Kopwe Tongeni Eani Luku Mi Enlet

Lupwen Sarah Jayne a 19 ierin, a pwalo pwe a uri kanserin ewe leenien for sokul. Mwirin an reirei, a meefi pochokkul me a apilukoch ussun manauan lon fansoun mwan. Enlet a kon watte an meefi apilukoch, pwe iwe lupwen a ier 20, a kofot me a poputa le akkota an ranin apupulu. Lon chok pwal ena ier, ewe kanser a pwukutasefal, iwe, a silei pwe a wor fitu chok wiik an epwe chuen manau. Sarah Jayne a malo fan June lon ewe ier 2000, ekis chok mwen an epwe ierini 21.

CHON etto aamwa Sarah Jayne lon ewe pioing ra ingeiti an apilukoch ngeni fansoun mwan fitifengen me an luku mi watte lon Kot me an we Kapas, ewe Paipel. Inaamwo ika a fokkun ngau minne a fis lon manauan, nge esor an tipemwaramwar ussun ewe apilukulukun manausefal​—weween, an epwe kunasefalli chienan kewe lon mwach kkan. (Jon 5:​28, 29) Neminnewe a apasa, “Upwe kunakemi meinisin lon an Kot we fonufan sefo.”

Ekkoch ra meefi pwe ena sokkun luku kefisitaan chok aramas. Ludovic Kennedy a eis, “Esap pwe ewe poraus ussun manau mwirin malo lukuen chok chokewe mi lukulukungau manauer pwe iwe ra luku nge le sopwoloon repwe kuna manau mi apwapwa are pwal mwo nge rappwa epwe ttik fan asengesir, iwe, lon eu tannipi mi ussun Ichen repwe eani fansoun mi apwapwa fitifengen me chokewe mi fen malo mwer me pwal chokewe mi fen malo me mwirir?” Sipwe eppieta och kapas eis mi appolua ena poraus. Sipwe mirit ika sipwe luku menni lein ekkeei ruu poraus: “A iei chok ewe manau sipwe eani, ina minne sipwe fori pwisin mochenich,” ussun Kennedy a apasa, are, sipwe luku Kot me an we pwon ussun ewe manausefal? Sarah Jayne a filata an epwe luku Kot me ewe manausefal. A ifa ussun an amaarata ena sokkun luku?

“Kukkutta Kot . . .me Wesewesen Kuna I”

Ren om kopwe amaarata om lukuluk won emon, a lamot om kopwe silei i me kaeo ika mei fet an ekiek me foffor. Ina eu mettoch letipom me ekiekum repwe angangfengen won. A pwal wesewesen ina ussun ren an emon amaarata luku mi enlet lon Kot. A lamot om kopwe silei i, me kaeo ussun an kewe lapalap me sorosorun, me miritiiti ifa ussun a tuppwol me wenechar lon an kewe kapas me foffor meinisin.​—Kol Fel 9:​10; 145:​1-​21.

Ekkoch ra meefi pwe ese pwak ena. Ra apasa pwe ika a wesewesen wor emon Kot, a kon imulo seni aramas me a kon monomon lapalapan kewe. Chon tipemwaramwar ra kan eis, “Ika pwe a wesewesen wor emon Kot me ren chon Kraist, awewe chok ren Sarah Jayne, pwata ena Kot ese pwaralo pwisin i ngenikich, weween, ekkewe lusun aramas?” Nge achiou pwe Kot a kon imulo seni aramas me esap tufich ar repwe silei lapalapan kewe? Lon eu afalafal ngeni ekkewe sou aak me sou tipachchem lon Atens, ewe aposel Paul a apasa pwe “ewe Kot mi foriata ei fonufan, pwal masouan meinisin” a fen pwal awora mettoch meinisin fan iten an aramas tufichin “kukutta Kot . . . o kuna i.” A enlet pwe iei pwal alon Paul: “Nge ese touau seni emon me emon leich.”​—Fofor 17:​24-​27.

Iwe, ifa ussun kopwe tongeni “kukutta Kot . . . o kuna i”? Ekkoch ra fen fori ena mettoch ren chok ar katol masouen lang me fonufan. Ren chommong aramas, ina eu mettoch mi awora nafochun pisekin annet mi affata ngenir pwe a wor emon Chon For.a (Kol Fel 19:1; Aisea 40:26; Fofor 14:​16, 17) Ra meefi, ussun ewe aposel Paul, pwe “Seni chok ewe fansoun Kot a foriata fonufan, aramas ra tongeni meefi, ren forian kewe, ekkewe sokkosokun Kot rese tongeni kuna, an we manaman esemuch o pwal lapalapan feilfeilo chok.”​—Rom 1:​20; Kol Fel 104:24.

