Ifa Pochokkulen Om Luku?
“Oua fen uta nukuchar lon ami luku.”—2 KORINT 1:24.
1, 2. Met popun epwe nom rech luku, me ifa ussun luku epwe tongeni pochokkulelo?
NOUN Jiowa kewe chon angang ra silei ewe lamoten luku. Ren enletin, ‘are emon esap luku, iwe, esap tongeni apwapwai Kot.’ (Ipru 11:6) Ina popun, sia tingor fan iten an we ngun mi fel me eu me lein uwan kewe, luku. (Luk 11:13; Kalesia 5:22, 23) Ach akkappiru lukuen chienach kewe a pwal tongeni apochokkula ei lapalap lon manauach.—2 Timoti 1:5; Ipru 13:7.
2 Ach luku epwe pochokkulelo ika sipwe feffetal won ewe aal mi awewe won lon an Kot we Kapas fan iten chon Kraist meinisin. Akkalleaan Paipel me kaeo lon ewe Kapasen Kot fan tinikken ren alillisin ekkewe puk a feito seni ewe “chon angang mi tuppwel o tipatchem,” a tongeni alapalo ach luku. (Luk 12:42-44; Josua 1:7, 8) Sia apochokkulafengenni ach luku lupwen sia fiffiti mwich me mwichelap. (Rom 1:11, 12; Ipru 10:24, 25) Me ach luku a pochokkulelo lupwen sia kapas ngeni aramas lon ewe angangen afalafal.—Kol Fel 145:10-13; Rom 10:11-15.
3 Ekkewe elter chon Kraist mi tong ra alisikich le apochokkula ach luku ren ar awora emmwen me alillis seni ewe Paipel. Ra eani ewe ekiek ussun chok an ewe aposel Paul lupwen a ereni ekkewe chon Korint: “Sia chok etikemi le angang pwe oupwe pwapwa, pun oua fen uta nukuchar lon ami luku.” (2 Korint 1:23, 24) Pwal eu Paipel a apasa: “Sia chok etikemi le angang pwe oupwe pwapwa, pokiten ami luku mi pochokkul.” (Contemporary English Version) Ekkewe mi pwung ra manau ren ar luku. Pwungun pwe emon ese tongeni anganga ach luku are efisi ach wiliiti chon angang mi tuppwol. “Kich emon me emon sipwe fakkun pwisin en me uwei osan.”—Kalesia 3:11; 6:5.
4 Ewe Paipel a ur ren porausen aramas mi luku. Neman sia fen silei porausen chommong an ekkeei aramas foffor mi itefoulo, nge ifa ussun ewe luku ra pwaralo ran me ran, eli atun unusen manauer mi ttam? Ach ekkekieki ifa ussun ra pwaralo ei lapalap fan ekkewe osukosuk mi wewefengen me ach kewe a tongeni apochokkula ach luku.
Luku A Ngenikich Pwora
5 Luku a apochokkulakich fan iten ach sipwe esilei an Kot we Kapas fan pwora. A mmen watte an Inok we pwora lupwen a oesini an Kot we kapwung. A apasa: “Nengeni, ewe Samol a fen feitiu eti chommong chommong noun kewe mi fel, pwe epwe fori apwung ngeni aramas meinisin, o apungu ekkewe aramas ingau meinisin ren ar kewe fofor-ingau, o pwal ren ekkewe kapas pochokkul ekkewe chon tipis mi ingau ra fen kapas pochokkul ngeni i.” (Juta 14, 15) Ekkewe aramas rese luku Kot mi oputa Inok ra mochen nnielo i lupwen ra rongorong ekkena kapas. Nge, a pwora le kapas fan an luku, me Kot a “angei,” weween pwe a awesalo manauan nge Inok ese fen meefi ewe riaffoun malo. (Keneses 5:24; Ipru 11:5) Sise kuna ekkena sokkun manaman ikenai nge, Jiowa a polueni ach kewe iotek fan iten pwora me luku pwe sipwe tongeni esilei an kewe kapas.—Fofor 4:24-31.
