Emiriti Letipom Pwe Epwe Niuokkusiti Jiowa
“Amwo repwe chok emiriti letiper pwe repwe niuokkusitiei me alleasochisi ai kewe alluk fansoun meinisin.”—TUTERONOMI 5:29, New World Translation.
1. Met popun sia wenewenen achifoua pwe lon eu ran aramas repwe pwapwaesini ar ngaselo seni niuokkus?
NIUOKKUS a fen eriaffou chon fonufan fitepuku, fitepuku ier. Pokiten aramas ra niueiti lengita, malapalap, fofforingau, are maun, ra kan aurek fansoun meinisin. Ina popun, ekkewe kapas mi akkom lon ewe Universal Declaration of Human Rights a pwarata an aramas tipeni ar repwe efisata eu fonufan ikewe aramas meinisin repwe ngaselo seni niuokkus ie.a Sia pwapwa pun Kot a alukulukatiu ngenikich pwe ena sokkun fonufan epwe toto—nge sap minne ren an aramas efisata. Ren noun we soufos Maika, Jiowa a pwonei pwe lon an we fonufan sefo mi pwung, ‘esap wor emon epwe aniuokkusu noun kewe aramas.’—Maika 4:4, NW.
2. (a) Ifa ussun ewe Paipel a peseikich ach sipwe niuokkusiti Kot? (b) Ikkefa ekkewe kapas eis mi tongeni piita lupwen sia ekieki wiisach we, wiisen ach sipwe niuokkusiti Kot?
2 Iwe nge, niuokkus a pwal tongeni alisikich. Lon ewe Paipel, fan chommong a pesei noun Kot kewe chon angang pwe repwe niuokkusiti Jiowa. Iei alon Moses ngeni chon Israel: “Oupwe niuokkusiti Jiowa ami Kot, me ami oupwe angang ngeni.” (Tuteronomi 6:13, NW) Fitepuku ier mwirin, iei makkeien Solomon: “Oupwe niueiti Kot o alesochisi an kewe alluk, pun iei a fichiti aramas meinisin.” (An Salomon Afalafal 12:13) Ren ach angangen afalafal, ewe mi fis fan emmwenien chonlang, sia pwal pesei aramas meinisin pwe repwe “niuokusiti Kot, o alinga i.” (Pwarata 14:6, 7) Sap minne chon Kraist repwe chok niuokkusiti Jiowa, nge repwe pwal tongei i ren unusen letiper. (Mattu 22:37, 38) Ifa ussun sipwe tufichin pwaratapok tong me niuokkus ngeni Kot? Pwata a lamot ach sipwe niuokkusiti emon Kot mi tong? Met sokkun feioch sipwe kuna seni ach amaarata niuokkus ngeni Kot? Ren poluen ekkena kapas eis, sipwe akkom silei met weween ach sipwe niuokkusiti Kot me ifa ussun ena sokkun niuokkus eu foun longolongun ach riri ngeni Jiowa.
Ing, Sufol, me Niuokkus
3. Ifa weween niuokkus ngeni Kot?
3 Niuokkus ngeni Kot eu memmeef epwe nom ren chon Kraist fan iten ewe Chon Foriireta. Iei och weween ena niuokkus: “An aramas ingeiti me sufoliiti ewe Chon For me ar niuokkusiti ar repwe aletipengaua i.” Ina minne, ach niuokkusiti Kot a nemeni ruu mettoch mi lamot lon manauach: ach ekiek ngeni Kot me ach ekiek ngeni ekkewe foffor a oput. A ffat pwe ir me ruu ekkena mettoch ra wesewesen lamot me mi fichiitiir ach sipwe kaeofichi ussur. Ussun Vine’s Expository Dictionary of New Testament Words a apasa, ren chon Kraist ena niuokkus mi fiti sufol ‘eu minen nemenem lon manauen aramas, fan iten mettochun ngun me foffor mi pwung.’
