Porausen Ekkewe Chon Afalafala Ewe Muu

Ra “Rongorong” Porausen Ewe Muu Lon Brazil

EKKEWE Chon Pwarata Jiowa lon Brazil ra poputa le kaeo Brazilian Sign Language pwe repwe tongeni esileifeili ewe kapas allim ussun ewe Muu ngeni ekkewe aramas mi selingepung. Ar achocho a uwaoch, ussun an ekkewe poraus mi mak fan ra pwarata.

Eva,a emon mi selingepung lon São Paulo, a poputa le kaeo sign language mwirin ir me noun kewe ulumon ra poputa le nonnom ren emon mwan mi selingepung. Lon eu sitowa, Eva me an we boyfriend ra chuuri eu mwichen Chon Pwarata mi selingepung, iwe ra etiweer le fiti mwich lon ewe Kingdom Hall. Ra fitiir pun ra ekieki pwe epwe wor eu pari.

Pokiten an Eva ese kon lien silei sign language, ese tongeni weweiti chommong lein ekkewe poraus a katowu lon ewe mwich. Mwirin, ruuemon Chon Pwarata ra etiwa i lon imwer pwe repwe ekis mongo. Seni ekkewe lios lon ewe brochure Pwapwaesini Manau won Fonufan Tori Feilfeilo Chok!, ra awewe ngeni Eva an Kot kewe pwon ussun eu paratis epwe fis won fonufan lon mwach kkan. Eva a saani met a kaeo me a poputa le fiffiti ekkewe mwich.

Ekiselo mwirin, Eva a poutalo an we boyfriend pwe epwe atipeeufengenni manauan me ekkewe alluk lon ewe Paipel. Ikaamwo an famili a fokkun u ngeni nge, Eva a feffeita lon pekin ngun tori a papataiselo lon 1995. Wonu maram mwirin, Eva a poputa le pioneer, are afalafal ussun ewe Muu full-time. A fen alisi fomon aramas mi selingepung pwe repwe fangolo manauer ngeni Kot tori ra papataiselo.

Carlos a selingepung seni an uputiu. Seni le kukkunun a aea safeien apuchopuch, lisou mwaal, me sola. Lupwen eu gang a amosoku Carlos, iwe a ssu ngeni São Paulo me a nonnom ren João ren ekkoch fansoun. João, a ussun chok Carlos, a selingepung me manauan a chok ur ren osukosuk.

Fite ier mwirin, Carlos a kaeo ewe poraus ussun ewe Muu, me ewe poraus a amwokutu i le atipeeufengenni manauan me ewe Paipel me a rechisterini an pupulu. Mwirin an apwonueta met ewe Paipel a apasa, Carlos a fangolo manauan ngeni Jiowa me a papataiselo. Nge Carlos ese silei pwe João a pwal kaeo ewe kapas allim, me a pwal siwili manauan. Lupwen a kaeo pwe Jiowa ese saani nounoun lios lon fel, João a molelo noun kewe “liosun aramas pin.” Mwirin an siwili manauan me loom, João a pwal papataiselo.

Mwa met ren pwapwaan Carlos me João lupwen ar ra chuufengen me lon ewe Kingdom Hall me lupwen ra kuna ekkewe siwil a fis lon manauer! Iwe iei ir me ruuemon ra wiliiti mokuren famili mi asimau me chon afalafala ewe Muu mi tinikken.

Lon Brazil iei, mei wor 30 sign-language mwichefel me 154 kumi, me mei wor lap seni 2,500 chon afalafal ie, nge orun 1,500 me leir ra selingepung. Lon ewe 2001 District Mwichelap lon Brazil, itelapan “Senseen An Kot We Kapas”, lap seni 3,000 ra fiti, me 36 ra papataiselo. Ren alillisin Jiowa, sia anean pwe pwal chommong mi selingepung repwe pwal etiwa ewe poraus ussun ewe Muu.

[Footnotes]