6 Ren luku Noa “a forata ewe waim, pwe epwe amanaua chon le imwan.” (Ipru 11:7; Keneses 6:13-22) Noa emon “chon afalafala minne mi pwung” me a pwora le esilefetalei ewe kapasen ourour seni Kot ngeni aramas. (2 Piter 2:5, NW) Ra fen esiita an Noa poraus ussun ewe Nooter ussun chok ekkoch ra esiita ewe poraus lon ewe Paipel pwe arapakan chok ei otot minen loom epwele talo. (2 Piter 3:3-12) Ussun chok Inok me Noa, sia tongeni uwei ena esin poraus pokiten ewe luku me pwora sia fen angei seni Kot.
Luku A Ngenikich Mosonottam
7 A lamot luku me mosonottam, akkaewin lupwen sia wikiiti ewe sopwoloon ei otot mi ngau. Eperiam emon lein ekkewe repwe “alemwiri ekkewe pwon ren luku o likiitu.” (Ipru 6:11, 12) Ren luku a likitalo ewe telinimw mi wouoch itan Ur, me a wiliiti emon chon siamu lon eu fonu mi towau Kot a pwon pwe epwe ngeni. Aisek me Jekop ir chon alemwir ren ena pwon. Iwe nge, “ekkewe aramas meinisin ra malo lon luku; rese mo angei feiochun ekkewe pwon.” Ren luku ra “fakkun mochen eu fonu mi murinno seni fonuer we, a wewe ngeni fonuen lang.” Iwe, Kot “a ammolata ngeni ir telinimwer.” (Ipru 11:8-16) Ewer, Eperiam, Aisek, me Jekop—me puluwer kewe mi niuokksiiti Kot—ra fen wikiiti fan mosonottam fan iten ewe Muun Lang epwe amanauer ngeni manau won fonufan.
8 Ese poutulo seni Eperiam, Aisek, me Jekop ar luku. Rese mwo nemeni ewe Fonu mi Pwonetiu, me rese fen kuna ifa ussun ekkewe fonu meinisin repwe kuna feioch seni mwirimwirin Eperiam. (Keneses 15:5-7; 22:15-18) Inaamwo ika ewe ‘telinimw Kot epwe forata’ esap fiffis tori a fen lulo fite puku ier nge, ekkeei mwan ra chuen pwaralo luku me mosonottam ren unusen manauer. Amwo sipwe fori ussun we chok atun ei fansoun lupwen a fen fisita Muun Messaia lon lang.—Kol Fel 42:5, 11; 43:5.
Luku A Ngenikich Mettoch Mi Murinno Sipwe Achocho Ngeni
9 Ekkewe mwan mi tuppwol me loom rese fen etiwa lapalapen manauen ekkewe chon Kenan mi ppwor pokiten minne ra achocho ngeni a fokkun murinno seni ena. Luku a ngenikich mettoch mi murinno lon pekin ngun sipwe achocho ngeni me ekkena mettoch sipwe achocho ngeni repwe alisata ach sisap fitipacheiti ei fonufan mi nonnom fan nemenien ewe mi ingau, Setan ewe Tefil.—1 Jon 2:15-17; 5:19.
10 Fan an Kot emmwen, noun Jekop we, Josef, a wiliiti sou nemenemen unusen ewe mongo lon Isip, nge ese achocho ngeni an epwe wiliiti emon mi foummong won fonufan. A eani luku won pwonutaan an Jiowa kewe pwon. Lupwen Josef a 110 ierin, a ereni pwiin kewe: “Ngang upwe le mala. Nge Kot epwe fokun alisikemi, epwe emwenikemiiwu seni ei fanu o aliwinikemiila lon ewe fanu a pwon ngeni Apraham, Isaak me Jakop.” Josef a tingor pwe epwe peias lon ewe fonu mi pwoneitiu. Lupwen a malo, ra safeini inisin me walong lon ewe pworun mi ma me a nonnom lon Isip. Nge lupwen Israel a fen ngaselo seni fan nemenien Isip, ewe soufos Moses a uwei chuun Josef pwe epwe tongeni peisasini lon ewe fonu mi pwonetiu. (Keneses 50:22-26; Ekistos 13:19) Luku ussun chok an Josef epwe amwokutukich ach sipwe achocho ngeni mettoch mi fokkun murinno seni ach wiliiti emon mi foummong lon fonufan.—1 Korint 7:29-31.
