Manau Fan Nemenemen Luku Esor Longolongun
KA sereni emon lupwen ka towu seni lon imwom we. Pecheom a chepeti fau. Tikin emon matchang le pwin. Ka ttana eu ttan fan fitu atun om onnut. Ikkena ekkoch mettoch chommong aramas rese pwal kon ekieki. Nge me ren ekkoch aramas lon Notoun Afrika, ekkena mettoch ita och esissin are poraus seni ngunun ekkewe mi malo. Feioch are feiengau epwe toruk nge, mi alongolong won ewe esissin me aweween.
Sokkopaten luku esor longolongur ra pwal choufetal lukun Afrika. Mwirin fite, fite ierin ar nonnom lon eu fonu ia ewe muu a alluk pwe esap wor an aramas luku kot, chommong Chon Saini, me Chon Rusia ra chuen eani lukuluk won ekkewe luku esor longolongur. Lon Merika me Iurop, chommong aramas ra akkalleani horoscope, are ra niuokkus lupwen ewe engol me aulungatin ran a sereni Alimu me lupwen ra kuna kattu mi chchol. Ekkoch aramas mi nonnom ennefennin fonufan ra luku pwe och saram lon lang le pwin itan northern lights eu esissinnen maun are malapalap. Lon India, ewe semmwen AIDS a choufetal pokiten ekkewe mwan mi uwei torakku ra luku pwe lon ekkewe ran mi pwichikkar, inisir epwe patapatelo ika repwe lisowu mwaal. Chon Japan mi ttuw pokungo ra luku pwe epwe fis feiengau ika emon fefin epwe tolong lon ewe pokungo mwen a wes. Luku mi chofona a choufetal lein ekkewe aramas mi itefoulo lon pasket me yakiu. Emon chon vani a apasa pwe a win pokiten noun kewe ssitakin ra chchol nge rese pwech. Esap wes ach eiteita ekkeei sokkun luku.
Nge ifa ussum? A wor om luku mi monomon mi anniuokkus kese tongeni awewei? Eu luku, are och mettoch ka ekis luku, are eu eoreniom, a kku manauom nge kese tongeni awewei ewe popun ka lukuluk won? Ifa ussun kopwe polueni epwe tongeni affata ika ka manaueni manauom fan nemenemen luku ese pwung, pun ina weween ekkewe luku esor longolongur.
Ika emon a mut ngeni ekkewe luku esor longolongur ar repwe nemeni filian kewe me manauan ran me ran, iwe, a mut ngeni och mettoch ese kon lien weweiti an epwe nemeni manauan. Mmen och ach fori ena? Sipwe mut ngeni och mettoch ese ffat are fokkun ngau an epwe nemenikich? Ekkewe luku esor longolongur ikkena ekkoch minen atakirikir are ekkoch minen efeiengau mi tongeni efeiengauakich?