“Kukutta Kinamwe O Tapwelo Mwirin”
“Are mi tufich, ukukun minne oua tongeni, oupwe kinamwefengen me aramas meinisin.”—ROM 12:18.
1, 2. Ikkefa ekkoch popun ewe sokkun kinamwe aramas ra efisata esap nomottam?
EKIEKI mwo nge a wor eu imw mi apwangapwang longolongun, a kirou ekkewe auchamw, me a sapwilitiu osun. Kopwe ita ekiekin imweimw? Neman kopwe apasa aapw. Inaamwo ika epwe peinit, nge ena imw epwe chuen chok apwangapwang. Eli ekiselo chok nge ena imw epwe turulo.
2 Sokkun kinamwe meinisin mi fisita lon ei fonufan a ussun chok ena imw. Epwe kau won longolong mi apwangapwang—weween, won ekkewe pwon me kokkot seni aramas, nge “resap tongeni amanaua emon.” (Kolfel 146:3) Lon porausen uruwo, a pwalo pwe fansoun meinisin a fen okor maun lefilen muu me einang. A enlet pwe a fen wor fansoun kinamwe mi mwoch, nge mei fet ena kinamwe? Ika ruu muu ra maunfengen, iwe mwirin, a fis kinamwe pokiten eu leir a kkuf are ir me ruu ra meefi pwe resap tongeni win lon ewe maun, iwe, mei fet ena sokkun kinamwe? Ewe oput, amoson, me lolowo mi efisata ena maun mi chuen nom. Ewe sokkun kinamwe mi ussun ita och ‘peinit’ mi apwolu ewe oput lefiler esap ina ewe sokkun kinamwe mi enlet.—Isikiel 13:10.
3. Pwata ewe kinamwe mi nom ren noun Kot kewe aramas a sokko seni ewe kinamwe aramas ra efisata?
3 Iwe nge, a wor kinamwe mi enlet lon ei fonufan mi ur ren maun. Nge a nom ia? A nom lein chon tapwelo mwirin ipwen Jises Kraist, nge ir chon Kraist mi enlet, iwe, ra akkalleasochisi alon Jises me akkachocho ngeni ar repwe appiru manauan. (1 Korint 11:1; 1 Piter 2:21) Mi enlet ewe kinamwe lefilen chon Kraist mi enlet seni ekkewe muu me einang me tettelin aramas mi sokkopat, pun a popu seni ewe ririin kinamwe lefiler me Kot, ewe mi longolong won ar luku ewe asorun penmanau Jises Kraist a awora. Ar kinamwe eu liffang seni Kot, nge esap ina och mettoch aramas ra kefisita. (Rom 15:33; Efisus 6:23, 24) A fisita pokiten ar akkanomuur fan nemenien ewe “Samolun Kinamwe,” Jises Kraist, me ar fel ngeni Jiowa, “ewe Koten tong me kinamwe.”—Aisea 9:6; 2 Korint 13:11.
4. Ifa ussun emon chon Kraist a kan “tapwelo mwirin” kinamwe?
4 Kinamwe ese pukun tori aramas ese unusoch manauer. Ina minne, Piter a makkei pwe emon me emon chon Kraist epwe “kukutta o tapwelo mwirin.” (1 Piter 3:11) Ifa ussun sipwe tongeni fori ena mettoch? Eu oesini seni lom lom a awora poluan. Ren an nounou ewe soufos Aisea, Jiowa a apasa pwe “Iwe, noum kewe mwan meinisin repwe kaio seniei, upwe awouur o fang ngeniir kinamwe.” (Aisea 54:13; Filipai 4:9) Ewer, kinamwe mi enlet a kan toto ren ir mi alleasochisi an Jiowa kewe afalafal. Pwal och, kinamwe fitifengen me “tong, pwapwa, . . . mosonoson, kirokiroch, lipwakoch, luku, tipefesir, forfichi,” uwaan an Kot ngun mi fel. (Kalesia 5:22, 23) Kinamwe esap toto ngeni emon ika ese nom ren tong, chengel, mosonottam, kirokiroch, fofformurinno, tuppwol, tipefesir, are ewe tufichin nemeni meefian me fofforun.