11 Moses ‘a filata epwe eti noun Kot kewe aramas lon ar riaffou, o esap pwapwaesini pwapwan tipis mi epwe nonnom chok fansoun mochomoch’ ussun chok emon mi sinelap lon ewe famili mi nemeni Isip. (Ipru 11:23-26; Fofor 7:20-22) A pout seni Moses an wiliiti emon mi foummong lon fonufan me an peias lon ewe sokkun peias mi watte lon Isip aramas ra chuen ingeiti tori ikenai. Nge met aucheaan ena lupwen sia alollo ngeni wiisan mi auchea ussun chok “emon aramasen Kot,” chon affor fan iten ewe pwon loom mi riri ngeni ewe Alluk, noun Jiowa we soufos, me emon lein ekkewe aramas mi wiisen makkei ewe Paipel? (Esra 3:2) Ka mochen wiliiti emon mi foummong lon fonufan, are en ka achocho ngeni ekkewe mettochun ngun mi tekia seni?
Luku A Atoto Eu Manau Mi Menemenoch
12 Luku esap chok ngeni aramas mettoch mi murinno repwe achocho ngeni nge epwe pwal ngeniir manauer mi menemenoch. Neman Reap ese meefi pwe manauan mi wesewesen auchea pokiten i emon fin lisowu. Nge a siwil an ekiek lupwen a anganga an luku! Reap a “kuna pung ren an kewe fofor [fofor mi alongolong won luku], mwirin a fen etiwa ekkewe chon kuno [chon Israel] o pwal tinirelo lon efoch al,” pwe repwe tongeni su seni ekkewe chon Kenan mi cheer. (Jemes 2:24-26) Reap a esinna pwe Jiowa ewe Kot mi enlet, me a pwal pwaralo an luku ren an ese chuen emon fin lisowu. (Josua 2:9-11; Ipru 11:30, 31) A puluweni emon mi angang ngeni Jiowa, sap emon chon Kenan mi ese luku. (Tuteronomi 7:3, 4; 1 Korint 7:39) Reap a fen angei eu wiis auchea mi fokkun lapalap. Ewe Messaia emon mwirimwirin. (1 Kronika 2:3-15; Rut 4:20-22; Mattu 1:5, 6) Reap epwe pwal kuna ewe feiochun manausefal ngeni manau won fonufan ussun chok chommong aramas, ekkoch me leir ra pwal poutalo manauer mi limengau.
13 Reap a amwochu eu manau mi wenechar mwirin a poutalo eu manauen tipis. Iwe nge, ekkoch chon loom mi fen fangolo manauer ngeni Kot, ra fen tipis watte. King Tafit a lisowu mwaal ren Patsipa, a efisata maloon puluwen Patsipa we lon ewe maun, me mwirin a puluweni Patsipa. (2 Samuel 11:1-27) Tafit a riaffou wachemuk me a aier. A tingormau ngeni Jiowa: “Kosap . . . uwei seniei om we Ngun mi Fel.” Ese fen pout seni Tafit ngunun Kot we. A wor an Tafit luku pwe Jiowa, fan an umoumoch, esap “nioput eu letip mi ta” me rosolo pokiten tipis. (Kol Fel 51:11, 17; 103:10-14) Pokiten ar luku, Tafit me Patsipa ra pwal nonnom lein samasamen ewe Messaia.—1 Kronika 3:5; Mattu 1:6, 16; Luk 3:23, 31.