4. Ifa ussun sipwe tongeni amaarata ach meefi ing me sufol ngeni ewe Chon Forikich?
4 Ifa ussun sipwe tongeni amaarata ing me sufol ngeni ewe Chon Forikich? Sia kan ingelo lupwen sia kuna leeni mi lingoch, puputiuen konik me won eu chuuk mi tekia, are lingen och mwiritup. A lapalo ena memmeef lupwen sia miritiiti ren mesach, mesen lukuluk, pwe Kot a forata ekkena mettoch. Pwal och, ussun King Tafit, sia weweiti pwe sia mmen kisikis ika sipwe apopofengennikich me forien Jiowa kewe mi fokkun lapalap. “Lupwen ua nennengeni om kewe lang, foriom mesen poum, ewe maram pwal ekkewe fu ka fen iseniretiu lon leenier; meta lamoten aramas, nge ka fen ekieki?” (Kol Fel 8:3, 4) Ena ing mi lapalap a efisata sufol, iwe, sufol a amwokutukich ach sipwe pwarata ach kilisou ngeni Jiowa me ach mwareiti i ren mettoch meinisin a foffori fan asengesich. Pwal iei makkeien Tafit: “Upwe mwareituk pun a mmen amwarar ai foruta lon eu lapalap mi aniuaniu. Om kewe angang ra lingemwarar, ussun nguni a fen wenewenen miritiiti.”—Kol Fel 139:14, NW.
5. Pwata sipwe niuokkusiti Jiowa, me ifa ewe leenien appiru mi murinno a nom rech fan iten ena mettoch?
5 Ing me sufol a kan efisata ewe sokkun niuokkus mi murinno me mi fiti fairo ren an Kot manaman pokiten i ewe Chon For me pwal fan iten an nemenem pun i ewe Sou Nemenem won mettoch meinisin, nge a wor an pwuung le eani ena nemenem. Lon eu langepwi ewe aposel Jon a kuna, “ir ekkewe mi fen pworacho ngeni ewe manmocho me ululun we”—weween, ekkewe chon kepit mi tapwelo mwirin Kraist lon wiiser we lon lang—ra apasa: “Om kewe fofor mi chok lapalap o amwarar, En ewe Samol Kot mi Lapalap! Om kewe al mi chok pung o enlet, En Kingen ekkewe fansoun! Io esap niuokusituk, Samol? Io esap alingalo itom?” (Pwarata 15:2-4) Niuokkus ngeni Kot, ewe mi popu seni ing mi lapalap fan iten tekian, a amwokutu chienen Kraist kana chon nemenen lon ewe muun lang ar repwe asamolu Kot pokiten i ewe sou nemenem mi lapalap seni meinisin. Lupwen sia ekieki mettoch meinisin Jiowa a fen fori me an nemeni mettoch meinisin fan minne mi pwung, esap ina och popun mi lapalap ach sipwe niuokkusiti i?—Kol Fel 2:11; Jeremaia 10:7.
6. Pwata sipwe niuokkusiti ach sipwe aletipengaua Jiowa?
6 Iwe nge, lukun an aramas meefi ing me sufol, epwe pwal kapach ngeni ar niuokkusiti Kot ar niueiti ar repwe aletipengaua are alleasolapa i. Met popun? Popun, pun inaamwo Jiowa a “songomang pwal woun tong,” nge sipwe chechchemeni pwe a kan “liwini an samasam tipis.” (Ekistos 34:6, 7) Inaamwo ika a lap an Jiowa tong me umoumoch, nge ese mutata fofforingau me an aramas pukun filata ewe alen tipis. (Kol Fel 5:4, 5; Apakuk 1:13) Ir mi pwisin filata ar repwe foffori minne mi ngau me ren ekiekin Jiowa, nge rese aier, iwe, ra u ngeni i, repwe kuna apwung. Ussun ewe aposel Paul a apasa, “mi amosok chapur ach sipwe iolo le poun ewe Kot mi manau.” Ach eani ewe sokkun niuokkus mi murinno ren ena mettoch eu minen tumun ngenikich.—Ipru 10:31.
“Oupwe Fitipacheiti I”
7. Ikkefa ekkewe popun ach sipwe eani lukuluk won an Jiowa manamanen amanaua aramas?
7 An aramas mennin ngeni Kot me ar wewefichiiti an manaman mi lapalap a kan akkom mwen ar repwe tufichin eani lukuluk won Jiowa ren mettoch meinisin. Ussun an emon semirit meefi lukulukoch lupwen seman a nom ren, a pwal ina ussun ach meefi lukulukoch fan an Jiowa emmwen. Nengeni mwo meefien chon Israel lupwen Jiowa a emmweniirowu seni Isip: “Lupwen ekewe chon Israel ra kuna an ewe Samol mi Lapalap manaman a fori ngeni ekewe re Isip, ra meniniti ewe Samol mi Lapalap, ra pwal luku i.” (Ekistos 14:31) Minne a fis ngeni Elisa a pwal anneta pwe “ewe chonlangin ewe SAMOL a pwepwellifetalei ekkewe ir mi niueiti i, o a angaserelo.” (Kol Fel 34:7; 2 King 6:15-17) Porausen noun Jiowa kewe aramas lon ach ei fansoun me neman minne a fis lon pwisin manauach a anneta pwe Kot a kan pwarata an manaman fan asengesin ir mi angang ngeni. (2 Kronika 16:9) A ina ussun ach miritiiti pwe “an emon aramas meniniti ewe Samol mi Lapalap a atoto an apilukulukoch.”—An Salomon Fos 14:26.