A Lamot Ngonuk ewe Paipel

Iwe nge, ren om kopwe forata luku mi enlet lon ewe Chon For, a lamot ngonuk pwal eu mettoch a fen awora. Ifa ena mettoch? Ina ewe Paipel​—an Kot we Kapas mi fel, iwe, a pwari letipan me an kokkot lon. (2 Timoti 3:​16, 17) Ekkoch repwe apasa, “Nge witiwit mwo. Pwata sipwe tongeni luku met ewe Paipel a apasa lupwen sia kuna ekkewe mettoch mi fokkun ngau aramas ra fori, nge ir mi apasa pwe ir chon appiru ewe Paipel?” A pwung pwe a mmen ngau Christendom pokiten an kewe foffor mi likotuputup, an kewe fofforun nni aramas, me an kewe foffor mi sikepwach. Nge aramas mi mirit repwe tongeni weweiti pwe Christendom a chok tipin appiru an Paipel kewe kapasen emmwen.​—Mattu 15:⁠8.

Ewe Paipel a eani ourour pwe chommong aramas repwe apasa pwe ir chon fel ngeni Kot, iwe nge, repwe “amam ewe Samol mi fen amoni ir.” Ewe aposel Piter a apasa pwe “Fan asengesir aramas repwe esiita ewe al mi enlet.” (2 Piter 2:​1, 2) Jises Kraist a apasa pwe chokena, ir chon “fori minne mi ingau,” iwe, ar kewe foffor mi ngau epwe esissinereta. Ika emon epwe moneelo an Kot kapas pokiten fofforun Christendom, epwe ussun an moneelo echo taropwe seni emon chienan mi wenechar pokiten chok an a itengau ewe emon mi wiisen uwei ewe taropwe.

Aramas resap tongeni forata luku mi enlet ika ese nom rer an Kot we Kapas. Lon chok ewe Paipel Jiowa a awewei an ekiek. A pwarawu poluen ekkewe kapas eis mi piita fansoun meinisin, awewe chok ren ewe popun an mutata riaffou me letipeta me met epwe fori ussun ekkena mettoch. (Kol Fel 119:105; Rom 15:⁠4) Sarah Jayne a forata an luku pwe ewe Paipel wesewesen ewe Kapasen Kot mi fel. (1 Tesalonika 2:​13; 2 Piter 1:​19-​21) Ifa ussun? Esap pokiten chok seman me inan ra ereni, nge pokiten an tipewen le atittina meinisin ekkewe pisekin annet mi pwarata pwe ewe Paipel mi sokkolo seni meinisin puk, iwe, Kot a pwari ekkewe poraus mi mak lon. (Rom 12:​2) Ren chok awewe, neminnewe a kuna an ewe Paipel manaman le tufichin siwili manauen chokewe mi apwonueta an kewe kapasen emmwen. Ren alillisin ekkewe fitu puk, awewe chok ren The Bible​—⁠God’s Word or Man’s?,b neminnewe a pwal kaeofichi ekkewe chommong pisekin annet mi affata pwe ewe Paipel a popu seni Kot.

“Luku a Popu Seni Minne Sia Rong”

Iwe nge, esap naf ach sipwe chok nouni eu Paipel are pwal mwo nge luku pwe a popu seni Kot. Ewe aposel Paul a makkei pwe “Luku a popu seni minne kewe sia rong.” (Rom 10:17) Ach rongorong ewe Paipel, nge esap chok ach nouni eu Paipel, iei ewe mettoch mi forata luku. En mi kan “rong” minne Kot a apasa ren om akkalleani me kakkaeo an we Kapas. Ekkewe kukkun ra pwal mwo nge tongeni fori ena mettoch. Paul a makkei pwe “seni chok an kukkun” Timoti a kait ussun “ekkewe taropwe mi fel” ren inan we me inelapan we. A ita wewe ngeni pwe Timoti a tupulo ren alor? Aapw! Timoti ese michita are tupulo rer. Letipen atewe a “piitelo pwe epwe luku” minne a rong me allea.​—2 Timoti 1:5; 3:​14, 15, NW.

