Kútta Chókkewe mi Eáni Eú Sókkun Fós Mwen Kopwe Afalafal
1. Pwata a fen kkótóló án ewe mwichefel leenien afalafal alóngólóng wóón eú me eú fós lón ekkewe leeni chómmóng ra eáni sókkópaten fósun fénúfan ie?
1 Lón ewe ier Pentikos 33, mwirin án néún Jesus kewe chón káé angei ewe manaman mi fel, ra “popuetä le kapas lon kapasen ekis” ngeni chókkewe mi feito seni fénú towau. (Föf. 2:4) Pokiten ena, órun 3,000 ra papatais. Inaamwo ika lap ngeniir ra sile ewe fós mi chéúfetál, neman fósun Ipru are Krik, nge Jiowa a filatá pwe repwe rongorong pwóróusen ewe Mwú lón pwisin ar fós. Ese mwáál iei popun, pokiten aramas ra mwittir etiwa ewe pwóróus allim atun ra rongorong lón pwisin ar fós. Ina popun, ikenái, lón ekkewe leeni ikewe ie chómmóng aramas ra eáni sókkópaten fósun fénúfan ie, a fen kkótóló án ewe mwichefel leenien afalafal alóngólóng wóón eú me eú fós. (Organized, pekin taropwe 107, par. 2-3, esor lón fósun Chuuk) Ekkewe kúmi mi sókkóló ar fós ese wor pwisin ar leenien afalafal, ina popun ra afalafal ngeni chókkewe mi eáni ar fós lón án ewe mwichefel mi eleenier leenien afalafal, me án ekkewe ekkóch mwichefel leenien afalafal mi arap ngeniir.
2. (a) Met weween ewe angangen kútta aramas mi eáni eú sókkun fós, me ia a lamot epwe fis ie? (b) Ifa usun ekkewe mwichefel ra tongeni álillisfengen lón ekkewe leenien afalafal mi sókkópat fós lón? (c) Met sipwe féri ika sia chuuri emén mi pwapwaiti ewe enlet, nge a eáni eú sókkun fós?
2 Ika ka nóm lón eú leeni ikewe aramas ra eáni chék eú fós, a mecheres óm afalafal pun epwe seni eú imw ngeni pwal eú. Iwe nge, epwe sókkóló met kopwe féri ika ka nóm lón eú leeni ikewe ie mi sókkópat fós aramas ra eáni. Eli ekkóch mwichefel mi eáni pwal ekkóch fós, ra pwal akkafalafal lón ekkena leeni oua afalafal ie. Ekkóch mwichefel ra tongeni ngenikemi iten me pwóróusen ekkewe aramas mi eáni ewe fós oua eáni, nge ákkáeúin wisen ámi we mwichefel are kúmi an epwe kútta ekkena sókkun aramas. (Ppii ewe pwóór “Álillisfengen.”) Ina minne, eli mi lamot kopwe fiti ewe angangen kútta aramas mi eáni eú sókkun fós. Weween kopwe eis chókkana. Ifa usun epwe fis ena angangen kút?
3. Met epwe lóngólóng wóón án eú mwichefel are kúmi angangen kút, me ifa úkúkún ewe fansoun repwe áeá ren ena angang?
3 Akkóta ewe Angangen Kútta Aramas mi Sókkóló Ar Fós: Ewe úkúkún fansoun sipwe áeá fán iten ewe angangen kút lón ekkewe leeni ikewe ie chómmóng aramas ra eáni sókkópaten fós ie, a lóngólóng wóón nonnomun ewe leeni me ewe mwichefel. Ren chék áwewe, fitemén aramas lón ena leeni ra eáni eú sókkun fós? Fitemén chón afalafal? Fitu address chón ewe mwichefel are kúmi ra fen angei? Neman ewe mwichefel epwe filatá le alapaaló ar afalafal ikewe mi chómmóng aramas ie lón ar we leenien afalafal me lón ekkewe leeni mi kkan ngeniir lap seni ekkóch leeni. Iwe nge, a lamot eú angangen kút mi kókkótéch, pwe epwe suuk ngeni chómmóng aramas ar repwe tufichin kéri iten Jiowa.—Rom 10:13, 14.
4. (a) Ifa usun sipwe akkótaéchú ewe angangen kút? (b) Ikkefa ekkóch alen ach sipwe kútta ekkewe aramas mi eáni ach fós?
