Ekkewe Luku Esor Longolongur Ra Nemeni Manauom?
EKKEWE luku esor longolongur ra nonnom ekis meinisin won fonufan. Fan ekkoch aramas ra aucheaniir pokiten ir kinikinin eorenier. Are aramas mi tongeni ekiekir ussun chok mettoch mi lamot kisikis nge ir mi apwapwai manauer. Lon Iurop me Merika, aramas rese kan luku pwe ekkewe luku esor longolongur repwe wesewesen kku manauer. Nge, lon Afrika, ekkewe luku esor longolongur ra wesewesen kku manauen aramas.
Lape-ngeni eorenien Afrika a alongolong won ekkewe luku esor longolongur. Kachito, appio won asapwal, me puk mi for lon Afrika ra kan menlapei luku esor longolongur mi awarawar, ussun chowean pwee, fel ngeni marar mi ma, me ttit. Met popun ekkewe luku mi chofona ra kon etipetipa aramas, me ia ra pop seni ie?
Ifa Ussun Ekkewe Luku Esor Longolongur Ra Poputa?
Chommong luku mi chofona ra pop seni an aramas niueiti ngunun ekkewe mi malo are ngun mi ngau. Ngeniir, met a fiffis epwe wewe ngeni an ekkewe ngun sotun le aporausa kapasen amoson, ourour, are och feioch.
Ekkewe luku esor longolongur ra pwal riri ngeni pochokkuletaan chon semmwen me safei. Fan iten lape-ngeni aramas lon ekkewe fonu mi woungau, a kon watte liwinin safei are ewe safei ese kawor lon fonuer. Ina popun repwe kutta alillis are sotun le eppeti semmwen ren eorenien samasamer kewe, angangen roong, me seni ekkewe luku esor longolongur. Ra pwal ekis kinamwe lupwen repwe fosfengen me emon sou roong mi weweiti eorenier kewe me ar fos, lap seni ar fosfengen me emon toktor lon pioing. Iei ussun ekkewe luku mi chofona ra sopwosopwolo.
Lapalapen ekkewe luku esor longolongur mi sokkolo lon fonu me fonu me ifa ussun ra choufetal a alongolong won sile seni chon loom, tutunlap, me met a fen fis lon eu me eu fonu. Nge och mettoch mi wewe chok ren ir meinisin ina ewe luku pwe aramas ra wiisen apwapwai emon are och mettoch seni fonuen ekkewe ngun.
Kot a oput an aramas kutta alillis seni angangen roong. (Tuteronomi 18:10-12; 2 King 21:6) A wewe ngeni ach kunou ren chon oputakich, ach chiechi ngeni chokkewe mi tunalo Kot! Ach alleani horoscope, kutta alillis seni emon sou roong, are ekis angolong lon angangen roong a wewe ngeni ach mut ngeni ekkewe ngun mi ngau ar repwe nemeni ifa ussun sia pwungupwung won ekkewe mettoch mi lamot lon manauach. A ussun chok pwe sia fitiir le u ngeni Kot.
Chon Kraist mi enlet repwe atowaueerelo seni ekkewe foffor mi rochopwak kapachelong ekkewe luku esor longolongur, me etiwa ewe saram lon pekin ngun ewe Chon Ffor, Jiowa, me Noun we, Jises, ra awora. Ar tongeni pwapwaesini kinamween ekiekir a pop seni ar sile pwe ra foffori minne mi pwung me ren Kot.—Jon 8:32.