Jiowa A Efeiochu Me Tumunu Chokkewe Mi Alleasochis

“Nge eman mi auselingaei epwe manau fan kinamwe, esap ourek, esap pwal niueiti och feiengau.”​—AN SALOMON FOS 1:​33.

1, 2. Met popun alleasochis ngeni Kot a mmen lamot? Awewei mwo.

EKKEWE kukkun chuko mi oneon ra chok kukkuttafetalei aner mongo lein ewe fetil mi mwochomwoch nge, rese ateneki ewe matchang watte mi akkaas asan. Muttir chok, ewe niefefin chuko a kokko ren an epwe ouroureer me, lon fitu chok seken, ir meinisin ra kuna tumun fan poun kewe. Ewe matchang watte a feilo.a Ifa ewe lesen? Alleasochis a tongeni amanauakich!

² Ena lesen a wesewesen lamot ngeni chon Kraist ikenai pokiten an Setan achocho ngeni an epwe ochei noun Kot kewe aramas. (Pwarata 12:​9, 12, 17) A achocho an epwe ataielo ach pochokkul lon pekin ngun pwe epwe pout senikich an Jiowa alillis me ach apilukulukun manau esemuch. (1 Piter 5:8) Iwe nge, ika sia arap ngeni Kot me ika sia muttir alleasochisi ekkewe emmwen seni an we Kapas are seni an we mwicheich, sia tongeni lukuluk won an tumun. Ewe sou makkei kol mi fel a makkei: “Epwe pwolukelo ren poun kewe, o kopwe kuna om leenien op fan poun kewe.”​—Kol Fel 91:4.

Eu Muu Mi Alleasolap A Ussun Ita Wiliiti Liapen Emon Matchang

³ Lupwen muun Israel a alleasochisi Jiowa, a kuna feioch seni an Jiowa tumun. Nge, fan chommong, ekkewe aramas ra su seni ewe Chon Foriir me ra kul ngeni ekkewe kot mi ffor seni ira me fau​—⁠ekkewe kot mi ‘lomotongau, resap tongeni afeiochuur ika amanaueer.’ (1 Samuel 12:21) Mwirin fite puku ierin an u ngeni Kot, Israel a wiliiti eu muu mi rikilo me ese tongeni chikarsefal. Ina popun Jises a letipechou ren an apasa: “O Jerusalem, Jerusalem, en mi nielo ekkewe soufos o monei ngeni fau atekkewe ir mi tinalo reom. Fan fitu ngang ua mochen ionfengenni noum kewe, usun chok emon chuko a ionfengenni atenin fan poun nge ami ouse mochen. Nengeni, imwemi we epwe ponulo.”​—Mattu 23:37, 38.

⁴ Pwe Jiowa a fen poutalo Israel, ewe muu mi u ngeni, a fen letelo fan riaffou lon 70 C.E. Lon ena ier noun Rom kewe sounfiu, mi uwei ar kewe esissin mi tekia mi mak won liosun ewe ikel, ra changetiu won Jerusalem, me ra nnielo chommong. Eu pwin aramas a fen feilo Jerusalem fan iten ewe Pasofer. Ar kewe asor rese fen atoto ngeniir eu feioch seni Jiowa. A achema ngenikich an Samuel kewe kapas ngeni King Saul lupwen a alleasolap: “Ifa usun, ewe Samol mi Lapalap epwe efich asoren kek me sokun asor usun an efich aleasochisi alon? Nengeni, aleasochis a murina seni asor, nge auseling a murina seni ach eani asor iwien atemwanin sip.”​—1 Samuel 15:22.