4 Ewe mwichen elter, nge ákkáeúin ewe chón túmúnú ewe angangen afalafal, epwe akkótaéchú me emmweni ewe angangen kút pwe ete akkanop ena angang ikewe mi lamot epwe fis ie. (1 Kor. 9:26) Epwe wor emén mwán mi lipwákéch epwe emmweni ena angang lón ekkewe kúmi mi sókkóló ar fós. Nge ákkáeúin emén elter are chón álillis mi kefilitá me ren ewe mwichen elter lón ewe mwichefel mi eleenia ena kúmi. Chómmóng mwichefel me kúmi ra mmen kókkótéch le poputááni ewe angangen kút, neman ra áeá puken nampaan phone are ewe Internet le kútta iten ekkewe aramas mi terrú lón eú sókkun fós. Iwe, ena angang a fis ren ar kéri aramas wóón phone are chuuriir pwe repwe silei menni address epwe kapachelong lón rekotun ewe leenien afalafal. Ika mi tufich, ewe mwichen elter lón ewe mwichefel mi eleenia ewe kúmiin aramas mi sókkóló ar fós, epwe akkóta pwe fán ekkóch unusen ewe mwichefel epwe fiti ewe angangen kút.—Ppii ewe pwóór “Iei Usun Kopwe Kútta Chókkewe mi Eáni Óm Fós.”
5. (a) Ikkefa ekkewe minen álillis ngeni ekkewe chón afalafal mi féri ewe angangen kút? (b) Met sipwe tongeni apasa ngeni ekkewe aramas atun sia féri ena angang?
5 A lamot epwe ffat ngenikich met sipwe achocho ngeni iteiten sia pwisin fiti ewe angangen kút. Pokiten ei angang ina kinikinin ewe angangen afalafal, iwe sipwe úféúf úf mi fich ngeni chón afalafal. Chómmóng ra kúna pwe ar asóssót ar afalafal me eáni ewe fós lupwen ra kútta aramas, a álisiir le mwasangasang me emúrinnéló ar tufichin sile ena fós. Sia tongeni apachaalong ewe awa sia néúnéú fán iten ewe angangen kút, nge esap ewe awa sia néúnéú le féri ekkewe mappún me taropween leenien afalafal. Ika sia kúna emén mi eáni ach fós, sipwe achocho le áiti ngeni ewe kapas allim me mwittir ereni ewe chón túmúnú ewe angangen afalafal are ewe emén mi fil me ren, pwe ekkewe mineféén repot repwe kapachelong lón pwóróusen ewe leenien afalafal. Mi lamot kopwe féri ena ese lifilifil ika eménnewe a sani le aúseling are ese. Inaamwo ika a lamot ewe angangen kút, nge sipwe itepék me rúúepek le fiti meinisin kinikinin ewe angangen afalafal.—Ppii ewe pwóór “Iei Met Kopwe Apasa lón ewe Angangen Kútta Aramas mi Sókkóló Ar Fós.”
6. Ikkefa ekkewe minen áweires sia kúkkúna atun sia kútta ekkewe mi selingepúng are awemwéch?
6 Kúkkútta Chókkewe mi Selingepúng are Awemwéch: A weires ach kútta ekkewe mi selingepúng are awemwéch, me a lamot sipwe fókkun achocho me tinikken. Sise tongeni esilla emén mi selingepúng are awemwéch ren chék itechikin itan, napanapen inisin are ren úfan. Pwal och, familien me chienen ekkewe mi selingepúng are awemwéch ra mochen túmúnúúr, ina popun neman repwe tipemwaramwar le affata ngeni ekkewe chón afalafal lupwen ra eis usur. Ekkena minen álillis mi mak fan, ra tongeni álisikich le kúkkútta ekkewe mi selingepúng are awemwéch me chókkewe mi sókkóló ar fós.
7. (a) Ifa usun sipwe kútta ekkewe mi selingepúng are awemwéch lón leenien imwen aramas kewe? (b) Ifa usun sipwe álisi ewe chón imw pwe epwe meefi kinamwe atun sia eis chókkana?
7 Ekkewe mwichefel me kúmi mi eáni ewe fós lón pwoomw are sign-language ra sópwéch le eis chókkewe mi selingepúng are awemwéch lón leenien imwen aramas kewe. Neman ewe chón imw a kúna chón órun, chienan chón angang are chón sukul mi eáni fós lón pwoomw. Neman a fen kúna ekkóch minen esissil wóón al mi áit ngeni chón ena sóópw pwe mi wor semirit mi selingepúng are awemwéch ikkena. Eli a pwal wor márárin mi selingepúng are awemwéch. Kopwe chechchemeni pwe eli ekkóch resap lúkú popun óm chuuriir. Iwe nge, ewe chón imw epwe kinamwe ika kopwe napanapen chiechiéch ngeni, emwittiri óm afalafal, wenechar me áwewe fán súfél. Ekkóch ra sópwéch ren ar áiti ngeni ewe chón imw ewe Paipel are ekkóch DVD lupwen ra eis ika ewe chón imw a silei emén mi selingepúng are awemwéch. Mwirin repwe chék ereni pwe ra mochen áiti ngeni ekkewe mi selingepúng are awemwéch ewe ápilúkúlúk Paipel a awora fán iter. Ika ewe chón imw ese mochen pwári pwóróus usun ewe mi selingepúng are awemwéch, neman epwe tipemecheres le angei óm address are eché taropween etiwetiw fán iten án ewe mwichefel kewe mwich me ngeni márárin me chienan we mi selingepúng are awemwéch.