8. (a) Pwata ach niuokkusiti Kot a kan amwokutukich pwe sipwe feffetal lon an kewe al? (b) Awewei mwo ifa ussun sipwe “fitipachei” Jiowa.
8 Ewe sokkun niuokkus mi murinno fan iten Kot esap chok efisata ach eani lukuluk won i ren unusen letipach, nge epwe pwal amwokutukich pwe sipwe feffetal lon an kewe al. Lupwen Solomon a fori efinunen ewe imwen fel, a iei ussun an iotek ngeni Jiowa: “Ren ei noum aramas repwe meninituk o aleasochis ngonuk lon fansoun ar manau lon ewe fanu ka ngeni am kewe lewo.” (2 Kronika 6:31) Mesemwan, iei an Moses kapasen pesepes ngeni chon Israel: “Oupwe fetalla murin ewe Samol mi Lapalap ami we Kot o meniniti, oupwe apwonueta an kewe alluk o aleasochisi alon, oupwe pwal fel ngeni o fitipacheiti.” (Tuteronomi 13:4) Ussun ekkena wokisin ra affata, an aramas mochen feffetal lon alen Jiowa me fitipach ngeni a popu seni ar eani lukuluk won Kot ren unusen letiper. Ewer, ach niuokkusiti Kot epwe emmwen ngeni ach alleasochisi Jiowa, ach angang ngeni, me ach fitipach ngeni, ussun chok an emon semirit foropachei seman we pokiten an luku i ren unusen letipan.—Kol Fel 63:8; Aisea 41:13.
Ika Sia Tongei Kot Sipwe Pwal Niuokkusiti I
9. Ifa ussun tong ngeni Kot a riri ngeni niuokkus ngeni Kot?
9 Me ren Paipel, sap minne ach niueiti Kot a wewe ngeni pwe sisap tongeni tongei i. Nge chon Israel ra nom fan ei alluk mi era pwe repwe “niuokkusiti Jiowa . . . pwe repwe feffetal lon an kewe al meinisin me tongei i.” (Tuteronomi 10:12, NW) Ina minne, niuokkus ngeni Kot me tong ngeni Kot ra ririfengen. Ach niuokkusiti Kot a amwokutukich pwe sipwe feffetal lon an kewe al, iwe, ena mettoch a anneta pwe sia tongei i. (1 Jon 5:3) A pwung ena pun lupwen sia tongei emon, sia niueiti ach sipwe aletipengaua i. Chon Israel ra aletipengaua Jiowa ren ar u ngeni lon ewe fonu poon. Pwungun pwe sisap mochen fori och mettoch mi aletipechou Semach we lon lang. (Kol Fel 78:40, 41) Iwe nge, pokiten ewe “SAMOL a pwapwa ren ir ekkewe mi niuokusiti i,” ach alleasochis me tuppwol a kan apwapwai letipan. (Kol Fel 147:11; An Salomon Fos 27:11) Ach tong ngeni Kot a kan amwokutukich pwe sipwe apwapwai i, me ach niuokkusiti Kot a pineikich seni ach sipwe aletipechou i. Ekkena lapalap ra poluoch, nge rese polufesen.