⁵ Jiowa a alluk ngenikich pwe sipwe alleasochis nge, a silefichi an aramas kewe apwangapwang. (Kol Fel 130:​3, 4) A kutta senikich eu letip mi enlet me ewe sokkun alleasochis mi alongolong won luku, tong, me ach niueiti ach sipwe aletipechou i. (Tuteronomi 10:12, 13; An Salomon Fos 16:6; Aisea 43:10; Mika 6:8; Rom 6:​17) Eu ‘kuchu mi lapen’ chon pwarata mwen ewe fansoun Kraist mi akkamwochu tuppwol ngeni Kot fan sossot watte, pwal mwo nge ngeni malo, a fen anneta pwe ena sokkun alleasochis a tufich. (Ipru 11:36, 37; 12:1) A ifa me watteen ar apwapwai letipen Jiowa! (An Salomon Fos 27:11) Iwe nge, pwal ekkoch ra tuppwol me le poputaan, nge rese sopwosopwolo ar feffetal won ewe alen alleasochis. Emon leir King Jehoash lon Juta loom.

Emon King Mi Ngauolo Ren Chiechi Mi Ngau

⁶ Arapakan King Jehoash epwe nninniilo lupwen i chok emon monukol. Iwe, lupwen a tori fisu ierin, Jehoash a seikita ngeni King fan alillisin ewe Samol Fel mi Lapalap Jehoiata. Pokiten Jehoiata, emon mwan mi niueiti Kot, me a awora fon ussun chok emon sam, Jehoash “a fori mine a pwung me fan mesen ewe Samol mi Lapalap lon ukukun ranin manauen ewe souasor Jehoiata.”​—2 Kronika 22:⁠10–​23:​1, 11; 24:​1, 2.

⁷ Fofforun Jehoash kewe mi murinno a kapachelong forsefallin an Jiowa imwen fel​—⁠eu mettoch a fokkun mochen fori. A achema ngeni ewe Samol Fel mi Lapalap, Jehoiata, ewe lamoten ar repwe angei ekkewe takises seni Juta me Jerusalem ussun chok “Moses . . . a apwungala,” pwe epwe tongeni mooni ewe angang. A ffat pwe Jehoiata a fen sopwoch lupwen a pesei ewe king-aluwon an epwe kaeo me alleasochisi an Kot kewe alluk. Ina popun ewe angang won ewe imwen fel me pisekin kewe a muttir wesilo.​—2 Kronika 24:​4, 6, 13, 14; Tuteronomi 17:18.

⁸ A solap pwe Jehoash ese alleasochis tori sopwoloon. Met popun? An Kot we Kapas a erenikich: “Nge murin an Jehoiata mala, ekewe samolun Juta ra feito o asamolu ewe king. Murin, ewe king a auselinga ar tungor. Iei mine ekewe aramas ra ukutiu le fel lon imwen ewe Samol mi Lapalap an semelaper we Kot o fel ngeni ekewe uluulun anufefin Asera me ekewe uluulun anumwal. Ren ei Kot a song ngeni chon Juta me Jerusalem, pun ra tipis.” Etipetipaen ekkewe samol a pwal emmweni ewe king ngeni an tunalo alon kapasen noun Kot kewe soufos, nge emon leir noun Jehoiata we, Sekaraia. Sekaraia a pwora le apwungu Jehoash me ekkewe aramas pokiten ar alleasolap. Jehoash ese aier nge a apwungualo pwe repwe monei ngeni fau Sekaraia tori an malo. Jehoash a wiliiti emon mwan mi alleasolap, esor an tong pokiten etipetipaen chiechi mi ngau!​—2 Kronika 24:​17-​22; 1 Korint 15:33.

⁹ Ifa ussun Jehoash me chiechian kewe, ekkewe samol, mwirin ar poutalo Jiowa? Eu mwichen sounfiun Siria​—⁠“iei mwo chokukun”​—⁠ra tooki Juta me ra “niela samolun ekewe aramas meinisin.” Ekkewe sounfiu ra eriani Jehoash an epwe fangolo pisekin kewe meinisin me fangolo unusen ewe kolt me silifer meinisin lon ewe imwen fel. Rese nnielo Jehoash nge a awpangapwangelo tori a semmwenilo. Ekiselo chok mwirin, aramasen pwisin imwan we ra pwungupwungfengen ar repwe nnielo Jehoash. (2 Kronika 24:23-​25; 2 King 12:17, 18) A fet pwungun an Jiowa kewe kapas ngeni Israel: “Nge are ousap aleasochisi alon ewe Samol mi Lapalap ami we Kot, ousap pwal tumwunuochu le apwonueta an kewe alluk me pwuung meinisin . . . anumamau repwe feito womi o nonom mwemi”!​—Tuteronomi 28:15.

