“Alapalo Om Kamwochunuk”
“Sipwe fokkun kamwochunuk won ekewe kapas mi let sia fen rongorong, pwe sisap tokola seni.”—IPRU 2:1.
1. Eani eu kapas awewe mi pwarata ifa ussun eu minen arikirik epwe tongeni efisi osukosuk.
LON chok ewe United States, ekkewe aksiten lon chitosa ra nielo orun 37,000 aramas iteiten ier. Ekkewe sou sile ussun ena mettoch ra apasa pwe chommong lein ekkena aramas resap malo ika ekkewe chon unteng repwe tuttumunufichi atun ra wawa chitosa. Ekiekin ekkoch chon unteng a rikilo ren ekkoch esissin oropen ewe al are ar fos won telifon. Ekkoch ra pwal mongo atun ra unteng. Iwe, lon ekkena foffor meinisin, ekkewe minen rikirik ra tongeni efisi feiengau.
2 Arapakan 2,000 ier mwen forun ewe chitosa, ewe aposel Paul a kapas ussun eu sokkun minen rikirik mi watte feiengauan ngeni ekkewe Chon Kraist chon Ipru. Paul a itelapei ewe poraus pwe Jises Kraist mi fen manausefal a wiseni eu wis mi tekia seni ekkewe chonlang meinisin, pun a mottiu peliefichin Kot. Mwirin, ewe aposel a apasa: “Iei mine sipwe fokkun kamwochunuk won ekkewe kapas mi let sia fen rongorong, pwe sisap tokola seni.”—Ipru 2:1.
3 Pwata a lamot ngeni ekkewe Chon Kraist chon Ipru ar repwe “kamochunuk won ekewe kapas mi let [ra] ren rongorong” ussun Jises? Popun, pun arapakan 30 ier a fen lo seni ewe fansoun Jises a likitalo fonufan. Atun ar we Masta ese chuen nonnom rer, ekkoch Chon Kraist chon Ipru ra poputa le toko seni ewe luku mi enlet. Ra rikilo ren ewe lamalamen Jus, ewe sokkun fel ra pin eani.
A Lamot Ngeniir Ar Repwe Kamwochunuk
4 Met popun emon Chon Kraist epwe ekiekin liwiniiti ewe lamalamen Jus? Iwe, ewe kokkotun fel fan ewe Alluk a wor minne aramas repwe tongeni kuna. Aramas repwe tongeni kuna ekkewe samol-fel me ttini ekkewe asor mi kkek. Iwe nge, lon ekkoch lapalap, a sokkolo ewe lamalamen Kraist. Ekkewe Chon Kraist mei wor ar we Samol-fel mi Lapalap, Jises Kraist, nge rese kuna won fonufan lap seni inik ier. (Ipru 4:14) Mei wor ar we imwenfel, nge leenian we mi fel a nonnom lang. (Ipru 9:24) Sokko seni ewe fofforun sirkumsaisi fituker fan ewe Alluk, ekkewe Chon Kraist repwe “sirkumsais lon [letiper], och mettochun ngun.” (Rom 2:29) Ina minne, ekkewe Chon Kraist chon Ipru ra poputa le ekieki pwe ewe lamalamen Kraist, ina och mettoch rese tongeni kuna are attapa.
5 A lamot ngeni ekkewe Chon Kraist chon Ipru ar repwe weweiti eu mettoch mi sokkolo aucheaan ussun ewe kokkotun fel Kraist a poputani. A alongolong won luku nge sap ren minne aramas repwe tongeni kuna, nge a fokkun tekia seni ewe Alluk ra angei seni Moses. Paul a makkei: “Pun are luet ngeni aramas mi limengau chaan siike are kou liemwan, o pwal falangen kou liefefin, epwe tongeni apinirelo ngeni limelimochun fituker, nge ewe chaan Kraist, i mi iseta pwisin i mi esor limengauan ngeni Kot ren ewe Ngun esemuch, epwe fakkun alimochu letipemi seni ekkewe foforun malo, pwe oupwe angang ngeni ewe Kot mi manau?” (Ipru 9:13, 14) Ewer, musuloon tipis ren luku an Jises Kraist we moon kepich a fokkun lapalap seni ekkewe asor fan ewe Alluk.—Ipru 7:26-28.
6 Mei wor pwal eu popun a lamot ngeni ekkewe Chon Kraist chon Ipru ar repwe kamwochunuku ekkewe mettoch ra rongorong ussun Jises. A fen oesini pwe Jerusalem epwe tatakkis. Jises a apasa: “Pun ekkewe ran repwe feito ngonuk, o ekkewe chon oputok repwe tu o achukuchukata pwul pwellifeiluk. Repwe etiepach ngonuk le pekum meinisin, o repwe poutatiu en won pwul, o pwal noum kewe semirit mi nom lon en; o resap likiti efou fau won efou lon en, pun kese sinei ewe ran mi Kot epwe amwaok.”—Luk 19:43,44.
