Ewe Alluk Mi Ussun Kolt Eu Alluk mi Wesewesen Auchea

Inaamwo ika a lap me lein aramas ra ekieki pwe ewe Alluk mi ussun Kolt eu afalafal ussun fofforoch seni Jises, nge pwisin i a apasa pwe “Ai afalafal esap ai, pwe an ewe emon mi tinieito.”​—Jon 7:16.

EWER, ewe Chon Awora minne Jises a eani afalafal, pachelong minne aramas ra eita ngeni ewe Alluk mi ussun Kolt, i ewe emon mi tinato Jises, weween, ewe Chon For, Jiowa Kot.

Le poputaan, otaen Kot pwe aramas meinisin repwe fori ngeni chon orur kewe minne ra mochen kuna seniir. A nampa eu le pwarata an ekiekin tumunuochu mettoch meinisin mi manau ren lapalapen an forata aramas: “Iei usun Kot a fori aramas lon pusin lapalapan, eman mwan me eman fefin.” (Keneses 1:27) A wewe ngeni pwe pokiten an tong, Kot a forata aramas pwe repwe eani pwisin lapalapan kewe mi sokkolo aucheaar fan iten ar repwe tufichin pwapwaesini manau lon kinamwe, pwapwa, me tipeeu​—nge epwe ita ina ussur tori feilfeilo chok. Ika ewe mwelien letip Kot a ngeniir epwe miritilo fan minne mi pwung, epwe ekkemmweniir pwe repwe fori ngeni aramas minne ra pwisin mochen kuna seniir.

A Poputa An Aramas Ekieki Pwisin Ir

Pokiten a fokkun murinno manauen aramas me le poputaan, met a fis? A piita ewe lapalap mi fokkun ngau, weween, an aramas ekieki pwisin ir. A lap me lein aramas ra silei ewe poraus lon Paipel ussun minne ewe akkaewin pean aramas ra fori, ussun an a mak lon Keneses sopwun 3. Setan, emon chon u ngeni mettoch meinisin Kot a efich, a etipetipa Atam me If pwe repwe kutta pwisin letiper, iwe, ra moneelo an Kot nemenem fan iten ar repwe tufichin pwisin nemenemeniir. Sap minne ar ekieki akkom pwisin letiper me ar u ngeni Kot a chok atoto pwisin sopwongauer, nge a pwal atoto watte feiengau ngeni mwirimwirir kewe repwap nouniiretiu. Ina eu mettoch mi affata minne a kan fis ika aramas repwe tunalo ewe afalafal epwap choufetal mwirin, ewe mi iteni ewe Alluk mi ussun Kolt. Ina minne, “usun chok tipis a tolong lon fonufan ren emon aramas, o pwal malo ren tipis; iei usun malo a tori aramas meinisin, pun aramas meinisin ra tipis.​—Rom 5:12.

Inaamwo ika aramas ra sapelo seni fofforun Jiowa Kot kewe mi longolong won tong, nge Kot ese likitiirelo. Ren chok awewe, Jiowa a ngeni ewe muun Israel an Alluk pwe epwe emmweniir. A aiti ngeniir pwe repwe fori ngeni aramas minne ra mochen ar repwe fori ngeniir. Ewe Alluk a awora emmwen fan iten met sokkun foffor epwe fichiiti chon kichiniwel, ekkewe at mi ma seniir semer, me ekkewe fefin mi ma seniir puluwer. A affata met repwe fori ika epwe fis kaweten aramas, are an emon su fan emon, me sola. Ekkewe alluk fan iten an epwe limoch fonu me inis a pwarata tumun lon pekin eppetin samau. A pwal wor alluk fan iten foffor lefilen mwan me fefin. Jiowa a affata met an we Alluk a longolong won ren an ereni ekkewe aramas pwe “Kopwe echeni chon arum usun pusin om echenuk,” nge iei eu kapas Jises a aloni mwirin. (Lifitikos 19:18; Mattu 22:39, 40) Ewe Alluk a pwal kapas ussun met sokkun foffor epwe fichiiti chon ekis mi nonnom lein chon Israel. Iei alon ewe Alluk: “Ousap ariafouu eman chon ekis, pun oua silei usun nonomun eman chon ekis, pokiten oua fen piin wasola lon ewe fanu Isip.” Weween pwe chon Israel repwe pwarata kirokiroch ngeni chon osupwang.​—Ekistos 23:9; Lifitikos 19:34; Tuteronomi 10:19.