Emon Seketeri A Kuna Manau Pokiten Alleasochis

¹⁰ Fan ekkoch ka fen chipwangelo pokiten a chokisikis aramas mi pwapwaiti ewe kapas allim? Fan ekkoch ka lolowoiiti aramas mi wouoch me ewe pwapwa ra kuna lon manauer? Ika pwe ina, kopwe mwo ekkekieki Paruk, noun Jeremaia we seketeri, me ewe fon mi tong Jiowa a ngeni i.

¹¹ Paruk a mammakkei porausen eu oesini won echo taropwe lupwen Jiowa a afota mesan won i. Met popun? Pokiten an Paruk menemenemmang ren lapalapen manauan me an mochen kutta mettoch mi murinno seni wiisan mi auchea ussun chok noun Kot chon angang. Pokiten Jiowa a kuna ei siwil lon ekiekin Paruk, a ngeni ei fon mi kirokiroch me ffat: “Ifa usun, ka kutta mettoch mi watte fan itom? Kosap kutteer. Pun upwe aworato feiengau won aramas meinisin. Nge ngang upwe amwochu manauom lon ekewe leni meinisin ia kopwe feila ie.”​—Jeremaia 36:​4; 45:5.

¹² Ka tongeni meefi seni an Jiowa kewe kapas ngeni Paruk ukuukun an aucheani ei mwan mi murinno mi angang fan tuppwol me pwora fan iten Jiowa fengen me Jeremaia? Ussun we chok ikenai, Jiowa a aucheani chokkewe mi kuna sossot ren ar mochen chei ekkewe mettoch mi ling lon ei fonufan. A mmen apwapwa pwe chommong ra fen etiwa ewe fon seni chiener kewe lon pekin ngun, ussun chok Paruk a fori. (Luk 15:​4-7) Amwo pwe kich meinisin sipwe miritiiti pwe esor lamoten ach kutta “mettoch mi watte” lon ei fonufan. Chokkewe mi kutta mettoch mi watte resap kuna pwapwa, me repwe morolo ren ei fonufan me mochenian kewe.​—Mattu 6:​19, 20; 1 Jon 2:​15-​17.

¹³ Porausen Paruk a pwal ngenikich eu lesen mi auchea ren tipetekison. Jiowa ese pwisin fos ngeni Paruk nge a fos ngeni ren Jeremaia. Paruk epwe sinefichi apwangapwangen me lapalapen Jeremaia kewe. (Jeremaia 45:​1, 2) Iwe nge, Paruk ese fen kkuf fan lamalam tekia; a miritiiti fan tipetekison pwe Jiowa ewe popun ena fon. (2 Kronika 26:​3, 4, 16; An Salomon Fos 18:12; 19:20) Iwe, ika sia ‘serengau lon och tipis’ me sia fen angei och fon mi lamot seni an Kot we Kapas, amwo sipwe appiru an Paruk asimau, mirit lon pekin ngun, me tipetekison.​—Kalesia 6:1.

¹⁴ Ach tipetekison epwe alisikich lupwen sia wiisen awora fon. A mak lon Ipru 13:17: “Iwe, oupwe alleasochisi ekkewe chon emmwenikemi, o nonnom fan nemenier; pun ra mamasa ngunumi usun chok ir ekkewe repwe pwarata usun ar angang. Iwe, repwe fori ar angang ren pwapwa, sap ren letipechou, pun are ra letipechou ren ar angang, ami ousap feioch ren.” Fan fitu ekkewe elter ra tinikken le iotek ren ar repwe angei pwora, tipatchem, me fairo mi lamot fan iten pwonutaan ei kinikinin ewe wiis chon masen siip! Amwo sipwe “menniniti ei sokkun aramas.”​—1 Korint 16:18.