“Kinamwefengen me Aramas Meinisin”
5, 6. (a) Ifa sokkofesenin emon mi kinamwe me emon mi efisata kinamwe? (b) Chon Kraist ra kan achocho ngeni ar repwe kinamwefengen me io?
5 Aramas ra apasa pwe kinamwe a wewe ngeni “fansoun mosonoson, are fansoun esor osukosuk, fitikoko, akurang.” Ena awewe epwe weneiti chommong fansoun lupwen esor fitikoko. Pwal mwo nge emon aramas mi ma a kinamwe! Iwe nge, ren ach sipwe tufichin pwapwaesini kinamwe mi enlet, sap minne sipwe chok aramas mi kinamwe. Iei alon Jises lon an we Afalafal won ewe Chuuk: “Ra feioch, ir mi chon efisata kinamwe, pun repwe eiten ngenir noun Kot.” (Mattu 5:9) Jises a kapas ngeni aramas mi suuk ngeniir ewe apilukulukun ar repwe wiliiti noun Kot lon pekin ngun, iwe mwirin, repwe eani ewe sokkun manau esap tongeni morolo lon lang. (Jon 1:12; Rom 8:14-17) Iwe, lo, lo, meinisin chon tuppwol, nge esap ir aramas mi eani ewe apilukulukun manau lon lang, repwe “eti noun Kot kewe lon ewe ngas mi ling.” (Rom 8:21) Aramas mi kinamwe chok repwe tongeni eani ena apilukuluk. Ewe kapasen Kriik fan iten “aramas mi kinamwe” a wesewesen wewe ngeni “chon efisata kinamwe.” Fan chommong ena kapas aramas mi kinamwe—weween, emon mi eani kinamwe—a sokko seni ena kapas chon efisata kinamwe. Me ren ewe Paipel, ewe kapas chon kinamwe a wewe ngeni emon mi ekkefisata kinamwe, iwe, fan ekkoch ena sokkun aramas epwe efisata kinamwe lupwen esor kinamwe mesemwan.
6 Ekieki mwo ena mettoch, iwe, nengeni mwo an ewe aposel Paul fon ngeni chon Rom: “Are mi tufich, ukukun minne oua tongeni, oupwe kinamwefengen me aramas meinisin.” (Rom 12:18) Sap minne Paul a ereni chon Rom pwe repwe chok kinamwe lon letiper, inaamwo ika epwe murinno ena. Nge a peseer pwe repwe efisata kinamwe. Ren io? Ren “aramas meinisin”—chon ar kewe famili, chiener kewe chon Kraist, me pwal ren chokewe rese etiir lon ar lukuluk. A pesei chon Rom pwe repwe efisata kinamwe lefiler me aramas ‘ukukun minne ra tongeni.’ Ese mochen ar repwe likitalo minne ra luku fan iten forutaan kinamwe. Resap asonga aramas, nge repwe fos ngeniir fan ewe ekiekin efisata kinamwe. Epwe ina ussun chon Kraist, ese lifilifil ika repwe chufengen me chon ewe mwichefel are chon lukun. (Kalesia 6:10) Iei makkeien Paul mi tipeeu ngeni ena: “Oupwe kukutta fofor-murinno lefilemi, pwal ngeni aramas meinisin.”—1 Tesalonika 5:15.
7, 8. Ifa ussun me met popun chon Kraist ra kinamwe ngeni chokewe rese fitiir lon ar luku?