7 Inet epwe fis? Jises ese pwarata ewe ran me ewe aua. Nge, a ngeniir ei kapasen emmwen: “Nge are oupwe kuna ekkewe mwichen sounfiu ra pwellifeili Jerusalem, iwe, oupwe sinei pwe an we tatakkis a arapoto. Lon ewe fansoun, ir mi nonnom Jutia repwe suta won chukuchukuta. Ir mi nonnom lon ewe telinim repwe tou, o ir mi nonnom le malamal resap tolong lon.” (Luk 21:20, 21) Lon ekkewe 30 ier mwirin Jises a apasaou ekkena kapas, ekkoch Chon Kraist lon Jerusalem ra tenechepwakelo me ar ekiek a rikirikfetal. Ussun ita nge rese chuen tuttumunu ewe al mwer, lon kapas awewe. Ika resap siwili ar ekiek, repwe wesewesen feiengau. Ese lifilifil ika ra luku are rese, nge a chok kanoto tatakkisin Jerusalem!a Amwo ita an Paul we kapasen fon epwe ouroura me fongunata ekkewe chon Kraist mi mour lon pekin ngun lon Jerusalem.
“Kamwochunuk” Ikenai
8 Ussun chok ekkewe Chon Kraist lon ewe aeuin senturi, a lamot ach sipwe “kamwochunuk” ngeni ekkewe poraus mi enlet seni an Kot we Kapas. Pwata? Popun, pun epwe pwal torikich eu kiteter, sap ngeni eu chok muu, nge unusen eu ototen mettoch. (Pwarata 11:18; 16:14, 16) Pwungun pwe sise silei ewe ran me ewe aua lupwen Jiowa epwe mwokutukut. (Mattu 24:36) Iwe nge, sia tongeni pwisin kuna pwonuetaan an ewe Paipel oesini mi affata pwe sia nonnom lon “ewe ranin le sopolon.” (2 Timoti 3:1-5) Ina minne, sipwe tumunukich seni ekkewe mettoch meinisin mi tongeni arikikichelo. A lamot ach sipwe kakkaeo an Kot we Kapas me meefi atapwalapwalen ei fansoun. Ren chok ach sipwe foffori ena mettoch, sipwe “ngaselo seni ekkewe mettoch meinisin mi epwe fis.”—Luk 21:36.
9 Lon ei fansoun mi sokkolo aucheaan, ifa ussun sipwe tongeni pwarata pwe sia “kamwochunuku” ekkewe mettochun ngun? Iwe, epwe pwalo ren ach fiffiti ekkewe mwichen Chon Kraist iteitan me ekkewe mwichelap. Sipwe pwal tinikken le kakkaeo Paipel pwe sipwe arap ngeni ewe Chon Fori, Jiowa. (Jemes 4:8) Ika sipwe kakkaeo ussun Jiowa ren ach pwisin kakkaeo me fiffiti ekkewe mwich, sipwe ussun chok ewe sou makkei kol mi apasa ngeni Kot: “Om kapas a wewe ngeni eu lamp ren pechei, o pwal saramen ai al.”—Kol Fel 119:105.
10 Ewe Paipel epwe ussun chok ‘saramen ach we al’ lupwen a esilei ngenikich an Kot kkewe kokkot lon mwach kkan. Mi pwal eu ‘saram fan iten pechech.’ Weween, epwe tongeni emmwenikich lupwen epwe torikich osukosuken manauach. Ina popun a lamot ach sipwe “kamwochunuk” lupwen sipwe mwichfengen ren chienach kkewe chon luku me pwisin alleani an Kot we Kapas. Ewe sile sipwe angei epwe alisikich ach sipwe filioch pwe sipwe apwapwai Jiowa me apwapwai letipan. (An Salomon Fos 27:11; Aisea 48:17) Ifa ussun sipwe tongeni alapalo ttamen ach auselingoch lon fansoun mwich me atun sipwe pwisin kaeo pwe sipwe kuna alillis watte seni an Kot kkewe minen alillis?