¹⁵ A ffat pwe Paruk a fen siwili ekiekin pun Jeremaia a awiisa ngeni eu wiis mi fokkun weires​—⁠epwe feilo ngeni ewe imwen fel me epwe leuwommong le alleani ekkewe kapasen kapwung seni Jeremaia, ekkewe kapas a keran wes le makketiu. Paruk a alleasochis? Ewer, “Paruk a fori meinisin [minne] ewe soufos Jeremaia a akunou ngeni.” Pwungun pwe a pwal pworacho ngeni an alleani ewe poraus ngeni ekkewe samolun Jerusalem. (Jeremaia 36:​1-6, 8, 14, 15) Lupwen Papilon a liapeni ewe telinimw orun 18 ier mwirin, ekieki mwo watteen an Paruk kilisou ren an ese nninniilo pokiten an auselinga an Jiowa ourour pwe esap chuen kutta “mettoch mi watte” fan iten i pwisin!​—Jeremaia 39:​1, 2, 11, 12; 43:​6.

Alleasochis Atun Eu Maun A Amanaua Aramas

¹⁶ Lupwen Jerusalem a talo lon 607 B.C.E., a fokkun pwalo an Kot tongei chokkewe mi alleasochis. Lon ewe fansoun mi weires seni meinisin fansoun ekkewe sounfiun Papilon ra pwelli ewe telinimw, Jiowa a apasa ngeni ekkewe chon Jus: “Ua mwut ngenikemi pwe oupwe filata lefilen ewe al mi ale ngeni manau me ewe al mi ale ngeni mala. Chokewe mi nomotiu lon ei telinimw repwe mala ren maun, ren lengita pwal ren matter. Nge chokewe mi towu seni ei telinimw o fangata ngeni ekewe chon Papilon mi pwelifeili ei telinimw fan pisekin maun repwe manau, repwe chok kutta en me pusin manauan.” (Jeremaia 21:​8, 9) Inaamwo ika chon Jerusalem ra tipis me a pwung ar kuna ei kata nge, Jiowa a pwaralo tong ngeni chokkewe mi alleasochis, pwal mwo nge lon ena fansoun mi lamot lupwen ewe telinimw epwele talo.b

¹⁷ An Jeremaia ereni ekkewe chon Jus pwe repwe feilo ngeni ekkewe chon Papilon a wewe ngeni sossotun an Jeremaia alleasochis. Jeremaia a lolowo fan asengesin iten Jiowa. Ese mochen pwe ena it epwe kuna esiit lupwen chon Papilon repwe apasa pwe ar wiin a fis pokiten pochokkulen ar kewe uluulun esor manau lon ir. (Jeremaia 50:​2, 11; Kolun Kechu 2:​16) Pwal och, Jeremaia a pwal silei pwe i pwisin epwe tongeni feiengau ika epwe ereni aramas pwe repwe ffangeta pokiten chommong aramas repwe apasa pwe Jeremaia a peni ekkewe chon Papilon. Iwe nge, Jeremaia ese limaramarsefal ren an niuokkus, nge a apasawu an Jiowa kewe kapas fan alleasochis. (Jeremaia 38:​4, 17, 18) Sipwe ussun chok Jeremaia ren ach uwei eu poraus chommong rese saani. Ina ewe poraus a fen efisi an aramas oputa Jises. (Aisea 53:3; Mattu 24:9) Ina popun, sisap “niuokusiti aramas,” nge sipwe appiru Jeremaia me alleasochisi Jiowa fan pwora, me eani lukuluk won i.​—An Salomon Fos 29:25.