Ukuukun an Israel pwarata tuppwol le apwonueta ewe Alluk, a pwal ina ukuukun an Jiowa efeiochu ena muu. Fan nemenien Tafit me Solomon, ewe muu a feioch me ekkewe aramas ra pwapwa me kinamwe. A iei ussun uruwoon: “Iwe, chon Juta me chon Israel ra fokun chomong usun chok chomongun foun pien aroset. Ra momongo, ra ukkun o pwapwa. Chon Juta me chon Israel ra nom lon kinamwe, eu me eu famili a nom fan pusin an iran wain me an ira fiik.”​—1 King 4:20, 25.

A eu poraus mi aletipechou pwe kinamween me lukulukochun ewe muu ese nomottam. Inaamwo ika a nom rer an Kot Alluk, nge chon Israel rese akkapwonueta, pwe ra mut ngeni pwisin mochenir an epwe amoielo ar ekieki manauen chon orur. Ena mettoch fitifengen me ar rikilo seni Jiowa a atoto riaffou ngeni emon me emon leir me pwal ngeni unusen ewe muu. Iwe, lon ewe ier 607 B.C.E., Jiowa a mut ngeni chon Papilon ar repwe ataielo ewe muun Juta, ewe telinimw Jerusalem, me pwal mwo nge ewe imwen fel mi fokkun lingoch a nom ikewe ie. Nge met popun? “Iei mine ewe Samol mi Unusen Manaman a apasa, ‘Pokiten ami ousap aleasochis ngeni ai kewe kapas, upwe titila ren chon ekewe mwu meinisin mi nom efeng, pwal ren nei chon angang Nepukatnesar ewe kingen Papilon. Upwe emwenireto pwe repwe maun ngeni ei fanu Juta me aramasan, pwal ngeni chon ekewe mwu meinisin mi nom pwelin unukun. Upwe fokun aroserela o fori pwe repwe och minen eniweniw, och minen turunufas me itengau tori feilfeilachok.’ ” (Jeremaia 25:8, 9) A fet watte liwiningauen ar likitalo ewe fel mi unusen limoch fan iten Jiowa!

Eu Leenien Appiru Ngenikich

Iwe nge, sap minne Jises Kraist a chok aiti ngeni aramas ewe Alluk mi ussun Kolt, nge a pwal isetiu ewe leenien appiru mi nampa eu ren an aramas apwonueta. A wesewesen ekieki met epwe ochiiti aramas. (Mattu 9:36; 14:14; Luk 5:12, 13) Fan eu, arap ngeni ewe telinimw Nein, Jises a kuna emon fefin mi ma seni puluwan, nge a fokkun letipeta ren maloon noun we alaemon, emon aluwol, iwe, a fiti eu pwin aramas mi uwei ewe soma. Iei alon ewe Paipel ussun: “Lupwen ewe Samol a kuna neminewe, a fakkun tongei i.” (Luk 7:11-​15) Me ren Vine’s Expository Dictionary of Old and New Testament Words, ena kapas “fakkun tongei” a wewe ngeni “a chung me leutun.” A meefi riaffoun letipan, me a amwokutu i pwe epwe fori met epwe angasalo neminewe seni. A fet watteen ewe chengel ena fefin a meefi lupwen Jises a amanauasefalli ewe aluwol, iwe a “ngeni inan we”!

Iwe saingo, ren an tipeeu ngeni an Kot kokkot, Jises a tipemecheresin kuna riaffou me a fangolo manauan fan iten ewe moon kepich pwe aramas repwe tufichin ngaselo seni fotekin tipis me malo. Ina ewe leenien appiru mi nampa eu fan iten an aramas apwonueta ewe Alluk mi ussun Kolt lon unusen manauer.​—Mattu 20:28; Jon 15:13; Ipru 4:15.