10. Ifa ussun Jises a pwarata pwe a pwapwa ren an niuokkusiti Jiowa?
10 Manauen Jises Kraist a affata ifa ussun an epwe tufichin ririfengen ach tong ngeni Kot me ach niueiti i. Iei makkeien ewe soufos Aisea ussun Jises: “Iwe, Ngunun ewe Samol mi Lapalap epwe nonom won, ewe Ngun epwe ngeni tipachem me mirit, ekiekoch me tufich. Epwe pwal silei letipen ewe Samol mi Lapalap o niueiti i. Iwe, epwe pwapwa ngeni an epwe aleasochisi ewe Samol mi Lapalap fan niuokus.” (Aisea 11:2, 3) Me ren ena oesini, an Kot we ngun a amwokutu Jises pwe epwe niueiti Seman we lon lang. Pwal och, sia kuna pwe ena niuokkus eu minen atoto pwapwa ngeni, nge ese ppet ren. Jises a kuna pwapwa seni an fori letipen Kot me an apwapwai i, lon pwal mwo nge fansoun an kuna watte sossot. Lupwen epwele nninniilo won ewe iraan riaffou, iei alon ngeni Jiowa: “Esap usun minne ngang ua mochen, pwe usun minne ka mochen.” (Mattu 26:39) Pokiten an niuokkusiti Kot, Jiowa a auseling ngeni siongauen Noun we, iwe, a apochokkula letipan, me a selani seni malo.—Ipru 5:7.
Sipwe Kaeo pwe Sipwe Niueiti Jiowa
11, 12. (a) Pwata sipwe emiritikich ren ach sipwe tufichin niuokkusiti Kot? (b) Ifa ussun Jises eu minen kait ngenikich fan iten ach sipwe niuokkusiti Jiowa?
11 Ewe mettoch niueiti Kot a sokko seni ach ingelo lupwen sia kuna manamanen me lingen forien Kot kewe, pun ese pukun nom rech. Ina ewe popun ewe Tafit mi Lapalap, Jises Kraist, a korikich lon ei oesini: “Ami nei semirit, oupwe feito rei o auseling ai kapas, upwe afalafalakemi usun ami oupwe niueiti ewe SAMOL.” (Kol Fel 34:11) Ifa ussun sipwe tongeni kaeo seni Jises fan iten ach sipwe niueiti Jiowa?
12 Jises a aiti ngenikich pwe sipwe niueiti Jiowa ren an alisikich le weweiti sorosorochun Semach we lon lang. (Jon 1:18) Pwisin sorosorun Jises a pwarata ekiekin me fofforun Kot ngeni forian kewe, pun Jises a lapalapeni lapalapen Seman we. (Jon 14:9, 10) Pwal och, ren an Jises we asor, sia tufichin arap ngeni Jiowa lupwen sia iotek ren omusomusen ach kewe tipis. Ina eu mettoch mi pwarfichi umoumochun Kot, iwe, ina eu popun sipwe niuokkusiti i. Iei makkeien ewe sou makkei kol fel: “Nge omusamusen tipis a nom reom, pwe am aupwe niuokusituk.”—Kol Fel 130:4.
13. Ifa ussun ewe puken An Salomon Fos a eiteita met sipwe fori ren ach sipwe tufichin niuokkusiti Jiowa?
13 Ewe puken An Salomon Fos a eiteita met sipwe fori ren ach sipwe tufichin amaarata ach niuokkusiti Kot. “Nei, kopwe etiwa ai kewe kapas o iseis ekewe alluk lon lelukom. Kopwe au selingom ngeni tipachem o suki lelukom pwe kopwe wewe ren. Ewer, kopwe sio ngeni Kot pwe epwe fang ngonuk om silelap, kopwe alapata mweliom o tungor ngeni pwe kopwe weweoch ren. Are kopwe fori iei usun, murin kopwe weweiti auchean om niuokusiti ewe Samol mi Lapalap o fefeita lon om silei Kot.” Ina minne, ren ach sipwe niuokkusiti Kot, sipwe kaeo an we Kapas, achocho le weweiti minne a aiti ngenikich, me nengenifichi an fon.
14. Ifa ussun sipwe tongeni alleasochisi ewe fon mi weneiti ekkewe kingen Israel?
14 Mi alluk ngeni iteiten kingen Israel lom lom an epwe fori kapiin ewe Alluk, iwe, epwe ‘aleani lon ranin manauan meinisin, epwe pwal tongeni kaio seni usun an epwe meniniti ewe Samol mi Lapalap an we Kot ren an aleasochisi kapasen ekewe alluk me ekewe pwuung meinisin.’ (Tuteronomi 17:18, 19) A pwal chok fokkun lamot ngenikich allean me kaeon Paipel fan iten ach sipwe emiritikich pwe sipwe niuokkusiti Jiowa. Lupwen sipwe akkapwonueta an Paipel kewe kapasen emmwen lon manauach, sipwe angei tipachchemen me silelapen Kot ekis me ekis. Sipwe silei ‘weween ewe mettoch niuokkusiti Jiowa’ pun sipwe kuna ekkewe mettoch mi murinno a kan efisata lon manauach, iwe, sipwe aucheani ach riri ngeni Kot. Pwal och, ren ach mwimwichfengen me chienach kewe chon luku, oukich meinisin, kukkun me chinnap, sipwe tongeni auseling ngeni aitien Kot, me kaeo ach sipwe niuokkusiti Kot, me feffetal lon an kewe al.—Tuteronomi 31:12.