Amurinnolo Ach Tufichin Auseling lon Ekkewe Mwich
11 Fan ekkoch, ese mecheres ach sipwe auselingoch lon an chon Kraist kkewe mwich. Epwe mecheres pwe ach ekiek epwe tongeni rikilo, eni pokiten an emon monukol kechiu are emon mi waremmang a kutta an we leenien mot. Pokiten ach angang lon ena ran, eni sipwe pekkus. Pokiten ewe chon afalafal ese kon lien mwasangasang, eni sipwe poputa le ekieki ussun pwal ekkoch mettoch—are pwal mwo nge mourulo! Pokiten ekkewe poraus mi katou ra fokkun lamot, epwe murinno ach sipwe achocho ngeni ach sipwe alapalo ach tufichin auselingoch lon an ewe mwichefel kkewe mwich. Nge, ifa ussun sipwe tongeni fori ena mettoch?
12 Epwe kkan mecheres ach sipwe auselingoch lon ekkewe fansoun mwich ika sia fen mmolneta. Ina minne, pwata sise isetiu fansoun fan iten ach sipwe alleani ekkewe poraus sipwe kaeo? Iteiten ran epwe chok wewe ngeni fitu minich pwe sipwe alleani me ekiekifichi won ekkewe sopwun seni Paipel sipwe wisen alleani lon ena wiik. Ren ach sipwe akkotaochu ach fansoun, sipwe tongeni eani fansoun pwe sipwe mmolneta fan iten ewe mwichen Book Study me ewe kaeo lon ewe Leenien Mas. Ese lifilifil menni kokkotun fansoun kaeo sipwe filata, nge a pwung eu mettoch: Ach sipwe mmolneta epwe alisikich pwe sipwe auselingoch ngeni ekkewe lesen sipwe kaeo lon an ewe mwichefel kkewe mwich.
13 Lukun ar repwe mmolneta, ekkoch ra kuna pwe repwe auselingoch lon fansoun mwich lupwen repwe mommot lon eu leeni mi kan ngeni ewe chon afalafal. Ach atola mesen ewe chon afalafal, alleani lon pwisin nouch Paipel atun i epwe alleani ekkewe wokisin, me makkei ekkewe poraus auchea, ikkena pwal ekkoch mettoch epwe eppeti ach ekiek an epwe rikilo. Iwe nge, ach sipwe eani eu letip mi murinno epwe lamot watte lap seni ekkena mettoch. A lamot ach sipwe weweiti ewe popun sipwe mwichfengen. Sipwe eti chienach kkewe chon luku le mwichefengen akkaeuin fan iten ach sipwe fel ngeni Jiowa. (Kol Fel 26:12; Luk 2:36, 37) A lamot ekkewe mwich fan iten ach sipwe angei ewe mongo lon pekin ngun. (Mattu 24:45-47) Pwal eu, ra awora ngenikich fansoun pwe sipwe ‘apochokkula emon me emon lefilach lon tong, o fofor-murinno.’—Ipru 10:24, 25.
14 Ekkoch repwe ekiekin aukuku ochun eu mwich ren lipwakochun ekkewe chon afalafal. Repwe apasa pwe a och ewe mwich ika ekkewe chon afalafal ra lipwakoch. Nge ika rese kon lien lipwakoch, eni epwe sokkolo an ekkoch chon auseling ekiek. Pwungun pwe ekkewe chon afalafal repwe achocho le lipwakochulo lon ar tufichin asukula me akkaeuin achungu letipen aramas. (1 Timoti 4:16) Nge, kich chon auseling sisap mochen esiita. Inaamwo ika a lamot lipwakochun ekkewe chon afalafal, nge esap ewe chok mettoch ewe mwich epwe sopwoch ren. Kese tipeeu pwe epwe akkaeuin lamot ifa ukukun ach sipwe auselingoch, nge sap lipwakochun ewe chon afalafal? Lupwen sipwe fiti ekkewe mwich me auselingochu ekkewe afalafal, sipwe fel ngeni Kot me ren letipan. Ina ewe mettoch ewe mwich epwe sopwoch ren. Ika sia fokkun mochen angei sile ussun Kot, sipwe kuna alillis seni ekkewe mwich, ese lifilifil ukukun lipwakochun ewe chon afalafal. (An Salomon Fos 2:1-5) Ina minne, sipwe akkachocho ngeni ach sipwe “kamwochunuk” lon ach kkewe mwich.