Luku A Pochokkulelo Ren Ewe Kapasen Alukuluk Pwe Kot Epwe Alisikich
14 Inaamwo ika sia feffetal fan luku iei nge, fan ekkoch sia osupwangen an emon alukulukukich ussun an Kot alillis. Sou Kapwung Kition, emon lein ekkewe mi “pworacho ngeni ekkewe mu ren luku,” a kutta ena esin kapasen alukuluk. (Ipru 11:32, 33) Lupwen ekkewe chon Mitian me chiener kewe ra tooki Israel, ngunun Kot a tori Kition. Kition a mochen angei kapasen alukuluk pwe Jiowa a nonnom ren. A mochen fori eu sossot epwe kapachelong uloulen emon siip mi nonnom chok won ppwulun eu leenien wichiwich wiich ren unusen eu pwin. Akkom, amurenipwin a nonnom chok won uloulen ewe siip nge ewe ppwul a pwas. A sorei fan ewe oruuen sossot. Kition emon mi tumunuoch. Mwirin, Jiowa a fen alukuluku pwe epwe alisi, Kition a angang fan an luku me a akkufu chokkewe mi u ngeni Israel. (Soukapwung 6:33-40; 7:19-25) Sap minne sia nafangauen luku lupwen sia mochen kutta ei esin alukuluk lupwen a wor ach kefil. Sia pwaralo ach luku ren ach kutta alillis lon ewe Paipel me lon ekkewe puk fan iten chon Kraist me ren ach iotek fan iten emmwen seni ngun mi fel lupwen sia pwungupwung won och mettoch.—Rom 8:26, 27.
15 Emon soufos a alukuluku sou kapwung Parak pwe Kot epwe alisi me an luku a pochokkulelo. Ewe soufos Tepora a pesei Parak an epwe achocho le angasalo Israel seni fan nemenien Japin, ewe kingen Kenan. Fan luku me ren ewe kapasen alukuluk pwe Kot epwe alisiir, Parak a emmweni 10,000 mwan, nge mi ngau ar kewe pisekin maun, me ra akkufu noun Japin we mwichen sounfiu mi fokkun pochokkul seniir fan nemenien ewe meilap Sisera. Ewe kolun Tepora me Parak mi amwarar a ffor fan iten ar repwe pwapwaiti ei win. (Soukapwung 4:1–5:31) Tepora a pesei Parak pwe epwe etiwa wiisan seni Kot, ewe wiis sou emmwenin Israel. Parak emon lein noun Kot kewe chon angang mi “asulo ekkewe chon fiu.” (Ipru 11:34) Ach pwungupwung won ifa ussun Kot a efeiochu Parak pokiten ewe angang a fori fan luku a tongeni amwokutukich ach sipwe achocho ngeni pwal mwo nge ekkewe wiis mi weires sia angei seni Jiowa.
Luku A Alisata Kinamwe
16 Ussun chok luku a alisikich ach sipwe apwonueta wiisach kewe mi weires lon an Kot we angang, luku a pwal alisata kinamwe me chiechioch ren aramas. Lupwen ewe mwan chinnap, Eperiam, a kuna ewe osukosuk lefilen nour kewe chon masen siip me a lamot pwe repwe mufesen, iwe, a mut ngeni noun pwiin we, Lot, an epwe filata ewe fonu mi murinno. (Keneses 13:7-12) Eperiam epwe fen iotek fan luku pwe Kot epwe alisi le awesalo ei osukosuk. Nge Eperiam ese ekieki met a lamot ngeni i pwisin akkom, nge a awesalo ewe osukosuk fan kinamwe. Ika a wor osukosuk lefilach me pwiich we, sipwe iotek fan luku me “kutta kinamwe,” ren ach chechchemeni ifa ussun Eperiam a pwarata tong.—1 Piter 3:10-12.