Aramas mi Akkapwonueta ewe Allukmi Ussun Kolt

A wor aramas lon ei fansoun mi wesewesen akkapwonueta ewe Alluk mi ussun Kolt? Ewer, nge sap minne ra chok fori ena mettoch lupwen a mecheres ngeniir. Ren chok awewe, le atun ewe Oruuen Maunen Fonufan fan ewe muun Nazi lon Tois, Chon Pwarata Jiowa ra amwochu ar luku Kot me ar tong ngeni chon orur, iwe, rese tongeni likiti ewe Alluk mi ussun Kolt. Inaamwo ika ewe Steit a echimwa aramas ar repwe pwarata oput me apap ngeni chon Jus meinisin, nge ekkewe Chon Pwarata ra chuen chok apwonueta ewe Alluk mi ussun Kolt. Lon pwal mwo nge ekkewe leenien fotek, ra tuttumunu chiener kewe, iwe, inaamwo ika a fokkun ekis chok aner mongo, nge ra ineti ngeni chon Jus me aramas ese lifilifil. Pwal och, inaamwo ika ewe Steit a alluku ngeniir pwe repwe angei pisekin maun fan iten ar repwe nnielo aramas, nge rese tipeeu ngeni, ussun chok ar rese mochen aramas repwe nniirelo. Ita ifa ussun repwe tongeni nnielo aramas, nge wiiser ar repwe tongeer ussun ar tongei pwisin ir? Pokiten ar rese mochen nnielo aramas, chommong leir ra titiilo ngeni ekkewe leenien fotek, are, ra nninniilo.​—Mattu 5:43-​48.

Atun om alleani ei poraus, en mi kuna feioch seni an aramas apwonueta ewe Alluk mi ussun Kolt. Chon Pwarata Jiowa ra weweiti pwe ikenai chommong aramas ra kuna riaffou, nge esor ar apilukuluk me alillis. Pokiten ena, ekkewe Chon Pwarata ra pwisin mwokut pwe repwe alisi aramas ar repwe kaeo ussun ewe apilukulukoch me emmwen mi nom lon ewe Paipel. Ina eu mettoch mi kapachelong lon eu angangen asukula aramas mi fiffis won unusen fonufan, nge a fokkun watte seni ekkewe fansoun mwan meinisin. Met a fen fis seni? Ussun ewe oesini lon Aisea 2:2-4 a apasa, “chomong aramas,” nge ren enletin ra lap seni wonu milion won unusen fonufan, ra fen ‘kaeo ussun fofforun Jiowa me ra fetal lon an kewe al.’ Lon kapas awewe, ra fen kaeo ar repwe “amani nour ketilas o awili ngeni pisekin tuw pwul, nge wokur siles repwe awili ngeni naifen otot.” Ra fen kuna kinamwe me lukulukoch lon ekkeei fansoun mi ur ren fitikoko.

Nge En?

Ekieki mwo ewe riaffou an aramas tunalo ewe Alluk mi ussun Kolt a fen atoto ngeni chon fonufan mwirin an aramas u ngeni Kot lon Ichen, nge ina eu foffor Setan ewe Tefil a poputani. Otaen Jiowa an epwe ssorei minne a fen fis. Ifa ussun? “Iei popun Noun Kot a pwato, pwe epwe atailo ekkewe angangen ewe tefil.” (1 Jon 3:8) Ena mettoch epwe fis fan nemenien an Kot we Muu, ewe a nom le poun Jises Kraist, ewe mi mirit me lipwakoch, nge ina i ewe emon mi aiti ngeni aramas ewe Alluk mi ussun Kolt me a apwonueta ena alluk lon unusen manauan.​—Kol Fel 37:9-​11; Taniel 2:44.

Iei kunaen King Tafit seni Israel lom lom: “Ngang emon aluwol me lom, nge iei ua fen chinnapelo, iwe nge, esap fan eu ai kuna emon mi pwung nge a unusen osupwang, me noun kewe ra kut aner pilawa. Unusen ran a pwarata chen me kisaseu, ina minne noun kewe repwe kuna och feioch.” (Kol Fel 37:25, 26, New World Translation) Kese kan tipeeu pwe ikenai a lap ngeni aramas ar ra tipemmong me kichingau, nge rese “pwarata chen me kisaseu”? A ffat pwe an aramas akkapwonueta ewe Alluk mi ussun Kolt epwe tongeni emmwen ngeni kinamwe me lukulukoch pun a atoto feioch iei me pwal lon mwach kkan fan an Kot we Muu. An Kot we Muu epwe amoielo seni fonufan sokkun kichingau me fofforingau meinisin me akkasiwili ewe kokkotun an aramas kewe nemenem mi ngau me eu otot sefo Kot epwe forata. Iwe, aramas meinisin repwe pwapwaesini ar manau fan ewe Alluk mi ussun Kolt.​—Kol Fel 29:11; 2 Piter 3:13.

[Pictures on page 4, 5]

Sap minne Jises a chok afalafal ussun ewe Alluk mi ussun Kolt nge a pwal isetiu ewe leenien appiru mi nampa eu ren an aramas akkalleasochisi ena alluk

[Pictures on page 7]

Ach akkalleasochisi ewe Alluk mi ussun Kolt epwe tongeni emmwen ngeni kinamwe me lukulukoch mi enlet