7 Ifa ussun sipwe tongeni kinamwefengen me chokewe rese etikich lon ach luku are pwal mwo nge ir mi u ngeni minne sia luku? Aewin, sisap ameef ngeniir pwe ussun ita kich mi tekia seniir. Ren chok awewe, esap eu fofforun kinamwe ach sipwe esiita aramas. Jiowa a fen pwarata an apwung won ekkewe mwicheich me tettelin aramas, nge esor ach pwuung pwe sipwe kapas ussun emon pwe epwe ussun ita nge a fen kuna apwung. A enlet pwe esap kich chon apwungu aramas, pwal mwo nge ir mi u ngenikich. Mwirin an ereni Taitos pwe epwe fonou chon Kraist lon Krit ussun ar foffor ngeni ekkewe aramas mi wiisen nemeniir, Paul a apasa pwe epwe achema ngeniir ar “resap esiita emon, resap aninifengen, repwe umoumoch, o repwe pwarata mosonoson mi unusoch ngeni aramas meinisin.”—Taitos 3:1, 2.
8 Ach kinamwefengen me chokewe rese fitikich lon ach luku a mmen lamot pun a peppeseer ar repwe eani ekiekoch ussun ewe enlet. Pwungun pwe sise kan amaarata ewe sokkun chiechi mi “alimengaualo ach kewe fofor murinno.” (1 Korint 15:33) Iwe nge, sipwe tongeni pwarata fairo, me sipwe sufoliiti aramas meinisin me pwarata kirokiroch ngeniir. Iei makkeien Piter: “Oupwe manauesini sokkun manau mi fakkun murinno lein ekkewe Jentail, pwe inaamo ika repwe aitengaualo ami usun chon forata mi ingau, nge repwe nengeni ami kewe fofor-murinno, o repwe alingalo Kot lon ranin an waroto.”—1 Piter 2:12.
Chon Efisata Kinamwe lon ewe Angangen Afalafal
9, 10. Ifa ewe leenien appiru Paul a isetiu fan iten pwarataan kinamwe ngeni chokewe rese fitikich lon ach luku?
9 Chon Kraist lon ewe aewin senturi ra itefoulo ren ar pwora. Rese siwili ewe poraus ra uweifeili, iwe, lupwen aramas ra u ngeniir, a pposolo letiper pwe repwe alleasochisi Kot pwe ar sou nemenem nge esap aramas. (Fofor 4:29; 5:29) Iwe nge, sap minne ra alollofengenni pwora me kapas pochokkul. Ekieki mwo lapalapen Paul lupwen a kapas ussun an luku mwen mesen King Erot Akrippa II. Erot Akrippa a tipisin weyingau ngeni fefinan we, Pernis. Iwe nge, Paul ese ekiekin afalafala Akrippa ussun foffor mi limoch. Nge, a menlapei ekkewe mettoch ir me ruuemon ra tipeeu won, me a apasa pwe Akrippa a silelap ussun eorenien chon Jus me i emon chon luku ekkewe soufos.—Fofor 26:2, 3, 27.
10 Paul a ita meseniau ngeni ewe mwan mi tufichin angasalo i seni fotek? Aapw. Paul a appiru pwisin an fon, iwe, a kapas enlet. Ese eani och kapas mi chofona ngeni Erot Akrippa. (Efisus 4:15) Nge Paul emon chon efisata kinamwe, iwe, a silei ifa ussun an epwe “lapalapeni lapalapen sokkun aramas meinisin ngeni sokkun aramas meinisin.” (1 Korint 9:22) An ekiek pwe epwe anneta nge a wor an pwuung le afalafal ussun Jises. Pokiten i emon sense mi angoch, a poputa ren an kapas ussun eu mettoch ir me Akrippa repwe tongeni tipeeufengen won. A ina ussun an Paul alisi ena king mi limengau manauan an epwe eani ekiekoch ussun ewe lamalamen Kraist.—Fofor 26:28-31.