Unusen Feioch Seni Om Pwisin Kaeo
15 Sipwe feioch watte seni ach ‘kamwochunuk’ lon ach kkewe fansoun pwisin kaeo me ekkekieki won. Ach akkalleani me ekkekieki won ekkewe poraus lon Paipel me an chon Kraist kkewe puken alillis epwe awora ngenikich fansoun ach sipwe lefareni lon letipach ekkewe poraus mi enlet lon Paipel. Iwe, ena mettoch epwe kku ach ekiek me foffor. Enlet, epwe alisata ach pwapwaesini ach foffori letipen Jiowa. (Kol Fel 1:2; 40:8) Ina minne, epwe lamot ach sipwe amurinnolo ach tufichin kaeo pwe sipwe kuna feioch seni. A fokkun mecheres ach sipwe rikilo! Ekkewe minen rikirik—eu koko won telephone are och akurang epwe tongeni arikalo ach ekiek. Are, eni a fen weires ngenikich ach sipwe kakkaeo. Sia tongeni mommot fan iten ach sipwe ani mongoon ngun, nge mwirin ekis chok fansoun ach ekiek a riki ngeni pwal och mettoch. Ifa ussun sipwe tongeni “kamwochunuk” atun sipwe pwisin kaeo an Kot we Kapas?
16 Epwe murinno ach sipwe filata eu fansoun me leeni mi fichiti ach sipwe kaeo. Ren lap ngeni kich meinisin, a fokkun kisikis ewe fansoun sipwe aea fan iten pwisin kich. Eni sia meefi pwe ussun ita nge minne sipwe wisen fori iteiten ran a chok uweikichelo ussun chok efoch panen ira kukkun lon eu chanpwupwu mi pwupwukai. Epwe lamot ach sipwe fiu ngeni ewe auut, lon kapas awewe, me kutta ekkoch fansoun kinamwe seni osukosuken manauach pwe sipwe tongeni kaeo. Sisap chok ekiekin witiwit tori ach sipwe sereni eu fansoun kaeo. Iwe nge, epwe lamot ach sipwe nemeni ach fansoun me foratiu eu fansoun fan iten ach sipwe kaeo. (Efisus 5:15, 16) Ekkoch ra filata eu fansoun lessosor lupwen epwe kisikis osukosuk. Pwal ekkoch ra kuna pwe a murinno lekuniol. Iwe, iei ewe poraus mi lamot, pwe sisap tunalo lamoten ach sipwe angei sile mi enlet ussun Kot me Noun we. (Jon 17:3) Ina minne, sipwe akkota ekkewe fansoun ach sipwe pwisin kaeo me apwonueta ena kokkot.
17 Mwokus—ewe fofforun ekiekochu won minne sia fen kaeo—a fokkun lamot. A alisikich pwe sipwe angei ekiekin Kot seni ewe pekin taropwe lon Paipel me lefareni lon letipach. Ach mwokus epwe alisikich pwe sipwe silei ifa ussun sipwe apwonueta ekkewe kapasen fon seni Paipel pwe sipwe “chon apwonueta ewe kapas, sap chon rong chok.” (Jemes 1:22-25) Pwal eu, mwokus epwe alisikich pwe sipwe arap ngeni Jiowa, pun epwe atufichikich ach sipwe ekieki ifa ussun ewe poraus sia kaeo lon ach kkewe fansoun a itelapei lapalapen Kot kkewe.
18 Ren ach sipwe unusen feioch seni ach kaeo me ekiekifich, epwe lamot ach sipwe tumunukich seni ekkewe minen arikirik. Ika sipwe angei ekkewe minefoon sile atun sipwe ekiekifich, epwe lamot ach sipwe tunalo ekkewe minen arikirik mi torikich ikenai. Ren ach fori ena, epwe lamot ach kutta fansoun ach sipwe alaemon chok, nge met ren feiochun ach sipwe ani ewe mongoon ngun me unumi ewe konikin enlet seni an Kot we Kapas!
19 Met sipwe fori ika a mwochomwoch ach tufichin likiitu le kaeo me ekiekich a poputa le rikilo mwirin chok fitu minich? Ekkoch ra kuna pwe repwe tongeni alangattama ar likiitu le kaeo ren ar repwe poputa le kaeo fansoun mwochomoch, nge ekis me ekis repwe alapalo ekkena fansoun. Sia mochen pwe epwe nafoch ach fansoun kaeo, nge sisap atapwalapwal le kaeo. Epwe lamot ach sipwe amarata ach mochen sileochu ewe poraus sipwe kaeo. Iwe, sipwe pwal tongeni alapalo ach sile ren ach sipwe aea ekkewe chommong puk mi fen katou seni ewe mwichen chon angang mi tuppwol me tipatchem. A fokkun murinno ngenikich ach sipwe kakkaeo “ekkewe le alollolun Kot.” (1 Korint 2:10) Ach fori ena mettoch epwe atufichikich ach sipwe alapalo ach sile ussun Kot me amarata ach tufichin esinna lefilen minne mi murinno me minne mi ingau. Ika sipwe tinikken le kaeo an Kot we Kapas, sipwe pwal “tongeni afalafala ekkewe ekkoch.”—2 Timoti 2:2.