Alleasochis Lupwen Kok A Mauneekich

¹⁸ Arapakan chok, an Setan we otot meinisin epwe talo lon ewe “riaffou mi lapalap.” (Mattu 24:21) Ese mwaal pwe mwen me atun ena fansoun, epwe watte ekkewe sossotun luku me alleasochis noun Kot kewe aramas repwe kuna. Ren chok awewe, a mak lon ewe Paipel pwe Setan, “Kok” seni ewe fonuen Makok, epwe maunei noun Jiowa kewe aramas, nge chommong repwe alisi. Ra awewe won lon Paipel ussun chok “mwichemongun sounfiu . . . usun eu molumol mi tori ewe fanu.” (Isikiel 38:​2, 14-​16) Pokiten chokkena mi mauneer ra chommong seniir me esor pwisin ar kewe pisekin maun, noun Kot kewe aramas repwe kutta ar amanau fan “poun” Jiowa, mi ussun chok eu ttitin maun fan iten chokkewe mi alleasochis.

¹⁹ Ei poraus a achema ngenikich fansoun an Israel towu seni Isip. Mwirin ekkewe 10 riaffou mi chou, Jiowa ese emmweni noun kewe aramas ngeni ewe Fonu mi Pwonetiu won ewe aal mi mecheres me mwochomwoch, nge a emmweniir ngeni ewe Setipar, ngeni eu leenien feiengau rese tongeni su seni. Me ren ekiekin sounfiu, ese och ar feilo ie pokiten epwe watte ar feiengau. Ika en ka fen nonnom lein ekkena chon Israel, kopwe fen ita alleasochisi an Jiowa we kapas mi katowu seni auen Moses me kopwe karis ngeni ewe Setipar fan lukulukoch, lupwen ka silei pwe kese wesewesen fetal ngeni ewe Fonu Mi Pwonetiu?​—Ekistos 14:​1-4.

²⁰ Lupwen sia alleani Ekistos sopwun 14, sia kuna ifa ussun Jiowa a fen amanaua noun kewe aramas ren pwaloon an manaman mi amwarar. A ifa me watteen pochokkuleloon ach luku seni ekkeei sokkun poraus lupwen sipwe kaeo me ekiekifichiir. (2 Piter 2:9) Luku mi pochokkul a apposa letipach pwe sipwe alleasochisi Jiowa, pwal mwo nge lupwen a ussun ita nge met epwe kutta senikich esap och me ren an aramas ekiek. (An Salomon Fos 3:​5, 6) Iwe, kopwe pwisin eisinuk, ‘Ngang mi achocho ngeni ai upwe apochokkula ai luku ren ai tinikken le kaeo ewe Paipel, iotek, me ren ai ekiekifichi minne ua kaeo, pwal ren ai chiechifengen me ngeni noun Kot kewe aramas?’​—Ipru 10:24, 25; 12:​1-3.

Alleasochis A Ngenikich Apilukulukoch

²¹ Chokkewe mi manaueni manauer fan alleasochis ngeni Jiowa repwe tongeni kuna, iei mwo, pwonutaan An Salomon Fos 1:​33: “Nge eman mi auselingaei epwe manau fan kinamwe, esap ourek, esap pwal niueiti och feiengau.” A ifa me amwararen ekkeei kapas mi aururukich atun ranin an Jiowa song! Pwungun pwe Jises a ereni noun kewe chon kaeo: “Iwe, are ekkeei mettoch epwe fisita, oupwe neta o sacheta pun ami amanau a fen arapoto.” (Luk 21:28) A ffat pwe chokkewe chok mi alleasochisi Jiowa epwe nafoch ar lukuluku ar repwe alleasochisi alon ekkena kapas.​—Mattu 7:​21.

²² Pwal eu popun sipwe lukulukoch pwe “Kot ewe Samol mi Lapalap esap fori och ika esap pwari mwo mine a ekiekieta ngeni noun chon angang ekewe soufos.” (Amos 3:7) Ikenai, Jiowa ese chuen fori pwe noun kewe soufos repwe oesini ussun chok met a fen fis me loom; nge a fen awiisa ngeni eu mwichen aramas mi eani wiiser ussun chok emon chon angang mi tuppwol me ra awora mongo lon pekin ngun lon ewe fansoun mi murinno ngeni aramasen imwan. (Mattu 24:45-​47) A ifa me lamoten ach alleasochisi ei “chon angang”! Ewe lesen mwirin ei epwe aiti ngenikich pwe ena esin alleasochis a pwaralo ach ekieki ussun Jises, mastaan ewe ‘chon angang.’ Jises ewe emon ‘chon ekewe mwu meinisin repwe aleasochisi.’​—Keneses 49:10.