11. Ifa ussun sipwe tongeni efisata kinamwe lon ach angangen afalafal?
11 Ifa ussun sipwe tongeni wiliiti chon efisata kinamwe lon ach angangen afalafal? Ussun Paul, sisap anini ngeni aramas. Pwungun pwe fan ekkoch epwe lamot ach sipwe “pworacho le apasa ewe kapasen Kot,” weween, sipwe anneta pwe a pwung minne sia luku. (Filipai 1:14) Nge a lap ngeni ekkewe fansoun ach sipwe akkaewin afalafala ewe poraus allim. (Mattu 24:14) Ika emon aramas epwe weweiti ewe enlet ussun an Kot kewe kokkot, iwe, epwe tongeni poputa le likitalo ekkewe ekiek mi chofona lon pekin lamalam me alimelima pwisin i seni ekkewe foffor ese pwung. Ina minne, ukuukun ach tufich, sipwe menlapei ekkewe mettoch epwe kku letipen chon auseling, nge sipwe poputa ren ekkewe mettoch a wor tipeeufengen won. Esap fisoch ach angang ika sipwe asonga emon, nge ita ururun pwe ena emon epwe auseling ngeni ach poraus ika sia fen angochukich le fos ngeni me le poputaan.—2 Korint 6:3.
Chon Efisata Kinamwe lon ewe Famili
12. Ifa ussun sipwe tongeni efisata kinamwe lon ach kewe famili?
12 Paul a apasa pwe ir mi pupulu repwe “kuna riaffoun fonufan.” (1 Korint 7:28) Repwe kuna riaffou mi sokkopat. Eu me lein ekkena mettoch, chon pupulu repwe tipefesen fan ekkoch. Ifa ussun repwe pwakini minne ra tipefesen won? Repwe mwokut fan kinamwe. Emon chon efisata kinamwe epwe fori met song esap lapalo ren. Ifa ussun? Akkom, epwe tumunu chonauan. Ika chonauen emon epwe tunofinuk are eani kapasen esiit, ena kukkun mettoch epwe wesewesen eu mettoch “mi ingau . . . mi ur ren safein malo.” (Jemes 3:8) Emon chon efisata kinamwe a kan aea chonauan le aufichieta aramas nge esap aletipechouur.—An Salomon Fos 12:18.
13, 14. Ifa ussun sipwe tongeni alukulukatiu kinamwe lupwen sipwe mwaallilo lon ach kapas are lupwen sipwe tipepwich?
13 Pokiten sise unusoch, fan ekkoch kich meinisin sia kan apasa mettoch sia mengiringir ren mwirin. Ika ena mettoch epwe fis, sipwe muttir awesi ewe fitikoko, weween, sipwe efisata kinamwe. (An Salomon Fos 19:11; Kolose 3:13) Sipwe tumunukich seni ach sipwe mwochulong lon “anini usun kapas” me ‘wippin ussun mettoch mi lamot kisikis.’ (1 Timoti 6:4, 5) Nge, sipwe achocho le weweiti wesewesen meefien puluwach. Ika epwe kapas pochokkul ngenikich, sisap eani ewe chok sokkun kapas. Chechchemeni pwe eu “kapasen paluen mi pwetete a awesi lingeringer.”—An Salomon Fos 15:1.
14 Fan ekkoch, eli epwe lamot om kopwe ekieki ewe fon seni An Salomon Fos 17:14: “Mwen an epwe poputa ewe anini, ke le feilo mwo.” (New World Translation) Likitalo ewe osukosuk. Mwirin, lupwen a fen kukkunulo ami tipepwich, neman oupwe tongeni pwakini ewe osukosuk pwe epwe wor tipeeufengen. Fan ekkoch, eli epwe murinno ami oupwe tingorei emon elter an epwe alisikemi. Ekkena mwan mi asimau me wewefich repwe tongeni awora alillis lupwen epwe fis och mettoch mi tongeni ataielo ewe kinamwe lefilen chon pupulu.—Aisea 32:1, 2.
Chon Efisata Kinamwe lon ewe Mwichefel
15. Me ren Jemes, menni lapalap mi ngau a fen pwukuta lein ekkoch chon Kraist, me pwata ena lapalap a popu seni fonufan, a ussun lapalapen manmwocho, me a nom lon pekin timon?