20 Ach sipwe fiffiti an Chon Kraist kkewe mwich me pwisin kakkaeo epwe fokkun alisikich pwe sipwe alapalo me akkamwochu ach ririoch ngeni Jiowa. A pwapwalo pwe a ina ussun ewe sou makkei kol fel mi apasa ngeni Kot: “Ifa lapalapen ai aucheani om alluk! Ua chok ekieki usun ran meinisin.” (Kol Fel 119:97) Iwe, sipwe likiitu le fiffiti ekkewe mwich me ekkewe mwichelap. Sipwe kukkutta ekkewe fansoun kakkaeo Paipel me ekiekochu ussun. Ren ach sipwe foffori ekkena mettoch, sipwe kuna feioch watte pokiten ach “kamwochunuku” an Kot we Kapas.
[Footnotes]
a Eni ewe taropwe ngeni ekkewe chon Ipru a mak lon 61 C.E. Ika ina, ekkewe soufiu fan Cestius Gallus ra pwellifeili Jerusalem nimu chok ier mwirin. Ekiselo chok mwirin, ekkewe sounfiu ra feil seniir, iwe, a mut ngeni ekkewe Chon Kraist mi mirit ar repwe sulo. Ruanu ier mwirin, ekkewe sounfiuun Rom fan General Titus ra atailo ewe telinimw.
En mi Chechemeni?
• Pwata ekkoch chon Ipru Chon Kraist ra rikilo seni ewe luku mi enlet?
• Ifa ussun sipwe tongeni auselingoch lon an chon Kraist kkewe mwich?
• Met epwe alisikich pwe sipwe kuna feioch seni ach pwisin kaeo Paipel me ach ekiekifichi won?
2, 3. Ifa ewe kapasen pesepes Paul a ngeni ekkewe chon Ipru Chon Kraist, iwe, pwata a murinno an we kapasen fon?
4. Pwata ekkoch chon Ipru Chon Kraist repwe ekiekin liwiniti ewe lamalamen Jus?
5. Ifa ussun Paul a pwarata pwe ewe kokkotun fel Jises a poputaani a lapalap seni ewe sokkun fel fan ewe Alluk?
6, 7. (a) Met popun a lamot pwe ekkewe Chon Ipru chon Kraist repwe “kamwochunuk won ewe kapas mi let ra fen rongorong”? (b) Lupwen Paul a makkei noun we taropwe ngeni ekkewe chon Ipru, ifa ttamen ewe lusun fansoun mwen taloon Jerusalem? (Pii ewe footnote.)
8. Pwata a lamot ngenikich ach sipwe alapalo ach “kamwochunuk” won ekkewe poraus enlet lon an Kot we Kapas?
9, 10. (a) Ifa ussun sipwe tongeni pwarata pwe sia alamota ekkewe mettochun ngun? (b) Ifa ussun an Kot we kapas epwe ‘eu lamp ngeni pechech’ me ‘saramen ach we al’?
11. Pwata fan ekkoch epwe weires ngenikich ach sipwe auselingoch lon ach kkewe mwich?
12. Met epwe tongeni alisikich pwe sipwe auselingoch lon ekkewe mwich?
13. Met epwe tongeni alisikich pwe sipwe auselingoch ngeni ekkewe poraus sipwe kaeo lon ekkewe mwich?
14. Ifa ewe mettoch ekkewe mwich repwe sopwoch ren?
15. Ifa ussun ach kakkaeo me mwokus epwe alisikich?
16. (a) Pwata a lamot ach sipwe akkota eu fansoun ach sipwe pwisin kaeo? (b) Ifa ussun en mi fen eani fansoun pwe kopwe kaeo an Kot we Kapas?
17. Met weween ewe mettoch mwokus, me ifa ussun epwe tongeni alisikich?
18. Ikkefa ekkoch lapalap mi lamot fan iten emon epwe ekiekifichi won minne a kaeo?
19. (a) Met a alisi ekkoch ar repwe alapalo ar likiitu le kaeo? (b) Epwe met meefiach ussun ach sipwe kakkaeo, iwe, ikkefa ekkewe feioch sipwe kuna seni ei foffor mi lamot?
20. Ifa ussun sipwe tongeni amarata me akkamwochu ach ririoch ngeni Jiowa Kot?
[Picture on page 9]
A lamot ngeni ekkewe chon Ipru Chon Kraist ar repwe silei kanotoon taloon Jerusalem
[Picture on page 11]
Ekkewe sam me in ra tongeni alisi nour kkewe pwe repwe kuna alillis seni an chon Kraist kkewe mwich