, kopwe mochen fori ei mettoch pokiten ewe Paipel a peseikich: “Oupwe sotuni mettoch meinisin; oupwe amwochu minne mi murinno.” (1 Tesalonika 5:21) An Kot pwapwaitikich, esap ina ewe mettoch mi lamot seni meinisin?—Jon 17:3; 1 Timoti 2:3, 4.
Eli ekkewe nouwisin lamalam repwe pwon pwe sipwe manau feilfeilo chok. Nge ika ena pwon ese longolong won aitien ewe Paipel, ekkewe feioch seni an Kot Muu esap torikich. Lon an Afalafal mi itefoulo won ewe Chuuk, Jises a ouroura kich: “Esap iteiten aramas meinisin mi apasa ngeniei, ‘Samol, Samol’ epwe tolong lon muun lang, pwe ir chok mi fori letipen Semei mi nonnom lang.”—Mattu 7:21.
Jises a itelapei ach foffori letipen Seman ika sipwe angei ekkewe feioch seni an Kot Muu. Weween pwe, pokiten eu mettoch a nikinikin fich ngeni Kot chok, sap minne Kot a pwapwa ren. Pwungun pwe, Jises a apasa: “Chommong aramas repwe apasa ngeniei lon ewe ran, ‘Samol, Samol, esap pwe am chon afalafal fan itom? Esap pwe am chon asulo ekkewe timon fan itom? Esap pwe am chon fori chommong manaman fan itom?’ Iwe, upwe chok pwar ngenir, ‘Use mo sineikemi. Oupwe chok su seniei, ami mi fori minne mi ingau!’” (Mattu 7:22, 23) A ffat pwe ewe mettoch mi lamot seni meinisin ach wesewesen weweiti meta ewe kapas allim ussun ewe Muu me mwirin ach atipeeufengenni manauach ngeni.—Mattu 7:24, 25.
Mei Wor Alillis
Ren lap seni 100 ier, Chon Pwarata Jiowa ra fen afalafala ewe kapas allim ussun Muun Kot. Ren ar nounou puk me chassi me ren ar afalafal, ra alisi aramas won unusen fonufan le angei sile mi enlet ussun weween ewe Muu, ekkewe feioch epwe wato, me met aramas repwe fori pwe repwe angei ekkena feioch.
Sia peseiok le auseling ngeni ewe poraus Chon Pwarata Jiowa ra afalafala. Ren om etiwa me fori met ewe kapas allim a apasa, epwe tongeni toto reom feioch watte esap chok iei nge pwal lon mwach kkan lupwen Muun Kot a nemeni unusen fonufan.—1 Timoti 4:8.
Poputa le kaeo ussun ewe Muu iei, pokiten ekkewe feioch seni an Kot Muu ra arapoto!
[Pictures on page 7]
Chon Pwarata Jiowa ra afalafala ewe kapas allim ussun an Kot Muu ren ar nounou puk me chassi me ren ar afalafal