17 Ekieki mwo ifa ussun ach apwonueta ekkewe kapasen alongolongun alluk fan iten chon Kraist epwe alisikich ach sipwe alisata kinamwe. Lupwen Paul epwele poputa an we oruuen sai, Parnapas a tipeeu ngeni an Paul ekiek pwe repwe chuurisefalli ekkewe mwichefel lon Saipros me Esia Minor. Iwe nge, Parnapas a mochen pwe pwiin we Mark epwe fitiir. Paul ese tipeeu pokiten Mark a fen likitiirelo lon Pamfilia. “Ra chok aninifengen” me pokiten ar songfengen ra aimufesen lefiler. Parnapas me Mark ra feilo Saipros, nge Paul a fili Sailas me ra “feilfetal won Siria me Silisia, o a apochokkula ekkewe mwichefel.” (Fofor 15:36-41) Lo, lo, lo, rese chuen songfengen, pun Mark a nonnom ren Paul lon Rom, me ewe aposel a apunga Mark. (Kolose 4:10; Filemon 23, 24) Lupwen Paul a kalapus lon Rom orun 65 C.E., a ereni Timoti: “Iwe, kopwe angei Mark pwe epwe etuk le feito, pun an angang mi lamot chapur ngeniei.” (2 Timoti 4:11) Ese mwaal pwe Paul a fen iotek ussun an chiechi ngeni Parnapas me Mark, me alillis seni iotek a fen efisata ewe chiechioch ren aramas mi riri ngeni “an Kot kinamwe.”—Filipai 4:6, 7.
18 Pokiten sise unusoch, sia “fori chommong sokkun mwal.” (Jemes 3:2) Osukousuk a ppiita lefilen ruuemon fin Kraist. Paul a mak ussur: “Upwe fonou Iuotia, o upwe pwal fonou Sintike, pwe repwe tipeeufengen lon ewe Samol, . . . kopwe alisi nemin kena; ra fen etiei lon angangen ewe kapas allim.” (Filipai 4:1-3) Ese mwaal pwe ekkeei ruuemon fin Kraist ra fen awesalo ar osukosuk fan kinamwe ren ar apwonueta alon ewe fon mi makketiu lon Mattu 5:23, 24. Apwonuetaan ekkewe kapasen alongolongun alluk lon ewe Paipel epwe alisata kinamwe ikenai.
Luku A Atufichi Ach Likiitu
19 Ren luku sia tongeni likiitu fan riaffou. Neman sia letipechou pokiten emon aramasach a alleasolapa Kot ren an puluweni emon ese luku. (1 Korint 7:39) Aisek me Repeka ra riaffou pokiten an Iso puluweni ruuemon fefin rese tongei Kot. Puluwan kewe, ekkewe fin Hit “ra fokun ariafouu Isaak me Repeka.” A kon watte an Repeka riaffou pwe a apasa: “Ngang usap chuen mochen manau pokiten pwuluen Esau kewe fin Hit. Are Jakop epwe pwal pwulueni eman lein ekei fin Hit, epwe fen och ai upwe mala?” (Keneses 26:34, 35; 27:46) Iwe nge, ei osukosuk ese fen ataielo an Aisek me Repeka luku. Amwo sipwe amwochu ach luku mi pochokkul lupwen ekkewe osukosuk ra aweiresikich.
20 Ewe fefin chinnap Naomi mi fen malo puluwan we, emon fin Juta me a silei pwe ekkoch fin Juta mi tongeni nounatiu nour kewe at repwe wiliiti samasamen Messaia. Pokiten noun kewe mwan ra fen malo me ese wor nour kewe me pokiten i pwisin ese chuen tongeni nounou, ese fen watte an tufichin fitipacheiti samasamen Messaia. Iwe nge, lupwen puluwen noun we mi malo Rut a puluweni ewe mwan chinnap Poaz me a nounou, noun we a wiliiti samasamen Jises, ewe Messaia! (Keneses 49:10, 33; Rut 1:3-5; 4:13-22; Mattu 1:1, 5) An Naomi me Rut luku a pochokkul seni ar kewe osukosuk me a atoto ngeniir chengel wachemuk. Chengel wachemuk epwe nom rech ika sia amwochu ach luku fan riaffou.