15 A eu minen aletipechou pwe ekkoch chon Kraist lon ewe aewin senturi ra pwarata pwe ra eani ewe ngunun lolowo me anini—ruu lapalap mi mwaalfesen me kinamwe. Iei alon Jemes: “Ei sokkun tipatchem ese feitiu seni won, nge seni chok fonufan; ese nom lon pekin ngun, pwe lon pekin timon chok. Pun ikewe lolowo o anini ra nom ie, iei leenien fitikoko, me sokkun fofor mi limengau meinisin.” (Jemes 3:14-16) Ekkoch ra luku pwe ewe kapasen Kriik mi afou ngeni “anini” a weneiti ewe fofforun kutta it me emiisfengen fan iten nemenem. Iwe, a pwung an Jemes makkei pwe ena lapalap a popu “seni chok fonufan; ese nom lon pekin ngun, pwe lon pekin timon chok.” Lon porausen uruwo meinisin, chon nemenem won fonufan ra fen emiisfengen, ussun chok an ekkewe manmwocho fiufengen. Aninifengen a enletin popu seni “fonufan” me “ese nom lon pekin ngun.” A pwal popu seni “pekin timon.” Ena lapalap mi fokkun ngau a akkom pwalo ren ewe chonlang mi tipemmong won nemenem, iwe, a u ngeni Jiowa Kot me a wiliiti Setan, sou nemenemen ekkewe timon.
16. Ifa ussun lapalapen ekkoch chon Kraist lon ewe aewin senturi a ussun chok ewe lapalap a nom ren Setan?
16 Jemes a pesei chon Kraist ar repwe tumunuur pwe ete maarita ewe ngunun anini, pun ena mettoch a atai kinamwe. Iei makkeian: “Ifa usun ekkewe anini are ekkewe fiu lefilemi, ra popu seni ia? Esap seni ami kewe mochenia-ingau mi fiufengen lon kifetin inisimi?” (Jemes 4:1) Ena “mochenia-ingau” epwe tongeni wewe ngeni ar mocheniaiti pisek are ar mochen kutta it are nemenem. Ussun Setan, neman ekkoch lon ekkewe mwichefel ra mochen pwe repwe itetekia, nge esap ‘chon kisifochofoch,’ pwe ina alon Jises ussun noun kewe chon kaeo mi enlet. (Luk 9:48) Ena sokkun lapalap epwe tongeni atai kinamween ewe mwichefel.
17. Ifa ussun epwe tufich ngeni chon Kraist ikenai ar repwe chon efisata kinamwe lon ewe mwichefel?
17 Ikenai, sipwe pwal fiffiu ngeni tongen pisek, lolowo, are kutta it. Ika kich wesewesen chon efisata kinamwe, sisap lolilen ika ekkoch lon ewe mwichefel ra silelap senikich lon ekkoch angang, me sisap aitengauer mwen mesen aramas ren ach efisata tipemwaramwar ussun ewe popun ra fori ar kewe angang. Ika a wor eu mettoch sia angoch lon, sisap ekiekin atekiakicheta ren, ussun ita nge ewe mwichefel epwe feioch pokiten chok angochuch me silelapach. Ena sokkun lapalap epwe efisata kinikinfesen, nge esap atoto kinamwe. Chon efisata kinamwe rese kan eani minen asikesik ar kewe tufich, nge ra akkaea tufichiir kewe fan tipetekison pwe repwe angang fan iten pwiir kewe me alinga Jiowa. Ra miritiiti pwe tong, iei esissinnen emon chon Kraist mi enlet, nge esap tufichin emon me emon.—Jon 13:35; 1 Korint 13:1-3.