8. Ifa usun eú mwichefel mi kkan ngeni ewe mwichefel mi eáni fós lón pwoomw epwe awora álillis?
8 Lón eú are ruu rán lón eú ier, neman eú mwichefel mi eáni fós lón pwoomw epwe etiwa eú mwichefel mi kkan ngeni nge mi eáni pwal eú fós pwe epwe álisiir lón ar angangen kút lón eú me lein ekkewe telinimw lón ar we leenien afalafal mi watte. Ewe mwichefel mi eáni fós lón pwoomw epwe emmweni eú mwich fán iten ewe angangen kút me epwe wor kapasen emmwen me eú pwoomw. Epwe mwaren wor emén chón afalafal seni ewe mwichefel mi eáni fós lón pwoomw epwe fiti eú me eú ekkewe kúmiin afalafal me epwe wor néúr map mi áiti ngeniir ewe leeni repwe kút ie.
9. Ifa usun ewe angangen kút epwe fis ikewe ie ekkewe chón selingepúng are awemwéch ra soun nóm ie ren ar repwe chiechifengen me kukkunoufengen are angei álillis mi kawor lón ewe leeni?
9 Ewe angangen kút epwe pwal tongeni fis ikewe ie ekkewe mi selingepúng are awemwéch ra soun nóm ie ren ar repwe chiechifengen me kukkunoufengen are angei álillis mi kawor lón ewe leeni. Chón afalafal repwe úféúf úf mi fich ngeni minne a fiffis lón ena leeni. Eli e fen éch repwe fós ngeni emén are rúúemén mi nóm ikkena, me repwe túmúnúéch, lap seni ar repwe afalafal ngeni unusen ewe kúmiin aramas. Ika ewe emén a pwapwaiti, ewe chón afalafal epwe angei itan, an address are nampaan néún phone me met kkan me epwe pwal ngeni an.
10. Ifa usun chón afalafal repwe tongeni féri ewe angangen kút lón ekkewe leenien business lón leenier?
10 Pwal eú, ammolnatá ekkewe map mi makketiw ekkewe leenien business lón ewe leeni me chuuriir lón fansoun mi fich. Eli epwe pwá ekkewe leenien amémé gas lón eché map. Pwal lón eché, eli epwe pwá ekkewe leenien dry cleaner, imwen sopw, kafie, hotel, are pwal och sókkun business. Ika a wor eú chék sókkun business lón eú me eú map, iwe, ekkewe chón afalafal ra tongeni eáni eú sókkun napanapen afalafal, me lipwákéchúló le féri ar angang. Áwewe chék, lap ngeni ekkewe hotel ra etiwa ekkewe mi selingepúng are awemwéch ar repwe néúr kastomer. Neman sipwe ekis áweweei ach angang ngeni ewe chón angangen front desk me ngeni eché futo mi masou ren eféú DVD me eché taropween etiwetiw fán iten án ewe mwichefel kewe mwich pwe repwe tongeni ngeni néúr kewe kastomer mi selingepúng are awemwéch. Lón ekkóch leenien business, sia tongeni eis ika mi wor néúr chón angang are kastomer mi eáni ewe fós lón pwoomw. Ika mi wor sukul fán iten chókkana lón ewe leenien afalafal, sipwe tongeni anéúnéú ekkóch néúch kewe DVD fán iten ar library.
11. Pwata ewe angangen kút ina eú kinikin mi lamot lón ewe angangen afalafal?
11 Eú Angang mi Lamot: A weires ewe angangen kúkkútta chókkewe mi eáni óm fós. Pwal eú, a mwittir sissiwil napanapen ekkewe sóópw pokiten aramas ra kan mwékútfetál, ina popun epwe weires an epwe pwúppwúng rekotun ewe leenien afalafal. Iwe nge, a lallapóló ekkewe leenien afalafal ikewe ia a fis ewe angangen kút ie. Ina eú kinikin mi lamot lón ewe angangen afalafal. Jiowa, ewe a ngenikich ewe wis le afalafal, i ese lifilifil aramas. (Föf. 10:34) I “ewe mi mochen pwe aramas meinisin repwe küna manau, repwe pwal silei ewe let.” (1 Tim. 2:3, 4) Ina minne, amwo sipwe angechu lefilach me Jiowa le kútta meinisin aramas mi sókkóló ar fós me mi wor rer “eu leluk mi mürina o aleasochis.”—Luk. 8:15.
