‘Ifa Ükükün Fansoun Ai Üpwe Siö . . . ren Om Älillis?’

Jayne a kechiw le erä: “Ua chök mochen pwe epwe wes ai ei metek!” A üri kanser, me a chöülo lon inisin. Chon an we famili me chiechian kewe ra äneänei pwe repwe tongeni echikara me äwesi an riäfföü! Ra iotek ngeni Kot pwe epwe älisi. Nge epwe aüseling ar na iotek? A chchüngü Jayne?

KOT a silei napanapen nonnomun aramas. An we Kapas, ewe Paipel, a apasa: “Förien Kot kewe meinisin ra ngüngü fän cheuch usun cheuchen fam.” (Rom 8:​22) Kot a silei pwe fitepükü million aramas ra meefi riäfföü iteiten rän lon pekin aion, memmeef, are ekiek, usun chök Jayne. A kükküna ekkewe 800 million aramas ra annut fän ar echik iteiten pwin, fite million ra kawet ren chon le imwer kewe, me chommong sam me in ra aüreki met epwe fis ngeni nöür kewe fansoun mwer. Kese kan ekieki ika pwe Kot epwe ataweei ach kewe osukosuk? Esap pwe Kot a mochen älisi förian kewe aramas usun chök ach mochen älisi attongach kewe?

Esap en chök ka fen ekieki usun ekkena mettoch. Lap seni 2,600 ier loom, emön mi tuppwöl itan Apakuk a pwal meefi ina usun, iwe, a eisini Kot: “Ifa ükükün fansoun ai üpwe siö ngonuk pwe kopwe awora om alilis, nge kopwap aüselinga? Ifa ükükün fansoun ai üpwe siö ngonuk fän iten ewe angangen mwänewüs, nge kopwap amanauakem? Pwota ka föri pwe üa küna ei sokun weires? Pwota ka tongeni nenengeni ei sokun föför mi ngau? Feiengau me angangen mwänewüs ra nonom mwei, fiu me änini ra fis ekis meinisin.” (Apakuk 1:​2, 3) Apakuk, emön soufos re Ipru a küna chommong föfförün mwänesol me föfföringaw lon an we fansoun. Ikenäi, sia rongorong pworausen föfföringaw iteiten rän, iwe, chokkewe mi meefi tong ra fokkun letipengaw ren.

Itä Kot a apwüngü Apakuk ren an kewe osukosuk? Aapw. A aüselinga an kewe kapas eis, iwe mwirin, a aururu me apöchökküla äte­na. Jiowa Kot a apöchökkülatä än Apakuk lükü ren an pwonei pwe epwe asopwalo riäfföü. Än Kot pwonen äpilükülük allim epwe pwal tongeni aururu letipom usun chök an aururu letipen Jayne me an we famili. Ekkewe pworaus mwirin repwe pölüweni ekkeei kapas eis: Ifa usun sipwe tongeni lükü pwe Kot a tongekich? Met Kot epwe föri le asopwa­lo riäfföü, iwe, ineet epwe föri ena?