Mi Pwapwa Meinisin mi Niuokkusiti Jiowa
15. Ifa ussun ewe mettoch niuokkus ngeni Kot a riri ngeni ach fel ngeni i?
15 Seni minne a mak asan, sipwe tongeni kuna pwe ewe mettoch niuokkusiti Kot eu lapalap mi murinno oukich meinisin sipwe amaarata, pun ina och foun longolongun ach fel ngeni Jiowa. A kan emmwen ngenikich ach sipwe achifoua i ren unusen letipach, ach sipwe feffetal lon an kewe al, me ach fitipacheiti i. Ussun an a pwalo lon manauen Jises Kraist, ewe mettoch niuokkusiti Kot epwe pwal tongeni amwokutukich pwe sipwe apwonueta ach pwon ngeni, pwonen ach fangolo manauach ngeni, iei me pwal tori feilfeilo chok.
16. Pwata Jiowa a peseikich pwe sipwe niuokkusiti i?
16 Ewe mettoch niuokkusiti Kot esap eu mettoch mi eriaffou are chouni aramas. Ewe Paipel a apasa pwe “Mi pwapwa aramas meinisin mi niuokkusiti Jiowa, ir ekkewe mi feffetal lon an kewe al.” (Kol Fel 128:1, NW) Jiowa a kan peseikich ach sipwe niuokkusiti i pun a silei pwe ena lapalap epwe tumunukich. Sia kuna an ekiekin tumunu aramas lon alon we ngeni Moses: “Amwo leluker [chon Israel] epwe iei chok usun iteiten fansoun, pwe repwe meninitiei o aleasochisi ai kewe alluk meinisin, pwe repwe feioch me mwirimwirir tori feilfeilachok.”—Tuteronomi 5:29.
17. (a) Met sokkun feioch epwe toto rech seni ach niuokkusiti Kot? (b) Met sokkun poraus ussun niuokkus ngeni Kot sipwap kaeo ussun lon ena eu lesen mwirin ei?
17 Pwal ussun chok, ika sipwe emiriti letipach an epwe niuokkusiti Kot, sipwe sopwoch. Ifa ussun? Aewin, ena sokkun lapalap epwe apwapwai Kot me epwe emmwen ngeni ach sipwe pacheoch ngeni. Tafit a silei seni pwisin kunaan pwe “Epwe apwonueta minne ir ekkewe mi niuokusiti i ra mochen, epwe pwal rong ar pupuchor, o epwe amanaua ir.” (Kol Fel 145:19) Oruuan, ewe mettoch niuokkusiti Kot epwe efeiochukich pun epwe nemeni ach ekiek ussun minne mi ngau. (An Salomon Fos 3:7) Ena eu lesen mwirin ei epwe awewei ifa ussun ena niuokkus a kan tumunukich seni mettoch mi efeiengau lon pekin ngun, me epwe enniwili ekkoch poraus mi mak lon Paipel ussun ekkoch mwan mi niuokkusiti Kot, iwe, ra sapelo seni minne mi ngau.
[Footnotes]
a Ewe General Assembly of the United Nations a foratiu ewe Universal Declaration of Human Rights lon December 10, 1948.
En mi Tongeni Polueni Ekkan Kapas Eis?
• Met weween niuokkus ngeni Kot, me ifa ussun a kan nemeni manauach?
• Ifa ussun ach niuokkusiti Kot a ririfengen me ach fitipacheiti i?
• Ifa ussun manauen Jises a pwarata pwe niuokkus ngeni Kot a ririfengen me tong ngeni Kot?
• Ifa ussun sipwe tongeni emiriti letipach pwe epwe niuokkusiti Jiowa?
[Picture on page 23]
Mi alluk ngeni ekkewe kingen Israel pwe repwe fori pwisin nour kapiin ewe Alluk, iwe, repwe alleani iteiten ran meinisin
[Picture on page 24]
Ach niuokkusiti Jiowa a emmwen ngeni ach luku i ussun chok an emon at luku seman we
[Picture Credit Line on page 21]
Stars: Photo by Malin, © IAC/RGO 1991