[Pwóór lon pekin taropwe 5]
Álillisfengen
Ika ewe mwichefel are kúmi a mochen tingor án ekkóch álillis le kútta chókkewe mi eáni an fós pwe repwe afalafal ngeniir, iwe, ewe chón túmúnú ewe angangen afalafal a tongeni fós ngeni elterin ekkewe mwichefel mi eáni pwal eú fós me kkan ngeniir. A éch an epwe chék fós ngeni ekkewe mwichefel mi kkan ngeniir are ewe mwichefel mi chómmóng aramas mi eáni ena fós lón an we leenien afalafal. Ekkena mwichefel repwe esilei ngeni chón ar mwichefel ika ra kúna emén mi eáni ena fós, iwe, repwe makketiw ewe address me ngeni ewe chón túmúnú ewe angangen afalafal me epwe ngeni ewe mwichefel are kúmi mi tingor álillis. Ekkewe chón túmúnú ewe angangen afalafal lón ekkewe mwichefel mi fiti ena angangen kút repwe akkótaéchú eú kókkót pwe repwe tongeni áwesaaló ekkewe leenien afalafal mi sókkópat fós lón. Me repwe álisi ekkewe mi sani le aúseling ren ar esilei ngeni ewe mwichefel are kúmi mi eáni ar fós.
Ika chón afalafal ra chuuri emén mi eáni pwal eú fós nge a enletin pwapwaiti ewe pwóróus (are emén mi selingepúng are awemwéch), repwe mwittir le amasoua ewe taropwe Please Follow Up (S-43) me ngeni seketerin ewe mwichefel. Epwe atufichi eménna le mwittir angei álillis lón pekin lúkú.
[Pwóór lon pekin taropwe 6]
Iei Usun Kopwe Kútta Chókkewe mi Eáni Óm Fós
• Eisini ekkewe chón káé, aramaser kewe, chiener chón angang, me ié kkan.
• Néúnéú ewe puken nampaan phone le kútta iten ekkewe aramas mi terrú lón fénúom. A pwal wor eú puk mi tettelitiw ekkewe address me fengen iten aramas. Eli a wor wóón ewe Internet are lón ekkewe kompeni mi túmúnú angangen phone.
• Eiséch lón ekkewe leeni mi awora álillis ngeni aramas meinisin, áwewe chék lón ekkewe library, ofesin mwú, me college.
• Cheki ekkewe simpúng fán iten án chókkewe mi eáni eú sókkun fós esilesil ren met epwe fis lón ewe sóópw.
• Cheki ekkewe sitowa me leenien business mi álisi chókkewe mi eáni eú sókkun fós lón ewe sóópw.
• Ika mi mumutá me ren minne ká an ewe leeni, kopwe anéúnéú ekkewe puk ren óm watá wóón eú cheepel ikewe aramas mi eáni óm fós ra soun nóm ie, áwewe chék lón leenien business, leenien án ekkewe chón sukul chufengen, are leenien sousou bus, taxi me mwoota.
• Ika a mumutá me ren allúkún mwúúm, mééni eú puk are eú prokram lón ewe kampiuter ren kútten iten aramas wóón ewe Internet.
[Pwóór lon pekin taropwe 7]
Iei Met Kopwe Apasa lón ewe Angangen Kútta Aramas mi Sókkóló Ar Fós
Ika sia chiechiéch, pwáraatá tong me wenechar ngeni ekkewe aramas sia chuuriir, epwe álisiir le ekieki pwe kich aramas mi éch. Fán chómmóng, a éch ach sipwe akkomw áiti ngeniir eú puk are eché taropwe lón ar fós.
Mwirin óm kapong ngeni, neman kopwe apasa: “Am aua kúkkútta chókkewe mi eáni fósun _____ pwe aupwe áit ngeniir án Paipel ápilúkúlúk. En mi silei emén aua tongeni fós ngeni?”
Atun ka kúkkútta ekkewe mi selingepúng are awemwéch, ka tongeni apasa: “Ran allim. Ua tongeni áit ngonuk och mettóch? [Néúnéú eú portable vitio player, le ettiki eú wokisin lón ewe New World Translation—On DVD.] Ina kinikinin ewe Paipel lón American Sign Language. Me lúkún ewe Paipel, mi kawor fiteféú vitio nge rese kamé, mi ffér fán iten an epwe ataweei án chókkewe mi selingepúng are awemwéch osupwang lón pekin lúkú. En mi sissilei emén mi selingepúng, awemwéch are weires le rongorong, me a eáni ewe fós lón pwoomw?” Ika ewe chón imw ese chechchemeni emén, fán chómmóng a éch ach sipwe apasa ekkewe leeni neman a fen kúna emén mi selingepúng are awemwéch me ie, áwewe chék lón leenien an angang, lón sukul are lón sópwun we.