“Kinamwe epwe Chon Mammasakemi”
18. Ifa ussun ekkewe elter ra kan efisata kinamwe lefiler?
18 Ekkewe elter ra kan akkom le efisata kinamwe lon ewe mwichefel. Iei an Jiowa oesini ussun noun kewe aramas: “Upwe seikata kinamwe pwe epwe wiisen chon mammasakemi me pwung pwe epwe wiisen chon akkot ngenikemi.” (Aisea 60:17, NW) Lon ar tipeeu ngeni ena mettoch, chon Kraist mi wiiseni wiisen chon mas ra akkachocho le alapalo kinamwe leir me pwal lein chon ewe mwichefel. Ekkewe elter repwe tongeni alikiitu ewe kinamwe leir ren ar eani ewe “tipatchem seni won,” ewe mi kinamwe me miritoch. (Jemes 3:17) Pokiten an a sokkopat nonnomur me kunaer lon manauer, eli fan ekkoch epwe sokkofesen ekiekin ekkewe elter lon eu mwichefel. A ita wewe ngeni pwe esor kinamwe leir? Esap ina ussun ika repwe mwokut fan mirit. Chon efisata kinamwe ra kan uwawu meefier fan tipetekison, iwe, ra auseling ngeni meefien chiener kewe ren sufol. Emon chon efisata kinamwe esap anicho fan iten pwisin an ekiek, nge epwe afanni ekiekin pwiin we fan alillisin iotek. Ika resap ipweri och emmwen seni Paipel, ina epwe tongeni wor ekiek mi sokkopat. Ika chienan kewe rese tipeeu ngeni i, emon chon efisata kinamwe epwe tipemecheresin fiti minne chienan kewe repwe apwungalo. Epwe ina ussun an epwe pwarata pwe a miritoch. (1 Timoti 3:2, 3) Chon mas mi asimau ra silei pwe ar alikiitu kinamwe a lamot seni an emon apwonueta pwisin an ekiek.
19. Ifa ussun ekkewe elter, ir chon efisata kinamwe lon ewe mwichefel?
19 Ekkewe elter ra kan alapalo kinamwe lein chon ewe mwichefel ren ar akkawora alillis ngeniir nge esap ren ar kon eiponi ar kewe angang. Pwungun pwe fan ekkoch a lamot repwe fonou ekkoch. (Kalesia 6:1) Nge sap minne emon chon Kraist mi wiisen chon mas epwe akkaewin angang fan iten kaworen fon. Fan chommong epwe apunga an aramas angang murinno. Ekkewe elter mi eani tong ra kan achocho ngeni ar repwe pi ekkewe lapalap mi murinno lon aramas. Chon mas ra kan aucheani an chiener kewe chon Kraist angang weires, me ra eani ewe lukuluk pwe chiener kewe chon luku ra angang ukuukun ar tufich.—2 Korint 2:3, 4.
20. Ifa ussun ewe mwichefel a kan feioch ika meinisin chon ewe mwichefel, ir chon efisata kinamwe?
20 Ina minne, lon ewe famili, lon ewe mwichefel, me pwal lon ach kewe foffor ngeni ir kewe rese fitikich lon ach luku, sia kan achocho ngeni ach sipwe aramas kinamwe me ach sipwe efisata kinamwe. Ika sipwe tinikken fan iten ach sipwe efisata kinamwe, sipwe alapalo kinamween ewe mwichefel. Ena mettoch epwe pwal tumunukich me apochokkulakich lon chommong sokkun lapalap, ussun sipwele kuna lon ena eu lesen mwirin ei.
En mi Chechchemeni?
• Met weween ach sipwe chon efisata kinamwe?
• Ifa ussun epwe tufich ach sipwe chon efisata kinamwe lon ach kewe foffor ngeni aramas, nge esap ir Chon Pwarata Jiowa?
• Met sokkun mettoch epwe amaarata kinamwe lon ach kewe famili?
• Ifa ussun ekkewe elter repwe tongeni alapalo kinamwe lon ewe mwichefel?
[Pictures on page 8]
Chon Kraist, ir chon efisata kinamwe lon ewe angangen afalafal, lon ar kewe famili, me pwal lon ewe mwichefel