21 Inaamwo ika sise tongeni silei met eu me eu ran epwe wato ngenikich emon me emon nge, ren ach luku sia tongeni likiitu fan ese lifilifil menni osukosuk. Luku a efisi ach pwora me mosonottam. Luku a ngenikich mettoch mi murinno sipwe achocho ngeni me a ngenikich manauach mi menemenoch. Luku a alisata ach chiechi ngeni aramas me epwe nomottam lap seni osukosuk. Amwo pwe kich “ewe sokun aramas mei wor luku mi amanaua ngunuch.” (Ipru 10:39, NW) Fan pochokkulen ach Kot mi tong, Jiowa, me fan asengesin lingan, amwo pwe kich sipwe akkanganga ach luku mi pochokkul.
Ifa Ussun Kopwe Polueni?
• Ifa ewe pisekin annet lon Paipel mi anneta pwe luku a apworaikich?
• Met popun sia tongeni apasa pwe luku a ngenikich eu manau mi menemenoch?
• Ifa ussun luku a alisata kinamwe?
• Ifa ewe pisekin annet pwe luku a atufichi ach likiitu fan riaffou?
3. Ifa ussun ekkewe elter mi tong ra tongeni alisikich ren luku?
4. Ifa ussun ekkewe poraus lon ewe Paipel ussun noun Kot kewe chon angang mi tuppwol ra tongeni apochokkula ach luku?
5. Ifa ewe pisekin annet lon Paipel mi pwarata pwe luku a apochokkulakich le esilefetalei an Kot kapas fan pwora?
6. Ifa ussun luku me pwora seni Kot a alisi Noa?
7. Ifa ussun Eperiam me ekkewe ekkoch ra fen pwaralo luku mi mosonottam?
8. Eperiam, Aisek me Jekop ra pwari mosonottam me luku ikaamwo ar rese weweiti met?
9. Ifa ussun luku a etipetipa met sia achocho ngeni?
10. Ifa ussun sia silei pwe Josef ese chok ekiekin wiliiti emon mi foummong lon fonufan?
11. Ifa ussun Moses a pwari pwe a achocho ngeni mettochun ngun?
12. Ifa ussun luku a siwili manauen Reap?
13. Ifa an Tafit we tipis ren Patsipa, nge a pwaralo menni ekiek?
14. Ifa ussun Kot a alukuluku Kition, me ifa ussun ei poraus a tongeni kku ach luku?
15. Ifa ussun sia tongeni kuna alillis ren ach sipwe eani ewe sokun luku a nom ren Parak?
16. Ifa ewe pisekin nengeni Eperiam a isetiu ren an kutta kinamwe lefiler me Lot?
17. Met popun sia tongeni apasa pwe Paul, Parnapas, me Mark ra awesalo ar osukosuk fan kinamwe?
18. Met epwe fen tongeni fisita ren ewe osukosuk lefilen Iuotia me Sintike?
19. Menni ar osukosuk ese fen ataielo an Aisek me Repeka luku?
20. Ikkefa ekkewe leenien appiru ren luku Naomi me Rut ra isetiu?
21. Ifa ussun luku a alisikich, me sipwe apposa letipach ren ach sipwe fori met?
[Pictures on page 14]
Luku a ngeni Noa me Inok ewe pwora mi lamot fan iten ar repwe esilefetalei an Jiowa kewe poraus
[Pictures on page 15]
Luku ussun an Moses a amwokutukich ach sipwe achocho ngeni mettochun ngun
[Pictures on page 16]
Alukuluk ussun ewe alillis seni lang a apochokkula lukuen Parak, Tepora, me Kition