[Footnotes]

En Mi Chechchemeni?

• Ifa mwiriloon an Israel akkalleasolap?

• Ifa ussun chiechian kewe ra ku King Jehoash, lupwen a kukkun me lupwen a watte?

• Ikkefa ekkewe lesen sia tongeni kaeo seni Paruk?

• Met popun noun Jiowa kewe aramas mi alleasochis resap niuokkus atun ewe fansoun sia arap ngeni ewe sopwoloon ei otot?

3. Ifa mwiriloon an Israel akkalleasolap?

4. Ifa ussun a fen pwalo pwe Jiowa a fen likitalo Jerusalem lon 70 C.E.?

5. Met sokkun alleasochis Jiowa a kutta senikich, me ifa ussun sia silei pwe sia tongeni eani ena esin alleasochis?

6, 7. Met sokkun sou nemenem Jehoash lupwen Jehoiata a chuen manau?

8. (a) Ifa ewe populapen an a ngaualo an Jehoash pochokkul lon pekin ngun? (b) An ewe king alleasolap a emmwen ngeni an fori met?

9. Ifa ussun met a tori Jehoash me ekkewe samol a menlapei ewe feiengauen alleasolap?

10, 11. (a) Met popun ach ekiekifichi an Jiowa fon ngeni Paruk epwe alisikich? (b) Ifa ewe fon Jiowa a ngeni Paruk?

12. Met popun sipwe tumunukich seni ach kutta “mettoch mi watte” fan itach lon ei fonufan?

13. Ifa ewe lesen ussun tipetekison sipwe tongeni kaeo seni ewe porausen Paruk?

14. Met popun a murinno ach sipwe alleasochisi chokkewe mi emmwenikich?

15. (a) Ifa ussun Jeremaia a pwaralo an lukulukoch won Paruk? (b) Menni ewe feioch Paruk a kuna fan iten an alleasochis?

16. Ifa ussun a pwalo an Jiowa tongei ekkewe chon Jus lon Jerusalem lupwen sounfiun Papilon ra pwellifeili ewe telinimw lon 607 B.C.E.?

17. (a) Ikkefa ekkewe ruu mettoch a sotuni an Jeremaia alleasochis lupwen Jiowa a ereni pwe epwe aporausa ngeni ekkewe aramas pwe repwe ‘feila ngeni ekkewe chon Papilon’? (b) Ifa ussun ach sipwe kuna feioch seni an Jeremaia alleasochis fan pwora?

18. Ikkefa ekkoch sossotun alleasochis noun Jiowa kewe chon angang repwe kuna lon mwach kkan?

19, 20. (a) Met popun a fokkun watte lamoten alleasochis lupwen chon Israel ra nonnom unukkun ewe Setipar? (b) Ifa ussun ach iotek me ach ekiekifichi ussun porausen Israel unukkun ewe Setipar epwe efeiochukich ikenai?

21. Ikkefa ekkewe feioch, iei me lon mwach kkan, epwe tori chokkewe mi alleasochisi Jiowa?

22. (a) Ikkefa ekkewe popun noun Jiowa kewe aramas repwe lukulukoch? (b) Met sipwe poraus ussun lon ewe lesen mwirin ei?

[Picture on page 21]

Fan an Jehoiata emmwen, Jehoash a alleasochisi Jiowa

[Picture on page 22]

Chiechi mi ngau a etipetipa Jehoash an epwe efisi nninniilon noun Kot we soufos

[Picture on page 24]

Kopwe fen alleasochisi Jiowa me kuna amwararen an manaman mi amanaua aramas?