A pwal ina ussun maaritaan lukuen Sarah Jayne. Ussun chon Peria lon ewe aewin senturi, neminnewe a “etiwa ewe kapas [seni seman me inan me pwal fitemon chon kait] ren pwichikaren letiper.” Le kukkunun, ese mwaal neminnewe a luku minne seman me inan ra ereni. Mwirin, lupwen a watteta, neminnewe ese chok lukuchou mettoch meinisin a kaeo ussun. A ‘kukuttafichi ran me ran seni lon Paipel, are ekkeei mettoch mi iei usun.’​—Fofor 17:11.

Kopwe Tongeni Forata Luku mi Enlet

En mi pwal tongeni forata luku mi enlet​—nge ina ewe sokkun luku Paul a kapas ussun lon noun we taropwe ngeni chon Ipru mi wiliiti chon Kraist. Atewe a makkei pwe ena sokkun luku a “usun chok ach alleta minne sia apilukuluku, o usun chok ach achifoua minne sise mo kuna.” (Ipru 11:⁠1) Ika kopwe eani ena sokkun luku, esap wor om tipemwaramwar pwe mettoch meinisin ka apilukuluk ngeni me ekiekin kuna, pachelong an Kot pwon ussun eu manausefal, repwe pwonuta. Kopwe wenewenen achifoua pwe ekkena apilukuluk ra longolong won kapas mi lukuchar, nge esap won kapasen anean. Kopwe silei pwe Jiowa a fen apwonueta meinisin an kewe pwon. (Josua 21:45; 23:14; Aisea 55:​10, 11; Ipru 6:18) Kopwe enletin achifoua ewe fonufan sefo Kot a fen pwonei pwe iwe epwe ussun ita nge a fen fis. (2 Piter 3:​13) Epwe pwal wenewenen ffatoch om kuna ren mesom kewe, mesen lukuluk, pwe a wesewesen wor ewe Kot itan Jiowa, Jises Kraist, me an Kot we Muu, nge esap ir kefisitaan chok aramas.

Sap minne kopwe alaemon chok lupwen kopwe forata luku mi enlet. Lukun an awora an Kapas, Jiowa a pwal awora eu mwichefelin Kraist mi nom ekis meinisin won fonufa, iwe, a kan achocho le alisi aramas mi wenechar letiper ar repwe forata luku lon Kot. (Jon 17:20; Rom 10:​14, 15) Kopwe etiwa sokkun alillis meinisin Jiowa a kan awora ren ena mwicheich. (Fofor 8:​30, 31) Pokiten luku och uwaan an Kot we ngun mi fel, kopwe iotek fansoun meinisin ren ena ngun an epwe alisuk le forata luku mi enlet.​—Kalesia 5:⁠22.

Kosap piitelo ren chon lukulukummang mi kan esiita ekkan aramas mi apasa pwe ra luku Kot me an we Kapas. (1 Korint 1:​18-21; 2 Piter 3:​3, 4) Pwungun pwe luku mi enlet a mmen lamot fan iten an epwe apochokkulok le likiitu fan ena sokkun sossot. (Efisus 6:​16) Sarah Jayne a kuna pwe mi enlet ena, me fansoun meinisin a peppesei chokewe mi etto ren lon ewe pioing pwe repwe apochokkula pwisin ar luku. Neminnewe a kan apasa, “Kopwe lefareni ewe enlet. Kakkaeo an Kot we Kapas. Fitipachei an Kot we mwicheich. Iotek fansoun meinisin. Fiffiti an Jiowa angang.”​—Jemes 2:​17, 26.

Iei alon emon kangof lupwen a kuna watteen an neminnewe luku Kot me ewe manausefal: “A ina wesewesen om luku, are met?” Lupwen aramas ra eis ewe popun a watte an apilukoch, inaamwo ika a mmen weires minne a kuna, neminnewe a apasa pwe “A wor ai lukuluk won Jiowa. I wesewesen emon chiechi ngeniei, me a mmen watte ai tongei i.”

[Footnotes]

[Picture on page 6]

“Seni chok an kukkun” Timoti a kait lon “ekkewe taropwe mi fel” ren i nan we i nelapan we

[Picture on page 6]

Chon Peria ra itoch pokiten ar kaeofichi Paipel iteiten ran

[Credit Line]

Seni “Photo-Drama of Creation,” 1914

[Pictures on page 7]

An aramas rongorong me akkapwonueta ewe Paipel a kan forata ar luku, nge esap chok ar nouni eu Paipel

[Picture on page 7]

“Upwe kunakemi meinisin lon an Kot we fonufan sefo”